9 Februari 2025 (Bahasa Nias) ~ Tata Ibadah

Minggu, 9 Februari 2025

[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]

FANGOWAI BA FOGAONI

FANGOWAI
Liturgos : Ya’ami banua niha Keriso, ba wondrugida migu Epifania andre, ma’owai ami fefu ba döi Zo’aya ya’ita Yesu Keriso, Ya'ahowu!

Jemaat : Ya'ahowu!

Liturgos : Yafao-fao khõmi Lowalangi!

Jemaat : Ya fao khõu Geheha-Nia!

FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 7

Dönisido khö-Mö he Yesu, ya khö-U manö sa’ae wa’aurigu.
Ya so ba dödögu Geheha, sangila mamasao ya’odo khö-U.
Afu’afugu lö uböhöli, wangalulu khö-Mö, Sangorifi.

Tolo ndra’odo he So’aya, ena’ö sökhi wanunögu khö-U.
Fa böi tobali fayafaya, wolaugu khö-U sinunö sibohou.
Ena’ö sango’ou tödögu göi, Geheha-Mö andrö si lö faröi.

FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!

Jemaat : Yaduhu!

Liturgos : He Yehowa, farongogö khögu lala ba wa’auri andrö: no fahöna wa’omuso dödö föna-U, ba ba gambölö-U so wa’ohahau dödö si lö mamalö. (Sinunö 16:11). HALELUYA!

Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato

Liturgos : Manunõ ita moroi ba Mbuku Zinunõ No. 87

Hiza Yesu So’aya ya’ita, nifatenge Nama.
No Ya’ia zindruhu lalada, wogamö aurifa.
Khö-Nia so wangorifida, na mo’arota wamatida.
Me no möna auri ita.

No Ibe’e Geheha sanolo, sangehaogö tödö.
Ibohouni dödö si ta’unö, nibalugö horö.
I’a’aro’ö wanötöna, wa so wemaoso ba femöna.
Ba zamati khö Zo’aya.

FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura Amosi 3 : 1-8

1 Mifondrondrongo daroma li andre, taroma li Yehowa, fanegu ya’ami, Iraono Gizeraëli, fanegu sato fefu, ni’ohegu miyawa moroi ba danõ Miserayi; imane:
2 Ba niha fefu ba guli danõ, ba no ha ya’ami nituyugu; andrõ wa u’otu’õ ami ba lalõmi andrõ fefu.
3 Hadia, so zi darua, si fao ba lala, na lõ samagõlõ ira?
4 Hadia, mundrõndrõndrõndrõ zingo ba gatua, na lõ ahuluania? Hadia, ifarongogõ linia ono zingo, ba naha wemõrõ khõnia, na lõ hadia ia nira’unia?
5 Hadia, alau wofo ba dandrawa tou ba danõ, na tenga khõnia mege lalau dandrawa andrõ? Hadia, aefa dandrawa ba danõ tou, na lõ hadia zalau?
6 Hadia, lalau gõi dorofe yomo ba mbanua, si lõ tokea niha sato? Hadia, itõrõ mbanua famakao hadia ia, na tenga khõ Yehowa mbõrõ?
7 Lõ’õ! Lõ ilau hadia ia Yehowa, na lõ nibokainia ua tõdõnia, ba genoninia andrõ, sama’ele’õ.
8 Na no mundrõndrõndrõndrõ zingo, ba ha niha zi lõ ata’u? Ba na no muhede Zo’aya, Yehowa, ba ha niha zi lõ mama’ele’õ?

Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA

FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!"

Jemaat : Manunõ moroi ba Mbuku Zinunõ No. 224 : 1

Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!

Jemaat : Manunõ moroi ba Mbuku Zinunõ No. 450

Liturgos : Dumadao Zato!

FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura II Korindro 5 : 18-21

18 Ba fefu da’õ, ba moroi ba Lowalangi, si no mangatulõ’õ ya’ita khõnia, ba khõ Yesu Keriso, si no mame’e gõi khõda halõwõ fangatulõ andrõ.
19 Lowalangi sa zi no mangatulõ’õ khõnia õsi guli danõ, ba khõ Keriso, lõ ibe’e õmõra lalõra andrõ, ba no ibe’e ba dõdõma daroma li andrõ, ba wangatulõ andrõ.
20 Ba no sinenge ndra’aga, salahi Keriso, hulõ na Lowalangi zamarou tõdõ niha, ba lima andrõ, mangandrõ ndra’aga, salahi Keriso, mamane: Mifa’atulõ’õgõ ami khõ Lowalangi!
21 Noa sa ibali’õ horõ zi lõ irai mangila horõ, salahida, ena’õ tobali fa’atulõ khõ Lowalangi ita, ba khõnia andrõ.

Ya’ahowu zamondrongo taroma Li Lowalangi ba same’e ba dõdõ (Luka 11:28)

Jemaat : Yaduhu!

FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261

2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.

Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]

Liturgos : Mudadao Zato!

KOOR/VOCAL GROUP

Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163

[Pengkhotbah Mõi ba Mimbar]

HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.

Fombaso Taroma Li Lowalangi moroi ba zura Luka 5 : 1-11

1 Ba me laforege khõnia niha sato, me lafondrondrongo khõnia daroma li Lowalangi, ba ba mbewe mbawa Genezare andrõ so ia.
2 Ba i’ila dundraha, dua rozi, ba zinga nene, no larõi sangai i’a, mamabago kiri.
3 Ba mõi ia yawa ba dundraha si sara, tundraha Wetero, i’andrõ khõnia, ena’õ isola ma’ifu, iheta baene. Ba mudadao ia ba dundraha, mamahaõ niha sato.
4 Ba me no ibato huhuo, ba imane khõ Zimoni: Misola ba zabakha ba milau giri, ba wama’u’u i’a.
5 Ba itema linia Simoni, imane: He samahaõ, sara wongi manõ no ma’eregeisi dõdõma, ba lõ sahulu ndra’aga; ba me no õwa’õ, ba ulau giri.
6 Ba lalau, ba ahulu ira i’a, oya sibai; ba aetu’aetu girira.
7 Ba lakhawi tanga nawõra, si so ba dundraha si sara, ena’õ mõi ira mulului khõra. Ba so ira, ba lafo’õsi dundraha, ma’adua, irege ahõndrõhõndrõ.
8 Ba me i’ila da’õ Simoni Fetero, ba ituhi danõ fõna Yesu, imane: He Tua, heta’õ khõgu, me no niha si so horõ ndra’o!
9 Noa sa ihawui ia fa’ata’u ba awõnia fefu, ba wangai i’a andrõ, sahulu ira;
10 si manõ gõi Yakobo ba Yohane, ono Zebedaio andrõ, awõ Zimoni. Ba imane Yesu khõ Zimoni: Bõi ata’ufi, i’otarai da’e, ba sama’u’u niha ndra’ugõ.
11 Ba la’ohe baene dundraha, larõi fefu hadia ia ba la’o’õ ia.

Famotokhi Taromali Lowalangi

Sinanõ ba dõdõ tehalõ moroi ba zura Luka 5 : 10c

Böi ata'ufi, i'otarai da'e, ba sama'u'u niha ndra'ugö.

Fangandrõ Fondruhõ Wamotokhi Taromali

Jemaat : Manunõ moroi ba Mbuku Zinunõ No. 154

TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:

Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.

Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.

Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.

WARTA JEMAAT (Klik untuk membuka)

Liturgos : Manunõ ita moroi ba Mbuku Zinunõ No. 149

Hede khöma, he So’aya, ha li-Mö gaurifama.
Me samohouni tödöma, sandrohu fekolima.
Hede khöma, hede khöma, aro’ö wanötöna.

Hede khöma, he So’aya, bè khöma Geheha-Mö.
Sangabölö’ö ya’aga, wolo’ö somasi’Ö.
Hede khöma, hede khöma, da mahonogö dödö.

Hede khöma, he So’aya, da matara lahe-Mö.
A’aro’ö wamatima, be’e wa’anau gölö.
Ena’ö tola marugi naha si so Ya’ugö.

FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"

Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.

Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:

Ya mufahowu’õ ami Lowalangi, Ya murorogõ ami;

Ya mufohaga mbawa-Nia khõmi, Ya mu’ebua’õ dõdõ-Nia khõmi;

Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!

Jemaat : Manunõ moroi ba Mbuku Zinunõ No. 132