[Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi]
FANGOWAI BA FOGAONI
FANGOWAI
Liturgos : Ya’ami banua Zo’aya ni’omasi’ö ba döi Yesu Keriso, no tarugi migu nifotöi migu föna wamakao Yesu. Töi migu ma’ökhö andre, ya’ia da’ö: Septuagesima eluahania Ngaluo si 70, föna wemaoso Yesu. Ma’owai ami, ba döi Zo’aya ya’ita Yesu Keriso, Ya'ahowu!
Jemaat : Ya'ahowu!
Liturgos : Yafao-fao khõmi Lowalangi!
Jemaat : Ya fao khõu Geheha-Nia!
FOGAONI
Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No.
26
- He iraono, he satua, da tasuno Zo’aya,
Me da’ö zomasi Ia, na oi tasuno Ia.
- He na lö terongo lida, na mangandrö dödöda.
No oi i’ila So’aya, Ibe’e ni’andröda.
- Böi mo’aetufa wangandrö, ba fanuno So’aya.
He na bongi, he ma’ökhö, tödömö bè khö-Nia.
FANGA’ARO’Õ WA’OWULO (VOTUM)
Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Fõkhõda nilu’i-Nia ba no Ihare’õ khõ-Nia zafõkhõ khõda; ba ba dõdõda, ba ni’otu’õ Ia, nibõzibõzi Lowalangi ba nifakao. Ba no lalõda sa mbõrõ, wa tefesokho Ia, ba horõda mbõrõ, wa terasa Ia. Ya’ia zolu’i huku, ena’õ sohahau tõdõ ita, ba moroi ba zokho-Nia, wa no dõhõ wõkhõda. HALELUYA!
Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
209
- Do Keriso So’aya da’ö wangorifida.
Möi fangefa horöda na mamati göi ita.
Lö a’ozu tehuku, na no ta’o’ö Yesu.
- Na dalida goroisa ba oi simate ita.
Lö tesöndra zamösa zi lö mo’olalöwa.
Yesu no möi salahi, Itehe ni’elifi.
- Fa’omasi-Mö, Yesu, wa Ötehe nibunu.
Fangefama ba wönu, ena’ö lö tehuku.
Me ebua dödö-Mö, halöga tanakhö-Mö.
- Da ululudo khö-Mö, Yesu sahakhö tödö.
Sawatögu Ndra’ugö, bè khögu Geheha-Mö.
Fosinema göi ndra’o, ba ndro-Mö bohounido.
FOMBASO TAROMALI LOWALANGI (AMABU'ULA LI SIFÕFÕNA)
Liturgos : Da tafondrondrongo daroma Li Lowalangi, tehalõ moroi ba zura
Sinunö 62 : 1-9
1 Khõ duka wanunõ andrõ, khõ Yedutuno andrõ, nilau Dawido.
2 Ha khõ Lowalangi manõtõna dõdõgu, no ahonohono, khõnia i’otarai wangorifigu.
3 Ha ya’ia we’ewe’e dõdõgu ba fangorifigu, hatigu, tebai manõ mangiwa ndra’o.
4 Heza irugi misuwõ niha si ha samõsa, wa edõna midudugõ ia, hulõ mbagolõ si no aolo, hulõ gõli kara, si no muhisi?
5 Ha da’õ wamagõlõra, he lawisa wanimba tou ya’ia, moroi ba nahania salawa; faya zomasi ira; ba mbewera, ba famahowu, ba ba dõdõra, ba fangelifi.
6 Ha khõ Lowalangi manõtõna dõdõgu, no ahonohono, khõnia sa’ae i’otarai fangorifigu.
7 Ha ya’ia we’ewe’e dõdõgu ba fangorifigu, hatigu saro; tebai manõ mangiwa ndra’o.
8 Khõ Lowalangi usõndra wangorifigu ba turiagu; danedane wa’abe’egu ba fanõtõnagu, ba khõ Lowalangi so.
9 Bõi ya mamalõmalõ wanõtõnami khõnia, ya’ami ono niha; mibokai dõdõmi khõnia; tõtõnafõda Lowalangi.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA
FANGANDRÕ FANGEFA HORÕ
Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!"
Jemaat : Manunõ moroi ba Mbuku Zinunõ No. 224 : 1
Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalõ moroi ba zura
Kolose 1 : 24-29
24 Iada’e omuso dõdõgu, ba wamakao andre, salahimi, ba ubõnõkhi ba nõsigu andre zambõ na ba wamakao Keriso andrõ, salahi mbotonia, banua andrõ,
25 ba zi no tobali enoni ndra’odo, dali nihonogõi Lowalangi andrõ, nibe’e ba dangagu, ba khõmi andrõ, ba wamo’ahonoa fangombakha taroma li Lowalangi andrõ,
26 si no tobini andrõ, si lõ oroma, gõtõgõtõ wa’ara, ba ba nga’õtõ ndra tua andrõ, ba iada’e, ba no tefa’ele’õ ia, ba ni’amoni’õ andrõ khõnia.
27 Khõra edõna Lowalangi i’oroma’õ, he wisa wa’ebua lakhõmi zi no tobini andrõ, ba niha baero, ya’ia Keriso ba khõmi, tõtõnafõ lakhõmi andrõ.
28 Ya’ia ni’ombakha’õma ba madozigõ niha, wamarou tõdõra, madozigõ niha, wamahaõ ya’ira ba ngawalõ wa’atuatua, fefu, ena’õ dozi niha mo’ahonoa fa’atulõ, ba khõ Keriso, mabe’e.
29 Ba khõ da’õ sa gõi mohalõwõdo, fasõndrado, balazi wa’abõlõnia, sangabõlõ’õ sibai ya’odo.
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FANGOWULOI FASÕMBATA
Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
2. Ya’e zumange fasõmbata ma be’e soroi ba dõdõma.
3. Ya’e zumange fasõmbata buala si’otarai Nama.
4. Ya’e zumange fasõmbata, boto, noso, ba fa’aurima.
5. Ya’e zumange fasõmbata, lõ irugi zomasi dõdõ-U.
6. Ya’e zumange fasõmbata, ma’aohasi gõlõ Zo’aya.
Liturgos : Da tafasao wasõmbatada andre fõna Lowalangi, musindro ita fefu.
[Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA
Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
- Fombaso Taroma Li Lowalangi moroi ba zura
Yeremia 17 : 12-18
12 He ya’ugõ dadaoma lakhõmi, si no alawa i’otarai mbõrõta, naha ni’amoni’õ khõma!
13 Ya’ugõ tõtõnafõ Ndraono Gizeraëli — Yehowa! dozi sangerogõ ya’ugõ, ba tobali si lõ boto: si fabali khõu, ba nisura ba gawugawu tou, me no larõi gumbu nidanõ aurifa, Yehowa andrõ.
14 Orifido Yehowa, ena’õ te’orifi ndra’odo, tolodo, ena’õ usõndra wanolo, me no nisunogu ndra’ugõ!
15 Hiza lamane sa khõgu: ”Hezo daroma li Yehowa? Ena’õ itõrõ!”
16 Ba lõ’õ zui nibõdagu ya’odo, we’amõi kubalo, wolo’õ khõu, ba lõ’õ sa ni’arõgu bawa wamakao andrõ — ya’ugõ zangila! Hadia zalua ba mbewegu, ba no anehe ndra’ugõ.
17 Bõi bali’õ ameta’uõ ndra’ugõ khõgu; sawatõgu ndra’ugõ, na bawa wamakao!
18 Be’e aila zolohi ya’odo, ena’õ tobali dõdõra ba bõi be’e tobali dõdõgu: fatõrõ khõra mbawa wamakao andrõ ba fodua winaeta worasa ya’ira!
- Famotokhi Taromali Lowalangi
- Sinanõ ba dõdõ tehalõ moroi ba zura
Sinunö 62 : 2
Ha khö Lowalangi manötöna dödögu, no ahonohono, khö-Nia i'otarai wangorifigu.
- Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI
Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
- Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
- Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
- Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunõ ita moroi ba Mbuku Zinunõ No.
155
- Sisökhi li Yesu So’aya, tafonaha ba dödöda.
Ato sibai zi no te’ala, me no latimba li-Nia.
Fa’elungu zi falukha, ba wa’abe’e dödöra.
- Sisökhi li Yesu So’aya, tafonaha ba dödöda.
Ba böi ha samondrongo ita, ya tobali fa’aurida.
Aro ba duhu li-Nia, fa’omasi nitemada.
- He Yesu tolo na ndra’aga, me ambö fa’omasima.
No ma’omasi’ö zitaya, höngö ba gulidanöma.
A’aro’ö wamatima, ya khö-U ahono dödöma.
- He Yesu be’e ba dödöma, Geheha si oroi Nama
Samohouni era’erama, tödö ba amuatama.
Afu marugi khö Nama, ba naha so’ahonoa.
FANGANDRÕ SALAHI + FAMATENGE + HOWUHOWU
Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat :
He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
- Ya mufahowu’õ ami Lowalangi, Ya murorogõ ami;
- Ya mufohaga mbawa-Nia khõmi, Ya mu’ebua’õ dõdõ-Nia khõmi;
- Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba
Mbuku Zinunõ No.
314
- Tötönafö khöda ha So’aya, Ya’ia zanolo so’ahonoa.
Fefu nudu no oi Ilawa, me no mate Ia möi salahida.
So’ömö ita khö Zo’aya, wanuno Ya’ia Haleluya.
- Tötönafö khöda ha So’aya, khö-Nia tasöndra wangorifida
He folohi fangosiwawöi, böi aombö dödöda Yesu nawöda.
I’ohe ita ba khö Nama, omuso dödöda, Haleluya.
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
Tidak ada komentar:
Posting Komentar