31 Desember 2023 (Bahasa Nias)

Minggu, 31 Desember 2022 (Akhir Tahun) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, ma’owai ami fefu ba gangohorita ndröfi andre, ba döi Zo’aya ya’ita Yesu Keriso. Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 22 Ae dönisi göi dödögu, wanöngöni nilau-Mö. Ba bokai hörö dödögu, fa u’ila dödö-Mö. No fahöna wa’omasi, fatolosa, fangorifi. Fa’ahakhö dödö-Mö, fefu mbörö ba da’ö. He abu sibai dödögu, na gönado fotu-Mö. Ba wangoroma’ö khögu, fa’omasi-Mö andrö. Da’ö lala ba wogaoni, ya’odo ba wangorifi. Lö omasi Ndra’ugö, na te’ala ndra’odo. Fondrorogö nama ono, wondrorogö-Mö ya’o. Hulö ae ba gafi moyo, wolohe-Mö ya’odo. Na so mbaho fama’ala, Ötaya fa böi te’ala. Na so hili wamakao, Ö’onoro, Öfasao. No fahöna howuhowu, ha wa’oya mbuala-U. No Ötandrösaigö khögu, wangorifi mbanua-U. Ha khö-U u’ohe zinunö, ba fangandrö saohagölö. Ya sumange-Mö ndra’o, khö-U ululu ndra’odo. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Mi’andrõ saohagõlõ khõ Yehowa, me si sõkhi tõdõ Ia; me no si lõ aetu wa’ebua dõdõ-Nia andrõ. Mi’andrõ saohagõlõ khõ Lowalangi andrõ, me no si lõ aetu wa’ebua dõdõ-Nia andrõ. Mi’andrõ saohagõlõ khõ Zo’aya Sokhõ andrõ, me no si lõ aetu wa’ebua dõdõ-Nia andrõ (Sinunö 136:1-3). HALELUYA! Liturgos : Mangandrõ ita, "He Yehowa Lowalangima, si no umbu wa’omasi ba howuhowu. Möiga khö-U mangalulu ba wangandrö saohagölö me lö si faröi Ndra’ugö khöma ba zi döfi fa’ara, irege no marugi gangohorita ndröfi bongi andre. Lö mamalö matou’öga ba danga-U ba ndröfi mifönama. Ma’andrö khö-U, rorogöga ba wanohugö fekolima. Fatöröga ba lala andrö khö-U, ba fahaö ndra’aga ba wango’aurifagö fa’omasi, he ba wangomasi’öma Ya’ugö, ba si manö göi ba wangomasi’öma awöma niha awö niwöwöi fefu. Ya’ugö gubaloma samatörö ya’aga ba si lö faröi khöma. Yaduhu!" Mudadao Zato Liturgos : Manunõ ita moroi ba Mbuku Zinunõ No. 249 Ya monahia khöma, daromali-U andrö. Afu lö maböhöli wanara lahe-Mö. Be’e khöma wangöna, si’otarai khö-Mö. Böbölöwi si duhu baru fa’atulö. Be’e wa’anau gölö, wolau fasöndrata. Bè mbaluse famati ba föda Eheha. Tologa watelesa, wolawa uduma. Aro’ö wamatima, anau’ö gölöma. He Lowalangi Ama, rorogö ndra’aga. Eheha-Mö bè khöma, same’e femöna. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunӧ 23 : 1 - 6 1 Yehowa gubalogu, lõ ambõ ndra’o hadia ia. 2 Ibe’e molombase ndra’o, ba zodu’u sauri, ba i’ohe ndra’o ba zinga nidanõ sahonohono ndra’odo. 3 I’okafui dõdõgu; ifatõrõ ndra’o ba lala satulõ, bõrõ dõinia andrõ. 4 Ba he utõrõ mbawa danõ andrõ, si gõna lumõ wa’amate andrõ, ba lõ ata’udo zi lõ sõkhi; awõgu sa ndra’ugõ; si’ou andrõ ba we’ewe’e andrõ khõu, da’õ wondrara dõdõgu. 5 Õfa’oli gõgu fõnagu, fametahõ zi fa’udu khõgu; õbayoini fanikha hõgõgu, õfo’õsi khõgu mako, õfõnui. 6 Ha sambalõ si sõkhi ba fa’ebua dõdõ zolo’õlo’õ ya’odo, sagõtõ ya’o; ba si lõ tebulõ ba nomo Yehowa ndra’odo, sagõtõ fa’ara. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö andre, Ya’ugõ si maulu fa’ahakhö dödö, ba wangalulu ba ba wangandrö saohagölö-U howuhowu si no falukha ndra’aga zi döfi fa’ara, irege no tola makhamö gangohorita ndröfi andre. Mafaduhu’ö wa tenga si nangea ndra’aga tanö föna-Mö, me no fahöna zala olalöwa si no mafalua ba zi döfi fa’ara, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhödödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ndröfi fönama si faudu ba zomasi Ndra’ugö. " Jemaat : Mangandrö ba dödö zamösana föna Lowalangi... 1 irugi 2 meniti. Liturgos : Hakhösi dödö-U khöma, Ama, ba be’e aefa khöma horöma andrö ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Mitabu! Iwa’õ Yehowa, da talau fa’era! He no hulõ gasumbo wa’oyo horõmi, ba hulõ muko safusi dania; ba he no hulõ mbaru luo wa’oyo, ba hulõ mbu mbiribiri dania. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Efeso 1 : 3 - 6 3 Nisuno Lowalangi Zo’aya ya’ita, Yesu Keriso, Amania, si no mamahowu’õ ya’ita, fefu ngawalõ wamahowu’õ Geheha andrõ, ba zorugo, ba khõ Keriso. 4 Itõrõ wanutuyunia ya’ita, ba khõnia andrõ, fõna wolata tanõ, ena’õ sohauhau ita, si lõ sinegu, fõnania. 5 Moroi ba wa’omasinia ita, wa no ihõnagõ ihonogõi, ena’õ ono ita khõnia, moroi khõ Yesu Keriso, dali zomasi ia, nilau dõdõnia; 6 ba wanuno lakhõmi wa’ebua dõdõnia, ni’amualagõnia khõda, ba zomasi ia andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yeremia 31 : 7 - 9 7 Imane sa Yehowa: Mi’anunõ ba wa’omuso dõdõ, ba khõ ma’uwu Yakobo, mikaraini wa’iki, bõrõ hõgõ soi andrõ! Mi’ebua’õ li wanunõ, mimane: Orifi mbanuau andrõ, si tosai Iraono Gizeraëli, ya’ugõ Yehowa! 8 Hiza, u’ohe mangawuli ira moroi yõu, u’ozaragõ ira moroi ba wondrege danõ — fao zi lõ hõrõ ba sogombuyumbuyu tõla ba sanabina ba sawena madono fefu: ato sibai ira, wangawuli ba da’e! 9 Mege’ege ira wa’aso ba fakao: ufasao ira, u’ohe ba gumbu; lala si fadaya nitõrõ, si tebai manendre ira; noa sa tobali ama Ndraono Gizeraëli ndra’odo ba si a’a nonogu mado Geferayi! Famotokhi Taromali Lowalangi Sinanõ ba dõdõ tehalõ moroi ba zura Sinunӧ 23 : 1 Yehowa gubalogu, lӧ ambӧ ndra’o hadia ia. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA Liturgos : Manunõ ita moroi ba Mbuku Zinunõ No. 245 Oya zo’amböta ita, ba lala wekolida. I’u’uni wa’aurida, fanandraigö, fangala. Ha Yesu zamaigi lala, fa lö te’ala ita. Böi so wangiwa dödöda, wangandrö khö Zo’aya. No sebolo tödö Ia, solomasi ba niha. Na ta’ogorofi horö, Ibe’e ni’andröda. Fefu gabula dödöda, awö wa’atosasa. Da tatunö föna-Nia, Ya’ia zamolala. Irongo gangandröwada, na moroi ba dödöda. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 256 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***