10 September 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 10 September 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 26 He iraono, he satua, da tasuno Zo’aya, Me da’ö zomasi Ia, na oi tasuno Ia. He na lö terongo lida, na mangandrö dödöda. No oi i’ila So’aya, Ibe’e ni’andröda. Böi mo’aetufa wangandrö, ba fanuno So’aya. He na bongi, he ma’ökhö, tödömö bè khö-Nia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 229 Site’ala ndra’aga, na lö fa’omasi-U. Andrö böi röi ndra’aga afu lö elungu. Tödöma sitohöna, da’ö nemalima. Tologa ba wolawa, bè khöma Geheha. Na lö Ya’ugö, Yesu, te’ala ndra’aga. Lö fulitö tehuku, me oya horöma. Andrö farou dödöma, böi aetu wangandrö. Afu anau gölöma, tolo, Eheha-Mö. Ma’ondrasi Ndra’ugö, Yesu, Sangefa’ö. Be’e aefa horöma, ba wa’omasi-Mö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Amaedola 27 : 5 - 9 5 Sõkhi wanegu, si lõ mubini’õ, moroi ba wa’omasi, si lõ mu’oroma’õ. 6 Moroi ba dõdõ si sõkhi, ba ibago ita sangomasi’õ ya’ita, ba no si falawu, na fa’ago bawa khõda zi fatiu tõdõ khõda. 7 Si no abuso, ba ihundrahundra nõsi wani, ba ba zolofo, ba ami gõi zafeto fefu. 8 Hulõ wofo soloi, sondrõi azuninia, si manõ niha sondrõi omonia. 9 Fangomuso dõdõ wanikha, awõ nitutunu samohua; ba ami khõda zi fahuwu khõda, na ifobawa lala khõda, soroi ba dõdõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 18 : 15 - 20 15 Ba na mosala khõu dalifusõu, ba ae tegu ia, ba zi ha ya’ami, daruami; na ifondrondrongo khõu, ba no õsõndra dalifusõu. 16 Ba na lõ ifondrondrongo, ba halõ awõu zamõsa tõ ba ma darua, ena’õ aro huhuo fefu ba niwa’õ zi darua, ba ma si datõlu, si so ba mbõrõ. 17 Ba na lõ ifondrondrongo khõra andrõ, ba ombakha’õ ba mbanua. Ba na lõ’õ gõi ifondrondrongo niwa’õ mbanua, ba ya hulõ niha baero ia khõu, ya hulõ zanema beo. 18 Si ndruhu niwa’õgu khõmi, hadia nibõbõmi ba guli danõ, ba nibõbõ gõi ba zorugo; ba hadia ni’efa’õmi ba guli danõ, ba ni’efa’õ gõi ba zorugo. 19 Ba uwa’õ gõi khõmi, na darua ba khõmi zangosara’õ tõdõra, ba guli danõ, ba ngawalõ hadia ia, ni’andrõra, ba ibe’e khõra Amagu andrõ, si so ba zorugo. 20 Ba zorudu zi darua, ba ma si datõlu, ba dõigu, ba da’õ sodo khõra ba gotaluara. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Hezekieli 33 : 7 - 11 7 Ba ya’ugõ ono niha, ba no ube’e sanaro ba ma’uwu Gizeraëli, ena’õ õfangelama ira, ena’õ õfa’ema niwa’õgu, na no õrongo daroma ligu. 8 Na uwa’õ khõ zi no mangerogõ Lowalangi: ”Si mate ndra’ugõ, sebua horõ!” ba na lõ hedehedeu, ba wamangelama si no mangerogõ Lowalangi, ba mbuabuania andrõ, ba si mate zebua horõ andrõ ba lalõnia, ba donia, ba ba dangau u’alui. 9 Ba tenga ba khõu so, na no õfangelama zi no mangerogõ Lowalangi, ba mbuabuania andrõ, ena’õ ifalalini gera’erania, ba na lõ ibõhõli mbuabuania, ba si mate sa ia, bõrõ lalõnia andrõ, ba ya’ugõ, ba no õ’orifi nosou. 10 II. Ba ya’ugõ ono niha, ba õmane ba ma’uwu Gizeraëli: No mimane: Si ndruhu, no tohare khõma lalõma, awõ horõma, ba moroi ba da’õ, wa ariri ndra’aga, ba heza masõndra fa lõ mate ndra’aga? 11 Õmane khõra: Faya wa no sauri ndra’o, na omasido mate zebua horõ; somasi ndra’o na irõi lalania andrõ sebua horõ, na ifalalini gera’erania, ba na auri ia. Mifalalini gera’erami, mirõi lalami andrõ, si lõ sõkhi! Hana sa wa edõna mate ami, ya’ami ma’uwu Gizeraëli? Famotokhi Taromali Lowalangi Sinanõ ba dõdõ tehalõ moroi ba zura Hezekieli 33 : 11b Somasi Ndra’o na iröi lalania andrö sebua horö, na ifalalini gera’erania ba na auri ia. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 162 Sihulu tödö wangondrasi, fogaoni Zahakhö tödö. Ogorofi ngawalö horö, falua wangesa dödö. Angalulu sifao fangandrö, Ibe’e Yesu wangefa’ö. Tebai ahono sa dödöda, na lö mu’efa’ö horö. Na lö ihagaini Eheha dödöda si no ta’unö. Samaduhu’ö ba dödöda, wa no tehaogö, no atulö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 130 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***