13 Desember 2026 (Bahasa Nias)

TATA IBADAH BAHASA NIAS

13 DESEMBER 2026

[Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi]

FANGOWAI BA FOGAONI

Liturgos : Ya’ami banua niha Keriso, Ya’ahowu ami ba döi Zo’aya, Maranata!

Jemaat : Maranata!

Liturgos : Yafao-fao khömi Lowalangi!

Jemaat : Ya fao khöu Geheha-Nia!

1. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Sara khöda. Eluaha Adefe si Sara andre ya’ia da’ö: “Fa’aro Wanötöna ba wombaloi Fa’atohare Zo’aya ba luo safuri” (Aefa da’ö, itunu Lili molo’ö migu Adefe)
2. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Dua khöda. Eluaha Adefe si Dua andre ya’ia da’ö: “Fogaoni ba wamalalini Era’era ba wamaondragö Fa’atohare Zo’aya” (Aefa da’ö, itunu Lili molo’ö migu Adefe)
3. (Möi ba meza Altar Zangai Huhuo Sebua, ba imane): “Ma’ökhö andre migu Adefe si Tölu khöda. Eluaha Adefe si Tölu andre ya’ia da’ö: “Fa’atohare Mesia ba gulidanö, ba wama’ele’ö fa’atohare Mbanua Lowalangi” (Aefa da’ö, itunu Lili molo’ö migu Adefe)
4. (Möi ba meza Altar Zangai Huhuo Sebua, ba imane): “Ma’ökhö andre migu Adefe si öfa khöda. Eluaha Adefe si öfa andre ya’ia da’ö: “Fa’owuawua dödö me no ahatö wa’atohare Zo’aya” (Aefa da’ö, itunu Lili molo’ö migu Adefe)

Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö Numero 39

2. He Yesu no Ötehe möi’Ö tou ba gulidanö.
   Ba wolo’ö li Nama, ba wolohe fangatulö.
   Duhu wa somasi’Ö ba wangalui si so horö.
   Ena’ö lö tehuku dozi samati khö-Mö.
3. Tödöma mafa’anö ba wamaondragö Ya’ugö.
   Botoma ba fa’aurima malulu sumange-Mö.
   He So’aya tologa be’e khöma Geheha-Mö.
   Sangabölö ya’aga wanema’ö Ya’ugö.
4. Yae dödö si ta’unö, ma’ohe gametahö-Mö.
   Fao fangidengide’ö fangalulu soroi dödö.
   He Yesu ma’andrö khö-U, bohouni ba atulö’ö.
   Ya tobali sumange-U si lö mamalömalö.

FANGA’ARO’Ö WA’OWULO (VOTUM)

Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si ya?a awö danö!

Jemaat : Yaduhu!

Liturgos : Hiza, möi yomo ba mbanua khömi razomi, razo satulö ba sabölö (Zakharia 9:9b). MARANATA

Liturgos : Mangandrö ita, "He Yehowa Lowalangima, somböi banua si yawa awö danö. No fa’ebua dödö-U khöma wa no tola marugi mböröta ndröfi ba wa’aniha Keriso. Abölö’ö ndra’aga Eheha-Mö andrö Ni’amoni’ö, ena’ö so khöma mbuabua wamalalini era’era, ba ena’ö soŵa’a, sanöi ba sowua ndra’aga ba wamati ba wamaondragö fa’atohare Zo’aya ya’aga Yesu Keriso. Be’e khöma wehi’a dödö, fangosindruhugö ba fa lö faröi ba wango’aurifagö taroma Li-Mö, ena’ö samonga’eu fa’omasi, fa’atulö, fangefa, ba fa’ohahau dödö ndra’aga fefu irugi we’aso-Mö andrö si mendrua, Yaduhu!" Mudadao Zato

Liturgos : Manunö ita moroi ba Mbuku Zinunö Numero 44

2. Hosiana, So’aya, ma’owai’Ö fanunöma.
   Oi humulu dödöma, wanema Ya’ugö khöma.
   Onahia dödöma, wamatörö ya’aga.
3. Hosiana, So’aya, tologa, Ehao dödöma.
   Bohouni gamuata, fa böi alua wangala.
   Hagainiga Eheha, fa masöndra gaurifa.
4. Hosiana, So’aya, khö-U manö manötönaga.
   Dönisi göi nawöma, fa laröi nikhoi dödöra.
   Osara’ö dödöma, wamati khö-USo’aya.
5. Hosiana, So’aya, samatörö fefu niha.
   Abölö’ö ndra’aga, wangomasi’ö awöma.
   Fosinema ndra’aga, buala soroi Nama.

FOMBASO TAROMALI LOWALANGI (AMABU'ULA LI SIFÖFÖNA)

Liturgos : Da tafondrondrongo daroma Li Lowalangi, tehalö moroi ba zura Yesaya 61 : 10-11

10 Ba omuso dödögu ba khö Yehowa, owuawua dödögu ba khö Lowalangigu, me no ifonukha ndra’odo nukha fangorifi, me no i’olohuni ndra’o baru sebua fa’atulö andrö, si mane sangowalu, sangehao aya ba högö, ba si mane ono nihalö si onukha nukha ni’owalu.
11 Si mane tanö sa’ae, sauri sinanö, ba si mane kabu, ba zolöndru tanömö zinanö, si manö wa’amolöndru wa’atulö ba fa’ebua döi, ibe’e So’aya, Yehowa, ba zanehe niha baero fefu.

Si manö daroma Li Lowalangi, da tatema’ö faoma sinunö moroi ba Mbuku Zinunö No. 3 : 2

FANGANDRÖ FANGEFA HORÖ

Liturgos : Ya’ami ira talifusö, Na tawa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato.

Mangandrö ita, "He Ama Ni’amoni’ö, möiga ma’ondrasi dadaoma wa’ahakhö dödö-U ba wangandrö fangefa horö ba ngawalö nilauma si lö sökhi. Ma’andrö wa’ebolo dödö-U Ama ba wa’oya golalöwama, he nifaluama ba ndraonoma, khö ndra satuama, ba dalifusöma, ba ba niha fefu. Ma’andrö bologö dödö-U khöma me asese iböbö ndra’aga amuata fa’afökhö dödö, fayawasa, ba fönu ba lala wa’auri sero ma’ökhö. Ma’andrö hakhösi dödö-U khöma, sasai fefu horöma ba bohouni ndra’aga ba wamaondragö fa’atohare-Mö. Saohagölö Ama, ba döi Zo’aya ya’aga Yesu Keriso, ma’andrö ni’andröma.."

Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen)

Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! "NA UBINI’Ö HORÖGU KHÖ YESU"

Jemaat : Manunö moroi ba Mbuku Zinunö No. 224 : 1

Liturgos : Faya wa no sauri Ndra’o, Iŵa’ö Yehowa na omasi-Do mate zebua horö; somasi Ndra’o na iröi lalania andrö sebua horö, na ifalalini gera’erania, ba na auri ia. Mifalalini gera’erami, miröi lalami andrö, si lö sökhi! Hana sa wa edöna mate ami, ya’ami ni’omasi’ö-Gu? Lakhömi khö Lowalangi si yawa!

Jemaat : Manunö moroi ba Mbuku Zinunö No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)

Liturgos : Da tafondrondrongo daroma Li Lowalangi, tehalö moroi ba zura Yohane 14 : 1-3

1 Böi abu dödömi. Mi’amati ba Lowalangi ba mi’amati khögu.
2 Oya nahia ba nomo Namagu, ba na tenga si manö mena’ö, ba no uwa’ö khömi. Möido sa muhaogö naha khömi.
3 Ba na no möido, na no uhaogö naha khömi, ba mangawulido, ba uhalö ami khögu, ena’ö so ami göi ba zi so ya’o.

Ya’ahowu zamondrongo taroma Li Lowalangi ba same’e ba dödö (Luka 11:28)

Jemaat : Yaduhu!

FANGOWULOI FASÖMBATA

Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7)

Tafa’ema föna wasömbata khö Lowalangi, ba manunö ita moroi ba Mbuku Zinunö No. 261

2. Ya’e zumange fasömbata ma be’e soroi ba dödöma.
3. Ya’e zumange fasömbata buala si’otarai Nama.
4. Ya’e zumange fasömbata, boto, noso, ba fa’aurima.
5. Ya’e zumange fasömbata, lö irugi zomasi dödö-U.
6. Ya’e zumange fasömbata, ma’aohasi gölö Zo’aya.

Liturgos : Da tafasao wasömbatada andre föna Lowalangi, musindro ita fefu.

[Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR / VOCAL GROUP

Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163

[Pengkhotbah Möi ba Mimbar]

HUHUO SEBUA

Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita... [Fangadrö Famokai Huhuo Sebua] Amin.

1. Fombaso Taroma Li Lowalangi moroi ba zura I Tesalonika 4 : 13-18
   13 Ba lö edöna mabini’ö khömi, ya’ami ira talifusö, he wisa ba zi no mate andrö, fa böi abu dödömi, si mane tánö bö’ö andrö, si lö fanötöna.
   14 Na mamati ita sa, no mate Yesu ba no ifuli auri, ba ba zi manö göi ifafatörö’ö khö Yesu Lowalangi zi no mate andrö, awönia.
   15 Taroma li Lowalangi sa niwa’öma andre khömi: ya’ita andre, sauri, si tosai, irugi wa’aso Zo’aya andrö, ba tenga föna zi no mate ita dania.
   16 Ya’ia dania, So’aya, zi möi mitou, moroi ba zorugo, na so we’ao andrö, na mu’ao zatua mala’ika andrö, na tefoli dorofe Lowalangi andrö, ba oföna maoso zi no mate andrö, ba khö Keriso.
   17 Awena dania tefazawa ita, ya’ita sauri, si tosai, ba lawuo, fao ita khöra, ba wamaondragö So’aya, ba dalu mbanua; ba tobali awö Zo’aya ita, si lö mamalömalö.
   18 Andrö faoma mibe’e fondrara dödö nawömi daroma li andre.
2. Famotokhi Taromali Lowalangi
3. Sinanö ba dödö tehalö moroi ba zura I Tesalonika 4 : 17a
   Ba tobali awõ Zo’aya ita, si lõ mamalõmalõ.
4. Fangandrö Fondruhö Wamotokhi Taromali

Jemaat : Manunö moroi ba Mbuku Zinunö No. 154

TUHO WAMATI

Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida:

• Ya’o mamati khö Lowalangi Ama si lö ambö fa’abölö, somböi banua si ya?a awö danö.
• Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
• Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu!

Liturgos : Mudadao Zato.

WARTA JEMAAT (Klik untuk membuka)

Liturgos : Manunö ita moroi ba Mbuku Zinunö Numero 447

2. Da ta’angerangeragö, luo Zo’aya.
   Na terongo li dorofe, ndra mala’ika.
   Oi teboka lewatö, maoso zi mate andrö.
   Heza fao ita wemaoso, ba mbawa da’ö.
3. Da ta’angerangeragö, luo Keriso.
   Na Ikaoni niha fefu, ba oi owulo.
   Ifanema zamati, Ibè khöra lakhömi.
   Fao khö-Nia ba wa’auri, lö manö faröi.

FANGANDRÖ SALAHI + FAMATENGE + HOWUHOWU

Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:"

Pengkhotbah + Jemaat :

He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu.

Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi:

• Ya mufahowu’ö ami Lowalangi, Ya murorogö ami;
• Ya mufohaga mbawa-Nia khömi, Ya mu’ebua’ö dödö-Nia khömi;
• Ya mufalemba hörö-Nia khömi, Ya mubč’e wa’ohahau dödö khömi fefu. Yaduhu!

Jemaat : Manunö moroi ba Mbuku Zinunö Numero 447 : 4

4. Da ta’angerangeragö, luo Zo’aya.
   Hewisa afu takhamö, zo’ahonoa.
   Da ta’oigö dödöda, ba wamati khö-Nia.
   Afu tarugi takhamö, ba zi so Ama.

Pengkhotbah : Ya'ahowu!!!

Jemaat : Ya'ahowu!!!

*** IBADAH SELESAI ***