20 Desember 2026 (Bahasa Nias)

TATA IBADAH BAHASA NIAS

20 DESEMBER 2026

[Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi]

FANGOWAI BA FOGAONI

Liturgos : Ya’ami banua niha Keriso, Ya’ahowu ami ba döi Zo’aya, Maranata!

Jemaat : Maranata!

Liturgos : Yafao-fao khömi Lowalangi!

Jemaat : Ya fao khöu Geheha-Nia!

1. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Sara khöda. Eluaha Adefe si Sara andre ya’ia da’ö: “Fa’aro Wanötöna ba wombaloi Fa’atohare Zo’aya ba luo safuri” (Aefa da’ö, itunu Lili molo’ö migu Adefe)
2. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Dua khöda. Eluaha Adefe si Dua andre ya’ia da’ö: “Fogaoni ba wamalalini Era’era ba wamaondragö Fa’atohare Zo’aya” (Aefa da’ö, itunu Lili molo’ö migu Adefe)
3. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Tölu khöda. Eluaha Adefe si Tölu andre ya’ia da’ö: “Fa’atohare Mesia ba gulidanö, ba wama’ele’ö fa’atohare Mbanua Lowalangi” (Aefa da’ö, itunu Lili molo’ö migu Adefe)
4. (Möi ba meza Altar Zangai Huhuo Sebua, ba imane): “Ma’ökhö andre migu Adefe si öfa khöda. Eluaha Adefe si öfa andre ya’ia da’ö: “Fa’owuawua dödö me no ahatö wa’atohare Zo’aya” (Aefa da’ö, itunu Lili molo’ö migu Adefe)

Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö Numero 42

2. Da’ö wa möi ba danöda Yesu sangorifi.
   Wolohe khöda fa’auri soroi Lowalangi.
   Fa’omasi Lowalangi ba niha fefu soi.
   Afu dozi te’orifi zaro ba wamati.
3. Böi sarörö tödö ita, falua wa’omasi.
   Böi awuwu ba böi faröi, aro’ö wamati.
   Lowalangi tatöngöni umbu wa’omasi.
   Samè khöda Ono-Nia Yesu sangorifi.
4. Ta’omusoi’ö dödöda ya’ita samati.
   Me so lala wangorifi wanöndra fa’auri.
   Yesu Keriso So’aya Ono Lowalangi.
   Solohe niha khö Nama yawa ba lakhömi.
5. He ya’ita zamösana tabokai dödöda.
   Ba wanema’ö Mesia sangatulö niha.
   Ta’omusoi’ö dödöda wanema Ya’ia.
   Suno Ia lö mamalö sangorifi niha.

FANGA’ARO’Ö WA’OWULO (VOTUM)

Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si ya?a awö danö!

Jemaat : Yaduhu!

Liturgos : Hiza, möi yomo ba mbanua khömi razomi, razo satulö ba sabölö (Zakharia 9:9b). MARANATA

Liturgos : Mangandrö ita, "He Yehowa Lowalangima, somböi banua si yawa awö danö. No fa’ebua dödö-U khöma wa no tola marugi mböröta ndröfi ba wa’aniha Keriso. Abölö’ö ndra’aga Eheha-Mö andrö Ni’amoni’ö, ena’ö so khöma mbuabua wamalalini era’era, ba ena’ö soŵa’a, sanöi ba sowua ndra’aga ba wamati ba wamaondragö fa’atohare Zo’aya ya’aga Yesu Keriso. Be’e khöma wehi’a dödö, fangosindruhugö ba fa lö faröi ba wango’aurifagö taroma Li-Mö, ena’ö samonga’eu fa’omasi, fa’atulö, fangefa, ba fa’ohahau dödö ndra’aga fefu irugi we’aso-Mö andrö si mendrua, Yaduhu!" Mudadao Zato

Liturgos : Manunö ita moroi ba Mbuku Zinunö Numero 32

2. Ahatö ae Zo’aya, möi tou ba danöda.
   Si no faduhu tödö, zangila Mesia.
   Somuso tödö ira wanuno Yehowa.
   Hozana wangowaira Fondrege Zalawa.
3. Ahatö ae Zo’aya, fosumange tödöu.
   Tödöu ae bè nihaogö, fa tobali bohou.
   Faondragö soroi dödö, böi rörö ndra’ugö.
   Öfa’anö wandrumö, ondrasi Razomö.
4. Ahatö ae Zo’aya, sondrara tödöda.
   Itolo, Ifolala, gabuladödöda.
   He numana dödöda, so dötönaföda.
   Ba luo safuria, omuso dödöda.
5. Ahatö ae Zo’aya, nifatenge Nama.
   Aefa sawuyu horö, zolo’ö Ya’ia.
   Ba wa’omasi-Nia, oi Ibohouni sa.
   He tanö, he banua, awö nösinia.
6. Ahatö ae Zo’aya to’ele ba niha.
   Möi Ia ba wogaoni ya’ita khö Nama.
   Ya dozi tafa’anö ita zamösana.
   Wanema’ö Ya’ia me fangorifida.

FOMBASO TAROMALI LOWALANGI (AMABU'ULA LI SIFÖFÖNA)

Liturgos : Da tafondrondrongo daroma Li Lowalangi, tehalö moroi ba zura Yeremia 33 : 1-13

1 Ba humede Yehowa khö Yeremia, samuza tö, me ba gurunga na so ia, ba naha zago, imane:
2 Da’ö niwa’ö Yehowa, solau, Yehowa sogoi tödönia, ba wamalua — Yehowa döinia —, imane:
3 Angaröfi li ndra’o, ba utema liu, ba u’ombakha’ö khöu zebua, si tebai aboto ba dödö niha, si lö örai örongo.
4 Imane sa Yehowa, Lowalangi Ndraono Gizeraëli, ba nomo ba mbanua andre ba ba gödo razo mado Yuda, nidudugö, lualua fari andrö ba lualua zi’öli.
5 So zi möi fasöndra ba Ndrawa Galedaia ba lafo’ösi [nomo andrö] boto niha si mate, nibunugu ba wönugu andrö ba ba mbakhubakhu dödögu; börö walösökhira fefu, wa no ubini’ö mbawagu ba mbanua andre.
6 Hiza, ufatöfa khönia daludalu nifalemba, famadöhö; ufadöhö zokhora ba uböla’ö khöra wangorifi, si fahöna, ba si lö mamalömalö.
7 Ba u’ohe mangawuli ni’oloi’ö andrö, mado Yuda ba Iraono Gizeraëli, ufuli u’a’azökhi ira, si mane föna.
8 Ba uhaogö ira, uheta golalöwara fefu, lalöra khögu; ube’e aefa khöra zalara fefu, salara khögu, me lalawa ndra’odo.
9 Ena’ö turiagu omasiö ba fanuno ya’odo ba lakhömigu ia (mbanua andrö), ba niha ba guli danö fefu, sogikhi tödö dania ba sanizinizi ba zi sökhi andrö ba ba wangorifi andrö fefu — na larongo — nibe’egu khöra.
10 Imane Yehowa: Ba naha andre niwa’ömi: ”Tanö si mate, lö niha, ba lö urifö!” ba ba mbanua mado Yuda misa ba baewali Yeruzalema, si no asai’ö, si lö nihaniha: lö niha ba lö urifö,
11 ba terongo zui wa’iki ba wa’owuawua dödö ba ba wa’omuso dödö ba li zangowalu ba li nono nihalö ba fanunö zangumaö: ”Nisuno Yehowa ngahönö; si sökhi tödö sa Yehowa, si lö aetu sa wa’ebua dödönia andrö,” solohe ba gosali Yehowa sumange fangandrö saoha gölö: me ube’e mangawuli ni’oloi’ö andrö, si otarai danö da’e, ena’ö si mane föna — iwa’ö Yehowa.
12 Imane Yehowa ngahönö: Ba naha da’e, si no tanö si mate, si lö niha ba si lö urifö, ba ba mbanua khönia fefu, ba ifuli dania monaha gubalo, sokubaloi urifö.
13 Ba ba mbanua ba hili ba ba mbanua ba ndraso ba ba mbanua raya ba ba danö mado Mbeniyami, ba ba zi fasui Yeruzalema ba ba mbanua mado Yuda misa, ba ifuli latörö dania zangofaya ya’ira biribiri, iwa’ö Yehowa.

Si manö daroma Li Lowalangi, da tatema’ö faoma sinunö moroi ba Mbuku Zinunö No. 3 : 2

FANGANDRÖ FANGEFA HORÖ

Liturgos : Ya’ami ira talifusö, Na tawa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato.

Mangandrö ita, "He Ama Ni’amoni’ö, möiga ma’ondrasi dadaoma wa’ahakhö dödö-U ba wangandrö fangefa horö ba ngawalö nilauma si lö sökhi. Ma’andrö wa’ebolo dödö-U Ama ba wa’oya golalöwama, he nifaluama ba ndraonoma, khö ndra satuama, ba dalifusöma, ba ba niha fefu. Ma’andrö bologö dödö-U khöma me asese iböbö ndra’aga amuata fa’afökhö dödö, fayawasa, ba fönu ba lala wa’auri sero ma’ökhö. Ma’andrö hakhösi dödö-U khöma, sasai fefu horöma ba bohouni ndra’aga ba wamaondragö fa’atohare-Mö. Saohagölö Ama, ba döi Zo’aya ya’aga Yesu Keriso, ma’andrö ni’andröma.."

Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen)

Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! "NA UBINI’Ö HORÖGU KHÖ YESU"

Jemaat : Manunö moroi ba Mbuku Zinunö No. 224 : 1

Liturgos : Faya wa no sauri Ndra’o, Iŵa’ö Yehowa na omasi-Do mate zebua horö; somasi Ndra’o na iröi lalania andrö sebua horö, na ifalalini gera’erania, ba na auri ia. Mifalalini gera’erami, miröi lalami andrö, si lö sökhi! Hana sa wa edöna mate ami, ya’ami ni’omasi’ö-Gu? Lakhömi khö Lowalangi si yawa!

Jemaat : Manunö moroi ba Mbuku Zinunö No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)

Liturgos : Da tafondrondrongo daroma Li Lowalangi, tehalö moroi ba zura Luka 1 : 30-33

30 Ba imane mala’ika andrö khönia: Böi ata’ufi Maria; noa sa falukha’ö wa’ebua dödö khö Lowalangi;
31 ba hiza, manabina dania ndra’ugö, ba mo’ono’ö ono matua, ba öbe’e töinia Yesu.
32 Salawa dania da’ö, ba labe’e töinia Nono Wondrege Zalawa, ba ibe’e khönia Lowalangi So’aya dadaoma duania Dawido.
33 Ba samatörö ma’uwu Yakobo ia, götögötö wa’ara, ba si lö aetu wa’asalawania andrö.

Ya’ahowu zamondrongo taroma Li Lowalangi ba same’e ba dödö (Luka 11:28)

Jemaat : Yaduhu!

FANGOWULOI FASÖMBATA

Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7)

Tafa’ema föna wasömbata khö Lowalangi, ba manunö ita moroi ba Mbuku Zinunö No. 261

2. Ya’e zumange fasömbata ma be’e soroi ba dödöma.
3. Ya’e zumange fasömbata buala si’otarai Nama.
4. Ya’e zumange fasömbata, boto, noso, ba fa’aurima.
5. Ya’e zumange fasömbata, lö irugi zomasi dödö-U.
6. Ya’e zumange fasömbata, ma’aohasi gölö Zo’aya.

Liturgos : Da tafasao wasömbatada andre föna Lowalangi, musindro ita fefu.

[Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR / VOCAL GROUP

Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163

[Pengkhotbah Möi ba Mimbar]

HUHUO SEBUA

Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita... [Fangadrö Famokai Huhuo Sebua] Amin.

1. Fombaso Taroma Li Lowalangi moroi ba zura II Samueli 7 : 8-16
   8 Ba ömane dania khö genonigu Dawido: Da’ö niwa’ö Yehowa ngahönö: No uhalö ndra’ugö, me kubalo mbiribiri ndra’ugö, ena’ö razo mbanuagu Iraono Gizeraëli ndra’ugö,
   9 no utolo’ö ba ngawalö hadia ia fefu, nilaumö andrö, ba no uhori fönau nemaliu fefu, ba no u’asogö khöu döi, si falawalawa ba döi wondrege zebua ba guli danö,
   10 ba ufonaha mbanuagu Iraono Gizeraëli, ba utanö ba da’ö, ena’ö la’iagö da’ö ba ena’ö lö’ö sa’ae ata’u ira, ba ena’ö lö’ö sa’ae lafakao ira niha si lö sökhi, si mane mege,
   11 i’otarai me ufataro zanguhuku andrö, ba mbanuagu Iraono Gizeraëli, ba sahono ira ube’e, utimba nemalira fefu, tobali i’ombakha’ö khöu Yehowa, wa ya’ia zolau omo khöu.
   12 Na no irugi bawau dania, na no öleagö tou ndra’ugö, ba ngai ndra tuau, awena dania uhonogöi fangaliu ma’uwumö andrö, nga’ötöu, ba u’aro’ö wa’asalawania.
   13 Da’ö dania zolau omo ba döigu ba si lö tebulö dadaoma wa’asalawania, ube’e, irugi zi lö aetu.
   14 Amania ndra’o ba onogu ia. Ba na mosala ia, ba bözibözi ba niha uhalö fanegunia, famözi ba niha ube’e fotu.
   15 ba fa’ahakhö dödögu andrö, ba lö uböda khönia, tenga si mane famödagu ya’ia khö razo andrö, fönau.
   16 Si lö tebulö fönagu nga’ötöu razo, irugi zi lö aetu: dadaomamö andrö, ba si lö awu’a, götögötö wa’ara!
2. Famotokhi Taromali Lowalangi
3. Sinanö ba dödö tehalö moroi ba zura Luka 1 : 33
   Ba samatörö ma’uwu Yakobo ia, götögötö wa’ara, ba si lö aetu wa’asalawania andrö.
4. Fangandrö Fondruhö Wamotokhi Taromali

Jemaat : Manunö moroi ba Mbuku Zinunö No. 154

TUHO WAMATI

Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida:

• Ya’o mamati khö Lowalangi Ama si lö ambö fa’abölö, somböi banua si ya?a awö danö.
• Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
• Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu!

Liturgos : Mudadao Zato.

WARTA JEMAAT (Klik untuk membuka)

Liturgos : Manunö ita moroi ba Mbuku Zinunö Numero 35

2. Da’ö zumange-Nia,wanema Ya’ia.
   Be’e dödöu nihaogö, Zo’aya ya’ita.
   Fonaha ae li-Nia tanö ba dödömö.
   Ba be’e dali Ia, ba gamuatamö.
3. He sinumana tödö, so wangorifida.
   Ya dozi oi tatema, wa’omasi-Nia.
   Tötönaföda Ia, me So’aya Sokhö.
   Tafosumange Ia, ba ta’omasi’ö.

FANGANDRÖ SALAHI + FAMATENGE + HOWUHOWU

Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:"

Pengkhotbah + Jemaat :

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu.

Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi:

• Ya mufahowu’ö ami Lowalangi, Ya murorogö ami;
• Ya mufohaga mbawa-Nia khömi, Ya mu’ebua’ö dödö-Nia khömi;
• Ya mufalemba hörö-Nia khömi, Ya mubč’e wa’ohahau dödö khömi fefu. Yaduhu!

Jemaat : Manunö moroi ba Mbuku Zinunö Numero 35 : 4

4. Samuza tö so Yesu, möi ba wamöfö’ö,
   Ba wamalua huku, sitobali sulö.
   He sauri, he simate, farahu ba da’ö.
   Samati dozi auri, oi omuso dödö.

Pengkhotbah : Ya'ahowu!!!

Jemaat : Ya'ahowu!!!

*** IBADAH SELESAI ***