14 Juli 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 14 Juli 2024 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 7 Dönisido khö-Mö he Yesu, ya khö-U manö sa’ae wa’aurigu. Ya so ba dödögu Geheha, sangila mamasao ya’odo khö-U. Afu’afugu lö uböhöli, wangalulu khö-Mö, Sangorifi. Tolo ndra’odo he So’aya, ena’ö sökhi wanunögu khö-U. Fa böi tobali fayafaya, wolaugu khö-U sinunö sibohou. Ena’ö sango’ou tödögu göi, Geheha-Mö andrö si lö faröi. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 236 He Yesu sahakhö tödö, möido föna-Mö. Usao’ö ngawalö horö, Ösasai do-Mö. Reff : Yesu, Yesu, rongo we’aogu... Da’ö wangaro dödögu, nitaögö-U Yesu. Tödögu si no ta’unö tobali bohou. Reff : Yesu, Yesu, rongo we’aogu... Ha Yesu zondrara tödö, sindruhundruhu. Me si lö faröiröi Ia, ba wa’aurigu. Reff : Yesu, Yesu, rongo we’aogu... FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Amosi 7 :1-6 1 Da’e nifa’ele’õ Zo’aya Yehowa khõgu: So nono damo, me ibõrõtaigõ auri zinanõ ba nowi sebolo, ba so zarakha mo’ahonoa fa’ebua, me no aefa ifaguti’õ mbua mbiribiri khõnia razo. 2 Ba me no ahori la’a mbulu ndru’u ba danõ, ba mangandrõ ndra’o, umane: He So’aya, Yehowa, be’e aefa horõ! Heza lasõndra wangorifi ma’uwu Yakobo? No si numana sibai ira! 3 Ba mangesa dõdõ Yehowa. Bõi! iwa’õ Yehowa. 4 Ba da’e [zui] nifa’ele’õ Zo’aya Yehowa khõgu: Iwa’õ wanuwõ galitõ So’aya, Yehowa. Ba i’a nasi sebua alitõ; ba me i’a ena’õ dána khõ Yehowa, 5 ba mangandrõ ndra’o, umane: He So’aya, Yehowa, bõda! Heza lasõndra wangorifi ma’uwu Yakobo? No si numana sibai ira! 6 Ba mangesa dõdõ Yehowa. Bõi! iwa’õ Yehowa. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura II Timoteo 1 : 7-10 7 Tenga sa Eheha sada’uda’u nibe’e Lowalangi khõda, no Eheha sabõlõ, Eheha ba wa’omasi, Eheha ba wangonangegõ nibe’enia khõda. 8 Ba bõi aila ndra’ugõ, wamaduhu’õ turia Zo’aya ya’ita, ba bõi aila’õ ba khõgu andre, nitaha andrõ khõnia, yafao ndra’ugõ wanaha famakao andrõ, ba duria somuso dõdõ andrõ, dali wa’abõlõ Lowalangi andrõ, 9 si no mangorifi ya’ita, si no mogaoni ya’ita, fogaoni ni’amoni’õ; tenga dali mbuabuada, dali nihonogõl dõdõnia, ba fa’ebua dõdõ andrõ, si no falukha ita, ba khõ Keriso Yesu, fõna nga’õtõ danõ andrõ, 10 nifa’ele’õ iada’e, ba wa’ato’ele zangorifi ya’ita andrõ, Keriso Yesu, si no mamakiko fa’amate andrõ, ba si no mangasogõ fa’auri ba fa lõ tekiko, moroi ba duria somuso dõdõ andrõ, Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Mareko 6 : 14-29 14 Ba irongo razo Herode; noa sa teturia dõinia. Ba imane: No maoso Yohane andrõ, samayagõ idanõ, moroi ba ngai zi mate, andrõ so khõnia wa’abõlõ andrõ. 15 Ba so zanguma’õ, Eliya: ba so, ba sama’ele’õ lawa’õ; hulõ zama’ele’õ andrõ fõna, samõsa. 16 Ba me irongo Herode, ba imane: Yohane andrõ, nifa’ewa’õgu bagi, da’õ zi no maoso. 17 Noa sa ifatenge Herode, no ifara’u’õ Yohane, no labõbõ ba gurunga, bõrõ Herodia andrõ, fo’omo dalifusõ Herode, Filifo, me no ihalõ Herode. 18 Noa sa iwa’õ Yohane khõ Herode: Lõ tola so khõu wo’omo dalifusõu. 19 Ba no afõkhõ dõdõ Herodia andrõ khõnia, ibunu ena’õ, ba tebai. 20 Noa sa ata’u Herode Yohane, me no i’ila wa no niha satulõ, ni’amoni’õ, ba ifatarogõ’õ, ba auli abu dõdõnia, na irongo linia, ba omasi ia, ifondrondrongo. 21 Ba bawa senahõi: fatome Herode, awõnia salawa ba kumandra andrõ ba salawa andrõ ba Galilaia, me bawa wa’atumbunia. 22 Ba mõi yomo nono Herodia andrõ, alawe, manari, ba omasi Herode ba tomenia. Ba imane razo khõ nono alawe andrõ: Andrõ khõgu hadia zomasi’õ ba ube’e khõu; fahõlu ia khõnia: 23 Hadia ia ni’andrõu khõgu, ube’e khõu, irugi zi matonga mbanuagu. 24 Ba mõi ia baero, imane khõ ninania: Hadia zi sõkhi ni’andrõgu? Ba imane: Hõgõ Yohane andrõ, samayagõ idanõ. 25 Ba i’anema’õ ifuli ia khõ razo no mege, i’aliogõ, i’andrõ, imane: Omasido, iada’e sibai õbe’e khõgu, ba wiga yawa, hõgõ Yohane andrõ, samayagõ idanõ. 26 Ba abu sibai dõdõ razo, ba ba wahõlusa no mege ba ba dome andrõ, ba lõ edõna ia lõ ibe’e. 27 Ba i’anema’õ ifatenge razo wazuri, i’oroi’õ la’ohe hõgõ Yohane. 28 Ba mõi da’õ, i’ewa mbagi ba gurunga ba i’ohe hõgõ ba wiga yawa, ibe’e khõ nono alawe no mege, ba ibe’e khõ ninania ono alawe andrõ. 29 Ba me larongo nifahaõ Yohane, ba mõi ira, lahalõ mbotonia ba lako’o. Famotokhi Taromali Lowalangi Sinanõ ba dõdõ tehalõ moroi ba zura II Timoteo 1 : 7 Tenga sa Eheha sada’uda’u nibe’e Lowalangi khõda, no Eheha sabõlõ, Eheha ba wa’omasi, Eheha ba wangonangegõ nibe’enia khõda. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 279 Oroma’ö lalama ba haga-Mö. Me asese tobini ba telumö. Lakhömi gulidanö zolumö’ö. Ba gisö’isö dödö soya manö. Ya’ugö gubaloma si lö faröi. Sanuturu lalama ba wekoli. He oya nemalima sangalani. Ö’ila ötenawa ba Öfoloi. Aro’ö wamatima wanöngöni. Li-Mö si no Öwa’ö ba zamati. Wa dozi sanau ölö si lö faröi. Duhu wa oi latema wangorifi. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 275 Na fao khöda Yesu oi tola taröi. Fefu gisö’isö dödö, sanayaigö famati. Manötöna ita, wa Ifa’ema khöda wa’auri. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***