[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI
Liturgos : Ya’ami banua niha Keriso, Ya’ahowu ami ba döi Zo’aya, (I Kor 16:22). Maranata!!!
Jemaat : Maranata!!!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
(Möi ba meza Altar Zangai Huhuo Sebua, ba imane): “Ma’ökhö andre migu Adefe si Sara khöda. Eluaha Adefe si Sara andre ya’ia da’ö: “Fa’aro Wanötöna ba wombaloi Fa’atohare Zo’aya ba luo safuri” (Aefa da’ö, itunu Lili molo’õ migu Adefe)
FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No.
36
- Lowalangima So’aya, solomasi khöma.
Si no mamatenge khöma Keriso So’aya.
Ba wangorifi ya’aga, si no elungu taya.
Masuno’Ö Haleluya.
- No tumbu Ia ba kandra, ba Mbetilekhema.
Iröi lakhömi sebua ba zorugo yawa.
Möi Ia tou ba danöda, tobali ösi niha.
Masuno’Ö Haleluya.
- Tatema Ia tödöda me fangorifida.
Me khöda sa manandrösa, we’aso Mesia.
Ya’ia zindruhu haga, sohagaini tödöda.
Masuno’Ö Haleluya.
- He So’aya ae tologa, hagaini dödöma.
Ena’ö mo’ahonoa Ndra’ugö ba khöma.
Duhu möi fangorifima li-Mö niwa’ö-U khöma.
Masuno’Ö Haleluya.
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Hiza, möi yomo ba mbanua khömi razomi, razo satulö ba sabölö (Zakharia 9:9b). MARANATA
Liturgos : Mangandrõ ita, "He Yehowa Lowalangima, somböi banua si yawa awö danö. No fa’ebua dödö-U khöma wa no tola marugi mböröta ndröfi ba wa’aniha Keriso. Abölö’ö ndra’aga Eheha-Mö andrö Ni’amoni’ö, ena’ö so khöma mbuabua wamalalini era’era, ba ena’ö soŵa’a, sanöi ba sowua ndra’aga ba wamati ba wamaondragö fa’atohare Zo’aya ya’aga Yesu Keriso. Be’e khöma wehi’a dödö, fangosindruhugö ba fa lö faröi ba wango’aurifagö taroma Li-Mö, ena’ö samonga’eu fa’omasi, fa’atulö, fangefa, ba fa’ohahau dödö ndra’aga fefu irugi we’aso-Mö andrö si mendrua, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
39
- He Yesu no Ötehe möi’Ö tou ba gulidanö.
Ba wolo’ö li Nama, ba wolohe fangatulö.
Duhu wa somasi’Ö ba wangalui si so horö.
Ena’ö lö tehuku dozi samati khö-Mö.
- Tödöma mafa’anö ba wamaondragö Ya’ugö.
Botoma ba fa’aurima malulu sumange-Mö.
He So’aya tologa be’e khöma Geheha-Mö.
Sangabölö ya’aga wanema’ö Ya’ugö.
- Yae dödö si ta’unö, ma’ohe gametahö-Mö.
Fao fangidengide’ö fangalulu soroi dödö.
He Yesu ma’andrö khö-U, bohouni ba atulö’ö.
Ya tobali sumange-U si lö mamalömalö.
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura
II Moze 20 : 1 - 17
1 Ba iwa’õ daroma li andrõ fefu Yehowa, imane:
2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami.
3 Bõi so khõmõ Lowalangi tánõ bõ’õ, baero ndra’o.
4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ.
5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu,
6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ.
7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya.
8 Ame’egõ tõdõ luo wolombase andrõ, ba we’amoni’õ ya’ia.
9 Õnõ ngaluo mohalõwõ ndra’ugõ ba õhalõ halõwõu fefu.
10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha.
11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ.
12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu.
13 Bõi ange’e.
14 Bõi ohorõ.
15 Bõi anagõ.
16 Bõi bõbõgõ khõ nawõu zi lõ duhu.
17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 3 : 2
FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama Ni’amoni’ö, möiga ma’ondrasi dadaoma wa’ahakhö dödö-U ba wangandrö fangefa horö ba ngawalö nilauma si lö sökhi. Ma’andrö wa’ebolo dödö-U Ama ba wa’oya golalöwama, he nifaluama ba ndraonoma, khö ndra satuama, ba dalifusöma, ba ba niha fefu. Ma’andrö bologö dödö-U khöma me asese iböbö ndra’aga amuata fa’afökhö dödö, fayawasa, ba fönu ba lala wa’auri sero ma’ökhö. Ma’andrö hakhösi dödö-U khöma, sasai fefu horöma ba bohouni ndra’aga ba wamaondragö fa’atohare-Mö. Saohagölö Ama, ba döi Zo’aya ya’aga Yesu Keriso, ma’andrö ni’andröma..."
Liturgos : Mangandrö ba dödö zamösana föna Lowalangi... 1 irugi 2 meniti.
Jemaat : Mangandrö ba dödö...
Liturgos : Hakhösi dödöU khöma, Ama, ba be’e aefa khöma horöma andrö ma’afefu....Yaduhu.
Jemaat : Manunõ moroi ba Mbuku Zinunõ No. 224 : 1
Liturgos : Faya wa no sauri Ndra’o, Iŵa’ö Yehowa na omasi-Do mate zebua horö; somasi Ndra’o na iröi lalania andrö sebua horö, na ifalalini gera’erania, ba na auri ia. Mifalalini gera’erami, miröi lalami andrö, si lö sökhi! Hana sa wa edöna mate ami, ya’ami ni’omasi’ö-Gu? Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura
II Fetero 3 : 11 - 18
11 Ba me sadudu da’õ fefu, ba hadia, lõ miforege wanõrõ lala satulõ andrõ, awõ wangata’ufi Lowalangi?
, 12 ba wanõtõna, ena’õ irugi luo Lowalangi andrõ, ba wehulu dõdõ ba da’õ ya’ia mbõrõ wa adudu mbanua si yawa, ba galitõ, ba bõrõ wa’alau mbõrõtania andrõ, ba wa’akhozi.
13 Ba tadõnadõna mbanua si yawa, si bohou, ba tanõ si bohou, dali gamabu’ula linia andrõ — ba zahono fa’atulõ dõdõ.
14 Andrõ, ya’ami ni’omasi’õ, me midõnadõna zi manõ, ba mi’owõlõ’õlõgõ, ena’õ lõ hadia ia zi tokana ba sinegu khõmi, fõnania, na ifaigi, ba wa’atulõ.
15 Ba fangorifi, miwa’õ tõdõmi, wa’ebolo dõdõ Zo’aya ya’ita andrõ, si mane nisura Waulo gõi khõmi, talifusõda ni’omasi’õ andrõ, ba wa’atuatua andrõ, nibe’e khõnia,
16 si mane fehedenia gõi, na itõrõ linia da’õ, ba zura andrõ, fefu, ba zi so õsa zafõkhõ famotokhi, nifuyu’õ zi lõ mufahaõ andrõ ba si lõ aro tõdõ, si mane sura bõ’õ andrõ gõi, ba wamakiko ya’ira.
17 Ba ya’ami ni’omasi’õ, me no tohõna mi’ila, ba mi’angelama, fa lõ adõni ami gõi ba wa’elungu zi lõ molo’õ andrõ, ba fa lõ tebulõ ami ba wa’aromi andrõ.
18 Ba yatedou khõmi wa’ebua dõdõ andrõ, ba fa’aboto ba dõdõmi Zo’aya ya’ita, Yesu Keriso, sangorifi ya’ita. Ya khõnia zumange, he iada’e, ba he na luo si lõ aetu andrõ.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura
Mareko 13 : 24 - 37
24 Ba na luo da’õ, na no aefa wamakao no mege, ba taya haga luo, ba lõ’õ sa’ae dania muhaga mbawa,
25 ba atoru ndrõfi moroi ba mbanua si yawa, ba humeuheu wangaró andrõ, ba mbanua si yawa.
26 Ba la’ila dania Nono Niha, si so moroi sa ba lawuo, a’oi so wa’abõlõ, awõ lakhõmi.
27 Ba ifatenge dania mala’ikania andrõ, ba i’owuloi nitutuyu andrõ, moroi ba zi fasui, i’otarai wondrege danõ, irugi gahe mbanua ba wondrege tánõ sa.
28 Ba ba marafala mitõngõni wamaedo andrõ. Na mo’idanõ ndrahania, na tumbu lehelehe, ba mi’ila, wa no ahatõ mbawa wa’aukhu zino.
29 Si manõ goi ami, na mi’ila itõrõ da’õ no mege, ba oroma khõmi, no ahato ia.
30 Si ndruhu niwa’õgu khõmi, lõ fakhamõ atua niha si sagõtõ andre, irugi itõrõ da’õ fefu.
31 Atua mbanua si yawa dania ba atua danõ, ba lõ awu’a ligu.
32 Ba bawa andrõ ba inõtõ, ba lõ sangila, mala’ika ba zorugo gõi lõ’õ, Ono gõi lõ’õ, ha Ama zangila.
33 Mifaigi, bõi mifõrõ; lõ’õ sa mi’ila ginõtõ.
34 Hulõ niha sofanõ, sondrõi omonia, same’e ba danga zawuyunia hadia ia khõnia, sanguma’õ halõwõ zamõsana ba sanguma’õ khõ zanaro ba mbawandruhõ, bõi mõrõ ia.
35 Ba bõi mifõrõ, lõ’õ sa mi’ila ginõtõ wa’aso zatua baomo andrõ, na tánõ owi, ba ma na talu mbongi, ba ma na miwo manu, ba ma na moluo,
36 fa bõi mõrõ ami, i’ila, na so ia lõ mudõnadõna.
37 Ba hadia niwa’õgu khõmi, ba khõmi fefu uwa’õ: bõi mifõrõ!
- Famotokhi Taromali Lowalangi
- Sinanõ ba dõdõ tehalõ moroi ba zura
Mareko 13 : 33
Mifaigi, bӧi mifӧrӧ; lӧ’ӧ sa mi’ila ginӧtӧ
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No.
162
- Sihulu tödö wangondrasi, fogaoni Zahakhö tödö.
Ogorofi ngawalö horö, falua wangesa dödö.
Angalulu sifao fangandrö, Ibe’e Yesu wangefa’ö.
- Tebai ahono sa dödöda, na lö mu’efa’ö horö.
Na lö ihagaini Eheha dödöda si no ta’unö.
Samaduhu’ö ba dödöda, wa no tehaogö, no atulö.
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba
Mbuku Zinunõ No.
486
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
Tidak ada komentar:
Posting Komentar