12 Mei 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 12 Mei 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö föna Keriso, ba wanörö tödö Fanahae Zo’aya ya’ita Yesu Keriso ba zorugo. Andrö, ba döi Yesu ma’owai ami fefu, Ya’ahowu! Jemaat : Ya'ahowu! Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 1 Ya’ahowu dozi niha, samati khö Yehowa. Sanötöna fangorifi, ba döi Yesu So’aya. Saro tödö ba da’ö, fa’auri dötönafö. Yehowa zamokai hörö, ba samè khöda haga. Ibönökhi göi wame’e, fefu zoguna khöda. Lö manö faröi Ia, ba nifabu’u-Nia. Salawa yawa Zalawa, Lowalangi Yehowa. Andrö ta’o’ö li-Nia, lö manö baero-Nia. No so Ia ba khöda, Haleluya khö-Nia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Imane Yesu: “Iada’e, ba mofanõ Ndra’o khõ zamatenge Ya’o. Mõido sa muhaogõ naha khõmi. Urõi khõmi wa’ohahau dõdõ, fa’ohahau dõdõ khõ-Gu Ube’e khõmi. Bõ’õ nibe’e niha guli danõ, bõ’õ nibe’e-Gu. Bõi abu dõdõmi ba bõi ata’u ami (Yohane 16:5; 14:2c; 14:27). HALELUYA! Jemaat : Manunõ Liturgos : Mangandrõ ita, "He So’aya ya’aga Yesu Keriso, Ono Lowalangi Ama, solakhömi! No manahae Ndra’ugö ba zorugo, dumadao ba gambölö Nama, ba wamatörö si so si yawa ba mbanua, he göi si so si tou ba gulidanö. He So’aya, böi röi ndra’aga ba wanörö lalama. Fatenge khöma Geheha sanolo. Be’e khöma wa’abölö ena’ö lö faröi ndra’aga ba daroma Li-Mö, ba abölö’ö mbanua-U ba wolaŵa ngawalö zi lö sökhi, ena’ö si tedou ira wamati ba gulidanö andre. Ha khö-U manötönaga, me Ya’ugö zamatörö banua si yaŵa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 222 Lö fa’atulö khöda fefu, me fahöna wayawasa. Da möi ita nihaogö Yesu, me sebolo tödö Ia. Ha Yesu dötönaföda, sangatulö’ö ya’ita. Lö fa’atulö khöda fefu, me fahöna wa’udusa. Lö fa’omasi soroi dödö, me lö fefao gera’era. Ha Yesu dötönaföda, sangatulö’ö ya’ita. Lö fa’atulö khöda fefu, me fahöna wayafaya. Fa’aduhu lö ba dödöda, faruka walimosa. Ha Yesu dötönaföda, sangatulö’ö ya’ita. Lö fa’atulö khöda fefu, me lö fa’ebolo dödö. Asese so wange’e dödö, fa’omasida no ambö. Ha Yesu dötönaföda, same’e fanaha tödö. Lö fa’atulö khöda fefu, me no asese mamadaö. Me lö ta’o’ö li Geheha, sihedehede ba dödö. Ha Yesu dötönaföda, same’e tödö folo’ö. Lö fa’atulö khöda fefu, me ambö fa’anau gölö. Ba asese mangiwa dödö, hulö zi lö tötönafö. Ha Yesu dötönaföda, same’e fa’aro dödö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yeremia 17 : 7-10 7 Ba ya’ahowu niha, sanõtõna khõ Yehowa, same’e fa’abe’e dõdõnia Yehowa! 8 Eu nitanõ ba mbewe nidanõ ia, sangoro’õ wa’ania ba mbombo ba si lõ ata’u na aukhu zino; lõ aleu mbulunia ba lõ abu dõdõ, na dõfi si lõ teu, ba lõ mo’otalua wowua. 9 Si no tefuyu dõdõ niha, moroi ba dánõ bõ’õ fefu, ba si lõ sokhi — ha niha zangila amuata? 10 Ya’o, Yehowa, zanekhegõ tõdõ ba sanandraigõ bua, ba wanulõni ba zamõsaná buabuania, lualua nilaulaunia andrõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 3 : 2 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi Ama, si so ba zorugo yaŵa. Ma’ondrasi dadaoma wa’ahakhö dödö-U andrö. Mafaduhu’ö wa no niha sebua horö ndra’aga tanö fona-Mö, i’otarai iraono ndra’aga, no iböböga amuata walimosa, fanagö, fangisö, awö wamalua ngawalö gamuata si lö faudu ba zomasi Ndra’ugö. He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko ndra’aga ba böi tehe te’ala, törö tödö-U wa’ebua dödö-U ba fa’ahakhö dödö-U andrõ khöma. Böi bulö’ö khöma wangorifi andrö si no Öhönagö ba zamati khö-U, Yaduhu!" Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane Taroma Li Lowalangi, "Noa sa ahori mamazõkhi horõ ira, ba lõ’õ sa si sõkhi duriara khõ Lowalangi. Ba saohagõlõ wa Iŵa’õ Lowalangi satulõ ira, fa’ebua dõdõ-Nia, bõrõ wangõhõli andrõ, ba khõ Keriso Yesu, nifataro Lowalangi hõli, ba ndro-Nia andrõ, balazi wamati, ba wangoroma’õ fa’atulõ dõdõ-Nia, bõrõ wa no I’osilõmilagõ horõ fõna. Si mane fa’ahakhõ dõdõ nama nononia, si manõ wa’ahakhõ dõdõ Yehowa zangata’ufi Ya’ia." Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 13 : 10-17 10 Ba la’ondrasi ia nifahaõnia, lamane khõnia: Hana wa amaedola niwa’õu khõra? 11 Ba itema li, imane: Khõmi no mube’e wa’aboto ba dõdõ zi no tobini andrõ, ba mbanua zorugo andrõ, ba khõrá, ba lõ mube’e. 12 Ba zi ho so sa, ba tebe’e na, lahõna khõnia, ba ba zi lõ’õ, ba laheta gõi zi no so khõnia. 13 Da’õ mbõrõ wa amaedola huhuogu khõra, me lõ mangila ira, he wa’ae no teboka hõrõra, ba me lõ mamondrongo, he wa’ae larongo, ba me lõ aboto ba dõdõra. 14 Ba itõrõ ba khõra nifa’ele’õ Yesaya, me imane: ”Mirongo dania ia tõgi dalingami, ba lõ’õ manõ aboto ba dõdõmi; anehe hõrõmi, ba lõ mi’ila. 15 Noa sa mu’abe’e’õ dõdõ niha andre ba no afisofiso ira, ba no lafakifu hõrõ, ena’õ lõ la’ila hõrõra ba ena’õ lõ larongo tõgi dalingara ba ena’õ lõ aboto ba dõdõra, fa lõ lafuli ira, ena’õ u’orifi ira.” 16 Ba ya’ahowu hõrõmi, me la’ila, ba tõgi dalingami, me larongo. 17 Si ndruhu niwa’õgu khõmi: No ato zama’ele’õ ba no ato zatulõ somasi mangila ni’ilami andrõ, ba lõ ni’ilara, ba somasi mamondrongo nirongomi andrõ, ba lõ nirongora. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Sinunö 1 : 1-6 1 Ya’ahowu niha si lõ molo’õ nikhoi dõdõ zebua horõ andrõ, ba si lõ manõrõ lala zolalõ andrõ, ba si lõ dumadao ba zi dadao zango’aya. 2 Same’e fa’omuso dõdõnia oroisa Yehowa ba sangalui eluaha goroisania, bongi ma’õkhõ. 3 Hulõ geu sowua, nitanõ ba mbewe nidanõ, zi manõ, sowua buania na inõtõ. Bulunia, ba tebai aleu, ba hadia ia nifazõkhinia, ba mofozu. 4 Ba tenga si manõ zebua horõ andrõ; tobali sa hulõ gadaya ira, ni’oloi’õ nangi. 5 Andrõ tebai manaha zebua horõ andrõ, no tefatõrõ huku, ba lõ aro zolalõ andrõ, ba mbanua zateolõ. 6 Noa sa i’ila Yehowa lala zatulõ, ba lala zebua horõ andrõ, ba si lõ fozu. Famotokhi Taromali Lowalangi Sinanõ ba dõdõ tehalõ moroi ba zura Sinunö 1 : 1a Ya’ahowu niha si lõ molo’õ nikhoi dõdõ zebua horõ andrõ. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 147 No möi’Ö ba wamé buala, khö ndra nifaha’ö-U föna. Andrö ondrasi göi ndra’aga, dozi sowulo ba da’a. Fazawa danga-Mö yawama, fa’ema howuhowu khöma. He Yesu, oroma’ö khöma, zifaudu göiba dödö-Mö. Afu oroma khöma horö, nilauma ero ma’ökhö. Be’e aefa fefu horöma, Ya’ugö khöma zangatulö. Me tana khö-U sa’ae ndra’aga, da mangandröga ba döi-Mö. Bokai dödöma ba wanema, taroma li soroi khö-Mö. Ya hasara fefu dödöma, ba wamalua somasi’Ö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 313 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***