13 April 2025 (Bahasa Nias) ~ Tata Ibadah

Minggu, 13 April 2024

[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]

FANGOWAI BA FOGAONI

FANGOWAI
Liturgos : Ya’ami banua Zo’aya ni’omasi’ö ba döi Yesu Keriso, no tarugi migu nifotöi migu föna wamakao Yesu. Töi migu ma’ökhö andre, ya’ia da’ö : Palmarum. Ma’owai ami, ba döi Zo’aya ya’ita Yesu Keriso, Ya’ahowu!

Jemaat : Ya'ahowu!

Liturgos : Ya faofao khömi Lowalangi!

Jemaat : Ya fao khõu Geheha-Nia!

FOGAONI
Liturgos : Da ta honogö dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunõ ita moroi ba Mbuku Zinunõ No. 19

Tasuno Wondrege Zalawa, ba samatörö ya’ita.
Ebua wa’omasi-Nia, sahölihöli dödöda.
Itehe mate ba röfa, Nono-Nia salahida.

Ta’oigö dödöda wanuno, Lowalangida, So’aya.
Samè famati ba dödöda, si lö’ö khöda meföna.
Ta’omusoi’ö dödöda, me fa’aurida Zo’aya.

Ya’e dödöma, Sangorifi, era’erama, boto göi.
Si hulö nono mbiribiri, sumange nibe’ zamati.
Ba wa’ebua dödö-Mö, aro’öga tana khö-Mö.

FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!

Jemaat : Yaduhu!

Liturgos : Faigi khõgu zatulõ, Ya’ugõ Lowalangi, ohe ba lala huhuogu ba niha andrõ, si lõ fa’omasi; efa’õ ndra’o ba niha sebua faya, solau si lõ atulõ! Fa ukhamõ naha wame’e sumange khõ Lowalangi ba Lowalangi fa’omuso dõdõgu andrõ. Fa’ohe’õ haga-Mõ ba si duhu andrõ khõ-U! Da’õ zamasao ya’odo, solohe ya’o ba hili ni’amoni’õ andrõ khõ-U, ba ba naha-Mõ andrõ. (Sinunö 43:1,4a,3) HALELUYA!

Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi, si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ölulu nono-U omasiö ba danga zokhö horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dödöma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi Nama, ba khö Zo’aya ya’aga Yesu Keriso ba ba Geheha Ni’amoni’ö, Yaduhu!" Mudadao Zato

Liturgos : Manunõ ita moroi ba Mbuku Zinunõ No. 237

He na tebai ndra’o Öbè wa’abölö.
Ba no Öheta horögu bohou wa’aurigu.
Reff: Möi ndra’odo khö-U So’aya Yesu...

Ökaonido Yesu wangombakha khögu.
Famati ba fanötöna he göi fa’omasi-U.
Reff: Möi ndra’odo khö-U So’aya Yesu...

Nifalua-U Yesu manandrösa khögu.
Me Ötayaigö horögu Öbè howuhowu.
Reff: Möi ndra’odo khö-U So’aya Yesu...

He So’aya Yesu no sa Öfabu’u.
Öbe wa’auri sindruhu ba zamati fefu.
Reff: Möi ndra’odo khö-U So’aya Yesu...

Nisuno Zo’aya solomasi khögu.
Do-Nia Ni’amoni’ö möi fa’atulögu.
Reff: Möi ndra’odo khö-U So’aya Yesu...

FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura Zakharia 12 : 10-14

10 Ba ba ma’uwu Dawido, ba ba mbanua Yeruzalema, ba ulau Geheha fa’ahakhõ dõdõ, Eheha ba wakaosa, ba latõngõni nifahõra mege, ba la’e’esi ia, nifange’esi ono matua si ha sambusambua; mege’ege sibai ira ba khõnia, timba wa’abu dõdõ ba khõ nono si a’a.
11 Na luo da’õ, ba tesao wange’esi sabõlõbõlõ, ba Yeruzalema, timba wange’esi no ba Hadandrimo ba danõ salo’o, ba Megido.
12 Mege’ege niha ba danõ fefu, sambusambua mado: Si tonia ma’uwu Dawido ba si tonia ndra alawe khõra; ba si tonia ma’uwu Natano ba si manõ gõi ndra alawe khõra;
13 ba si tonia mado Lewi ba si manõ gõi ndra alawe khõra; ba si tonia ma’uwu Zime’i ba si manõ gõi ndra alawe khõra;
14 ba si manõ madora fefu; sambusambua mado, ba si tonia, ba si manõ gõi ndra alawe khõra.

Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA

FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!"

Jemaat : Manunõ moroi ba Mbuku Zinunõ No. 224 : 1

Liturgos : Ba no erege dõdõ-Gu õbe’e ba horõu andrõ; no õfakao-Do olalõwamõ. Ya’o, Ya’odo andre zamunu lalõu andrõ. Bõrõ Ndra’o, ba lõ’õ sa’ae itõrõ tõdõ-Gu horõu! Lakhõmi khõ Lowalangi si yawa!

Jemaat : Manunõ moroi ba Mbuku Zinunõ No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura Yohane 12 : 12-15

12 Sara wongi aefa da’õ, me larongo, niha sato, si no mõi ba gowasa, no mõi ba Yeruzalema Yesu,
13 ba lahalõ mbulu nohi, mõi ira mamaondragõ ya’ia, mu’ao ira: Hosana, ya’ahowu zi so andrõ, ba dõi Zo’aya, razo Ndraono Gizeraëli andrõ!
14 Ba me isõndra nono galide Yesu, ba i’okudo, itõrõ zi so ba zura andrõ:
15 ”Bõi ata’ufi, ono Ziona alawe, hiza, so razomõ, i’okudo nono galide”.

Ya’ahowu zamondrongo taroma Li Lowalangi ba same’e ba dõdõ (Luka 11:28)

Jemaat : Yaduhu!

FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261

2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.

Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR/VOCAL GROUP

Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163

[Pengkhotbah Mõi ba Mimbar]

HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.

Fombaso Taroma Li Lowalangi moroi ba zura Sinunö 68 : 25-36

25 No lõ la’ila, me õtõrõ, ya’ugõ Lowalangi, me itõrõ Lowalangigu andrõ, razogu, we’amõi ba ni’amoni’õ andrõ.
26 Mowaõwaõ, zanunõ, ba itete, ba solau biola, ba hunõ nono alawe, samõzi faritia.
27 Misuno Lowalangi, So’aya, ba gowuloa andrõ; ya’ami si oroi gumbu Ndraono Gizeraëli andrõ!
28 So ba da’õ Mbeniyami, si akhi andrõ, samatõrõ, ba salawa Ndraono Yuda, sato andrõ khõra, ba salawa Ndraono Zebuloni ba salawa Ndraono Nafetali.
29 No i’oroi’õ Lowalangi wa’asalawau. He Lowalangi, a’aro’õ nifa’emau khõma!
30 Bõrõ gosalimõ andrõ, ba Yeruzalema, wa la’ohe zumange khõu razo.
31 Tenawa zaliwaliwa andrõ, barõ zukhu, awõ ngawawá zawi si mantua andrõ, awõ nono zawi niha baero, ena’õ mangalulu ira, wolohe boto wirõ. Fazawili soi andrõ, somasi manuwõ.
32 So dania razo Miserayi; i’aliogõ i’oro’õ dangania khõ Lowalangi tanõ Gaitiofia andrõ.
33 Ya’ami õri niha ba guli danõ, misuno Lowalangi, misuno Zo’aya!
34 Misuno zanõrõ banua fondrege si yawa andrõ, si no gõtõgõtõ fa’ara; hiza, ifarongogõ linia andrõ, li sabõlõ.
35 Mitehe khõ Lowalangi wa’abõlõ; famatõrõ Iraono Gizeraëli wa’asalawania andrõ ba famatõrõ banua si yawa wa’abõlõnia.
36 Sata’u ita nilau Lowalangi, moroi ba ni’amoni’õ andrõ khõnia; Lowalangi Ndraono Gizeraëli andrõ zame’e fa’abõlõ ba fa’abe’e ba mbanuania. Nisuno Lowalangi!

Famotokhi Taromali Lowalangi

Sinanõ ba dõdõ tehalõ moroi ba zura Sinunö 68 : 36b

Lowalangi Ndraono Gizera'eli andrö zame'e fa'abölö ba fa'abe'e ba mbanua-Nia. Nisuno Lowalangi!

Fangandrõ Fondruhõ Wamotokhi Taromali

Jemaat : Manunõ moroi ba Mbuku Zinunõ No. 154

TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:

Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.

Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.

Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.

WARTA JEMAAT (Klik untuk membuka)

Liturgos : Manunõ ita moroi ba Mbuku Zinunõ No. 197

Fondrondrongo li Zo’aya, samokai, samolala.
Sama’ema fangorifi, ba zedöna manema.
Ibè buala-Nia, gondröita si lö taya.

Fondrondrongo li Zo’aya, si no mo’ahonoa.
No Ifatenge zanolo, Eheha soroi Nama.
Samasao ba wa’auri, si fahöna lakhömi.

FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"

Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.

Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:

Ya mufahowu’õ ami Lowalangi, Ya murorogõ ami;

Ya mufohaga mbawa-Nia khõmi, Ya mu’ebua’õ dõdõ-Nia khõmi;

Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!

Jemaat : Manunõ moroi ba Mbuku Zinunõ No. 270