[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami, Ya’ahowu!, no maoso Keriso!
Jemaat : Ya'ahowu! Duhu No Maoso Keriso!
Liturgos : Ya faofao khõmi Lowalangi!
Jemaat : Ya'ahowu! Ya fao khõu Geheha-Nia!
FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No
13
Same’e aefa khöu horöu fefu, sangohahau’ö tödömö.
Sanolo göi ba sahakhö tödö, ba sondrorogö ya’ugö.
Me lö fanolo ba niha, angaröfi li Yehowa, Haleluya, Haleluya.
No sahakhö sibai tödö Zo’aya, ba sebua tödö Ia.
Oi mo’ola watahisa-Nia, ba oböwö sibai göi na.
Lö Isulöni horöda, me sebolo tödö Ia, Haleluya, Haleluya.
No tödö nama ba ndraononia, dödö Zo’aya ya’ita.
Dozi sangata’ufi Ya’ia, oi Ibönökhi zoguna.
Sebua tödö sa Ia, no götögötö wa’ara, Haleluya, Haleluya.
FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horömi; Ba iada’e, ba no mususugi Keriso, moroi ba ngai zi mate. (I Kor. 15 : 17 ba 20a). HALELUYA!
Jemaat : Manunõ
Liturgos : Mangandrõ ita, "He Yesu Keriso So’aya ya’aga, Sangorifi ösi gulidanõ andre. Ma’andrõ saohagõlõ khõ-U me no Õlaŵa wa’abõlõ horõ ba fa’amate ba wemaoso-Mö andrö. Iada’e lõ sa’ae ata’u ndra’aga ba lumö wa’abõlõ wa’amate andrõ, me no maoso Ndra’ugõ ba wangorifi ya’aga. No alõmõ wa’amate andrõ ba wemõna, No Õ’efa’õ ndra’aga ba wa’abõlõ zogõmigõmi ba no Õ’ohe ndra’aga ba haga. No Ö’efa’ö ndra’aga moroi ba wesu horõ, irege tobali ndra’aga ono khö Lowalangi Ama. He Yesu Keriso no Öfaogö ndra’aga ba wa’amate-Mö ba tesusugi göi ndra’aga ba wemaoso-Mö andrö, ma’andrö khö-U böi bulö’ö khöma howuhowu-Mö, me Ya’ugö zamatörö banua si yawa awö danö i’otarai da’e irugi ba zi lö aetu, Yaduhu!"Mudadao Zato
Liturgos : Manunõ ita moroi ba Mbuku Zinunõ No.
300
Kubalogu Yesu, sogaoni ya’o.
Me omasi Ia, na auri ndra’o.
Itaögö numana, awö wamakao.
Andrö utötöna, khö Yesu ndra’o
Kubalogu Yesu, no Ihölido.
Ba huku horögu, si göna ya’o.
Fondrege zebua sa nitemagu.
Do sebua böli wangatulögu.
Kubalogu Yesu, Irorogödo.
Ibe’e zoguna, lö sambö ndra’o.
Ilawa nemali, samakao ya’o.
Ahono dödögu me Yesu zi fao.
Kubalogu Yesu, lö faröi khögu.
Lö aombö dödögu, lö fa’ata’u.
Me Ya’ia gumbu wangorifigu.
Ha khö-Nia ululu wa’aurigu.
FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura
I Samueli 12 : 20-25
20 Ba imane Samuëli ba niha sato: Bõi mi’abusi tõdõ: si ndruhu sa, no milau zi lõ atulõ andrõ, fefu — ba bõi atõ mibato sa’ae, wolo’õ khõ Yehowa, mifosumange Yehowa, moroi si’aikõ ba dõdõmi,
21 ba bõi mi’o’õ wayafaya andrõ, si lõ guna ba si tenga fangorifimi, me no si lõ boto.
22 Lõ’õ sa itibo’õ mbanuania Yehowa, bõrõ dõinia andrõ, si no ebua; noa sa atõ omasi Yehowa, ibali’õ banuania ami.
23 Ba ya arõu gõi khõgu wamazõkhi horõ khõ Yehowa, wamõhõi fangandrõ salahimi: u’oroma’õ sa khõmi lala si sõkhi andrõ, lala sadõlõ.
24 Ba mi’ata’ufi Yehowa, ba bõi farõi ami khõnia, wamosumange ya’ia, soroi si’aikõ ba dõdõmi; mitõngõni sa’ae zebua andrõ, nilaunia khõmi!
25 Ba na si lõ sõkhi milau, ba nihori ami, fabaya razomi andrõ.
FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!"
Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U."
Mangandrõ ba dõdõ zamõsana fõna Lowalangi.....1 irugi 2 meniti.
Liturgos : Imane taroma Li Lowalangi: ‘Ba no erege dödö-Gu õbe’e ba horõu andrõ; no õfakao-Do olalõŵamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu. (Yesaya 43:24b-25) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura
Fama'ele'ö 7 : 9-17
9 Ba aefa da’õ, ba u’ila, ba hiza zato sibai, si tebai i’erai niha, moroi ba ngawalõ soi fefu, ba moroi ba ngawalõ niwa fefu, ba moroi ba ngawalõ mado fefu, ba moroi ba ngawalõ li fefu, si so fõna dadaoma andrõ ba fõna Nono mbiribiri; nukha safusi nukhara, ba bulu nohi ba dangara.
10 Ba mu’ao ira, ebua lira, lamane: Fangorifi khõ Lowalangida, sidadao ba dadaoma andrõ, ba khõ Nono mbiribiri andrõ!
11 Ba no lafasui dadaoma andrõ mala’ika andrõ fefu, ba satua andrõ, ba saliwaliwa ba danõ andrõ, si õfa nga’eu, ba latuhi danõ fõna dadaoma andrõ, lafalõgu tou ira, mangalulu ira khõ Lowalangi,
12 lamane: Yaduhu, howuhowu, ba lakhõmi, ba fa’atuatua, ba fangandrõ saoha gõlõ, ba sumange, ba fa’abõlõ, ba fa’abe’e, khõ Lowalangida, irugi zi lõ aetu! Yaduhu.
13 Ba humede zatua andrõ, samõsa, imane khõgu: Da’õ, si so baru safusi andrõ, ha niha ira, ba heza la’otarai?
14 Ba umane khõnia: Ya’ugõ zangila, Tuha. Ba imane khõgu: Ya’ira da’õ, si otarai wamakao sabõlõbõlõ andrõ; ba no lababago mbarura, ba no la’afusi’õ, ba ndro Nono mbiribiri andrõ.
15 Da’õ mbõrõ, wa no so ira fõna dadaoma Lowalangi andrõ, awõ wa no enoninia ira, bongi ma’õkhõ, ba gosalinia; ba i’iagõ yawara sidadao ba dadaoma andrõ.
16 Lõ’õ sa’ae olofo ira, ba lõ’õ sa’ae owõkhi dõdõra, ba lõ gõna ira sino, ba he fa’aukhu, hadia ia,
17 me ikubaloi sa’ae ira Ono mbiribiri andrõ, si so ba dalu dadaoma andrõ, ba ifasao ira ba gumbu nidanõ fangorifi, ba Lowalangi zolosi dania fefu dawa hõrõ ba hõrõra andrõ.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
Fombaso Taroma Li Lowalangi moroi ba zura
Hezekieli 34 : 11-16
11 Imane sa So’aya, Yehowa: Hiza ndra’odo, ba wangalui biribirigu andrõ ba ba wamaigimaigi ya’ira.
12 Si mane famaigimaigi gubalo biribiri, na luo so ia ba hunõ mbiribirinia, si no muzaewe, si manõ dania wangaluigu biribirigu, ba u’orifi ira, moroi ba danõ andrõ misa fefu, ba nifazaewe ya’ira, me luo abõlõ lawuo ba me aloe.
13 Ba u’ohe ira miyawa, moroi ba niha baero ba u’ozaragõ ira ba danõ zotanõ misa, ba u’ohe ira ba danõra, ba ukubaloi ira ba hili Ndraono Gizeraëli ba ba mbewe mbombo, ba ba danõ misa fefu, ba zi so banua niha.
14 Ba zabõlõ du’u ukubaloi ira, ba ba hili salawa ba Ndraono Gizeraëli so nahara, naha gõra; ba da’õ mõrõmõrõ ira ba mbenua si sõkhi ba satabõ gõra du’u ba hili Ndraono Gizeraëli.
15 Ya’odo dania zokubaloi biribirigu ba ya’odo zame’e mõrõ ya’ira, iwa’õ So’aya, Yehowa.
16 Sisuna, ba u’alui, ba si no muzaewe, ba uhalõ mangawuli, ba ba zesokho, ba ulau daludalu, ba sofõkhõ, ba u’abe’e’õ, ba satabõ ba sabõlõ, ba urorogõ; u’onangegõ wokubaloi.
Famotokhi Taromali Lowalangi
Sinanõ ba dõdõ tehalõ moroi ba zura
Hezekieli 34 : 15
TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Manunõ ita moroi ba Mbuku Zinunõ No.
149
Hede khöma, he So’aya, ha li-Mö gaurifama.
Me samohouni tödöma, sandrohu fekolima.
Hede khöma, hede khöma, aro’ö wanötöna.
Hede khöma, he So’aya, bè khöma Geheha-Mö.
Sangabölö’ö ya’aga, wolo’ö somasi’Ö.
Hede khöma, hede khöma, da mahonogö dödö.
Hede khöma, he So’aya, da matara lahe-Mö.
A’aro’ö wamatima, be’e wa’anau gölö.
Ena’ö tola marugi naha si so Ya’ugö.
FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
Ya mufahowu’õ ami Lowalangi, Ya murorogõ ami;
Ya mufohaga mbawa-Nia khõmi, Ya mu’ebua’õ dõdõ-Nia khõmi;
Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No.
266
Khö-U, Yesu ahonodo, kubaloi ndra’odo.
Barö wondrorogö-Mö, ohahau sa dödö.
Khö-U manö, ndra’odo, terara dödögu, me no so’Ö, Yesu.
Fangelama dödögu, ba ngawalö horö.
Somba’agö lalagu, ba wolo’ö li-U.
Dou’ö na haga-Mö, bakha ba dödögu amölido Yesu.
Khö-U falemba dödögu, umbu wa’omasi.
Nönö na ba dödögu, Geheha wa’auri.
Ena’ö si faudu ba zomasi Yesu, fefu halöwögu.
Sowanua ba danö sambö fanötöna.
Oi arörö dödöra, wolohi si taya.
Hagaini dödöra, tuturu lalara, wolo’ö li-Nama.
Tidak ada komentar:
Posting Komentar