12 November 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 12 November 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 2 Suno Zo’aya me Ibè mbuala, me Idozigö wame’e si sökhi. Ba no fahöna Ibè ba zamati, suno Zo’aya. Suno Zo’aya Irorogö ita, I’ohe ita ba lala satulö. Dozi niha sedöna ae molo’ö, suno Zo’aya. Suno Zo’aya me lö aefa’aefa, oi Ihörögö zamati khö-Nia. Afu khö-Nia manötöna ira, suno Zo’aya. Suno Zo’aya me kubalo Ia, Ifolombase, Ibe’e zabönö. Ifasao ita ba zahono dödö, suno Zo’aya. Suno Zo’aya sanimba te’ala, si no elungu, I’ohe ba lala. Ibe’e wotu ba famangelama, suno Zo’aya. Suno Zo’aya solului khöda, na tebai ita ba wolawa horö. Itolo ita ba wasöndratada, suno Zo’aya. Suno Zo’aya me Ibe Geheha, sondrara tödö na tosasa ita. Oi Ifasao, Itolo göi ba lala, suno Zo’aya. Suno Zo’aya si lö faröi khöda, he no faröi khöda fefu nawöda. Lö sa faröi khöda Lowalangida, suno Zo’aya. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 213 No tenga sa sinangea, ndra’odo föna-U, Yesu. No usawö, no ulawa, goroisa ma’afefu. Ba gamuatagu andrö, no u’o’aya göi döi-Mö, he Yesu, orifido. No abu sibai dödögu, andrö mangaluludo. Lö baero Ndra’ugö, Yesu, sabölö ba wanolo. Andrö mangesa dödögu, ba horö fefu nilaugu, he Yesu, orifido. He Yesu, da u’andrö khö-U, be’e aefa horögu. Usao’ö fefu föna-Mö, khö-U ululu dödögu. Duhu, do-Mö wangefa’ö, horö nösi gulidanö, he Yesu, orifido. Andrö u’o’ö Ndra’ugö, me faduhu dödögu. Wa lö sa baero Ndra’ugö, zangefa’ö horögu. He Yesu, hakhösi tödö-U, temado ba wa’omasi-U, he Yesu, orifido. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Amosi 5 : 18 - 20 18 Alai zomasi na alio irugi bawa andrõ khõ Yehowa! Hadia guna mbawa andrõ khõ Yehowa khõmi? Fa’ogõmigõmi dania ia, ba tenga haga! 19 Hulõ zi falukha berua, na no moloi ia ba zingo, ba nidou ulõ, na no irugi yomo, ba na itufa tangania dowa. 20 Hiza, fa’ogõmigõmi dania mbawa andrõ, khõ Yehowa, ba tenga haga; sogõmigõmi, ba tenga sihaga! Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Luka 12 : 35 - 40 35 Bõi aefa’aefa mbõbõ talu ba lõwilõwimi, ba bõi matemate wandrumi, 36 ya hulõ niha sombalombaloi sokhõ ya’ira ami, na mangawuli ia moroi ba walõwa, ena’õ i’anema’õ labokai khõnia, na so ia, na ibõkõ mbawandruhõ. 37 Ya’ahowu zawuyu andrõ, na lõ mõrõ ira i’ila sokhõ ya’ira, na so ia; si ndruhu niwa’õgu khõmi, molembe ia dania, ifedadao ira ba mõi ia ngoningonira. 38 Ba na so ia, na no mõrõ niha ba ma na no aefa talu mbongi, ba na si manõ zui, i’ila, ba ya’ahowu ira. 39 Ba bõi zi lõ aboto ba dõdõmi da’õ: Na no i’ila ena’õ sokhõ omo ha wa’alawa mbóngi so zanagõ, ba lõ ifa’amõi ba nomonia ena’õ. 40 Ba ya’ami gõi, mifa’anõ ami, na lõ midõnadõna sa dania so Nono Niha. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura I Tesalonika 5 : 1 - 11 5 Ono haga sa ami fefu, ono zi ma’õkhõ; tenga ba zi bongi so ita, ba tenga ba zogõmigõmi. 6 Ba bõi mõrõmõrõ ita, si mane tánõ bõ’õ andrõ, ena’õ si no maoso ita, si lõ mabumabu. 7 Si mõrõ sa, ba ba zi bongi mõrõ, ba si mabu andrõ, ba ba zi bongi mabu. 8 Ba ya’ita, me no ba zi ma’?khõ ita, ba bõi mabumabu ita, ta’obaru gõrõba famati andrõ, ba õrõba fa’omasi, ba ta’otakula dakula andrõ, fanõtõna fangorifi. 9 Tenga sa ba wamatõrõ fõnu khõda ihonogõi ita Lowalangi, ha ba wanõndra fangorifi, ba khõ Zo’aya ya’ita, Yesu Keriso, 10 si no mate salahida, ena’õ auri ita, fao khõnia, awõnia, he si no maoso, ba he si mõrõ ita. 11 Andrõ faoma mifaraou dõdõ nawõmi, ba faoma mitolo nawõmi, si mane folaumi sa’ae gõi. (Heb. 10, 24 b. t.). Famotokhi Taromali Lowalangi Sinanõ ba dõdõ tehalõ moroi ba zura I Tesalonika 5 : 11 "Andrӧ faoma mifarou dӧdӧ nawӧmi, ba faoma mitolo nawӧmi, simane folaumi sa’ae gӧi." Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 159 Da u’andrö khö-U, So’aya, bè khögu Geheha-Mö. Solawa tanömö horö, na maoso ae ba dödö. Atulö’ö, So’aya, fefu ngawalö zala. Ha khö-Mö sa so wangefa, ba ngawalö golalöwa. Humulu sibai dödögu, ba wogamö si so’Ö. Ba no si tebai ndra’odo, si lö fa’anaugölö. U’andrö khö-U, So’aya, be’e khögu Geheha. Afu tola sa ukhamö, wa’auri ba zi so Ama. He Keriso, Sangöhöli, Ya’ugö dötönafö. Samahaö ba sangorifi, solohe ba zawatö. Öhagaini dödögu, wangoroma’ö khögu. Wa no fahöna horögu, si tobali famunugu. Ba u’andrö khö-U So’aya dou’ö na wamatigu. Ha khö-U faduhu dödögu, sisökhi Öbè khögu. Ha Ya’ugö höligu, sangefa’ö horögu. Fefu ngawalö nilaugu, simöi langu wa’aurigu. Humulu sibai dödögu, ba wogamö naha-Mö. Niha si tebai ndra’odo, lö khögu fa’abölö. Ha Ya’ugö lalagu, fa’auri, fa’aduhu. Fa mofozu wa’aurigu, irugi ba zi lö aetu. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 442 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***