16 Oktober 2022 (Bahasa Nias)

Minggu, 16 Oktober 2022 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 27 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 324 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 2 : 23 - 25 23 Ba ara ma’ifu furi õ, ba mate razo Miserayi. Ba mangarõngarõ Ndraono Gizeraëli ba halõw~õ sabe’e andrõ, mu’ira’ira, tobali terongo ba Lowalangi we’aora ba wangefa’õ ya’ira ba halõw~õ sabe’e andrõ. 24 Ba ifondrondrongo wangarõngarõra andrõ Lowalangi, ba itõrõ tõdõ Lowalangi wawu’usa li andrõ khõnia, khõ ndra Aberahamo, Iza’aki, Yakobo. 25 Ba inehegõ Ndraono Gizeraëli Lowalangi, ba ihakhõsi tõdõ ira. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura II Korindro 12 : 7 - 10 7 Ba ena’õ bõi fayawa ndra’o, ba nifa’ele’õ andrõ khõgu, me no ebua, ba no mutaru’õ khõgu zuzumõ ba nõsi, mala’ika Zatana, ena’õ igukhugukhui ndra’o, fa bõi fayawa ndra’odo. 8 Ba no medõlu mangandrõdo khõ Zo’aya, ena’õ aheta ia khõgu. 9 Ba no iwa’õ khõgu: Ya’abõnõ khõu wa’ebua dõdõgu khõu, a’oi sa so wa’abõlõ andrõ khõgu ba wa lõ abõlõ. Andrõ wa abõlõ omasido, ba wa lõ abõlõdo andrõ usuno ndra’o, ena’õ abono khõgu wa’abõlõ Keriso andrõ. 10 Andrõ omasi ndra’o wa lõ abõlõ ba famakao ba fa’afõkhõ ba folohi ba fa’atosasa, na bõrõ Keriso. Na sambõ fa’abõlõ ndra’o, awena abõlõdo. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Nehemia 5 : 1 - 13 1 Ba mangarõngarõ sibai niha sato, awõ wo’omora, ba iwara andrõ, niha Yehuda. 2 So zanguma’õ: Iraonoma matua ba iraonoma alawe, ba mabe’e gade; ndramufaigi khõma wakhe, ena’õ manga ndra’aga ba ena’õ auriga! 3 Ba so gõi zanguma’õ: Nowima ba kabu nagu khõma, ba omoma, ba mabe’e gade; ba ndramufaigi khõma wakhe, ba lofo andre! 4 Ba so gõi zanguma’õ: No mabe’e gade mbenuama, awõ kabu nagu khõma, ba wamalali kefe, õmõma beo ba zalawa. 5 Ba iya’e, ba he wa’ae no faoma ira mbotoma mboto dalifusõma andrõ, awõ wa no faoma ira ndraonoma ndraonora, ba malulu zui sawuyu ndraonoma matua, fabaya iraonoma alawe; noa sa tobali sawuyu nonoma alawe õsa. Ba no tebai matimba da’õ, me noa sa atõ niha bõ’õ zokhõ benuama, awõ kabu nagu khõma. 6 Ba mofõnu sibai ndra’o, me urongo wangarõngarõra, awõ niwa’õra andrõ. 7 Ba u’era’era tõdõgu; ba utegu zalawa ba satua, umane khõra: Hadia, sangebua hare ami, na mibe’e nifalali ba nawõmi? Ba ulau walukhata sebua ba khõra andrõ, 8 ba umane khõra: Ya’aga, ba no mahõli dalifusõda niha Yehuda andrõ, si no mu’amawa ba niha baero, ndrege nisõndrama lala. Ba ya’ami, ba samawa talifusõmi na’i ami, ena’õ te’amawa ira khõda? Ba lõ hedehedera, tebai latema ligu. 9 Ba umane: Si lõ sõkhi wolaumi andrõ! Hadia, tenga sangata’ufi Lowalangida ami ena’õ, ba nilaumi andrõ, bõrõ wango’aya niha baero andrõ, ududa? 10 Ba ya’o ba ira talifusõgu ba ono matua andrõ khõgu, ba no mabe’e nifalali khõra gana’a ba fakhe; ba alakha lõ tasugi zugilõda andrõ. 11 Ma’õkhõ andre mifuli khõra mbenuara ba kabu nagu khõra ba kabu zai ba omora, ba bõi sa’ae misugi mibe’emi nifalali khõra, ana’a ba fakhe ba agu ba fanikha. 12 Ba lamane: Mafuli, ba lõ’õ sa’ae masugi ira; ma’o’õ zomasi ndra’ugõ. Ba ufakaoni’õ gere, ba ube’e ba hõlu ira, wa la’o’õ niwa’õgu. 13 Ba u’anotogõ mbarugu ba dotogu ba umane: Ya’imane Lowalangi wanimba dozi si falimo ba nifabu’ura andrõ, yamutimba ira baomora ba ba zi so khõra, ba ni’anotogõ ira si manõ gõi, balazi lõ õsi sa’ae! Ba lamane niha sato fefu: Ya duhu! ba lasuno Yehowa. Ba la’o’õ da’õ no mege sato. Famotokhi Taromali Lowalangi Sinanõ ba dõdõ tehalõ moroi ba zura Yeremia 33 : 3 Angaröfi li Ndra’o, ba Utema liu, ba U’ombakha’ö khöu zebua, si tebai aboto ba dödö niha, si lö örai örongo Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA Liturgos : Manunõ ita moroi ba Mbuku Zinunõ No. 271 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 330 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***