13 November 2022 (Bahasa Nias)

Minggu, 13 November 2022 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tõdõ ba sowuawua tõdõ ami ba we’amõi fõna Keriso ma’õkhõ andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 9 FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3) HALELUYA! Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato Liturgos : Manunõ ita moroi ba Mbuku Zinunõ No. 207 FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunӧ 90 : 1 - 12 1 He So’aya! Sawatõma ndra’ugõ, gõtõgõtõ wa’ara. 2 Me lõ’õ na si tumbu hili, me lõ niwõwõimõ na tanõ, awõ golia uli danõ fefu, gõtõgõtõ wa’ara, ba no Lowalangi ndra’ugõ. 3 Õfuli õbali’o gawugawu niha, ba õfuli õwa’õ: Mifa’aso ami, ono niha! 4 Hulõ zi ma’õkhõ menewi, na no numalõ ia, si manõ khõu zi hõnõ fakhe, hulõ zango’õfa zi sara wongi. 5 Õhanigõ ira, fangifi irá; ba na mahemolu mbanua, ba hulõ ndru’u, si fuli molõndru. 6 Sobowo si hulõ wongi ba sobulu, ba na tánõ owi, ba lataba ia ba aleu. 7 Fõnumõ andrõ sa zi manga ya’aga ba ba wa’abao dõdõu andrõ tekeani ndra’aga. 8 Horõma no õbe’e ba gamaudumõ, ba folauma si lõ oroma, ba no õbe e ba haga mbawamõ andrõ. 9 Tayataya sa mbongima fefu, ba wa’abao dõdõu andrõ; hulõ deatea mbewe wa’anumalõ ndrõfima andrõ. 10 Fa’anau nosoma andrõ, ba fitu ngafulu fakhe, ba na anau, ba walu ngafulu fakhe, ba si sõkhinia, ba fangerege dõdõ ba famakao, si fulõi ia wa’anumalõ, sihombo ndra’aga. 11 Ha niha zaboto ba dõdõ fa’abõlõ wõnumõ andrõ, ba fa’abao dõdõu andrõ, wangata’ufi ya’ia? 12 Fahaõ ndra’aga ba wangerai bongima, ena’õ masõndra dõdõ satuatua. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Luka 21 : 7 - 19 7 Ba lasofu khõnia, lamane: He samahaõ, ba ha wa’ara da’õ? Ba hadia dandra, wa itõrõ dania da’õ? 8 Ba imane: Mifaigi, bõi lafaelungu ami; ato sa dania zi mõi, sanagõ tõigu, lamane dania: Ya’odo, ba: no irugi bawa; bõi mi’o’õ khõra. 9 Ba na mirongo wanuwõ ba folawa, ba bõi tokea ami; lõ’õ sa tola lõ so da’õ ua; ba lõ’õ na i’anema’õ fa’atua danõ. 10 Ba imane khõra: Maoso dania zi sambua soi, udu zi sambua, ba si sara õri, udu zi sara. 11 Ba so ndruru danõ sabõlõbõlõ ba lofo mbanua ba fõkhõ sebua misa, ba ameta’uõ ba tandra sebua, moroi ba mbanua si yawa. 12 Ba fõna da’õ fefu, ba lababaya ami ba lagohi ami, la’ohe ami ba zekola ba ba gurunga, ba wolohe ya’ami ba zalawa ba ba gumandru, bõrõ dõigu andrõ. 13 Tobali famaduhu’õ tõdõra da’õ khõmi. 14 Andrõ mitanõ ba dõdõmi, fa bõi mihõnagõ mi’alui he miwisa wamu’a. 15 Ya’o sa zame’e dania khõmi fehede ba fa’atuatua, si tebai lalawa ba si tebai lafadaõ dozi si fa’udu khõmi. 16 Ba so gõi dania, ba la’a mbõlimi ira amami ba talifusõ ba si tenga bõ’õ ba si fahuwu khõmi, ba labunu õsa ami. 17 Ba dozi dania fatiu dõdõra khõmi, bõrõ dõigu andrõ. 18 Ba sara lõ tekiko bu ba hõgõmi. 19 Ba wa’anau gõlõmi dania misõndra haremi nosomi. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Maleakhi 4 : 1 - 6 1 Hiza sa, irugi dania bawa andrõ siholahola, timba galitõ ba wanunu bõtua, ba timba mbõrõ wakhe dania dozi si fayawa, awõ dozi solau si lõ atulõ, ba akhozi ibe’e bawa andrõ dania, iwa’õ Yehowa ngahõnõ, tobali lõ tosai khõra ibe’e, he wa’a ba he daha. 2 Ba khõmi sangata’ufi tõigu, ba tumbu luo andrõ, fa’atulõ, ba fangorifi barõ gafinia, ba maoso ami ba manoka ami, si mane ono zawi nibula; 3 Ba mihundrahundra zebua horõ, awu sa’ae ira barõ gahemi, na bawa da’õ, ni’asogõgu dania, iwa’õ Yehowa ngahõnõ. 4 Mitõrotõrõ tõdõmi goroisa andrõ nifa’ema Moze, enonigu andrõ, ba ni’oroi’õgu amakhoita ba huku, ba Ndraono Gizeraëli fefu, ba hili Horebi. 5 Hiza, ufatenge khõmi Geliya andrõ, fama’ele’õ, gasagasa wa irugi bawa andrõ khõ Yehowa, sebua ba sata’u ita. 6 Ba ifuli ba ndraono dõdõ ndra ama, ba tõdõ ndraono khõ ndra ama, fa bõi mõi ndra’o, ba wangohori niha ba danõ. Famotokhi Taromali Lowalangi Sinanõ ba dõdõ tehalõ moroi ba zura Luka 21 : 19 Ba wa’anau gӧlӧmi dania misӧndra haremi nosomi. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. ANGOMBAKHATA GEREJA Liturgos : Manunõ ita moroi ba Mbuku Zinunõ No. 444 FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 498 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***