[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI
Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu!
Jemaat : Ya'ahowu!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No.
209
- Do Keriso So’aya da’ö wangorifida.
Möi fangefa horöda na mamati göi ita.
Lö a’ozu tehuku, na no ta’o’ö Yesu.
- Na dalida goroisa ba oi simate ita.
Lö tesöndra zamösa zi lö mo’olalöwa.
Yesu no möi salahi, Itehe ni’elifi.
- Fa’omasi-Mö, Yesu, wa Ötehe nibunu.
Fangefama ba wönu, ena’ö lö tehuku.
Me ebua dödö-Mö, halöga tanakhö-Mö.
- Da ululudo khö-Mö, Yesu sahakhö tödö.
Sawatögu Ndra’ugö, bè khögu Geheha-Mö.
Fosinema göi ndra’o, ba ndro-Mö bohounido.
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA!
Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
228
- Ha wa’asökhi mbu’u li, si no mowa’a ba dödö.
U’omasi’ö Keriso, usuno sa lö mamalö.
Reff : Sökhi ae ginötö...
- Ba dödögu so Keriso, ba dödö-Nia so ndra’o.
Mamatido ba u’o’ö li-Nia ufondrondrongo.
Reff : Sökhi ae ginötö...
- Ahono sa’ae dödögu, me Yesu we’ewe’egu.
Ba lö manö uröi Yesu me umbu wangorifigu.
Reff : Sökhi ae ginötö...
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura
Sinunӧ 27 : 1 - 6
1 Haga khõgu Yehowa ba fangorifi, ha niha zata’u ndra’o? ba’aba’a khõgu ba nosogu Yehowa, ha niha zi tokea ndra’o?
2 Na lahatõ’õ ira khõgu sanao horõ, ba wemanga õsigu — si fa’udu khõgu ba si fatiu tõdõ — ba manendre ira ba alau.
3 Na latarogõ ndra’o sanuwõ, ba lõ ata’u dõdõgu; na tesuwõ ndra’o, ba lõ abu dõdõgu.
4 Sambalõ u’andrõ khõ Yehowa, da’õ zihulu dodõgu: ena’õ monahia ndra’o ba nomo Yehowa andrõ, gõtõ wa’anau nosogu, ba wamaigi fa’asõkhi Yehowa andrõ ba ba wangomusoi’õ tõdõgu ba gosalinia.
5 Ifonaha sa’ae ndra’o baose, na bawa wamunu, ibini’õ ndra’o ba mbinimbini ba nosenia andrõ; i’alawa’õ yawa ndra’o ba dete gowe.
6 Ba tefaõga mbawagu yawa zi fa’udu khõgu, si tefasui ya’o, ba sumange nilau torofe ube’e ba nosenia, manunõ ndra’o khõ Yehowa ba ulau mbiola.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1
FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!"
Jemaat : Manunõ moroi ba Mbuku Zinunõ No. 224 : 1
Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura
Luka 10 : 21 - 24
21 Me luo da’õ owuawua dõdõnia, soroi ba Geheha ni’amoni’õ, ba imane: Usuno ndra’ugõ, Ama, So’aya sorugo awõ danõ, me no õbini’õ da’õ ba zatuatua ba ba zonekhe, ba me no õ’oroma’õ ia ba ndraono. Si ndruhu, ya’ugõ, Ama, me no si manõ wa’omasiu.
22 Ba ibali’õ ia furi ba nifahaõnia, imane: No ibe’e ba dangagu Amagu fefu hadia ia, ba lõ saboto ba dõdõ ha niha Nono andrõ, baero Nama andrõ, ba lõ saboto ba dõdõ ha niha Nama andrõ, baero Nono andrõ, awõ ba zedõna i’oroma’õ Ono andrõ.
23 Ba ibali’õ ia furi ba nifahaõnia, ba zi ha ya’ira, imane: Ya’ahowu hõrõ andrõ, sangila ni’ilami andrõ.
24 Uwa’õ sa khõmi: Ato zama’ele’õ, awõ zalawa, somasi mangila ni’ilami, ba lõ ni’ilara, ba no omasi ira mamondrongo nirongomi, ba lõ nirongora.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura
Yesaya 45 : 1 - 7
1 Da’õ niwa’õ Yehowa khõ nibayoininia andrõ, khõ Kiro andrõ — nira’ugu tanga kambõlõ, ba wanguhundragõ fõnania soi niha ba ba wameta bõbõ talu razo, ena’õ teboka mbawandruhõ fõnania ba ena’õ tenga nikusi sa’ae mbawa gõli:
2 Mowaõwaõdo fõnau ba ufadaya zobu’ubu’u: lagõ mbawandruhõ tõla, ba urasa, ba lazi si’õli, ba u’ewa.
3 Ba ube’e khõu girõgirõ andrõ, si so ba zogõmigõmi ba ana’a andrõ nibini’õ sibai ubokai khõu, ena’õ aboto ba dõdõu, wa no ya’odo zanõtõi tõimõ andrõ, ya’odo andre, Lowalangi Ndraono Gizeraëli andre.
4 Bõrõ genonigu Yakobo andrõ ba Izeraëli, nituyugu andrõ, wa utõtoi dõimõ, wa ufatõrõ gamalalata dõimõ, me lõ’õ na õ’ila ndra’odo.
5 Ya’odo Yehowa, ba tenga bõ’õ, lõ Lowalangi baerogu. Ya’o zamobõbõ talu ya’ugõ, me lõ õ’ilado na.
6 Ena’õ aboto ba dõdõ niha, ba gatumbukha ba ba gaekhula, wa lõ ha niha baerogu; ya’odó Yehowa, ba baerogu, ba lõ’õ.
7 Ya’odo zamazõkhi haga, ya’odo zombõi sogõmigõmi ba samalua fangorifi, ba samatõrõ famakao, — ya’odo, Yehowa, zolau da’õ fefu.
- Famotokhi Taromali Lowalangi
- Sinanõ ba dõdõ tehalõ moroi ba zura
Sinunӧ 27 : 1a
Haga khӧgu Yehowa ba fangorifi.
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No.
307
- Börö Keriso Yesu, si möi salahigu.
Wa usöndra wangefa, ba huku horögu.
Fefu niwa’ö-Nia, ufati me duhu.
Wa tebai möi khö Nama, zi lö mendrua tumbu.
- Ba fa’omuso dödö, khö Yesu a’oi so.
He bongi, he ma’ökhö, Ya’ia nawö fao.
Si lö fabali Ia, sanolo, samasao.
Ululu wa’aurigu, ba danga Keriso.
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba
Mbuku Zinunõ No.
400
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
Tidak ada komentar:
Posting Komentar