26 November 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 26 November 2022 (Fanӧrӧtӧdӧ Fa’auri si lӧ aetu) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya. Ma’ökhö andre no tarugi ba Gangohorita Ndröfi Niha Keriso. Ya sowuawua tödö ita ba we’amöi föna Keriso ba wanötöna fa’auri si lö aetu. Ma’owai ami ba döi Zo’aya ya’ita Yesus Keriso, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 431 Haga-Nia zangoroma, lalagu ba gulidanö. Ha khö-Nia utötöna, wogamö so’ahonoa, naha sohahau dödö. Wa’asökhi, molakhömi, naha Razo Wa’atulö. Sawatö so’ahonoa, si so omusola dödö, si lö tebulöbulö. Ambö ligu wamatunö, ni’ilagu na urugi. Ba nahia Lowalangi, si no maulu fa’asökhi, ba zowulo samati. Mangandrödo khö-U, he Yesu, be’e omuso dödögu. He na uröi gulidanö, ha sambalö zawatögu, nahia si so Yesu. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Si manõ zi mõna andrõ, nifonukha nukha safusi, ba lõ’õ manõ sa’ae Ubunu dõinia ba zura wa’auri andrõ, ba U’ombakha’õ dõinia, ba zi so Amagu, ba ba zi so mala’ika andrõ khõ-Nia! HALELUYA! Liturgos : Mangandrõ ita, "He So’aya ya’aga Yesu Keriso, Lowalangi sauri ba sangorifi. He matörö mbawa danö si göna lumö wa’amate, ba lö khöma fa’ata’u, me no Ya’ugö Gubaloma, sondrorogö ya’aga. Tebai i’alani ndra’aga fa’amate, me no Ya’ugö zangorifi ya’aga. Möiga khö-U ba wanou’ö boto awö nosoma, me no Ya’ugö zokhö ba samatörö fa’auri ba fa’amatema. He Ama ma’andrö khö-U, rorogö ba fatöröga ba zomasi Ndra’ugö irugi gamozua, famakhamö nahia ba zi so Ya’ugö. Si lö mamalömalö nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö. Yaduhu!" Mudadao Zato Liturgos : Manunõ ita moroi ba Mbuku Zinunõ No. 460 Ihawui ndra’odo fa’ata’u, wolawa emaligu. Me no sambö’ambö wamatigu, wangomasi’ö Yesu. Andrö u’alui Yesu, kubalogu, sangaro’ö famatigu. Afu tola urugi khamötögu, fa’auri si lö aetu. He Yesu, fasugi ba dödögu, wangorifi nosogu. Ena’ö böi arörö dödögu, ba zi lö manö fozu. He Yesu, tolo ndra’o, ae awögu, ba wanörö fekoligu. Fa ukhamö gohitö wa’aurigu, nahia si so Yesu. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yesaya 65 : 17 - 23 17 Hiza sa, uwõwõi mbanua si yawa si bohou ba tanõ si bohou, ba lõ’õ sa’ae itõrõ tõdõ zi fõfõna andrõ, lõ’õ sa’ae i’angeragõ niha! 18 Ba owuawua dõdõ ba ma’iki’iki ba niwõwõigu andrõ si lõ mamalõmalõ; hiza sa, ma’iki’iki Yeruzalema ba wamazõkhigu ya’ia ba owuawua dõdõ nõsi mbanua! 19 Ba sa’iki’iki bakha dõdõgu, bõrõ Yeruzalema andrõ, ba sowuawua dõdõgu mbanuagu, ba lõ’õ sa’ae terongo ba khõra li wege’ege ba he li wangarõngarõ. 20 Lõ’õ sa’ae ba da’õ ono sawuyu, si ha ba ngaluo fa’anau noso, ba lõ satua, si lõ a’ozu noso; mate ono matua, na no otu fakhe ba si ha otu fakhe, ba si so horõ, si no gõna fangelifi. 21 Ba lalau nomo, ba la’onahia gõi; lafazõkhi kabu nagu ba la’a mbua. 22 Tenga solau omo ira, ba tánõ bõ’õ zi onahia ba tenga sananõ sinanõ, ba tánõ bõ’õ zi manga mbua; fa’ara dõla geu sa’ae wa’anau noso mbanuagu andrõ, ba õlõ dangara, ba nitutuyugu andrõ zi oguna’õ. 23 Tenga serege tõdõ ira, ba zayazaya gõlõ, ba tenga so’ono, ena’õ itõrõ famakhõ. Nga’õtõ sebua howuhowu sa’ae ira khõ Yehowa, ba so ba ngaira madoura. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 24 : 29 - 36 29 Ba aefa si’aikõ wamakao andrõ, na luo da’õ, ba taya haga luo, ba lõ’õ sa’ae humaga mbawa, ba atoru ndrõfi moroi ba mbanua si yawa, ba humeuheu wangaro mbanua si yawa. 30 Ba aefa da’õ, ba oroma dandra Nono Niha andrõ ba mbanua si yawa, ba mege’ege fefu soi ba guli danõ, ba la’ila dania Nono Niha, si so moroi si yawa, ba dete lawuo ba mbanua, fao wa’abõlõ ba lakhõmi sebua. 31 Ba ifatenge mala’ikania, telau dorofe sebua li, ba la’owuloi khõnia nitutuyunia andrõ, moroi ba zi fasui, i’otarai wondrege danõ, numalõ ba wondregenia tánõ sa. 32 Ba ba marafala mitõngõni wamaedo andrõ: Na mo’idanõ ndrahania, na tumbu lehelehe, ba mi’ila, no ahatõ mbawa wa’aukhu zino. 33 Si manõ gõi ami, na mi’ila da’õ fefu, ba oroma khõmi, no ahatõ ia. 34 Si ndruhu niwa’õgu khõmi, lõ fakhamõ atua niha si sagõtõ andre, ba no alua da’õ fefu. 35 Atua mbanua ba atua danõ, ba lõ awu’a niwa’õgu. 36 Ba bawa andrõ ba inõtõ, ba lõ sangila, he mala’ika ba zorugo, he Ono; ha Ama zangila. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Pengkhotbah : Fatua lö tabaso mbörö huhuo da tafondrondrongo ha wa’ato zi tumbu awö zi no mate barö ndröfi andre. Situmbu: - Ira matua: 31 niha - Ira alawe : 27 niha Jumlah       : 58 niha Simate: - Satua   : 30 niha - Iraono : 4 niha Jumlah : 34 niha Pengkhotbah : Musindro Zato... Manunõ ita moroi ba Mbuku Zinunõ No. 410:1 [Fombaso Taroma li, moroi ba Roma 14:7-9] 7 Lõ’õ sa ba khõda sauri, ba khõnia manõ, ba lõ si mate, ba khõnia manõ. 8 Na auri ita sa, ba khõ Zo’aya wa’aurida, ba na mate ita, ba khõ Zo’aya wa’amateda; tobali, he sauri ita, ba he si mate ita, ba khõ Zo’aya ita. 9 Da’õ sa mbõrõ, wa mate Keriso, awõ wa no ifuli auri, ena’õ ifatõrõ zi no mate, awõ zauri. Pengkhotbah : Manunõ ita moroi ba Mbuku Zinunõ No. 410:2 [Fombaso Taroma li, moroi ba I Korindro 15:54b-57] 54b Ba awena itõrõ daroma li andrõ, si so ba zura: ”No alõmõ wa’amate andrõ ba wemõna. 55 Hezo wemõnau, fa’amate? Hezo duomõ, fa’amate?” 56 Ba tuo wa’amate andrõ, ba ya’ia horõ andrõ, ba fa’abõlõ horõ andrõ, ba ya’ia goroisa. 57 Ba nisuno Lowalangi same’e khõda femõna andrõ, moroi khõ Zo’aya ya’ita andrõ, Yesu Keriso. Pengkhotbah : Manunõ ita moroi ba Mbuku Zinunõ No. 410:3 Fombaso Taroma Li Lowalangi moroi ba zura Fama’ele’ӧ 21 : 1 - 4 1 Ba u’ila mbanua si yawa, si bohou, ba tanõ si bohou; noa sa numalõ mbanua si yawa si fõfõna, awõ danõ si fõfõna andrõ, ba lõ asi sa’ae. 2 Ba u’ila mbanua ni’amoni’õ andrõ, Yeruzalema si bohou, silalõ mitou moroi ba mbanua si yawa, moroi ba Lowalangi, nihaogõ, hulõ nono nihalõ, si no mangehao khõ zangai ya’ia. 3 Ba urongo li sebua, moroi ba dadaoma andrõ, imane: Hiza nose Lowalangi andrõ ba niha, ba mowanua ia ba khõra, ba ya’ira, ba banuania, ba ya’ia, Lowalangi, ba awõra, 4 ba i’osi dania dawa hõrõ fefu, ba hõrõra, ba lõ fa’amate sa’ae, ba lõ fa’abu dõdõ, ba lõ fege’ege, ba lõ fa’afõkhõ sa’ae, me no numalõ zi fõfõna andrõ. Famotokhi Taromali Lowalangi Sinanõ ba dõdõ tehalõ moroi ba zura Yesaya 65 : 17 - 23 Hiza sa, uwӧwӧi mbanua si yaẅa si bohou ba tanӧ si bohou, ba lӧ’ӧ sa’ae itӧrӧ tӧdӧ zi fӧfӧna andrӧ, lӧ’ӧ sa’ae i’angeragӧ niha. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 429 Humulu sibai dödögu, wombase’ö samaondragö ya’odo. Afu faodo ba zanunö, sanunonuno So’aya, Keriso. Fefu zomasi ndra’odo, toröi furi ba gulidanö andre. Omasido wa’ahono, ba nahia ba zi lö fa’amate. Fefu zi toröi furigu, lö ufaigi me saro khamötögu. Fefu nidönadönagu, no tohöna so khö Keriso Yesu. Fondrondrongo wangandrögu, he So’aya, aro’ö wamatigu. Ena’ö anau gölögu, wanötöna naha ba zi so Yesu. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 426 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***