24 September 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 24 September 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 18 No Ifa’ema khöda, daroma li fangorifi. Si möi fangefa horö, börö Yesu, Sangöhöli. Sebua tödö Ia, ba solakhömi göi. Ibè wa’anau gölö, ena’ö lö faröi, Ba fefu golalöwa, no oi te’asiwai. Börö Keriso, Yesu, same’e fa’auri. No amaedola nama, sondrorogö ononia. Töra wolau Zo’aya, ba zi numana tödö sa. Hewa’ae side’ide, ba si lö moguna. No amaedola mbunga, sagalio taya. Manö wa’auri niha lö mo’ahonoa. Lö sa faröi Zo’aya ba dana khö-Nia. Fao khöda Lowalangi, irugi ba zi lö aetu. Me duhu lö tewu’a, fefu zi no Ifabu’u. Ya’ia sa Yehowa, Fondrege Zalawa. Fefu niwöwöi-Nia, sanuno Ya’ia. Fao awö mala’ika, oi enoni-Nia. He tödö, da tasuno, Lowalangi, Ama. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 230 Ya’odo niha si lö sökhi, ba no omasi’Ö Yesu. Horögu fefu Öbè aefa, Öbohounido Eheha-U. Börö wemöna-Mö, Yesu, zanga’aro’ö tödögu, ba wogamö sawatögu. Mo’ömödo ba wama’ema, uturiaigö ba niha. Fefu zifalukha ndra’odo, nitemagu khö Zo’aya. He Ama abölö’ö na, ndra’odo ba wangombakha, turia röfa Zo’aya. Tebai manö sa olifudo, wa’ebuadödö Nama. Ba zi sandrohu fa’aurigu, fa’omasi-U no utema. He tosasa, he numana, he göna fa’ate’ala, lö uböhöli Zo’aya. Ba matötöna khö-U he Ama, wa Örorogö ndra’aga. Börö Nono-U Yesu Keriso, OnoWondrege Zalawa. Taromali-U gaurifama, si lö tebulö he ara, irugi ba gamozua. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Yesaya 54 : 7 - 10 7 Duhu, no u’erogõ ndra’ugõ, si lõ arara, ba u’ebua’õ wa’ahakhõ dõdõgu, wangahatõ’õ ya’ugõ khõgu. 8 Me tesao wõnugu, ba no ubini’õ mbawagu khõu, si lõ arara, ba ufuli uhakhõsi tõdõ ndra’ugõ, fa’ebua dõdõ si lõ aetu, iwa’õ sangorifi ya’ugõ andrõ, Yehowa. 9 Timba wa’anõnõ danõ idanõ andrõ, me luo Noakhi, khõgu da’õ: si mane fahõlusagu andrõ, wa lõ tola ifuli inõnõi danõ idanõ andrõ khõ Noakhi, si manõ wahõlusagu, wa lõ’õ sa’ae mofõnudo khõu, awõ wa lõ’õ sa’ae utegu’õ. 10 Alakha sa’ae aruru hili ba alakha mangiwa hilihili, ba lõ’õ sa tebulõ khõu wa’ebua dõdõgu ba tebai mangiwa wawu’usa li andrõ khõgu, iwa’õ sahakhõ tõdõ khõu, Yehowa andrõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Filifi 1 : 21 - 30 21 Fa’auri sa khõgu Keriso, ba hare khõgu wa’amate. 22 Ba na so nisõndragu, ba wa’auri ba mboto andre, ba lõ u’ila, hezo nihalõgu. 23 Ba no manufa manõ dõdõgu, ba zi dua balo andrõ: omasido mofanõdo ba sodo khõ Keriso; si sõkhi sibai sa da’õ; 24 ba abõlõ moguna, lõ ahetado, ba mboto andre, bõrõ ami. 25 Ba me faduhu dõdõgu ba da’õ, ba u’ila, lõ ahetado, ba lõ aefado khõmi fefu, ba wamanõi ya’ami ba ba wangomusoi’õ tõdõmi, ba wamati. 26 Ena’õ fahõna khõmi mbõrõ wanuno ya’ami, ba khõ Keriso, bõrõ ndra’o, fangawuligu, na mangawulido zui khõmi. 27 Ba ha da’õ: mihaogõ mbuabuami, si faudu ba duria somuso dõdõ andrõ, khõ Keriso, ena’o abe’e ami, ha sambua gera’era, ha sara dõdõ, wanolo ba wanimba si fatuwu ba wamati ba duria somuso dõdõ andrõ, he mõido mufaigi ami, ba he lõ ya’o, ba urongo he wisa khõmi. 28 Ba ena’õ lõ’õ manõ lakeani ami samadaõ andrõ; tandra wa’atekiko da’õ khõra, ba tandra wangorifi sa khõmi, ba moroi ba Lowalangi da’õ. 29 Noa sa tetehe khõmi — fa’ebua dõdõ — mitaha wamakao bõrõ Keriso, tenga ha famati khõnia, 30 ba faoma wasõndratada, si no mi’ila khõgu, ba nirongomi khõgu iada’e. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura I Moze 8 : 15 - 22 15 Ba humede Lowalangi khõ Noakhi, imane: 16 Heta’õ baowo, ya’ugõ ba fo’omou ba onou ba umõnõu, awõu. 17 Ba fefu zaliwaliwa ba danõ, si no fao khõu, fefu nõsi guli danõ, he fofo ba he urifõ niha ba he kuõkuõ fefu, sanananana ba danõ, ba fao khõu we’amõi tou, ena’õ maliwaliwa ba guli danõ ba ena’õ mo’ono’ono ba wangoya’õ ya’ira ba guli danõ. 18 Ba mõi tou Noakhi ba ononia ba fo’omonia ba umõnõnia. 19 Fefu zi õfa ahe, fefu kuõkuõ ba fefu wofo, fefu zaliwaliwa ba guli danõ, ngawangawalõ, ba aheta baowo. 20 Ba ifa’anõ naha wame’e sumange khõ Yehowa Noakhi, ihalõ ngawalõ zaliwaliwa ba guli danõ fefu, si lõ hadia ia zi lõ sõkhi, awõ ngawalõ wofo fefu, si lõ si lõ sõkhi, ba ibe’e sumange nitunu, ba naha andrõ. 21 Ba me i’ago hua omasiõ andrõ Yehowa, ba imane dõdõnia: Lõ utohugõ wangelifi tanõ ha niha andrõ, me no si lõ sõkhi gera’era dõdõnia, i’otarai iraono ia; ba lõ utohugõ wamubunu fefu zi so noso, si mane folaugu mege. 22 Sagõtõ tanõ dania, ba bõi ya’aetu’aetu wananõ ba famasi ba fa’okafu ba fa’aukhu zino ba bawa lõkhõ ba bawa deu ba si ma’õkhõ ba si bongi. Famotokhi Taromali Lowalangi Sinanõ ba dõdõ tehalõ moroi ba zura Filifi 1 : 27a Ba ha da’ö: mihaogö mbuabuami sifaudu ba duria somuso dödö andrö, khö Keriso. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 137 Turia Somuso dödö, lö dozi terongo na. Me lö oi dozi tahalö, halöwö fangombakha. Da tahalö halöwö, zamatenge ya’ita. Tenga saekhu ölö ita, ba halöwö Zo’aya. So wa’omuso dödöda, nitemada dania. Andrö böi faröi ita, irugi gamozua. Böi ahono sa dödöda, me ato zelungu na. Taforege wama’ema, taroma li Zo’aya. Böi abua gölöda, wangai halöwö-Nia. He fahöna zagafökhö, wangai halöwö-Nia. So khöda wondrara dödö, na aro wanötöna. Na si lö faröi ita, fa’auri zinemada. Da ta’andrö khö Zo’aya, Ibè khöda Geheha. Sangabölö’ö ya’ita, wangai halöwö-Nia. Böi manö faröi ita irugi gamozua. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 135 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***