23 Februari 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 23 Februari 2025 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya ni’omasi’ö ba döi Yesu Keriso, no tarugi migu nifotöi migu föna wamakao Yesu. Töi migu ma’ökhö andre, ya’ia da’ö: Sexagesima eluahania Ngaluo si 60, föna wemaoso Yesu. Ma’owai ami, ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 9 No töra moroi khö nina, wendroro ononia, Wamaeri Yesu So’aya, ya’o tana khö-Nia. Me omasi Lowalangi, na auri göi ndra’odo. Andrö wa no Ikaoni, afu u’o’ö Keriso. Lö faröi sa Zo’aya, he adudu danöda. Ifatenge Nono-Nia, Ama, Lowalangigu. Itehe nibunu Ia, si möi fangorifigu. He tödögu, lau anunö, böi olifu ndra’ugö. Angalulu khö Yesu, me sangorifi ya’ugö. Lö faröi sa Zo’aya, he adudu danöda. No Ibè Geheha-Nia, samatörö tödögu. Awö daroma li-Nia, wamohaga lalagu. Sangaro’ö famatigu, sondrou’ö fanötöna. Solawa emaligu, ba ginötö watelesa. Lö faröi sa Zo’aya, he adudu danöda. Irorogö sa ndra’odo, Ibönökhi zoguna. He na mofökhö ndra’odo, lö Iröido So’aya. Ba wofanö Ilumö’ö, fa lö göna te’ala. Ifasugi ba dödö, wanunonuno Ya’ia. Lö faröi sa Zo’aya, he adudu danöda. He So’aya, amölido, wanörö ulidanö. Fa lö te’ala ndra’odo, me oya wanandraigö. Böi famalö amenesi, ndra’odo na elungu. Efa’ödo ba horö, si no emali dödögu. Rorogödo, So’aya, irugi gamozua. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Fõkhõda nilu’i-Nia ba no Ihare’õ khõ-Nia zafõkhõ khõda; ba ba dõdõda, ba ni’otu’õ Ia, nibõzibõzi Lowalangi ba nifakao. Ba no lalõda sa mbõrõ, wa tefesokho Ia, ba horõda mbõrõ, wa terasa Ia. Ya’ia zolu’i huku, ena’õ sohahau tõdõ ita, ba moroi ba zokho-Nia, wa no dõhõ wõkhõda. HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 321 Dozi ita samati khö Zo’aya, falukha wolohi fango’aya. Lö’aetu so wanandraigö gafökha, fa lö tatema luo zi möna. Na lö tebulö ita khö Zo’aya, Ibè Geheha fangabölöda. Ena’ö tarugi ba zi so Ama, naha si no Ihaogö So’aya. Ya lö tebulö wa tötönaföda, nifabu’u Yesu ba zi möna. Ya’ia wa’auri si tebai taya, si so lakhömi si’oroi Nama. Da ta’alui naha so’ahonoa, si lö fa’abu dödö dania. Afönu so wa’omuso dödöda, lö mamalö sagötö fa’ara. Böi tebulö wanötöna dödöda, khö Yesu si möna salahida. Me lö Ibe’e saekhu ölö ita, he oya zafökhö nitaögöda. So zindruhu omusola dödöda, na to’ele Zo’aya ya’ita. Ikaoni dozi solo’ö li-Nia, wanema fa’auri si lö taya. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 37 : 1-11 1 Bõi ofõnu ba khõ zamazõkhi si lõ sõkhi andrõ: bõi afõkhõ dõdõu ba zolau si lõ atulõ. 2 Lõ’õ sa arara, ba tetaba ira, si mane du’u, ba aleu, si mane bulu ndru’u ba danõ. 3 Dõnadõna khõ Yehowa ba lau zi sõkhi; iagõ danõ ba fa’ua wa’adõlõ dõdõ. 4 Ba omuso dõdõu ba khõ Yehowa, ba ibe’e khõu zomasi dõdõu. 5 Be’e balazi Yehowa nitõrõmõ andrõ, ba dõnadõna khõnia, ba ya’ia zamaigi lala. 6 Ba ifatumbu’õ wa’atulõ dõdõu andrõ si mane fa’amoluo, ba lala andrõ khõu, si mane haga na laluo. 7 Honogõ’õ fõna Yehowa ba bazebaze’õ khõnia; bõi ofõnu ba khõ zamalua ni’alui dõdõnia, si lõ hadia ia, ba ba niha solau sabila. 8 Rõi wõnu andrõ ba bõhõli wa’abao dõdõ; bõi maoso dõdõu; ha ba wamazõkhi si lõ sõkhi aekhu da’õ. 9 Nihori sa dania zanao horõ, ba sanõtõna khõ Yehowa andrõ zokhõ tanõ dania. 10 Hatõ ma’ifu tõ, ba lõ’õ sa’ae sebua horõ andrõ, ba na õfaigi nahania, ba lõ ya’ia sa’ae. 11 Ba sebolo tõdõ andrõ zokhõ tanõ dania, ba owuawua dõdõra ba wa’afahõna wangorifi. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. Ma ondrasi Ndra’ugö ba nahia ni’amoni’ö Ya’ugö si fahöna fa’ahakhö dödö andrö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, irege sohahau tödö ndra’aga wanohugö fekolima ba zi so fönama ba wamalua somasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Roma 12 : 17-21 17 Bõi misulõni zi lõ sõkhi awõnia si lõ sõkhi, ba niha; si sõkhi mifatoutou, ba niha fefu. 18 Na dali ami, ba ya’atulõ ami ba niha fefu. 19 Bõi milau mbalõmi, ya’ami ni’omasi’õgu! mifonaha wõnu andrõ; noa sa so ba zura: ”Khõgu wolau balõ, ya’o zanulõni, iwa’õ So’aya.” 20 Ba na olofo zi fa’udu khõu, ba be’e gõnia, ba na owõkhi dõdõnia, ba fabadugõ khõnia nidanõ. Na õlau da’õ sa, ba õ’owuloi mbo galitõ ba hõgõnia. 21 Bõi ilawa ndra’ugõ si lõ sõkhi, be’e folawa zi lõ sõkhi zi sõkhi. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Mataio 5 : 38-48 38 No mirongo, wa no muwa’õ: ”Hõrõ fangali hõrõ ba ifõ fangali nifõ.” 39 Ba ya’o, ba uwa’õ khõmi: Bõi milawa zi lõ sõkhi andrõ. Ba na so zamalisi bo’õmõ kambõlõ, ba oro’õ khõnia zi tambai gõi. (Luk. 6, 29. Amaed. 24, 29). 40 Ba na so zangadugõ ya’ugõ, ba wangai barumõ, ba lulu khõnia lembe gõi. 41 Ba na so zamorege khõu, ba wolohe ya’ugõ awõnia ba lala zi saza fa’arõu, ba ae awõnia zi dua za. 42 Be’e ba zangandrõ khõu, ba bõi erogõ, na so zamalali khõu hadia ia. 43 No mirongo, wa no muwa’õ: ”Omasi’õ zahatõ khõu, ba yafatiu dõdõu ba zi fatiu tõdõ khõu.” 44 Ba ya’o, ba uwa’õ khõmi: Mi’omasi’õ zi fatiu tõdõ khõmi ba mi’angandrõ, salahi zolohi ya’ami; 45 ena’õ tobali ono Namami andrõ, si so ba zorugo, ami, me ifatumbu’õ luonia andrõ ba zi lõ sõkhi ba ba zi sõkhi, ba teu andrõ khõnia, ba ibe’e ba zatulõ ba ba zi lõ atulõ. 46 Na mi’omasi’õ sa zomasi ya’ami, ba hadia luomi? Tenga lamanõ gõi sanema beo andrõ? 47 Ba na ha talifusõmi mi’owai, ba hadia zi sõkhi nilaumi? 48 Tenga lamanõ gõi niha baero? Andrõ yamo’ahonoa ami, si mane fa’amo’ahonoa Namami andrõ ba zorugo. Famotokhi Taromali Lowalangi Sinanõ ba dõdõ tehalõ moroi ba zura Mataio 5 : 44 Ba Ya'o ba Uwa'ö khömi: mi'omasi'ö zifatiu tödö khömi ba mi'angandrö salahi zolohi ya'ami. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 152 Da mangandröga khö-U, So’aya, faogö Geheha ba li-Mö. Fa oi aboto ba dödöma, halöwö daroma li-Mö. Ya möi fango’ou dödöma, ba wanga’i halöwö-Mö. Ato zi lö ba dödö haga, me lö khöra Eheha-Mö. Lö sangoroma khöra lala, ba wogamö fa’atulö. Hagaini dödöra, li-Mö, ba wa’ebua dödö-Mö. No te’ogömisi dödöma, ba lakhömi gulidanö. Bokai höröma ba wangila, wa möi fangalama da’ö. He Yesu, ma’andrö khö-Mö, bali’öga tana khö-Mö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 490 "Andrö Ubè goroisa-Gu khömi. Faoma mi’omasi’ö nawömi. Simane fa’omasi-Gu ami." "Ya’odo lö manö faröi khömi, andrö ya böi ata’u dödömi. Ya’odo zangalani udumi." "Ya’o manö sa’ae gubalomi, andrö böi so wa’aombö dödömi. Fefu zoguna oi Ubönökhi." Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***