[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI Liturgos : Ya’ami banua niha Keriso. Fa’owuloda ma’ökhö ba wamalua Fanörö tödö “Fa’amate Zo’aya ya’ita Yesu Keriso” ba wangöhöli ya’ita ba horöda. Ma’owai ami ba döi Zo’aya. Ya’ahowu!
Jemaat : Ya'ahowu!
Liturgos : Ya faofao khõmi Lowalangi!
Jemaat : Ya'ahowu! Ya fao khõu Geheha-Nia!
FOGAONI Liturgos : Da tasuno Lowalangi Amada, si no manehegö Ono-Nia omasiö, mate ba röfa salahida, da möi ita ba wamalua fasumangeta khö Lowalangida. Tasuno Ia, manunö ita moroi ba Mbuku Zinunõ No.
201
Tasuno Zo’aya Yesu Keriso.
Ha khö-Nia so wangefa, fefu horö awö zala.
Da ta’ondrasi si fao famati.
Ta’andrö Geheha, Ni’amoni’ö.
Sangoroma’ö lalada, wanara lahe Zo’aya.
Itolo ita, fa lö te’ala.
Na anau gölöda, ba na lö faröi.
Lö tebulö wa fao khöda Zo’aya ero ma’ökhö.
Ifakhamö’ö zohahau dödö.
FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Me lahedehede’õ Ia, ba lõ Ifuli Ihedehede’õ; me lafakao Ia, ba lõ Ifangaha wolau balõ, Ibe’e ba danga zangatulõ’õ fanguhuku andrõ, Yaduhu! (1 Fetero 2:23) YADUHU!
Jemaat : Manunõ
Liturgos : Mangandrõ ita, "He Yehowa Lowalangi, Ama sahakhö tödö si so ba zorugo yawa. Moroi ba wa’omasi-Mö, wa no Ölulu nono-U omasiö ba danga zokhö horö: te’o’aya, tefakao, teforöfa ba mate ba wangöhöli ya’aga. Fahaö ndra’aga, fa’aboto ba dödöma wa khöma manandrösa wa’amate-Nia. Abölö’ö ndra’aga ba wanara lahe Zo’aya, ba wolu’i röfama, ena’õ lö faröi ndra’aga irugi gamozua götö danö andre, Yaduhu!"Mudadao Zato
Liturgos : Manunõ ita moroi ba Mbuku Zinunõ No.
106
Röfa Yesu, röfa Yesu, dötönafö silö aetu.
He niha si no mosala, mane Baraba meföna,
lö a’ozu tehuku.
Röfa Yesu, röfa Yesu, wangeheta sala fefu.
Horö fana’unöidödö, ha do Yesu wangehaogö,
fanasai, fangatulö.
Röfa Yesu, röfa Yesu, zangohahauni tödöda.
Na aro wanötönada, na göna wasöndratada,
ba tasöndra wemöna.
Röfa Yesu, röfa Yesu, da’ö zawatö dödöda.
He tosasa gera’era, he akao lö lingalinga,
ha Yesu lembalemba.
FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura
Zakharia 9 : 11-17
11 Ba me no do ube’e tandro tanga ba zura wawu’usa li andrõ khõda, ba u’efa’õ gõi ni’oloi’õ andrõ khõu, ba mba’a andrõ, si lõ idanõ.
12 Mifuli ami ba mbanua saro andrõ, ya’ami si no timba nikuru, sanõtõna na fangefa. Ma’õkh? na gõi, ba tefarongogõ: Ufodua winaeta wanulõni khõu.
13 No ukhai khõgu mado Yuda, nifogai fana, no ufo’õsi [ono wana] mado Geferayi, ba ufarou nonou matua, ya’ugõ Siona, ba wolau ba ndraono Yawano, ubali’õ si’õli zabõlõ ami.
14 To’ele dania Yehowa, yawara, ba itõrõ ono wana khõnia, timba gari mbanua; ilau dania dorofe Yehowa ba fao ia ba nangi sabõlõ moroi raya wanõrõ. (Sin. 18, 15. Yes. 27, 13).
15 Ifoba’aba’a ira Yehowa ngahõnõ, mangamanga ira, ba lahundrahundra tou nono gara riboribo. Labadu ndro [zanuwõ] nifamadu agu, ba oi do ira, timba wiga andrõ, ba wame’e sumange, ba timba watalinga naha wame’e sumange.
16 Lowalangira Yehowa zame’e abõlõ ira, na luo da’õ, ya’ira andrõ, nikubaloi, banuania, me no manimani ba dakula ira, si takile ba danõnia.
17 Ha lõ ebua lakhõminia! ba ha lõ abõlõ wa’asõkhinia! So mbua danõ, fangabõlõ nono matua, ba so nõsi mbua nagu fangabõlõ nono alawe.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 103 : 1
FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!"
Mangandrõ ita, "He Lowalangi, sangila era’era dõdõ niha, awö nilaura fefu! No aboto ba dödöma, wa börö horöma soya sibai, si no to’ele khö-U ba zorugo, wa no Öhare’ö khö Nono-U omasiö ngawalö lualua horö si göna khöma ena’ö, ya’ia wamakao soya, ba fango’aya, awö wangailasi, ba fa’amate ba röfa si no fondrege wa’afökhö. Ma’andrö khö-U, a’asogö ba dödöma wamati saro, ena’ö manandrösa khöma, zi no Itaögö Yesu Keriso, fa tola te’orifi ndra’aga, aefa ba wönu-Mö ba luo safuria. Bologö dödö-U khöma ba be’e aefa khöma horöma..."
Mangandrõ ba dõdõ zamõsana fõna Lowalangi.....1 irugi 2 meniti.
Liturgos : Si manõ sa wa’omasi Lowalangi nõsi gulidanõ, no Ibe’e Nono-Nia andrõ, si ha sambua, ena’õ lõ tekiko dozi samati khõ-Nia, ena’õ so khõra wa’auri si lõ aetu. (Yohane 3:16) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO WAÕWAÕ WAMAKAO YESU Liturgos : Manunõ ita moroi ba Mbuku Zinunõ No. 98:1
Fombaso Mataio 26:36-46
36 Ba irugi Yesu halama, Gezemane dõinia, fao ira khõnia. Ba imane khõ ndra nifahaõ: Midadao ba da’e, fatua mõido ba da’õ, ba wangandrõ.
37 Ba i’ohe awõnia Wetero, ba ono Zebedaio andrõ, si darua, ba ibõrõtaigõ abu dõdõ ba alangu dõdõ.
38 Ba imane khõra: Abu sibai dõdõgu, irugi wa’amate; mi’iagõ da’e, bõi mifõrõ, awõgu.
39 Ba mõi ia, lõ arõu, ifalõgu ia tou, mangandrõ ia, imane: He Ama, na so lala, ba yamutalu’i ndra’o mako andrõ. Ba bõi somasi ndra’o, ha somasi ndra’ugõ.
40 Ba mõi ia khõ ndra nifahaõ andrõ, ba no mõrõ ira, me irugi, ba imane khõ Wetero: Ba tebai si lõ mõrõ ami mato saza, awõgu?
41 Bõi mifõrõ, ba miangandrõ, fa lõ itõrõ ami fanandraigõ. Aoha sa gõlõ dõdõ, ba no sambõ fa’abõlõ nõsi.
42 Ba ifuli mõi, zamuza tõ, mangandrõ ia, imane: He Amagu! na te’ai italu’i ndra’o, fa lõ ubadu ia, ba ya’itõrõ zomasi ndra’ugõ.
43 Ba me ifuli ia ba noa zui mõrõ ira, me irugi, noa sa abua guli hõrõra.
44 Ba irõi ira, ifuli mõi mangandrõ, no medõlu, si manõmanõ linia.
45 Aefa da’õ, ba mõi ia khõ ndra nifahaõ andrõ, ba imane khõra: Ba mifõrõ sa’ae, ba mi’olombase! — Hiza, no fadege, fa tebe’e ba danga niha si so horõ Nono Niha.
46 Mifaoso, talabu, hiza no ahatõ zi manga mbõligu andrõ.
Liturgos : Manunõ ita moroi ba Mbuku Zinunõ No. 98:2
Fombaso Mataio 26:57-67
57 Ba la’ohe Yesu sondra’u ya’ia andrõ, la’ohe khõ gere sebua andrõ, Kayafa, ba zi falukha zangila amakhoita ba satua mbanua andrõ.
58 Ba i’o’õ Fetero, arõu moroi furi, irugi golayama gere sebua andrõ, ba mõi ia bakha, dumadao ia ba ngai genoni, ba wamaigi lualua.
59 Ba la’alui ere sebua ba salawa rafe sebua andrõ fefu, he lawisa wamõbõgõ horõ khõ Yesu, ba wamunu ya’ia,
60 ba lõ lasõndra, he wa’ae ato zi so samõbõgõ, sofaya. Ba ba gafuriata, ba darua zi so,
61 lamane: No iwa’õ da’õ: U’ila ududugõ gosali Lowalangi andrõ, ba ha tõlu ngaluo u’angotomosi’õ.
62 Ba maoso gere sebua, imane khõnia: Hadia, lõ õtema li ba nibõbõgõ da’e khõu?
63 Ba lõ hedehede Yesu. Ba humede gere sebua, imane khõnia: Ube’e ba hõlu ndra’ugõ, khõ Lowalangi sauri andrõ, ena’õ õwa’õ khõma, na Keriso andrõ ndra’ugõ, Ono Lowalangi.
64 Imane khõnia Yesu: Ya’ia niwa õu. Ono Lowalangi ndra’odo. Ba uwa’õ khõmi, i’otarai da’e, ba mi’ila, dumadao Nono Niha ba gambõlõ wa’abõlo andrõ, ba mi’ila so ia moroi sa, ba dete lawuo, ba mbanua si yawa.
65 Awena isika nukhania ere sebua, imane: No mangaohangaoha ia! Hadia guna zi so ba mbõrõ sa’ae khõda? hiza, faefá mirongo wangaohangaoha andrõ.
66 He wisa ba dõdõmi? Ba latema linia, lamane: Huku tamunu hukunia.
67 Ba ladidiloi mbawania, lagukhui ia, ba so gõi zamalisi bawania.
Liturgos : Manunõ ita moroi ba Mbuku Zinunõ No. 98:3
Fombaso Mataio 27:31-50
31 Ba me no aefa la’o’aya ia, ba laheta khõnia mbaru luo andrõ, ba lafonukha ia nukhania, ba la’ohe ia misa, ba wamorõfa ya’ia.
32 Ba me mõi ira baero, ba falukha ira niha, banua Girene, Simoni dõinia, ba lara’u da’õ, ba wolohe rõfania.
33 Ba me larugi naha andrõ, sotõi Gologota —
34 sokamu’u geluaha — ba lafabadugõ khõnia nagu nifaruka awõkhu, ba me no itandra, ba lõ edõna ibadu.
35 Ba me no laforõta ia, ba lafosasi nukhania, fadahõdahõ ira.
36 Ba dumadao ira, manaro ya’ia ba da’õ.
37 Ba labe’e yawa hõgõnia mbõrõ wa’amatenia, sura: ”Yesu da’e, razo niha Yehuda.”
38 Ba laforõfa awõnia zamara’u, darua, samõsa ba gambõlõ ba samõsa ba gabera.
39 Ba latandrawaisi ia sanõrõ, lafalikhõ ira,
40 ba lamane: He sanudugõ osali andrõ, ba sangotomosi ya’ia, si ha tõlu ngaluo, orifi ndra’ugõ, na Ono Lowalangi ndra’ugõ; ba ae tou moroi ba rõfa andrõ!
41 Si manõ gõi ndra ere sebua, la’o’aya ia, awõ zangila amakhoita awõ zatua mbanua andrõ, lamane:
42 Niha bõ’õ, ba no i’orifi, ba tebai i’orifi ia. Razo Ndraono Gizeraëli ia, yamõi tou iada’e moroi ba rõfa, ba mamati sa’ae ita khõuia.
43 No faduhu dõdõnia khõ Lowalangi, ba yamu’efa’õ ia da’õ iada’e, na i’omasi’õ ia: noa sa iwa’õ: Ono Lowalangi ndra’o.
44 Ba si manõ gõi zamara’u andrõ, niforõfa awõnia, wanandrawaisi ya’ia.
45 Ba i’otarai laluo, ba tobali ogõmigõmi ba danõ ma’asagõrõ, irugi labõzi tõlu.
46 Ba so labõzi tõlu, ba mu’ao Yesu, ebua li, imane: Eli! Eli! lema sabakhtani? He Lowalangigu! He Lowalangigu! hana wa no õ’erogõ ndra’o? geluahania.
47 Ba lamane õsa, si so ba da’õ, me larongo da’õ: Mogaoni Eliya da’õ.
48 Ba i’anema’õ fagohi zamõsa khõra, ihalõ rabo, ifo’õsi niro aisõ, ibe’e ba mbalõ zukhu ba ifabadugõ khõnia.
49 Ba lamane tánõ bõ’õ: Bõi ua! datafaigi, na mõi Geliya, ba wangorifi ya’ia.
50 Ba ifuli mu’ao Yesu, ebua li, ba aetu noso.
Liturgos : Manunõ ita moroi ba Mbuku Zinunõ No. 98:4
FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura
I Yohane 3 : 11-13
11 Da’õ sa duria, nirongomi, i’otarai mbõrõta, fa faoma ta’omasi’õ nawõda.
12 Bõi si mane Ka’ino andrõ, soroi ba Gafõkha samunu akhinia; ba hana wa ibunu? Me no si lõ sõkhi mbuabuania, ba me satulõ sa mbuabua nakhinia.
13 Ba bõi ahõlihõli dõdõmi, ya’ami ira talifusõ, na fatiu dõdõ niha guli danõ khõmi.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
Fombaso Taroma Li Lowalangi moroi ba zura
Mareko 15 : 33-41
33 Ba me laluo, ba ogõmigõmi danõ ma’afefu, irege labõzi tõlu.
34 Ba me labõzi tõlu ba mu’ao Yesu, ebua li, imane: Eloï! Eloï! lama sabakhtani? He Lowalangigu! He Lowalangigu! hana wa no õ’erogõ ndra’o? geluahania.
35 Ba lamane õsa, si so ba da’õ, me larongo: Hiza, mu’ao khõ Geliya.
36 Ba fagohi zamõsa, ihalõ rabo, ifo’õsi niro aisõ, ibe’e ba mbalõ zukhu, ifabadugõ, khõnia, imane: Bõi ua, datafaigi, na mõi Geliya, ba wangefa’õ ya’ia.
37 Ba mu’ao Yesu, ebua li, ba aetu noso.
38 Ba asika mba’aba’a andrõ ba gosali, fabali manõ, i’otarai si yawa, numalõ mitou.
39 Ba me i’ila kumandra andrõ, si so ba da’õ ba gamaudunia, wa si manõ wa’amatenia, ba imane: Si ndruhu, Ono Lowalangi niha andrõ.
40 Ba so gõi ndra alawe, samaigimaigi moroi ba zarõu, ira Maria, banua Magadala, andrõ, ba Maria, ina ndra Yakobo side’ide Yose andrõ, ba Salome andrõ;
41 si no fago’õgo’õ khõnia, me so ia ba Galilaia, si no mõimõi ngoningoninia, ba ato na dánõ bõ’õ, si no fao khõnia, we’amõi misi yawa ba Yeruzalema.
Famotokhi Taromali Lowalangi
Sinanõ ba dõdõ tehalõ moroi ba zura
I Yohane 3 : 16a
Ba da'ö no aboto ba dödöda wa'omasi andrö, me no Ibelegö noso-Nia fönada.
Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Manunõ ita moroi ba Mbuku Zinunõ No.
94
Famakao ba fango’aya, fa’amate ba röfa.
Nitaögö Yesu So’aya, we’amöi salahida.
Na ta’angeragö tödö wa’amate ba röfa.
Si tebai itaögö niha no Itaögö So’aya.
Do Yesu si no aduwa zi möi fangorifida.
Fa tobali ono ita khö Lowalangi Ama.
Böi taröi Yesu So’aya sandrohu fa’aurida.
Ya mo’arota wamati irugi gamozua.
FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
Ya mufahowu’õ ami Lowalangi, Ya murorogõ ami;
Ya mufohaga mbawa-Nia khõmi, Ya mu’ebua’õ dõdõ-Nia khõmi;
Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No.
104
No itaögö zagafökhö, Yesu yawa ba röfa.
No ya’odo zamobörö, tefakao zi lö sala.
Na u’angeragö fefu, nilaugu si lö göna.
Mangesa sibai dödögu, fa usöndra wangefa.
Fangailasi, fango’aya, no Ötaögö So’aya.
Wangefa’ö dozi niha, ba wönu soroi Nama.
Da u’andrö khö-U, So’aya, be’e khögu wemöna.
Afu lö faröi ndra’odo, irugi gamozua.
Tidak ada komentar:
Posting Komentar