20 November 2022 (Bahasa Nias) Akhir Tahun Gerejawi

Minggu, 20 November 2022 Fanõrõtõdõ Fa'auri Si Lõ Aetu + Femanga Gõ Ni'amoni'õ [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya. Ma’ökhö andre no tarugi ba Gangohorita Ndröfi Niha Keriso. Ya sowuawua tödö ita ba we’amöi föna Keriso ba wanötöna fa’auri si lö aetu. Ma’owai ami ba döi Zo’aya ya’ita Yesus Kerisou, Ya’ahowu...!!! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 12 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Si manõ zi mõna andrõ, nifonukha nukha safusi, ba lõ’õ manõ sa’ae Ubunu dõinia ba zura wa’auri andrõ, ba U’ombakha’õ dõinia, ba zi so Amagu, ba ba zi so mala’ika andrõ khõ-Nia! HALELUYA! Liturgos : Mangandrõ ita, "He So’aya ya’aga Yesu Keriso, Lowalangi sauri ba sangorifi. He matörö mbawa danö si göna lumö wa’amate, ba lö khöma fa’ata’u, me no Ya’ugö Gubaloma, sondrorogö ya’aga. Tebai i’alani ndra’aga fa’amate, me no Ya’ugö zangorifi ya’aga. Möiga khö-U ba wanou’ö boto awö nosoma, me no Ya’ugö zokhö ba samatörö fa’auri ba fa’amatema. He Ama ma’andrö khö-U, rorogö ba fatöröga ba zomasi Ndra’ugö irugi gamozua, famakhamö nahia ba zi so Ya’ugö. Si lö mamalömalö nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö. Yaduhu!" Mudadao Zato Liturgos : Manunõ ita moroi ba Mbuku Zinunõ No. 423 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sangombakha 8 : 9 - 17 8 Lõ niha sabõlõ moroi ba nangi, fa i’ila ena’õ iba’a nangi, ba lõ sabõlõ moroi ba mbawa wa’amate, ba lõ fangefa ba wanuwõ; ba fanao horõ andrõ, ba lõ i’orifi zama’ua. 9 Da’õ fefu ni’ilagu, bõrõ me no utõngõtõngõni fefu nilaulau ba guli danõ, gõtõ wa ibali’õ ia samatõrõ awõnia niha, ba wangalani ya’ia. 10 Ba noa gõi u’ila zebua horõ, niko’o, sogamõ folombase, ba tenga ba naha ni’amoni’õ monahia zolau satulõ mege, ba olifu mbanuara irá. Fayafayá gõi da’õ. 11 Me mogasa wamatõrõ huku ba nilau zi lõ sõkhi andrõ, andrõ wa itugu abe’e dõdõ nono niha, ba wolau si lõ sõkhi, 12 me meotu ilau zi lõ sõkhi si so horõ, ba anau nosonia ba da’õ, he wa’ae no aboto ba dõdõgu, wa sohahau tõdõ dania zangata’ufi Lowalangi, samondrongo linia. 13 Ba tenga sohahau tõdõ dania zanao horõ, no timba lumõ, wa lõ anau nosonia, me no tenga sangata’ufi Lowalangi ia. 14 II. So zi hulõ waya, ba guli danõ, ya’ia wa so zatulõ tõdõ si falukha lualua wolau zebua hõrõ, awõ wa so zebua horõ si falukha lualua wolau zatulõ tõdõ. Ba no umane: Faya gõi da’õ! 15 Ba no usuno wa’omuso dõdõ; me no fondrege zi sõkhi ba niha ba guli danõ, na mangamanga ia ba na ibadubadu hadia ia, na i omusoi’õ dõdõnia; ba ya lõ aefa’aefa khõnia da’õ ba wa’erege dõdõnia andrõ, gõtõ wa’anau nosonia, nibe’e Lowalangi khõnia ba guli danõ. 16 Ba me ube’e dõdõgu, ena’õ aboto ba dõdõgu wa’atuatua andrõ, ba ba wamaigimaigi nilaulau ba guli danõ, — me lõ falukha alau hõrõ niha, he ba zi bongi ba he ba zi ma’?khõ — 17 ba no u’ila, wa tebai aboto ba dõdõ niha wolau Lowalangi fefu, folaulaunia andrõ ba guli danõ, me i’eregeregesi dõdõnia niha, ba wangalui, ba me lõ’õ zui isõndra, ba he na iwa’õtõdõnia satuatua, no aboto ba dõdõnia, ba lõ’õ zui isõndra. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi si so ba zorugo yawa. No sowuawua tödö ndra’aga, börö howuhowu-Mö si no Ö’amualagö ba wa’aurima irugi ma’ökhö andre. Aboto ba dödöma wa no Ya’ugö gumbu wa’auri, ba no Ya’ugö gamozua wa’aurima. Ba hiza mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba gera’era dödöma, fehedema awö gamuatama si lö faudu ba daroma Li-Mö. Asese ma’osiwawöi ginötö nibe’e-U khöma, ba ambö ndra’aga wangoguna’ö tödö satuatua ba wangerai bongima, ba no malulu wa’aurima nifatörö gisö’isö dödö wa’a’ösi niha. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ginötö fönama si faudu ba zomasi Ndra’ugö. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Sahakhõ tõdõ Yehowa ba sebua tõdõ; ebolo sibai dödö-Nia ba no obõwõ sibai Ia. Lõ nibe’e-Nia dali horõda ba lõ nisulõni-Nia khõda olalõwada. Si mane fa’ahakhõ dõdõ nama nononia, si manõ wa’ahakhõ dõdõ Yehowa zangata’ufi Ya’ia. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 11 : 17 - 26 17 Ba me irugi Yesu, ba irongo, no õfa bonginia ba lewatõ. 18 Ba ahatõ ba Yeruzalema Mbetania andrõ, so dua mbadu fofanõ. 19 Ba no ato niha Yehuda, si mõi khõ ndra Marata Maria, ba wondrara tõdõra, ba khõ dalifusõra andrõ. 20 Ba me irongo Marata so Yesu, ba ifaondragõ, ba dumadao yomo Maria. 21 Ba imane Marata khõ Yesu: He Tua, ena’õ na ho so ndra’ugõ ba da’e, ba lõ mate mena’õ dalifusõgu andrõ. 22 Ba iada’e gõi, ba u’ila, hadia ni’andrõu khõ Lowalangi, ba ibe’e khõu Lowalangi. 23 Imane khõnia Yesu: Maoso dania dalifusõu andrõ. 24 Imane khõnia Marata: U’ila sa, maoso ia dania, ba wemaoso andrõ na luo sa furia 25 Imane khõnia Yesu: Ya’odo wemaoso ba fa’auri, samati khõgu, ba auri, he wa’ae mate ia. 26 Ba dozi sauri, samati khõgu, ba lõ mate, irugi zi lõ aetu. Hadia, faduhu dõdõu ba da’õ? Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Pengkhotbah : Fatua lö tabaso mbörö huhuo da tafondrondrongo ha wa’ato zi tumbu awö zi no mate barö ndröfi andre [Fombaso zitumbu ba simate ba zi döfi fa'ara] Situmbu - Ira Matua: 31 orang - Ira Alawe: 27 orang Jumlah: 58 orang Simate - Niha Satua: 30 orang - Iraono: 4 orang Jumlah: 34 orang Pengkhotbah : Manunö ita moroi ba Mbuku Zinunö numero 410:1. HEZA SA USÖNDRA (Musindro Zato) [Fombaso Taroma li moroi ba Roma 14:7-9] 7 Lõ’õ sa ba khõda sauri, ba khõnia manõ, ba lõ si mate, ba khõnia manõ. 8 Na auri ita sa, ba khõ Zo’aya wa’aurida, ba na mate ita, ba khõ Zo’aya wa’amateda; tobali, he sauri ita, ba he si mate ita, ba khõ Zo’aya ita. 9 Da’õ sa mbõrõ, wa mate Keriso, awõ wa no ifuli auri, ena’õ ifatõrõ zi no mate, awõ zauri. Pengkhotbah : Manunö ita moroi ba Mbuku Zinunö numero 410:2 [Fombaso Taroma li moroi ba I Korindro 15:54b-57] 54b ba awena itõrõ daroma li andrõ, si so ba zura: ”No alõmõ wa’amate andrõ ba wemõna. 55 Hezo wemõnau, fa’amate? Hezo duomõ, fa’amate?” 56 Ba tuo wa’amate andrõ, ba ya’ia horõ andrõ, ba fa’abõlõ horõ andrõ, ba ya’ia goroisa. 57 Ba nisuno Lowalangi same’e khõda femõna andrõ, moroi khõ Zo’aya ya’ita andrõ, Yesu Keriso. Pengkhotbah : Manunö ita moroi ba Mbuku Zinunö numero 410:3 Fombaso Taroma Li Lowalangi moroi ba zura I Korindro 15 : 50 - 58 50 Ba da’õ niwa’õgu, ya’ami, ira talifusõ, tebai isõndra mbanua Lowalangi õsi niha andrõ, ba tebai isõndra wa lõ obou sobou andrõ. 51 Hiza, si no tobini u’ombakha’õ khõmi: Lõ ahori mate ita, ba ahori tobali, 52 i’ogomuzaõ, ha mamõ’i hõrõ wa’ara, na telau dorofe safuria andrõ; telau sa ia dania, ba maoso zi no mate andrõ, tebai sa’ae obou, ba ya’ita, ba si tobali. 53 Lõ’õ sa tola lõ i’onukha wa tebai obou sobou andre, ba lõ tola lõ i’onukha wa tebai mate si mate andre. 54 Ba na no i’onukha wa tebai obou sobou andre, ba na no i’onukha wa tebai mate si mate andre, ba awena itõrõ daroma li andrõ, si so ba zura: ”No alõmõ wa’amate andrõ ba wemõna. 55 Hezo wemõnau, fa’amate? Hezo duomõ, fa’amate?” 56 Ba tuo wa’amate andrõ, ba ya’ia horõ andrõ, ba fa’abõlõ horõ andrõ, ba ya’ia goroisa. 57 Ba nisuno Lowalangi same’e khõda femõna andrõ, moroi khõ Zo’aya ya’ita andrõ, Yesu Keriso. 58 Andrõ, ya’ami ira talifusõgu, somasi ndra’o, ya’abe’e ami, si lõ humeuheu, ya’a’oi so khõmi wangai halõwõ Zo’aya andrõ, bõi yamamalõmalõ, me no mi’ila, tenga zayazaya gõlõ wa’erege dõdõmi andrõ, ba khõ Zo’aya. Famotokhi Taromali Lowalangi Sinanõ ba dõdõ tehalõ moroi ba zura I Korindro 15 : 58a Andrӧ, ya’ami ira talifusӧgu, somasi ndra’o, ya’abe’e ami, si lӧ humeuheu, ya’a’oi so khӧmi wangai halӧwӧ Zo’aya andrӧ, bӧi yamamalӧmalӧ Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA Famalua FEMANGA GÕ NI'AMONI'Õ (PERJAMUAN KUDUS) FEMANGA GÕ NI'AMONI'Õ 1. MANUNÕ Pendeta : Manunö ita moroi ba Mbuku Zinunö No. 281 : 1-2 2. FOGAONI Pendeta : "Ya’o Gö fangorifi," Iwa’ö Yesu, "Si möi khö-Gu, ba döhö wa’olofo, ba si faduhu tödö khö-Gu, ba lö sa’ae owökhi dödö." (Yohane 6:35). 3. FAMA'ANÕ Muzizio zato Pendeta : He ya’ami ira talifusö, da ta’owuawua’ö dödöda watomesa khö Lowalangi, ba wanema buala fa’ebua dödö-Nia, ba khö Zo’aya ya’ita Yesu Keriso, si no mate ba horöda, ba si no ifuli maoso wangalani fa’amate, irege falukha ita wangorifi ba fa’ohahau dödö. Andrö da tasekhegö dödö we’amöi föna Zo’aya. Hadia edöna ami mi’ombakha’ö horömi khö Lowalangi, sangila era’era dödö niha? Hadia, lö mibini’ö, wa no misawö goroisa-Nia fefu? Hadia abu dödömi ba da’ö ba mi’ogorofi sa’ae wolau horö? Na si manö, ba mitema ligu: “tebai mabini’ö horöma”. Jemaat : Tebai mabini’ö horöma. Pendeta : Hadia faduhu göi dödömi lö sameta horö baero Yesu Keriso, si no manaögö huku salahimi ? Na faduhu dödömi, ba mitema ligu wanguma’ö: “Faduhu dödöma” Jemaat : Faduhu dödöma. Pendeta : Hadia, edöna ami mibeta ba dödömi wayaẅasa, awö watiusa, awö wa’afökhö dödö? Hadia edöna ami mi’efa’ö zala zi so sala khömi? Hadai edöna ami mi’ogorofi mbuabua niha si sagötö tanö andrö, ba wamöhöi ya’ia? Ba mitema ligu: “edönaga ya itologa Lowalangi.” Jemaat : Edönaga ya itologa Lowalangi. Pendeta : Mangandrö ita ba wangandrö fa’ahakhö dödö Lowalangi. "He Lowalangi ! Niha si so horö ndra’aga, ma’ombakha’ö horöma khö-U : oya nilauma si lö sökhi, salama khö-U ba tenga göi zide’ide. Oya göi ngawalö zi lö sökhi ba dödöma bakha: Fayaŵasa, fa’afökhö dödö, ba fatiusa; no ambö famati, ba no oya na danö bö’ö, si lö atulö nifaluama tanöföna-U. He Yehowa, hakhösi dödö-U ndra’aga ba wa’omasi-Mö andrö ! Efa’ö khöma horöma andrö ba wa’ebua dödö-U andrö ! Sasai ndra’aga ba horöma andrö börö nono-U Yesu Keriso si no mangöhöli ya’aga. Yaduhu!" Tebe’e ginötö ba wangandrö ba dödö zamösana (1-2 menit) Pendeta : Me no mi’ombakha’ö horömi ba wogamö fangefa, ba na sindruhundruhu mangesa dödömi ba horömi ba wanötöna fangorifi khö Yesu Keriso, ba tola ufaduhu’ö khömi: wa I’efa’ö horömi andrö fefu Lowalangi, börö wamakao andrö nitaögö Yesu So’aya ya’ita! Mudadao Zato! 4. MANUNÕ Pendeta : Manunö ita moroi ba Mbuku Zinunö No: 182 : 1 5. OROISA YESU SANANDRÕSA BA WEMANGA GÕ NI'AMONI'Õ Pendeta : Ya’ami banua niha keriso ni’omasi’ö. Mifondrondrongo daroma li Lowalangi, sanandrösa ba Wemanga Gö Ni’amoni’ö, “So’aya ya’ita Yesu me bongi andrö, me te’a mböli-Nia, me orudu manga Ia khö ndra nifahaö-Nia, ba Ihalö roti (mufazawa roti), I’aohasi gölö Lowalangi, ba Iboboto roti andrö, Ibe’e khö ndra nifahaö-Nia, ba Imane : “Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o”. Si manö göi Ihalö mako (mufazawa naha nagu), me no aefa manga ira, I’aohasi gölö Lowalangi, ibe’e khöra, ba Imane : “Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o”. Ba li-Nia andre Ifaduhu’ö sibai khöda Yesu wanguma’ö. Ero na mi’a roti andre (mufazawa roti), ero na mibadu nösi mako andre (mufazawa mako), ba Uforoma’ö sibai khömi wa’omasi-Gu ami, awö wa’ahakhö dödö-Gu; niha si tekiko ena’ö ami, na lö Ubelegö mena’ö wa’auri-Gu fönami, fa böi sa’ae Itörö tödö Lowalangi horömi, ba wanguhuku ya’ami. Me no matedo, me no aduwa ndro-Gu iwa’ö Yesu ba aheta sa’ae horö na mifalu’i’ö khö-Gu. Börö wa’amate ba femaoso Zo’aya ya’ita Yesu Keriso wa tasöndra wangefa horö awö wangorifi. Andrö dozi sanema ha sambua boto, ha sambua wamati, fa’omasi ba fanötöna, Ya faofao khömi Geheha Ni’amoni’ö. Jemaat : Manunö Moroi ba Mbuku Zinunö No. 182 : 2 6. FAMA'EMA BA FANEMA'Õ GÕ NI'AMONI'Õ Pendeta : Imane Yesu, "Mi’aine khö-Gu dozi serege tödö, Ufolombase ami." ---- FAMA'EMA ROTI AWÕ AGU ---- Sato manunö moroi ba Mbuku Zinunö No. 237 [Muzizio Zato] Pendeta : 1) Mitema ba mi’a, boto-Gu da’e nibe’e salahimi; ero na mi’a da’e, ba mitörötörö tödömi Ndra’o! 2) Mibadu dozi ami, Amabu’ula Li Sibohou nösi mako andre, do-Gu nifaduwa salahimi, ba wangefa’ö horö; gofu hame’uga mibadu da’e, ba mitörötörö tödömi Ndra’o! Ena’ö Boto ba Do Zo’aya ya’ita Yesu Keriso, ni’amoni’ö ba solakhömi andrö, da’ö zangabölö’ö ba sondrorogö ya’ami irugi zi lö aetu. Mi’angawuli si fao fa’ohahau dödö. Ya mufahowu’ö ami Lowalangi, Yaduhu! [Mudadao Zato ba teowuloi galasi ba ame'ela Wemanga Gõ Ni'amoni'õ / Mangawuli ba nahia zamösana, ba latörö wama’ema fasömbata ba nahia si no mufa’anö] Pendeta : Manunö ita moroi ba Mbuku Zinunö No: 232 : 1 - 6 Liturgos : Manunõ ita moroi ba Mbuku Zinunõ No. 440 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 439 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***