8 Juni 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 8 Juni 2025 (Fanema Eheha) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya. No oi owulo ita oi faondra ba wa’owuawua dödö, ba wanörö tödö Fanema Eheha Ni’amoni’ö. Ma owai ami ba döi Yesu Keriso, Ya’ahowu! Jemaat : Ya'ahowu! Liturgos : Ba wa’owuawua dödö andrö, da talau fara’u tanga khö nawöda si so ba gambölö ba ma ba gaberada zamösana ba tamane: "Ya’ahowu wanema Eheha Ni’amoni’ö!" Jemaat : Ya’ahowu wanema Eheha Ni’amoni’õ. Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 27 Yehowa wa’abölögu, me umbu wa’omasi. Ibe’e khögu Zangefa, Yesu simöi salahi. Da’ö zomuso dödögu, fa’ebua dödö-Nia, usuno Lowalangi. Yehowa we’ewe’eda, me kubalo sindruhu. Ba no Ama Ia khöda, börö Keriso Yesu. Da talulu wa’aurida, wanunonuno Yehowa, irugi zi lö aetu. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba Ube’e khõmi dõdõ si bohou ba Eheha si bohou Ube’e ba dõdõmi bakha; tõdõ kara andrõ, ba Uheta barõ dotomi ba Ube’e khõmi dõdõ nagole. Ba Eheha-Gu Ube’e ba dõdõmi ba mi’o’õ nifakhoi-Gu Ube’e, ba mitõngõni lala nibe’e-Gu ba mitõrõ. (Hezekieli 36:26-27) HALELUYA! Jemaat : Manunõ Liturgos : Mangandrõ ita, "He Yehowa Lowalangima! Nisuno döi-Mö götögötö wa’ara, me no sebua tödö Ndra’ugö. No Öfatenge Geheha-U Ni’amoni’ö, ba wamohouni, ba wondrorogö, ba ba wanga’aro’ö ya’aga tobali ono sanema ondröita sebua böli, ya’ia wangorifi andrö ba khö Zo’aya ya’aga Yesu Keriso. No Öfatenge khöma, Geheha Ni’amoni’ö ba wamahaö ba ba wohagaini ya’aga banua-U. Mangalulu ndra’aga khö-U si fao fangidengide’ö ba wanema’ö Eheha-Mö, ena’ö I’iagö dödöma. Aine khõma Eheha Ni’amoni’õ ba wangabölö’ö ya’aga ba wolo’ö somasi Zo’aya ya’aga Yesu Keriso, Yaduhu!"Mudadao Zato Liturgos : Manunõ ita moroi ba Mbuku Zinunõ No. 122 Me no Öbali’ö bohou, ndra’aga si no tanakhö-U. Andrö fatenge göi khöma, Geheha si’oroi Nama. Ya Eheha-U zamaha’ö, sanolo sangabölö’ö. Afu ma’oigö dödöma, wangai halöwö Zo’aya. Böi faröi Ndra’ugö khöma, Yesu Keriso So’aya. Ya Eheha soroi Nama, zo’arota ba dödöma. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yoeli 3 : 1-5 1 Ba na aefa da’õ, ba ulau Gehehagu ba niha fefu; ba mama’ele’õ dania nonomi matua ba onomi alawe, ba mangifi zatua khõmi ba la’ila gangilata ono matua khõmi. 2 Numalõ ba zawuyu ira matua ba ba zawuyu ira alawe, ba ulau Gehehagu, na luo da’õ. 3 Ba ufa’ele’õ dandra sahõlihõli dõdõ ba mbanua si yawa ba ba danõ tou: dõ ba alitõ ba boto zimbo. 4 Tobali ogõmigõmi luo ba do mbawa, gasagasa wa irugi bawa sebua andrõ, sata’u ita, khõ Yehowa. 5 Ba dozi si angarõfi li tõi Yehowa, ba ni’orifi; so sa wangorifi ba hili Ziona ba ba Yeruzalema, itõrõ niwa’õ Yehowa, fangorifi zi tosai andrõ, nikaoni Yehowa, Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 120 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangima si no fahöna fa’omasi ba niwöwöi-Mö fefu. Ma’ondrasi Ndra’ugö ma’ökhö andre, ba wangombakha khö-U, wa tenga sinangea ndra’aga wanema howuhowu, me no fahöna horöma; me lö khöma fanörö lala satulö föna-U, me ma’o’ö nikhoi dödöma sito’ölö andrö. Ba me no oroma khöma Geheha Ni’amoni’ö, sohagaini lalama, ba solohe ya’aga ba zi duhu, andrö ma’andrö khö-U: heta ba dödöma fefu zira’ira’iö andrö, ba be’e aefa khöma horöma, ena’ö tola monaha ba dödöma, Zanolo, nifabu’u-Mö andrö, si no möi ba wanolo ya’aga ba wolaẅa afökha, sanandraigö ya’aga ero ma’ökhö; afu tola Ötandrösaigö khöma göi ngawalö howuhowu somasi‘Ö, ba ena’ö sangila Lowalangi ndra’aga ba gamozua, ba zorugo yawa" Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Fa’ahakhõ dõdõ sa, wa no auri ami, moroi ba wamati, ba tenga moroi khõmi da’õ, no buala Lowalangi. (Efeso 2:8) "Eheha andrö ba no we’ewe’e dödöda, ba gondröita andrö fefu, ya’ia wangöhöli andrö ba fangorifi ba wanuno lakhömi-Nia andrö". (Efeso 1:14) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO WAÕWAÕ WANEMA EHEHA NI'AMONI'Õ Liturgos : Da tafondrondrongo waõwaõ wanema eheha ni'amoni'õ. Manunõ ita moroi ba Mbuku Zinunõ No. 119:1 Fombaso Halõwõ Zinenge 2:1-4 1 Ba me luo wendrakose (si 50) ba no owulo ira fefu, ha sambua naha. 2 Ba i’ozumagõ so zihõngõ, si otarai mbanua si yawa, hulõ na itõrõ angi sabõlõbõlõ, ba ifõnui nomo andrõ, ma’asambua, ba zi dadao ira. 3 Ba oroma khõra dalinga wandru, si fabalibali, alitõ wamaigira, ba idozigõ ira, ahono ba hõgõra. 4 Ba fahõna khõra Geheha ni’amoni’õ, ba labõrõtaigõ lalau li bõ’õ, si mane nibe’e Geheha khõra fanõtõi. Manunõ ita moroi ba Mbuku Zinunõ No. 119:2 Fombaso Halõwõ Zinenge 2:5-13 5 Ba so zi fatewu gana ba Yeruzalema, niha Yehuda, niha sangata’ufi Lowalangi, soroi fefu soi ba guli danõ. 6 Ba me so zihõngõ andrõ, ba aekhu niha sato ba tobali dõdõra, me larongo wehedera ba li khõra, dozi ira. 7 Ba tobali dõdõra, dozi ira, ahõlihõli dõdõra ba lamane: Hiza, tenga banua Galilaia ira, dozi sihede andrõ? 8 Ba he wisa wa tarongo lida, dozi ita, li ba danõda, ba zi tumbu ita? 9 Ya’ita Dawa Waretia ba Dawa Media ba Dawa Gelama, awõ zi so ba Mezofotamia, ba ba Yudaia ba ba Gafadokia, ba Wondro ba ba Azia, 10 ba Werigia ba ba Wambilia, ba danõ Miserayi ba ba danõ Libia, tánõ ba Girene, awõ zi fatewu gana ba Roma, niha Yehuda, awõ zi no mõi banuara, 11 Dawa Gereta ba Dawa Ara, ba tarongo, lalau lida, wangombakha segebua andrõ, nilau Lowalangi. 12 Ba tobali dõdõra, dozi ira, lõ la’ila watahõgõ, faoma lamane khõ nawõra: He wisa da’õ dania? 13 Ba so zangaohangaoha õsa, lamane: Si mabu agu sami. 14 Ba maoso Wetero, awõ zi felezara, muhede ia, imane khõra: He ya’ami, niha Yehuda, awõ zi so ba Yeruzalema fefu, ya’aboto ba dõdõmi da’e, ba mifondrondrongo niwa’õgu! 15 Tenga sa si mane niwa’õmi, wa si no mabu da’e, awena sa gõi labõzi siwa. Manunõ ita moroi ba Mbuku Zinunõ No. 119:3 FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Roma 8 : 14-17 14 Ha niha sa ira fefu nifarou Geheha Lowalangi, da’õ nono Lowalangi. 15 Tenga sa Eheha zawuyu nitemami, ena’õ ata’u zui ami; Eheha ndraono nitemami; moroi khõnia wa mu’ao ita: He Aba, Ama! 16 Ya’iá, Eheha andrõ gõi, zamaduhu’õ tõdõda, wa ono Lowalangi ita. 17 Ba na ono ita, ba sanema ondrõita gõi, sanema ondrõita khõ Lowalangi, awõ Keriso, na nifakao gõi ita awõnia, ena’õ tefolakhõmi gõi ita awõnia. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yohane 14 : 15-26 15 Na mi’omasi’õ ndra’o, ba mi’o’õ goroisagu. 16 Ba ya’o, ba u’andrõ dania khõ Nama, ba ibe’e khõmi zanolo tánõ bõ’õ, ena’õ lõ aefa ia khõmi, irugi zi lõ aetu; 17 Eheha si duhu andrõ, si tebai latema niha guli danõ, me lõ la’ila, me lõ aboto ba dõdõra. Ba dõdõmi no aboto ia, me lõ aefa ia khõmi, ba ba dõdõmi so ia dania. 18 Lõ urõi ami, hulõ zi lõ ama, si lõ ina, mõido khõmi. 19 Ma’ifu tõ na, ba lõ’õ sa’ae la’ilado niha guli danõ, ba ya’ami zangila ya’o, auri sa ndra’o, ba sauri gõi ami dania. 20 Na luo da’õ, ba aboto ba dõdõmi, wa ba dõdõ Nama so ndra’o, awõ wa ba dõdõgu so ami ba ba dõdõmi so ndra’o. 21 Si so oroisa andrõ khõgu, solo’õ ya’ia, da’õ zomasi ya’o. Ba ni’omasi’õ Namagu zomasi ya’o; ba ya’o gõi u’omasi’õ ia ba u’oroma’õ ndra’o khõnia. 22 Imane khõnia Yuda, tenga banua Kariota andrõ: He Tua, hadia ia wa õ’oroma’õ ndra’ugõ khõma, ba lõ õ’oroma’õ ndra’ugõ ba niha guli danõ? 23 Itema linia Yesu, imane khõnia: Na so zomasi ya’o, ba i’o’õ ligu, ba i’omasi’õ Amagu, ba mõiga khõnia, ba ba khõnia ma’iagõ. 24 Si lõ mangomasi’õ ya’o, ba lõ i’o’õ ligu. Ba taroma li andrõ, nirongomi, ba tenga khõgu, no khõ zamatenge ya’o, khõ Nama. 25 Da’õ niwa’õgu khõmi, fatua lõ ahetado khõmi. 26 Ba sanolo andrõ, Eheha ni’amoni’õ, nifatenge Namagu dania ba dõigu, da’õ zamahaõ ya’ami, ba da’õ fefu, ba ahori ifasugi ba dõdõmi niwa’õgu khõmi. Famotokhi Taromali Lowalangi Sinanõ ba dõdõ tehalõ moroi ba zura Yohane 14 : 26a Ba sanolo andrö, Eheha ni'amoni'ö, nifatenge Nama-Gu dania ba döi-Gu, da'ö zamahaö ya'ami. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) FAMALUA FEMANGA GÕ NI'AMONI'Õ FEMANGA GÕ NI'AMONI'Õ 1. MANUNÕ Pendeta : Manunö ita moroi ba Mbuku Zinunö No. 218 : 1-2 Usao’ö khö-U, utunö zalagu, ngawalö zinegu. U’andrö khö-U, hagaini dödögu, soroi ba Geheha-U. No oya zitobini khögu, uwalinga tenga horögu. Fehedegu, oi lö faudu. 2. FOGAONI Pendeta : "Ya’o Gö fangorifi," Iwa’ö Yesu, "Si möi khö-Gu, ba döhö wa’olofo, ba si faduhu tödö khö-Gu, ba lö sa’ae owökhi dödö." (Yohane 6:35). 3. FAMA'ANÕ Muzizio zato Pendeta : He ya’ami ira talifusö, da ta’owuawua’ö dödöda watomesa khö Lowalangi, ba wanema buala fa’ebua dödö-Nia, ba khö Zo’aya ya’ita Yesu Keriso, si no mate ba horöda, ba si no ifuli maoso wangalani fa’amate, irege falukha ita wangorifi ba fa’ohahau dödö. Andrö da tasekhegö dödö we’amöi föna Zo’aya. Hadia edöna ami mi’ombakha’ö horömi khö Lowalangi, sangila era’era dödö niha? Hadia, lö mibini’ö, wa no misawö goroisa-Nia fefu? Hadia abu dödömi ba da’ö ba mi’ogorofi sa’ae wolau horö? Na si manö, ba mitema ligu: “tebai mabini’ö horöma”. Jemaat : Tebai mabini’ö horöma. Pendeta : Hadia faduhu göi dödömi lö sameta horö baero Yesu Keriso, si no manaögö huku salahimi ? Na faduhu dödömi, ba mitema ligu wanguma’ö: “Faduhu dödöma” Jemaat : Faduhu dödöma. Pendeta : Hadia, edöna ami mibeta ba dödömi wayaẅasa, awö watiusa, awö wa’afökhö dödö? Hadia edöna ami mi’efa’ö zala zi so sala khömi? Hadai edöna ami mi’ogorofi mbuabua niha si sagötö tanö andrö, ba wamöhöi ya’ia? Ba mitema ligu: “edönaga ya itologa Lowalangi.” Jemaat : Edönaga ya itologa Lowalangi. Pendeta : Mangandrö ita ba wangandrö fa’ahakhö dödö Lowalangi. "He Lowalangi ! Niha si so horö ndra’aga, ma’ombakha’ö horöma khö-U : oya nilauma si lö sökhi, salama khö-U ba tenga göi zide’ide. Oya göi ngawalö zi lö sökhi ba dödöma bakha: Fayaŵasa, fa’afökhö dödö, ba fatiusa; no ambö famati, ba no oya na danö bö’ö, si lö atulö nifaluama tanöföna-U. He Yehowa, hakhösi dödö-U ndra’aga ba wa’omasi-Mö andrö ! Efa’ö khöma horöma andrö ba wa’ebua dödö-U andrö ! Sasai ndra’aga ba horöma andrö börö nono-U Yesu Keriso si no mangöhöli ya’aga. Yaduhu!" Tebe’e ginötö ba wangandrö ba dödö zamösana (1-2 menit) Pendeta : Me no mi’ombakha’ö horömi ba wogamö fangefa, ba na sindruhundruhu mangesa dödömi ba horömi ba wanötöna fangorifi khö Yesu Keriso, ba tola ufaduhu’ö khömi: wa I’efa’ö horömi andrö fefu Lowalangi, börö wamakao andrö nitaögö Yesu So’aya ya’ita! Mudadao Zato! 4. MANUNÕ Pendeta : Manunö ita moroi ba Mbuku Zinunö No: 182 : 1 5. OROISA YESU SANANDRÕSA BA WEMANGA GÕ NI'AMONI'Õ Pendeta : Ya’ami banua niha keriso ni’omasi’ö. Mifondrondrongo daroma li Lowalangi, sanandrösa ba Wemanga Gö Ni’amoni’ö, “So’aya ya’ita Yesu me bongi andrö, me te’a mböli-Nia, me orudu manga Ia khö ndra nifahaö-Nia, ba Ihalö roti (mufazawa roti), I’aohasi gölö Lowalangi, ba Iboboto roti andrö, Ibe’e khö ndra nifahaö-Nia, ba Imane : “Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o”. Si manö göi Ihalö mako (mufazawa naha nagu), me no aefa manga ira, I’aohasi gölö Lowalangi, ibe’e khöra, ba Imane : “Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o”. Ba li-Nia andre Ifaduhu’ö sibai khöda Yesu wanguma’ö. Ero na mi’a roti andre (mufazawa roti), ero na mibadu nösi mako andre (mufazawa mako), ba Uforoma’ö sibai khömi wa’omasi-Gu ami, awö wa’ahakhö dödö-Gu; niha si tekiko ena’ö ami, na lö Ubelegö mena’ö wa’auri-Gu fönami, fa böi sa’ae Itörö tödö Lowalangi horömi, ba wanguhuku ya’ami. Me no matedo, me no aduwa ndro-Gu iwa’ö Yesu ba aheta sa’ae horö na mifalu’i’ö khö-Gu. Börö wa’amate ba femaoso Zo’aya ya’ita Yesu Keriso wa tasöndra wangefa horö awö wangorifi. Andrö dozi sanema ha sambua boto, ha sambua wamati, fa’omasi ba fanötöna, Ya faofao khömi Geheha Ni’amoni’ö. Jemaat : Manunö Moroi ba Mbuku Zinunö No. 182 : 2 Möiga khöU, he Yesu, afu matema. Agu awö roti, möi aurifama. Fa’atulö dödö, fa’ema khöma. Fa tola makhamö ba zi so Ama. 6. FAMA'EMA BA FANEMA'Õ GÕ NI'AMONI'Õ Pendeta : Imane Yesu, "Mi’aine khö-Gu dozi serege tödö, Ufolombase ami." ---- FAMA'EMA ROTI AWÕ AGU ---- Sato manunö moroi ba Mbuku Zinunö No. 237 He na tebai ndra’o Öbè wa’abölö. Ba no Öheta horögu bohou wa’aurigu. Reff: Möi ndra’odo khö-U So’aya Yesu... Ökaonido Yesu wangombakha khögu. Famati ba fanötöna he göi fa’omasi-U. Reff: Möi ndra’odo khö-U So’aya Yesu... Nifalua-U Yesu manandrösa khögu. Me Ötayaigö horögu Öbè howuhowu. Reff: Möi ndra’odo khö-U So’aya Yesu... He So’aya Yesu no sa Öfabu’u. Öbe wa’auri sindruhu ba zamati fefu. Reff: Möi ndra’odo khö-U So’aya Yesu... Nisuno Zo’aya solomasi khögu. Do-Nia Ni’amoni’ö möi fa’atulögu. Reff: Möi ndra’odo khö-U So’aya Yesu... [Muzizio Zato] Pendeta : 1) Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o! 2) Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o! Ena’ö Boto ba Do Zo’aya ya’ita Yesu Keriso, ni’amoni’ö ba solakhömi andrö, da’ö zangabölö’ö ba sondrorogö ya’ami irugi zi lö aetu. Mi’angawuli si fao fa’ohahau dödö. Ya mufahowu’ö ami Lowalangi, Yaduhu! [Mudadao Zato ba teowuloi galasi ba ame'ela Wemanga Gõ Ni'amoni'õ / Mangawuli ba nahia zamösana, ba latörö wama’ema fasömbata ba nahia si no mufa’anö] Pendeta : Manunö ita moroi ba Mbuku Zinunö No: 232 : 1 - 6 No Isusugi dödögu, Ihagaini Eheha. Ifa’ele’ö horögu, ba fefu golalöwa. Reff: Fa’abölö ndro Yesu, .... Andrö göi wa ufabu’u, u’ogorofi horö. Me usöndra wangatulö, so wa’ahono dödö. Reff: Fa’abölö ndro Yesu, .... Fefu wa’erege dödö, ba wolu’i horögu. Ba röfa Yesu utou’ö, ba terara dödögu. Reff: Fa’abölö ndro Yesu, .... Ba me lö Itimba ndra’o, no terara dödögu, Andrö falukha ndra’odo, wa’ohahau dödögu. Reff: Fa’abölö ndro Yesu, .... Lö ufamalö wanuno, ufolakhömi Yesu. Me no Iheta ndra’odo, ba lala wa’elungu. Reff: Fa’abölö ndro Yesu, .... Ba lö mangiwa dödögu, me itolo Eheha. So wa’ahono dödögu, lö uböhöi Zo’aya. Reff: Fa’abölö ndro Yesu, .... Liturgos : Manunõ ita moroi ba Mbuku Zinunõ No. 469 Hezo Yesu, si fahuwu khögu, tolo ndra’o folala dödögu. Tenawa gafökha samaelungu, bekhu sondröröndrörö tödögu. Reff : Be’e, be’e, be'e Geheha-U Yesu... A’aro’ö dödögu khö-U, Yesu, Ya’ugö zololohe tangagu. So’aya Yesu dötönafögu, wanöndra fa’auri si lö aetu. Reff : Be’e, be’e, be'e Geheha-U Yesu... Bè wamati saro ba dödögu, wolawa famakao famaelungu. Afu duhu ahono dödögu, na matedo sawatögu Yesu. Reff : Be’e, be’e, be'e Geheha-U Yesu... FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 469 : 4 Bè wamati saro ba dödögu, wolawa famakao famaelungu. Afu duhu ahono dödögu, na matedo sawatögu Yesu. Reff : Be’e, be’e, be'e Geheha-U Yesu... Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***