25 Mei 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 25 Mei 2024 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami, Ya’ahowu!, no maoso Keriso! Jemaat : Ya'ahowu! Duhu No Maoso Keriso! Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 18 No Ifa’ema khöda, daroma li fangorifi. Si möi fangefa horö, börö Yesu, Sangöhöli. Sebua tödö Ia, ba solakhömi göi. Ibè wa’anau gölö, ena’ö lö faröi, Ba fefu golalöwa, no oi te’asiwai. Börö Keriso, Yesu, same’e fa’auri. No amaedola nama, sondrorogö ononia. Töra wolau Zo’aya, ba zi numana tödö sa. Hewa’ae side’ide, ba si lö moguna. No amaedola mbunga, sagalio taya. Manö wa’auri niha lö mo’ahonoa. Lö sa faröi Zo’aya ba dana khö-Nia. Fao khöda Lowalangi, irugi ba zi lö aetu. Me duhu lö tewu’a, fefu zi no Ifabu’u. Ya’ia sa Yehowa, Fondrege Zalawa. Fefu niwöwöi-Nia, sanuno Ya’ia. Fao awö mala’ika, oi enoni-Nia. He tödö, da tasuno, Lowalangi, Ama. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horömi; Ba iada’e, ba no mususugi Keriso, moroi ba ngai zi mate. (I Kor. 15 : 17 ba 20a). HALELUYA! Jemaat : Manunõ Liturgos : Mangandrõ ita, "He Yesu Keriso So’aya ya’aga, Sangorifi ösi gulidanõ andre. Ma’andrõ saohagõlõ khõ-U me no Õlaŵa wa’abõlõ horõ ba fa’amate ba wemaoso-Mö andrö. Iada’e lõ sa’ae ata’u ndra’aga ba lumö wa’abõlõ wa’amate andrõ, me no maoso Ndra’ugõ ba wangorifi ya’aga. No alõmõ wa’amate andrõ ba wemõna, No Õ’efa’õ ndra’aga ba wa’abõlõ zogõmigõmi ba no Õ’ohe ndra’aga ba haga. No Ö’efa’ö ndra’aga moroi ba wesu horõ, irege tobali ndra’aga ono khö Lowalangi Ama. He Yesu Keriso no Öfaogö ndra’aga ba wa’amate-Mö ba tesusugi göi ndra’aga ba wemaoso-Mö andrö, ma’andrö khö-U böi bulö’ö khöma howuhowu-Mö, me Ya’ugö zamatörö banua si yawa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 229 Site’ala ndra’aga, na lö fa’omasi-U. Andrö böi röi ndra’aga afu lö elungu. Tödöma sitohöna, da’ö nemalima. Tologa ba wolawa, bè khöma Geheha. Na lö Ya’ugö, Yesu, te’ala ndra’aga. Lö fulitö tehuku, me oya horöma. Andrö farou dödöma, böi aetu wangandrö. Afu anau gölöma, tolo, Eheha-Mö. Ma’ondrasi Ndra’ugö, Yesu, Sangefa’ö. Be’e aefa horöma, ba wa’omasi-Mö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Razo 4 : 1-7 1 Ba so ndra alawe, fo’omo nono zekola zama’ele’õ, mangarõngarõ khõ Gelisa, imane: No mate wo’omogu, enoniu andrõ, ba no õ’ila, wa no sangata’ufi Yehowa ia, si lõ mamalõmalõ; ba iya’e, ba so zosugilõ, ba wangai sawuyunia onogu matua, si dombua. 2 Ba imane khõnia Elisa: He uwisa wanolo ya’ugõ? Ombakha’õ khõgu, hadia zi so khõu, yomo. Ba imane: Lõ hadia ia khõ zawuyumõ yomo, ha sara tawu wanikha. 3 Ba mane khõnia: Ae wawalõ nahia si lõ õsi, ba mbanuami, ba bõi sambõ fa’oya; 4 ba ae si bakha, ba kusi mbawandruhõ furimi onou andrõ, ba fo’õsi nahia andrõ fefu, ba safõnu, ba fa’ese misa ua. 5 Ba mõi ia, i’o’õ niwa’õ Gelisa. Ikusi mbawandruhõ furira iraononia; ba la’oro’õ khõnia nahia ba ifadoro manõ wamohani. 6 Ba me no ahori mo’õsi nahia andrõ, ba imane khõ nononia: Oro’õ na! Ba imane: Awai nahia. Ba awena tebato wanikha. 7 Ba mõi ia mangombakha khõ genoni Lowalangi andrõ. Ba imane khõnia da’õ: Ae amawa wanikha andrõ ba bu’a gõmõu. Ba si tosai, ba balazomi iraonou. FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane taroma Li Lowalangi: ‘Ba no erege dödö-Gu õbe’e ba horõu andrõ; no õfakao-Do olalõŵamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu. (Yesaya 43:24b-25) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Halöwö Zinenge 16 : 19-34 19 Ba me la’ila sokhõ ya’ia, no aheta mbõrõ wangaluira andrõ, ba lara’u ndra Faulo Sila, ladõni ba kade ba zalawa. 20 Ba la’ohe khõ gumandru, lamane: Lafakuyu khõda mbanua niha andre, ba no niha Yehuda ira; 21 la’ombakha’õ huku si lõ tola tatema, si lõ tola ta’o’õ, me Dawa Roma ita. 22 Ba maoso gõi niha sato khõra; ba laheta khõra nukhara ira kumandru ba lawa’õ, labõzi. 23 Ba me no laforege wamõzi ya’ira, ba lakuru, lawa’õ khõ zanaro ba gurunga, ihaogõ wanaro ya’ira. 24 Ba me no irongo goroisa andrõ, ba ibe’e ira ba gurunga tánõ bakha, ikalo gahera. 25 Ba mato talu mbongi, ba mangandrõ Waulo, awõ Zila, lasuno Lowalangi, ba lafondrondrongo khõra nikuru. 26 Ba i’ozumagõ so ndruru sabõlõbõlõ, irege dumõgõdõgõ latalata gurunga. Ba i’anema’õ teboka mbawandruhõ fefu, ba oi’dozi aefa rate khõra. 27 Ba me tokea zanaro ba gurunga, me i’ila, no teboka mbawandruhõ gurunga, ba isõbi wõda, ibunu ia ena’õ, iwai no moloi nikuru. 28 Ba mu’ao Waulo, ebua linia, imane: Bõi fakiko’õ, dozi sa so ndra’aga ba da’e! 29 Ba iwa’õ wandru, isawa si bakha, fagohi, ituhi danõ, fõna ndra Faulo Sila, manizinizi, 30 ba ifasao ira baero, imane: He uwisa, Tua, fa usõndra wangorifi? 31 Ba lamane: Amati khõ Zo’aya, Yesu, ba te’orifi ndra’ugõ, awõ zoroiyomou fefu. 32 Ba la’ombakha’õ khõnia daroma li Zo’aya ba ba si so ba nomonia fefu. 33 Ba ihalõ ira, ba da’õ sibai, ba zi bongi, isasai khõra zesokho ba wamõzi andrõ, ba i’anema’õ tebayagõ idanõ ia, awõ zoroiyomonia fefu. 34 Ba i’ohe ira yomo, ibe’e gõra, ba owuawua dõdõnia, me no samba omo manõ ira mamati ba Lowalangi. 35 Ba me no moluo, ba lafatenge wazuri ira kumandru, lamane: Efa’õ niha andrõ! Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yeremia 29 : 7-14 7 Mi’alui wangorifi mbanua andrõ, ba ni’oloiõgu ya’ami, mi’angandrõ khõ Yehowa, salahira; fangorifimi sa’ae wangorifira! 8 Imane sa Yehowa ngahõnõ, Lowalangi Ndraono Gizeraëli: Bõi lafowõhõ ami sama’ele’õ andrõ khõmi, si so andrõ ba khõmi, ba ma si faeta andrõ khõmi, ba bõi mi’amati ba wangifimi, 9 falimosa sa nifa’ele’õra khõmi ba dõigu, tenga ya’odo zamatenge ya’ira! — iwa’õ Yehowa. 10 Imane sa Yehowa: Na no alua zi fitu ngafulu fakhe ba Mbabeli, awena ufaigi ami ba awena ufalua niwa’õgu si sõkhi andrõ, ba khõmi, wa u’ohe mangawuli ami ba mbanua da’e. 11 U’ila sa, he wisa dõdõgu khõmi — iwa’õ Yehowa — tõdõ ba wangorifi ba tenga ba wamakiko, ba wamaigi fa’ohahau dõdõ khõmi, ba gõtõ dania! 12 Awena dania mi’angarõfi li ndra’o, mõi ami mangandrõ khõgu, ba ufondrondrongo khõmi. 13 Ba mi’alui ndra’o ba misõndrado, na moroi si’aikõ ba dõdõ mi’alui ndra’o, 14 ba ube’e nisõndrami ndra’odo — iwa’õ Yehowa — ba ufaigi wangefa khõmi, u’ozaragõ ami, moroi ba niha fefu ba moroi ba mbanua fefu, ba nitibo’õgu ya’ami — iwa’õ Yehowa — ba u’ohe mangawuli ami ba mbanua andrõ, ba nihetagu ya’ami. Famotokhi Taromali Lowalangi Sinanõ ba dõdõ tehalõ moroi ba zura Yeremia 29 : 12 Awena dania mi'angaröfi li Ndra'o, möi ami mangandrö khö-Gu, ba Ufondrondrongo khömi. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 302 Yesu, Ono Lowalangi, salawagu ba So’aya. Khö-U ubè wasumangeta, me no Öhöli ndra’o. Ba wekoligu ba danö, u’alui manö Ndra’ugö. Ba ahono sa dödögu, me ahatödo khö-Mö. Lasuno’Ö mala’ika, si so ba lakhömi Nama. He niha ba gulidanö, oi lafosumange’Ö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 302 : 5 No aro wanötönagu, he na uröi gulidanö. So wa’auri si lö aetu, si lö tebulöbulö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***