15 Oktober 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 15 Oktober 2023 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 192 Fa’omasi Nama, Itehe khöda. Mate salahida, Yesu ba röfa. Andrö oi atulö, ita khö Nama. Me no aefa horö börö Zo’aya. Böi tarörö ita, wangerangera. Ta’osambalö’ö manö dödöda. No Ikaoni ita, Yesu So’aya. Wanema fa’auri so’ahonoa. Fa’erege dödö, si no falukha. A’oi taya fefu, börö Zo’aya. Lö fa’aekhu gölö, zimöi khö-Nia. Falukha wangefa soroi Zo’aya. Andrö böi atage, böi faröi ita. Irege takhamö ba zi so Ama. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 189 Mitabu fefu, ta’ondrasi, Keriso Yesu Sangöhöli, Tabè dödöda Ibohouni, na horö oi taröi. Reff : Ohahau dödöda khö-Nia, .... Mitabu fefu da ta’o’ö, Keriso Yesu Sangefa’ö. Sahakhö tödö Yesu andrö, tabu böi taradö. Reff : Ohahau dödöda khö-Nia, .... Mitabu fefu, böi taböhöi, Keriso Yesu, Solomasi. Ya’ia razo ba wa’auri, Ono Lowalangi. Reff : Ohahau dödöda khö-Nia, .... FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 32 : 1 - 14 1 Ba me la’ila sato, arõrõ Moze wangawuli moroi ba hili, ba lahurufai Ga’aroni, ba lamane khõnia: Labu, asogõ khõda Lowalangi sowaõwaõ fõnada; lõ’õ sa ma’ila, hadia zi gõna niha andrõ, Moze andrõ, sangeheta ya’ita ba danõ Miserayi. 2 Ba imane khõra A’aroni: Miheta zaeru dalinga ana’a andrõ, ba dalinga wo’omomi ba ba dalinga nonomi matua ba ba dalinga nonomi alawe, ba mi’ohe khõgu. 3 Ba laheta zaeru dalinga ana’a ba dalingara, dozi, ba la’ohe khõ Ga’aroni. 4 Ba ihalõ ba dangara, ilau wahõ, ibali’õ ono zaw~i nifahele. Ba lamane: Da’õ Lowalangimi, ya’ami, Iraono Gizeraëli, sangeheta ya’ami ba danõ Miserayi! 5 Ba me i’ila da’õ A’aroni, ba ifazõkhi naha wame’e sumange fõnania; ba ifatenge zi’ao, lamane: Mahemolu telau gowasa khõ Yehowa! 6 Ba mahemolu õ, ba lahulõ wongi wame’e sumange nitunu ba sumange fangorifi, ba mudadao zato manga ba mamadu hadia ia; ba maoso ira, ba wolaya. 7 Ba imane Yehowa khõ Moze: Labu, ae mitou, noa sa elungu mbanuau andrõ, nihetau ba danõ Miserayi. 8 No alio sibai larõi lala andrõ, nifakhoigu khõra, no lafazõkhi nono zaw~i nifahele ba no mangalulu ira khõnia, no lafosumange ba no lamane: Da’õ Lowalangimi, ya’ami Iraono Gizeraëli, sangeheta ya’ami ba danõ Miserayi. 9 Ba imane na Yehowa khõ Moze: U’ila sa’ae, wa no niha sabe’e bõrõ du’i niha andrõ. 10 Ba bõhõido sa’ae, ena’õ tesao wõnugu khõra ba ena’õ uhori ira, ba ubali’õ furugõ soi sebua ndra’ugõ! 11 Ba itandraigõ i’alõsi dõdõ Lowalanginia Yehowa Moze, imane: He Yehowa! hana wa mofõnu sibai ndra’ugõ ba mbanuau andrõ nihetau ba danõ Miserayi fa’abolõu ba tangau sabe’e andrõ? 12 Hana wa õbe’e law~a’õ dania Dawa Miserayi: Ba wamatõrõ si lõ sõkhi iheta ira, ena’õ ibunu ira ba hili andrõ, ba ena’õ ihori ira ba guli danõ? Alõsi wõnumõ, sabõlõ sibai andrõ, ba hana na mangesa dõdõu ba wamunu andrõ, niw~a’õu nifatõrõ ba mbanuau andrõ! 13 Tõrõ tõdõu genoniu Aberahamo ba Iza’aki ba Izeraëli, ba zi no fahõlu ndra’ugõ ba khõu, ba zi no õfabu’u: U’oya’õ dania ma’uwumi, timba ndrõfi ba mbanua si yawa, ba tanõ andre, niw~a’õgu, ba ube’e ba ma’uwumi, ena’õ khõra, irugi zi lõ aetu! 14 Ba mangesa dõdõ Yehowa ba wamunu andrõ, nidaõ’õdaõ’õnia folau ba mbanuania andrõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Fama’ele’ö 19 : 6 - 10 6 Ba urongo, ba hulõ li zato, ba hulõ wegosogoso nidanõ sebua, ba hulõ we’ugu’ugu mbanua, sabõlõbõlõ, lamane: ”Haleluya, me no razo Zo’aya, Lowalangida andrõ, samatõrõ fefu hadia ia! 7 Data’omusoi’õ dõdõda, ba ta’owuawua’õ dõdõda, ba tafosumange ia; me no irugi walõwa Nono mbiribiri andrõ, ba me no ifa’anõ ia ngambatõnia, 8 ba no tetehe khõnia, ena’õ i’onukha zi ndruhu muko si sõkhi, sihaga; muko si sõkhi andrõ sa, ba ya’ia wa’atulõ niha ni’amoni’õ andrõ.” 9 Ba imane khõgu: Sura: Ya’ahowu nikaoni ba walõwa Nono mbiribiri andrõ! Ba imane khõgu: Da’õ li Lowalangi andrõ, si ndruhu. 10 Ba utuhi danõ fõna gahenia, ba wangalulu khõnia. Ba imane khõgu: Bõi! Awõu enoni ndra’odo, ba awõ dalifusõu andrõ, si so famaduhu’õ Yesu andrõ. Khõ Lowalangi angalulu. Famaduhu’õ Yesu sa, ba ya’ia Geheha wama’ele’õ andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Mataio 22 : 1 - 14 1 Ba humede Yesu, amaedola zui ilau khõra, imane: 2 No fakhilikhili ira mbanua zorugo andrõ razo niha, samangowalu ononia. 3 Ba ifatenge zawuyunia, ba wehede ba zi ho kumaoni, ba we’amõi ba walõwa, ba lõ edõna mõi ira. 4 Ba ifuli ifatenge zawuyu bõ’õ, imane: Mimane ba zi ho kumaoni andrõ: Hiza, no u’asiwai gõ andrõ khõgu, õrõbao khõgu ba hadia ia gurifõ ni’a’atabõ, ba no tumaba ba no awai fefu hadia ia, mitabu ba walõwa. 5 Ba lõ ba dõdõra; mofanõ ira, so zi mõi ba nowi khõnia, ba so zi mõi maniaga. 6 Ba tánõ bõ’õ, ba lara’u zawuyunia andrõ, la’o’aya ba labunu. 7 Ba mofõnu razo no mege, ba ifatenge zaradadunia, ifafakiko’õ zange’e andrõ ba banuara, ba ifatunu’õ. 8 Aefa da’õ, ba imane ba zawuyunia: Noa sa mulau walõwa, ba tenga si nangea mõi nikaoni andrõ. 9 Ba mi’ae ba wabaliwa lala misa, ba ha wa’ato zi falukha ami, ba mikaoni ba walõwa. 10 Ba mõi ba lala zawuyu no mege, ba la’ozaragõ fefu zi falukha ira, si sõkhi, awõ zi lõ sõkhi, ba afõnu niha si manga naha walõwa. 11 Ba me mõi baulu razo, ba wamaigi si manga andrõ, ba i’ila zamõsa ba da’õ, si lõ baru ba walõwa. 12 Ba imane khõnia: He le, hadia wa mõi’õ yomo ba da’e, ba lõ baru ba walõwa? Ba lõ hedehedenia. 13 Ba imane razo ba genoni: Mibõbõ gahenia ba tangania, ba mitibo’õ ia ba zogõmigõmi, baero sibai; ba fege’ege dania ba da’õ ba fatangisa mboha. 14 Ato sa nikaoni, ba lõ ato nitutuyu. Famotokhi Taromali Lowalangi Sinanõ ba dõdõ tehalõ moroi ba zura Mataio 22 : 14 Ato sa nikaoni, ba lӧ ato nitutuyu. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 202 Dozi solo’ö Yesu, falukha gakaola. Ni’odela zatana, bakha ba gera’erada. Somasimasi ita, ba gulidanöda. Ifatumbu’ö hokha, awö dödö fayawasa. Ba ni’omasi’öda, mamini horö sa. Tawai sohare ita, zimöi tanömö wangala. Ta’andrö khö Zo’aya, Ibe’e Geheha. Sohagaini tödöda, afu oroma de’ala. Sindruhu li Zo’aya, wa lö faröi Ia. Na lö tebulö ita, wolo’ö niwa’ö-Nia. Me Yesu zifao khöda, böi aombö dödöda. Khö-Nia wa’abölö same’e khöda femöna. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 490 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***