17 Agustus 2025 (Bahasa Nias)

Download Tata Ibadah (DOC)

Download Tata Ibadah (PDF)

17 Agustus 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 334 No sumindro sa’ae ndra’aga, soima Indonesia. No Öbe’e göi zamatörö si te’anö ba wohalöwö. Ohitö dödö tötönafö, afu oi omuso dödö. Ba fefu nono wobanua oi so wa’ohahau dödö. Ba ato nasa zabu tödö ba wa’ambö soguna. Ba ato göi zangaröngarö börö wökhö soya ngawalö. Ba ato nasa lö sekola, me ambö’ambö soguna. Ma’andrö khö-U Lowalangima, folala sa’ae dödöra. Ya’e ndra’aga banua-Mö, matou’ö ba danga-Mö. Fefu zamatörö ya’aga abölö’ö ba fahowu’ö. Bè khöra wa’atuatua, bè wa ha sara dödö. Ena’ö mohalöwö ira si fao fa’atulö dödö. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 336 Omuso ae dödöma, wa’omasi-Mö khöma. No sa aefa ndra’aga sawuyu niha. No Ötehe merdeka, soima Indonesia. Da mangandrö ndra’aga khö-U Lowalangi Ama. Ya lö mamalömalö Öfahowu’ö. Bè wahasara dödö ba wogamö ohitö. Ma’andrö saoha gölö Lowalangi Yehowa. Tohugö wondrorogö bè anau gölö. Tenawa wawukasa bè wa’ohahau dödö. He ono wobanua, he ira samatörö. Ö’osara’ö dödö ba wondrorogö. Afu oi mohalöwö molo’ö somasi’Ö. FOMBASO TAROMALI LOWALANGI (AMABU'ULA LI SIFöFöNA) Liturgos : Da tafondrondrongo daroma Li Lowalangi, tehalö moroi ba zura Yeremia 34 : 12-16 12 Ba humede Yehowa khõ Yeremia, imane: 13 Da’õ niwa’õ Yehowa, Lowalangi Ndraono Gizeraëli: No fawu’u li ndra’o khõ ndra tuami, me uheta ira ba danõ Miserayi ba danõ ni’osawuyu ya’ira, wanguma’õ; 14 ”Na irugi mewitu fakhe, ba yamu’efa’õ dalifusõnia Heberaio zamõsana, na so zi no mamawa ya’ia khõnia; meõnõ fakhe sawuyumõ ia ba na aefa õ, ba õ’efa’õ ia!” Ba lõ lafondrondrongo ligu ira tuami, lõ labe’e mbõrõ dalingara. 15 Ba no mifalalini gera’erami ma’õkhõ, no mi’o’õ zatulõ khõgu, me no mifarongogõ wangefa, ba nawõmi, ba me no mamagõlõ ami fõnagu, ba gosali andrõ, si no fao ba dõi tõigu. 16 Ba iya’e, ba no mifuli mibe’e ra’iõ dõigu, me ihalõ mangawuli zawuyunia ira matua ba sawuyunia ira alawe zamõsana, sawuyumi, si no mifalua fangefa’õ; me no mifuli mi’anõsõ’õ wangosawuyu ya’ira. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRö FANGEFA HORö Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Yohane 8 : 30-36 30 Me iwa’õ da’õ, ba ato zamati khõnia. 31 Ba imane Yesu ba niha Yehuda, si no mamati khõnia: Na lõ tebulõ ami ba daroma ligu andrõ, ba si ndruhu nifahaõgu ami; 32 ba aboto ba dõdõmi zi duhu, ba i’efa’õ ami si duhu andrõ. 33 Latema linia, lamane: Ma’uwu Gaberahamo ndra’aga, ba lõ marai mõi sawuyu niha bõ’õ, hadia wa õwa’õ: Ni’efa’õ ami? (Mat. 3, 9. Neh. 9, 36). 34 Itema lira Yesu, imane: Si ndruhundruhu niwa’õgu khõmi, sawuyu horõ zamazõkhi horõ. 35 Ba tenga sa si lõ mamalõmalõ yomo zawuyu, si lõ mamalõmalõ nono. 36 Ba na i’efa’õ ami Ono andrõ, awena aefa sibai ami. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura I Fetero 2 : 11-17 11 He ya’ami ni’omasi’õ! ufarou dõdõmi, me no si fatewu ami, me no sikoli: bõi mifa’amõi ba dõdõmi wangisõ nõsi niha andrõ, si fa’emali ba dõdõ. 12 Ba mihaogõ mbuabuami, ba gotalua niha baero andrõ, ena’õ lasuno Lowalangi, na bawa we’amõinia, bõrõ mbuabuami andrõ si sõkhi, na latõngõni da’õ, na no labõbõgõ khõmi zi lõ sõkhi. 13 Ba mi’o’õ fefu nifakhoi niha bõrõ Zo’aya ya’ita, he razo, fondrege zalawa, 14 ba he kumandru andrõ, nifatengenia, ba wangotu’õ sanao horõ andrõ, ba ba wanuno solau si sõkhi. 15 Si manõ sa zomasi Lowalangi, folau si sõkhi labe’e fama’afu mbawa ba wa lõ mangila andrõ, ba niha sambõ era’era. 16 Si mane si tenga sawuyu, ba bõi si mane same’e balubalu walõsõkhi wa no tenga sawuyu ira; si mane enoni Lowalangi. 17 Dozi niha mifosumange, mi’omasi’õ watalifusõta, mi’ata’ufi Lowalangi, mifosumange razo. Famotokhi Taromali Lowalangi Sinanö ba dödö tehalö moroi ba zura Yohane 8 : 36 Ba na I'efa'ö ami Ono andrö, awena aefa sibai ami. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 211 Ahono ae dödögu ba danga-Mö Yesu. He na so wandraigö lö fa’ata’ugu. Fefu gabula dödö, fa’aombö dödögu. He göi fangaröngarö Itayaigö fefu. Reff : Ahono ae dödögu...... FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 211 : 3 Yesu we’ewe’egu no möi salahigu. Si lö tebulö Ia, aro wamatigu. Ba wombaloi So’aya, utaha dödögu. Na irugi inötö wangawuli Yesu. Reff : Ahono ae dödögu...... Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***