29 Juni 2025 (Bahasa Nias)

Download Tata Ibadah (DOC)

Download Tata Ibadah (PDF)

29 Juni 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 15 Ya’ahowu ae zanöndra, Lowalangi sindruhu. Sangalui tola isöndra, na mamati khö Yesu. Ba tadönadöna na, watolosa Zo’aya, watolosa Zo’aya. Andrö wa toföfö danö, ba toföfö göi nasi. No Ya’ia zanguma’ö, andrö wa maulu sökhi. Fefu na mbö’önia, oi nihonogöi-Nia, oi nihonogöi-Nia. Ifatörö fefu niha, wangaro’ö tödöra. Fa dozi oi manötöna, ba nifabu’u-Nia. Lowalangi, Yehowa,tasuno Haleluya, tasuno Haleluya. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 232 No Isusugi dödögu, Ihagaini Eheha. Ifa’ele’ö horögu, ba fefu golalöwa. Reff: Fa’abölö ndro Yesu, .... Andrö göi wa ufabu’u, u’ogorofi horö. Me usöndra wangatulö, so wa’ahono dödö. Reff: Fa’abölö ndro Yesu, .... Fefu wa’erege dödö, ba wolu’i horögu. Ba röfa Yesu utou’ö, ba terara dödögu. Reff: Fa’abölö ndro Yesu, .... Ba me lö Itimba ndra’o, no terara dödögu, Andrö falukha ndra’odo, wa’ohahau dödögu. Reff: Fa’abölö ndro Yesu, .... Lö ufamalö wanuno, ufolakhömi Yesu. Me no Iheta ndra’odo, ba lala wa’elungu. Reff: Fa’abölö ndro Yesu, .... Ba lö mangiwa dödögu, me itolo Eheha. So wa’ahono dödögu, lö uböhöi Zo’aya. Reff: Fa’abölö ndro Yesu, .... FOMBASO TAROMALI LOWALANGI (AMABU'ULA LI SIFöFöNA) Liturgos : Da tafondrondrongo daroma Li Lowalangi, tehalö moroi ba zura Yeremia 1 : 4-9 4 So niwa’õ Yehowa khõgu, imane: 5 Lõ niwõwõigu ya’ugõ na, ba dalu ninau, ba noa sa’ae u’ila’õ; ba lõ si tumbu’õ na, ba no u’amoni’õ ndra’ugõ; no uhonogõi, sama’ele’õ ndra’ugõ ba ngawalõ soi niha. 6 Ba umane: He Soa’aya Yehowa, lõ’õ sa u’ila fahuhuo, me iraono na ndra’odo. 7 Ba imane khõgu Yehowa: Bõi wa’õ: Iraono na ndra’odo; ha khõ sa’ae fefu ufatenge’õ, ba mõi’õ, ba fefu hadia ia, ni’oroi’õgu khõu, ba õwa’õ. 8 Bõi ata’ufi ira, utolo sa ndra’ugõ, ba wangorifi ya’ugõ, iwa’õ Yehowa. 9 Ba i’oro’õ dangania Yehowa, itufa mbawagu. Ba imane khõgu Yehowa: Hiza, ube’e ba mbeweu daroma ligu. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRö FANGEFA HORö Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura I Tesalonika 3 : 1-13 1 Andrõ edõnaga, ha ya’aga zi torõi furi ba Natena, me no tebai mataha sa’ae, 2 ba no mafatenge Dimoteo andrõ, talifusõma, enoni Lowalangi andrõ, ba duria somuso dõdõ andrõ khõ Keriso, ba wangabe’e’õ ya’ami, ba ba wamarou tõdõmi, ba wamatimi andrõ, 3 ena’õ lõ sangiwa tõdõ, ba wamakao andrõ, noa sa mi’ila wa no nihonogõi khõda da’õ. 4 Me soga khõmi gõi sa’ae, ba no mahõnagõ mawa’õ khõmi, gõna dania ita famakao, ba no itõrõ ba no mi’ila. 5 Andrõ gõi wa no ufatenge, me tebai utaha sa’ae, ba wamaigi famatimi andrõ, ma no itandraigõ ami sanandraigõ andrõ, ba ma no tobali zayazaya gõlõ halõwõma andrõ. 6 Ba iada’e, me no mangawuli khõma Dimoteo, moroi ba khõmi, me no ituriagõ khõma wa’asõkhi wamatimi ba fa’asõkhi wa’omasimi, awõ wa lõ’õ manõ olifu ami ndra’aga, awõ wehulu dõdõmi, ba wangila ya’aga, si mane fehulu dõdõma, 7 ba wangila ya’ami; andrõ wa no terara dõdõma, ba khõmi andrõ, ya’ami ira talifusõ, ba wa’afõkhõ andrõ fefu, ba ba wamakao andrõ khõma, 8 bõrõ wamatimi andrõ; noa sa auri ndra’aga iada’e, na abe’e ami ba khõ Zo’aya. 9 Hadia sa zulõ, si tola mabe’e khõ Lowalangi, fangandrõ saoha gõlõnia, ba khõmi andrõ, ba wa’omuso dõdõma andrõ fefu, ba khõmi, fõna Lowalangida? 10 Bongi ma’õkhõ ma’abõlõgõ sibai wangandrõ, ena’õ fa’ila bawa ita, ba ena’õ ma’asiwai hadia ia zambõ na, ba wamatimi andrõ. 11 Ba ya’ia, Lowalangi, Amada, ba yamufolala ndra’aga khõmi ba So’aya ya’ita andrõ, Yesu. 12 Ba khõmi, ba yamudou’õ So’aya wa’omasimi nawõmi ba fa’omasimi niha fefu, si mane fa’omasima ami gõi, ena’õ fahõna, 13 ba wanga’aro’õ tõdõmi, ena’õ lõ sinegu, ba wa’ohauhau, fõna Namada Lowalangi, ba wa’aso Zo’aya ya’ita, Yesu, na fao ni’amoni’õ andrõ khõnia, fefu. Yaduhu. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura I Razo 19 : 15-21 15 Ba imane khõnia Yehowa: Fuli’õ, ae ba danõ si mate ba Ndramaseko, ba ae miyomo ba bayoini razo Ndrawa Garamo Hazaëli andrõ. 16 Ba Yehu andrõ, ma’uwu Nimisi, ba bayoini razo Ndraono Gizeraëli, ba Elisa andrõ, ono Zafati, banua Habeli Mehola, ba õbayoini sama’ele’õ, fangaliu dania. 17 Ba tobali ha niha zaefa ba mbawa zi’õli Hazaëli, ba bunusõ Yehu, ba ha niha zaefa ba mbawa zi’õli Yehu, ba bunusõ Gelisa. 18 Ba fitu ngahõnõ zi tosai Iraono Gizeraëli ube’e, dozi balõduhi si lõ irai akõi fõna Mba’ali andrõ, ba dozi bawa, si lõ irai fa’ago khõnia. 19 Ba iheta ia ba da’õ, ba falukha ia Gelisa andrõ, ono Zafati, samali’õ tanõ ia: felendrua fasa zawi fõnania, ba ya’ia zolohe fondrege tánõ furi. Ba mõi khõnia Geliya, ihawui ia barunia sebua. 20 Ba irõi zawi no mege ba i’o’õ Geliya, imane: Tehe khõgu mõido fa’ago bawa khõ namagu ba khõ ninagu, awena dania u’o’õ ndra’ugõ! Ba imane khõnia: Ae’e, ba fuli’õ; bõi olifugõ’õ nilaugu khõu! 21 Ba irõi Geliya, mõi ia, ihalõ zawi andrõ si safasa ba itaba; ba fakake zawi andrõ, ba ibe’e eu, ba wangasosoi õsi, ba ibe’e õ niha andrõ. Ba maoso ia, i’o’õ Geliya ba tobali ngoningoninia. Famotokhi Taromali Lowalangi Sinanö ba dödö tehalö moroi ba zura Yeremia 1 : 8 Böi ata'ufi ira, utolo sa ndra'ugö, ba wangorifi ya'ugö, iwa'ö Yehowa. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 204 : 1-2 Ha fa’omasi Yesu, zimöi fangorifigu. Fa’omasi sindruhu,wa ohahau dödögu. Dozi samati khö-Nia, Ifasao, I’ohe danga. Ifatörö ba haga ba lala khö Zo’aya. So’aya zangaro’ö,tötönafö dödöda. Sangabölö ya’ita, sanganau’ö ölöda. Ibè madala sihaga, fanötöna si lö taya. Na no tarugi Nama, ba omuso dödöda. FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 204 : 4 Aro’ö wanötöna, famati, fa’omasi. Fangönada wondrugi, naha si so fa’auri. Ha ba lewatö irugi, fanötöna ba famati. Sindruhu wa’omasi, zoguna he na furi. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***