1 Juni 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 1 Juni 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö föna Keriso, ba wanörö tödö Fanahae Zo’aya ya’ita Yesu Keriso ba zorugo. Andrö, ba döi Yesu ma’owai ami fefu, Ya’ahowu! Jemaat : Ya'ahowu! Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 6 Khö-Nia wa’asalawa, ba hadia wa’ebua, oi khö-Nia so manö. He si yawa ba zorugo, he si so ba gulidanö, oi Ya’ia zokhö ö, oi Ya’ia zokhö ö. Wa’ö khögu döi sebua, töi wa’asalawa niha, simane töi-Nia sa. Ha Ya’ia zamatörö, sangorifi, sondrorogö; Ono Lowalangida,Ono Lowalangida. Sebua lakhömi Ia, lö manö famaedo-Nia, mane lakhömi Nama. Ha Ya’ia zamatörö, sangorifi, sondrorogö; Ono Lowalangida, Ono Lowalangida. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Imane Yesu: “Iada’e, ba mofanõ Ndra’o khõ zamatenge Ya’o. Mõido sa muhaogõ naha khõmi. Urõi khõmi wa’ohahau dõdõ, fa’ohahau dõdõ khõ-Gu Ube’e khõmi. Bõ’õ nibe’e niha guli danõ, bõ’õ nibe’e-Gu. Bõi abu dõdõmi ba bõi ata’u ami (Yohane 16:5; 14:2c; 14:27). HALELUYA! Jemaat : Manunõ Liturgos : Mangandrõ ita, "He So’aya ya’aga Yesu Keriso, Ono Lowalangi Ama, solakhömi! No manahae Ndra’ugö ba zorugo, dumadao ba gambölö Nama, ba wamatörö si so si yawa ba mbanua, he göi si so si tou ba gulidanö. He So’aya, böi röi ndra’aga ba wanörö lalama. Fatenge khöma Geheha sanolo. Be’e khöma wa’abölö ena’ö lö faröi ndra’aga ba daroma Li-Mö, ba abölö’ö mbanua-U ba wolaŵa ngawalö zi lö sökhi, ena’ö si tedou ira wamati ba gulidanö andre. Ha khö-U manötönaga, me Ya’ugö zamatörö banua si yaŵa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 215 No oya zimöi tahataha, wangondrasi fogaoni-Mö. Fefu gomasiö dödögu, isaisido ba wolo’ö. Fahöna wamini tödö, ba fangosiwawöi li-Mö. Mangaluludo khö-U, So’aya, fa’ele’ö khögu lala. Ena’ö usöndra wangefa, ba horögu sifahöna. Irege tola utema, wa’auri ba gamozua. Ato sibai na dalifusö, sabe’e tödö ba khöra. Susugi dödöra So’aya, hagaini ira Eheha. Bali’ö tana khö-U ira, ba wogamö si so Ama. Ba lö tebulö wa te’ala, dozi sangerogö Ama. Si lö manehe nibohouni, tödö awö gera’era. He So’aya, heta khöma, dödö sifabu’abu’a. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 20 : 1-17 1 Ba iwa’õ daroma li andrõ fefu Yehowa, imane: 2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami. 3 Bõi so khõmõ Lowalangi tánõ bõ’õ, baero ndra’o. 4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ. 5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu, 6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ. 7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya. 8 Ame’egõ tõdõ luo wolombase andrõ, ba we’amoni’õ ya’ia. 9 Õnõ ngaluo mohalõwõ ndra’ugõ ba õhalõ halõwõu fefu. 10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha. 11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ. 12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu. 13 Bõi ange’e. 14 Bõi ohorõ. 15 Bõi anagõ. 16 Bõi bõbõgõ khõ nawõu zi lõ duhu. 17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 3 : 2 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi Ama, si so ba zorugo yaŵa. Ma’ondrasi dadaoma wa’ahakhö dödö-U andrö. Mafaduhu’ö wa no niha sebua horö ndra’aga tanö fona-Mö, i’otarai iraono ndra’aga, no iböböga amuata walimosa, fanagö, fangisö, awö wamalua ngawalö gamuata si lö faudu ba zomasi Ndra’ugö. He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko ndra’aga ba böi tehe te’ala, törö tödö-U wa’ebua dödö-U ba fa’ahakhö dödö-U andrõ khöma. Böi bulö’ö khöma wangorifi andrö si no Öhönagö ba zamati khö-U, Yaduhu!" Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane Taroma Li Lowalangi, "Noa sa ahori mamazõkhi horõ ira, ba lõ’õ sa si sõkhi duriara khõ Lowalangi. Ba saohagõlõ wa Iŵa’õ Lowalangi satulõ ira, fa’ebua dõdõ-Nia, bõrõ wangõhõli andrõ, ba khõ Keriso Yesu, nifataro Lowalangi hõli, ba ndro-Nia andrõ, balazi wamati, ba wangoroma’õ fa’atulõ dõdõ-Nia, bõrõ wa no I’osilõmilagõ horõ fõna. Si mane fa’ahakhõ dõdõ nama nononia, si manõ wa’ahakhõ dõdõ Yehowa zangata’ufi Ya’ia." Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Fama'ele'ö 22 : 12-21 12 Hiza, alio so ndra’o, ba fao khõgu luo andrõ khõgu, ba wanulõni ba zamõsana, dali mbuabuania. 13 Alafa ndra’o ba omega, si fõfõna ndra’o ba safuria, bõrõta ndra’o ba amozua. 14 Ya’ahowu zamabago nukhara, ena’õ tetehe khõra geu fangorifi andrõ, ba ena’õ tefa’tõrõ ira ba mbawa gõli andrõ, miyomo ba mbanua. 15 Baero so nasu andrõ, awõ zi fakelemu, awõ zohorõ, awõ zange’e, awõ zame’eme’e adu, awõ dozi solau faya, ba somasi ya’ia. 16 Ya’o, Yesu andrõ, no ufatenge mala’ika andrõ khõgu, ba wamaduhu’õ khõmi da’õ, ba mbanua niha Keriso andrõ. Lewiõ Dawido ndra’odo, lewiõ ba mbõrõ, ba ma’uwunia, madala andrõ, sihaga. 17 Ba lamane Eheha ba ono nihalõ andrõ: Aine! Ba ha niha zamondrongo, ba yamuwa’õ: Aine! Ba ha niha zowõkhi tõdõ, ba yamõi, ha niha zomasi, ba yamutema nidanõ fangorifi saoha gõlõ. 18 Ufaduhu’õ ba niha fefu, samondrongo taroma li fama’ele’õ andrõ ba zura andre: Na so zondrou’õ ya’ia, ba ifatõrõ khõnia Lowalangi wamakao andrõ, nisura ba zura andre. 19 Ba na so zombuwu taroma li ba zura wama’ele’õ andre, ba iheta Lowalangi gurakhania ba geu fangorifi andrõ ba ba mbanua ni’amoni’õ andrõ, nisura ba zura andre. 20 Imane samaduhu’õ da’e: Ya’ia lõ ara tõ so ndra’o. Yaduhu; aine Yesu, So’aya! 21 Yafalukha ami fefu wa’ebua dõdõ Zo’aya ya’ita, Yesu. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Sinunö 97 : 1-12 1 No razo Yehowa, ya owuawua dõdõ nõsi guli danõ, ya omuso dõdõ zi so ba hulo soya andrõ. 2 Si no tefasui lawuo ba fa’ogõmigõmi ia; danedane dadaomania ba huku sadõlõ ba fa’atulõ. 3 Mowaõwaõ fõnania galitõ, si manga zi fa’udu khõnia, fasui. 4 Isului guli danõ gari mbanua andrõ khõnia; i’ila uli danõ, ba muhisi. 5 Alau hili, hulõ zigusigu, fõna Yehowa andrõ, fõna Zo’aya tanõ, ma’asagõrõ. 6 Idunõdunõ wa’atulõnia andrõ banua si yawa, ba dozi soi mangila lakhõminia. 7 Falukha wa’aila dania dozi samosumange balõ geu, sanuno ya’ira ba nadu andrõ; mi’angalulu khõnia, ya’ami Lowalangi fefu! 8 Irongo Siona, ba omuso dõdõ; ba owuawua dõdõ nono Ndraono Yuda alawe, bõrõ wanguhukumõ andrõ, ya’ugõ Yehowa! 9 Ya’ugõ sa Wondrege zalawa, Yehowa, ba guli danõ, ma’asagõrõ, alawa yawa Lowalangi bõ’õ fefu ndra’ugõ. 10 Mi’ogorofi zi lõ sõkhi, ya’ami sangomasi’õ Yehowa! Ya’ia zondrorogõ noso zatulõ tõdõ andrõ khõnia; i’efa’õ ira ba danga zebua horõ andrõ. 11 Tumbu haga khõ zatulõ tõdõ, ba fa’omuso dõdõ ba zadõlõ era’era. 12 Mi’omusoi’õ dõdõmi ba khõ Yehowa, ya’ami satulõ tõdõ, ba misuno dõinia andrõ, ni’amoni’õ! Famotokhi Taromali Lowalangi Sinanõ ba dõdõ tehalõ moroi ba zura Sinunö 97 : 1 No razo Yehowa, ya owuawua dödö nösi gulidanö, ya omuso dödö zi so ba hulo soya andrö. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 313 Ululu fefu wa’aurigu, amatöröwa Keriso Yesu. Usuno Ia si lö aetu, me solomasi Ia khögu. Ba manunödo soroi dödö usunoIa lö mamalö. Ba manunödosoroi dödö usuno Ia lö mamalö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 313 : 4 Ube ndra’odo nifatörö, Geheha-Nia Ni’amoni’ö. Ba wombaloigu Yesu andrö, Ifahowu’ö lö mamalö. Ba manunödo soroi dödö usunoIa lö mamalö. Ba manunödosoroi dödö usuno Ia lö mamalö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***