8 Oktober 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 8 Oktober 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 13 Same’e aefa khöu horöu fefu, sangohahau’ö tödömö. Sanolo göi ba sahakhö tödö, ba sondrorogö ya’ugö. Me lö fanolo ba niha, angaröfi li Yehowa, Haleluya, Haleluya. No sahakhö sibai tödö Zo’aya, ba sebua tödö Ia. Oi mo’ola watahisa-Nia, ba oböwö sibai göi na. Lö Isulöni horöda, me sebolo tödö Ia, Haleluya, Haleluya. No tödö nama ba ndraononia, dödö Zo’aya ya’ita. Dozi sangata’ufi Ya’ia, oi Ibönökhi zoguna. Sebua tödö sa Ia, no götögötö wa’ara, Haleluya, Haleluya. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 237 He na tebai ndra’o Öbè wa’abölö. Ba no Öheta horögu bohou wa’aurigu. Reff: Möi ndra’odo khö-U So’aya Yesu... Ökaonido Yesu wangombakha khögu. Famati ba fanötöna he göi fa’omasi-U. Reff: Möi ndra’odo khö-U So’aya Yesu... Nifalua-U Yesu manandrösa khögu. Me Ötayaigö horögu Öbè howuhowu. Reff: Möi ndra’odo khö-U So’aya Yesu... He So’aya Yesu no sa Öfabu’u. Öbe wa’auri sindruhu ba zamati fefu. Reff: Möi ndra’odo khö-U So’aya Yesu... Nisuno Zo’aya solomasi khögu. Do-Nia Ni’amoni’ö möi fa’atulögu. Reff: Möi ndra’odo khö-U So’aya Yesu... FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Amaedola 2 : 1 - 9 1 He onogu, na õtehe huhuogu ba na õtanõ ba dõdõu goroisagu, 2 fa õbe’e mbõrõ dalingau ba wa’atuatua, fa aolo dõdõu ba wangerangera. 3 Na õkaoni wa’aboto ba dõdõ, na õfahede wangila watahõgõ; 4 na õgohi ia, nifolohi firõ, na õ’alualui nifangalungalui girõgirõ si no tobini. — 5 Awena dania aboto ba dõdõu wangata’ufi Yehowa andrõ, ba awena õsõndra wa õ’ila watahõgõ Lowalangi. 6 Yehowa sa zame’e fa’atuatua, ba mbawania alua wa’aboto ba dõdõ, awõ gera’era dõdõ. 7 No ibe’e yawa wangorifi khõ zadõlõ tõdõ, irorogõ zanõrõ lala si sõkhi. 8 Ena’õ lõ tebulõ ira ba lala satulõ ibe’e, ba itimba zi lõ sõkhi ba lala zatulõ tõdõ andrõ khõnia. 9 Awena dania aboto ba dõdõu hadia zatulõ ba hadia lala, awõ wa’adõlõ, awõ fefu zinõrõ si sõkhi. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Luka 11 : 37 - 42 37 Ba me fahuhuo ia, ba i’andrõ khõnia farizaio, samõsa, ena’õ mõi ia manga ahulõ khõnia. Ba mõi ia yomo, manga. 38 Ba ahõlihõli dõdõ warizaio andrõ, me i’ila, lõ ihõnagõ mombanõ Yesu, me awena manga. 39 Ba imane khõnia So’aya: Ya’ami, farizaio ma’õkh?, mihaogõ gero mako ba ero wiga, ba tánõ bakha khõmi, ba oi afõnu nirabu, awõ walõsõkhi. 40 He si lõ tõdõ! tenga ha samõsa zamazõkhi ya’ia, he tánõ baero ba he tánõ bakha? 41 Mibe’e manõ ame’ela ba zi numana zi so yawa, ba hiza, a’oi sa’ae sõkhi khõmi. 42 Ba alai ami farizaio andrõ, me mibe’e zambua ni’ofulu lõnga ba hõwa, awõ ngawalõ gulegule fefu, ba lõ ba dõdõmi huku ba fa’omasi Lowalangi andrõ. Ni’o’õ ena’õ zi sambalõ, ba tenga gõi ni’ositengagõ zi sambalõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yesaya 5 : 1 - 7 1 Ba damanunõdo, udunõdunõ ni’omasi’õgu andrõ, ulau zinunõ zomasido andrõ, wamatunõ kabu nagu andrõ khõnia. Somasido andrõ, ba no mokabu nagu yawa ba hili, ba zi sõkhi tanõ. 2 Ba ifaku ba itutuyu gara, ba itanõ bakha wewe nagu, si sõkhi bua. Ba dalu bakha ilau malige ba ikhao wolazi, ba ibazebaze’õ, ena’õ mowua bua nagu; ba i’owua mbua nagu ndru’u. 3 Ba iya’e, ya’ami banua Yeruzalema ba ya’ami, motõi Iraono Yuda, mi’ohe ba lala huhuo khõma kabu nagu andrõ khõgu. 4 Hadia na nilau mena’õ ba kabu nagu andrõ khõgu, si lõ nilaugu na? Ba hana wa i’owua mbua nagu ndru’u, me udõnadõna zi ndruhu nagu: 5 Ba da’u’ombakha’õ khõmi, he uwisa ba kabu nagu andrõ khõgu: Udeha gõlinia, ena’õ õ zõkha ia, ba ududugõ gõli kara andrõ khõnia, ena’õ lahundrahundra ia. 6 Tobali modu’u ube’e, fa bõi sa’ae laguti ba fa bõi lafaku mbõrõ; ya tumbu za’asa’a mao, awõ lato. Ba utenawa gõi lawuo, fa bõi moteu khõnia. 7 Ba kabu nagu andrõ khõ Yehowa ngahõno, ba ya’ia ma’uwu Gizeraëli, ba no sinanõ omasiõ khõnia Ndraono Yuda. Idõnadõna zadõlõ — ba hiza wange’e; idõnadõna wa’atulõ — ba hiza wangarõngarõ. Famotokhi Taromali Lowalangi Sinanõ ba dõdõ tehalõ moroi ba zura Amosi 5 : 24 Ba enaʼӧ na mangumbungumbu zatulӧ lala, timba nidanӧ; ba huku satulӧ, ba enaʼӧ na timba mbombo, si tebai ogoʼӧ! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 202 Dozi solo’ö Yesu, falukha gakaola. Ni’odela zatana, bakha ba gera’erada. Somasimasi ita, ba gulidanöda. Ifatumbu’ö hokha, awö dödö fayawasa. Ba ni’omasi’öda, mamini horö sa. Tawai sohare ita, zimöi tanömö wangala. Ta’andrö khö Zo’aya, Ibe’e Geheha. Sohagaini tödöda, afu oroma de’ala. Sindruhu li Zo’aya, wa lö faröi Ia. Na lö tebulö ita, wolo’ö niwa’ö-Nia. Me Yesu zifao khöda, böi aombö dödöda. Khö-Nia wa’abölö same’e khöda femöna. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 211 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***