[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami, Ya’ahowu!, no maoso Keriso!
Jemaat : Ya'ahowu! Duhu No Maoso Keriso!
Liturgos : Ya faofao khõmi Lowalangi!
Jemaat : Ya'ahowu! Ya fao khõu Geheha-Nia!
FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No
1
Ya’ahowu dozi niha, samati khö Yehowa.
Sanötöna fangorifi, ba döi Yesu So’aya.
Saro tödö ba da’ö, fa’auri dötönafö.
Yehowa zamokai hörö, ba samè khöda haga.
Ibönökhi göi wame’e, fefu zoguna khöda.
Lö manö faröi Ia, ba nifabu’u-Nia.
Salawa yawa Zalawa, Lowalangi Yehowa.
Andrö ta’o’ö li-Nia, lö manö baero-Nia.
No so Ia ba khöda, Haleluya khö-Nia.
FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horömi; Ba iada’e, ba no mususugi Keriso, moroi ba ngai zi mate. (I Kor. 15 : 17 ba 20a). HALELUYA!
Jemaat : Manunõ
Liturgos : Mangandrõ ita, "He Yesu Keriso So’aya ya’aga, Sangorifi ösi gulidanõ andre. Ma’andrõ saohagõlõ khõ-U me no Õlaŵa wa’abõlõ horõ ba fa’amate ba wemaoso-Mö andrö. Iada’e lõ sa’ae ata’u ndra’aga ba lumö wa’abõlõ wa’amate andrõ, me no maoso Ndra’ugõ ba wangorifi ya’aga. No alõmõ wa’amate andrõ ba wemõna, No Õ’efa’õ ndra’aga ba wa’abõlõ zogõmigõmi ba no Õ’ohe ndra’aga ba haga. No Ö’efa’ö ndra’aga moroi ba wesu horõ, irege tobali ndra’aga ono khö Lowalangi Ama. He Yesu Keriso no Öfaogö ndra’aga ba wa’amate-Mö ba tesusugi göi ndra’aga ba wemaoso-Mö andrö, ma’andrö khö-U böi bulö’ö khöma howuhowu-Mö, me Ya’ugö zamatörö banua si yawa awö danö i’otarai da’e irugi ba zi lö aetu, Yaduhu!"Mudadao Zato
Liturgos : Manunõ ita moroi ba Mbuku Zinunõ No.
191
No ikaoni So’aya, zabutödö ba horöra.
Sanutunö khö-Nia, fefu ngawalö zalara.
Ha zi tosasa tödö, ae khö Yesu angandrö.
Na tatema wangefa, lö sa’ae fa’ata’uda.
Me do-Nia hölida, lö sa’ae aombö dödöda.
Fangohahau dödöda, Ibè khöda So’aya.
Alai zabe’e tödö, niha sangaohasi horö.
Fefu horö sakhökhö, si lö lai ba wanguma’ö.
Na irugi inötö, dozi manema sulö.
Ba dozi sanau ölö, lö mamalö ba wangandrö.
Howuhowu lö ambö, me So’aya dötönafö.
He na tefakao mboto, ba böi abusi tödö.
Na khö Yesu dödöda, ba khö Yesu halöwöda.
Ömöda wama’ema, turiaröfa Zo’aya.
Eheha Ibè khöda, sangabölö ya’ita.
FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura
Amaedola 1 : 20-23
20 Mu’ao wa’atuatua baewali, ifarongogõ linia ba golayama.
21 Ba zinga misa, ba zato niha baolayama, mu’ao ia; ba mbawa gõli ba mbanua fahuhuo ia, imane:
22 ”He ya’ami, si lõ tõdõ, ha wa’ara tõ na omasi ami walõtõdõ andrõ? Ba ha wa’ara na omasi zango’aya wango’aya andrõ, ba ha wa’ara na fa’udu zambõ tõdõ ba wa’aboto ba dõdõ?
23 Mi’otahõgõ wotu andrõ khõgu! Hiza, ufalua khõmi Gehehagu; aboto ba dõdõmi daroma ligu ube’e.
FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!"
Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U."
Mangandrõ ba dõdõ zamõsana fõna Lowalangi.....1 irugi 2 meniti.
Liturgos : Imane taroma Li Lowalangi: ‘Ba no erege dödö-Gu õbe’e ba horõu andrõ; no õfakao-Do olalõŵamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu. (Yesaya 43:24b-25) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura
Fama'ele'ö 1 : 4-8
4 Yohane zanura da’e, ba mbanua niha Keriso andrõ, si fitu, ba Azia, Yafalukha ami wa’ebua dõdõ, ba fa’ohahau dõdõ, khõ zi so andrõ, si no so fõna, ba si mõi dania, ba ba Geheha andrõ, si fitu, si so fõna dadaomania andrõ,
5 ba khõ Yesu Keriso, samaduhu’õ andrõ, si lõ farõi, si a’a zi oroi ba ngai zi mate, ba samatõrõ razo andrõ, ba guli danõ, khõ zangomasi’õ ya’ita andrõ, si no mangefa’õ ya’ita ba horõda andrõ, donia,
6 ba si no mame’e banua ya’ita ba ere Namania Lowalangi, ya khõnia lakhõmi ba fa’abõlõ, irugi zi lõ aetu! Yaduhu.
7 Hiza, so ia ba lawuo, ba la’ila dania ia dozi hõrõ, ba samahõ ya’ia andrõ, ba mege’ege dania ba khõnia fefu soi niha ba guli danõ. Ya’ia, Yaduhu. 8 Alafa ndra’o ba omega ndra’o, iwa’õ So’aya Lowalangi, si so, ba si no so fõna, ba si mõi dania, samatõrõ fefu, hadia ia.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
Fombaso Taroma Li Lowalangi moroi ba zura
Yesaya 55 : 1-5
1 He ya’ami, sowõkhi tõdõ, fefu, mi’ondrasi nidanõ! Ba ya’ami si lõ balazo, mi’aine mi’õli mbõra ba mi’a! Mi’aine, mi’õli mbõra, ba agu ba susu, saoha gõlõ!
2 Hana wa edõna mitulo gana’a, bõli zi tenga õ, ba õlõmi, ba zi tebai abuso ami? Ba mifondrondrongo khõgu, ba misõndra õmi zi sõkhi ba mõi fangokafu dõdõmi zatabõ.
3 Mibe’e mbõrõ dalingami ba mi’ondrasi ndra’odo! Mifondrondrongo, ena’õ tedou nosomi! Ba ulau fawu’u li khõmi, si lõ tebulõ: — fa’ebua dõdõgu andrõ khõ duami Dawido, si tebai awu’a!
4 Hiza, no ube’e samaduhu’õ ia, ba niha baero salawa ba samatõrõ soi niha.
5 Hiza, õkaoni dania soi si lõ õrai mila, ba la’ondrasi ndra’ugõ niha si lõ irai fa’ila li khõu. Bõrõ Yehowa, Lowalangiu andrõ, Ni’amoni’õ ndraono Gizeraëli andrõ, me no ifolakhõmi ndra’ugõ.
Famotokhi Taromali Lowalangi
Sinanõ ba dõdõ tehalõ moroi ba zura
Yesaya 55 : 3a
Mibe'e mbrörö dalingami ba mi'ondrasi Ndra'odo! Mifondrondrongo, ena'ö tedou nosomi!
Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Manunõ ita moroi ba Mbuku Zinunõ No.
153
Fonaha ba dödöma, fefu zi no marongo.
Sangabölö ya’aga, ba lala ba zorugo.
Ya humaga dödöma, bè howuhowu khöma.
Eheha-Mö zoguna, sangehaogö tödöma.
He Yesu, Sangefa’ö, efa’ö khöma horö.
No oya sibai lalö, tebai madunödunö.
Ya sumange-U ndra’aga, ba fefu zi so khöma.
Li-Mö niwa’ö-U khöma, mabe’e ba dödöma.
FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
Ya mufahowu’õ ami Lowalangi, Ya murorogõ ami;
Ya mufohaga mbawa-Nia khõmi, Ya mu’ebua’õ dõdõ-Nia khõmi;
Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No.
501
Omasido fao khö Yesu, omasido fao khö Yesu irugi zi lö aetu.
Hewa’ae oya gakaola he no fahöna de’ala.
So sa Keriso awögu sagötö fa’aurigu.
He ya’ugö talifusö, he ya’ugö talifusö böi arörö dödömö.
Ö’osambalö’ö dödö wangalui fangorifimö.
Öfalua wangesa dödö ba ogorofi horö.
He ya’ita banuada, he ya’ita banuada moguna mangelama.
Me no oya sa dandrawa no ifazaewe afökha.
Da tahalö baluseda daromali Zo’aya.
Tidak ada komentar:
Posting Komentar