19 Januari 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 19 Januari 2025 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, ba wondrugida migu Epifania andre, ma’owai ami fefu ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 6 Khö-Nia wa’asalawa, ba hadia wa’ebua, oi khö-Nia so manö. He si yawa ba zorugo, he si so ba gulidanö, oi Ya’ia zokhö ö, oi Ya’ia zokhö ö. Wa’ö khögu döi sebua, töi wa’asalawa niha, simane töi-Nia sa. Ha Ya’ia zamatörö, sangorifi, sondrorogö; Ono Lowalangida,Ono Lowalangida. Sebua lakhömi Ia, lö manö famaedo-Nia, mane lakhömi Nama. Ha Ya’ia zamatörö, sangorifi, sondrorogö; Ono Lowalangida, Ono Lowalangida. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : He Yehowa, farongogö khögu lala ba wa’auri andrö: no fahöna wa’omuso dödö föna-U, ba ba gambölö-U so wa’ohahau dödö si lö mamalö. (Sinunö 16:11). HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 86 Haga si’oroi Zo’aya, sohagaini tödöda. Sangoroma khöda lala, ba wanöndra aurifa. Oi omuso dödöda, me no to’ele haga. Da möi ita ta’ondrasi, lembalemba dödöda. Ta’a’aro’ö wamati, famohaga lalada. Taröi zogömigömi, fa tasöndra wa’auri. Tasunosuno Yehowa, sangomusoi’ö tödö. Tafaduhu’ö duria, wa no so Zangatulö. Yesu sahakhö tödö, sangefa’ö ba horö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 111 : 1-10 1 Haleluya! Da’usuno Yehowa, moroi si’aikõ ba dõdõgu ba zowulo zadõlõ tõdõ andrõ ba ba zi falukha mbanua. 2 Sebua nilau Yehowa; la’alualui tõdõra dozi somasi ya’ia. 3 Fa’ebua ba lakhõmi wolaunia andrõ, ba fa’atulõnia andrõ, ba irugi zi lõ aetu. 4 No ihonogõi, fa bõi olifu niha zahõlihõli dõdõ andrõ khõnia; sebua tõdõ Yehowa ba sahakhõ tõdõ. 5 No ibe’e gõ ba zangata’ufi ya’ia; lõ mamalõmalõ wa itõrõ tõdõnia wawu’usa li andrõ khõnia. 6 No ifa’ele’õ ba mbanuania wa’abõlõ wolaunia, wame’e tána khõra tána ba niha baero andrõ. 7 Si duhu ba satulõ wolau dangania andrõ; si lõ mangiwa goroisania andrõ, fefu. 8 Saró, si lõ mamalõmalõ, irugi zi lõ aetu, dali zi duhu ba sadõlõ. 9 No ifa’ohe’õ wangorifi ba mbanuania, no i’aro’õ gamabu’ula linia, si lõ tebulõ. 10 Bõrõta wa’atuatua wangata’ufi Yehowa andrõ; sangila watahõgõ dozi sanõrõ lalania; si lõ tebulõ duriania andrõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 2 : 1-11 1 Dua wongi aefa da’õ, ba so walõwa ba Kana ba Galilaia, ba so nina Yesu ba da’õ. 2 Ba lakaoni gõi Yesu, awõ nifahaõnia, ba walõwa andrõ. 3 Ba lõ agu khõra, me no ahori nagu walõwa. Ba imane ina Yesu khõnia: Lõ agu. 4 Imane khõnia Yesu: Hana ndra’ugõ khõgu, alawe? Tenga na inõtõ khõgu. 5 Imane inania ba genoni andrõ: Na so niwa’õnia khõmi, ba mi’o’õ. 6 Ba so ba da’õ rumbi, õnõ, naha nidanõ, ba wanasa khõra, huku khõra ba niha Yehuda, fa tõlu yõu zambua. 7 Imane khõra Yesu: Mifõnui idanõ rumbi andrõ. Ba lafõnui irugi mbewe. 8 Ba imane khõra: Misou saae, ba mi’ohe khõ zatua zangai halõwõ. Ba la’ohe. 9 Ba me no itandra satua zangai halõwõ nidanõ andrõ, si no tobali agu, ba me lõ i’ila, he moroi — ba la’ila sa enoni andrõ sana’u idanõ andrõ — ba humede zatua zangai halõwõ khõ zangowalu, 10 imane khõnia: Ofõna labe’e nagu si sõkhi dozi niha, ba dania, na no abuso ira, ba labe’e zambõ fa’asõkhi; ba ya’ugõ, ba no õtenagõ nagu si sõkhi, irugi da’e. 11 Ba Kana ba Galilaia ilau da’õ Yesu, bõrõta dandra andrõ, i’oroma’õ lakhõminia, ba mamati khõnia nifahaõnia andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yesaya 62 : 1-5 1 Bõrõ Ziona andrõ, wa lõ ubato wehede, ba bõrõ Yeruzalema, wa lõ ahono ndra’odo, irege alua zatulõ andrõ khõra, hulõ haga, ba irege alua wangorifira, hulõ zulu siholahola. 2 Ba la’ila zatulõ andrõ khõu niha baero, ba oroma lakhõmiu ba zalawa fefu. Ba tõi si bohou labe’e tõimõ, soroi ba li Yehowa. 3 Ba amaedola zaembu soadu ndra’ugõ, ba danga Yehowa ba aya ba hõgõ ba zalawa ba danga Lowalangiu. 4 Tenga tõimõ sa’ae ”Nirõi”, ba tenga sa’ae ”Tanõ si mate” dõi danõu andrõ; ”Fa’omasigu” labe’e tõimõ ba tõi danõu, ba ”Ni’owalu”, me somasi Yehowa ndra’ugõ ba me no amaedola ni’owalu danõu andrõ. 5 Si mane ono matua, na i’owalu nono alawe, si manõ dania wangai nonou ya’ugõ, ba si mane fa’owuawua dõdõ zangowalu nono nihalõ andrõ khõnia, si manõ dania wa’owuawua dõdõ Lowalangiu ndra’ugõ. Famotokhi Taromali Lowalangi Sinanõ ba dõdõ tehalõ moroi ba zura Yesaya 62 : 2a Ba la'ila zatulö andrö khö-U niha baero, ba oroma lakhömi-U ba zalawa fefu. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 150 Ha ba li-Mö döhöga, ha ba li-Mö auriga. Me fangoroma zala, ba wanöndra fangefa. Fefu wa’elunguma, he göi falimosama. Ha ba ndro-Mö aheta, na mangesa dödöma. No fangoroma lala, li-Mö niwa’ö-U khöma. Afu lö te’alaga, ena’ö so wemöna. Ya’ugö zawatöma, röfa-U nitöngönima. Ba wangosisi lala, saekhu ba zi so Ama. Böi ya mamalömalö, bè wondrara dödöma. Ba ngawalö zafökhö, ba lala wekolima. Bè wa’owölö’ölö, awö wa’anau gölö. Afu tola mo’ölö, wolo’ö somasi’Ö. Ba fehulu dödöma, wogamö sawatöma. Be’e khöma Geheha, sanuturu lalama. Li-Mö si no Öwa’ö, ba lö tebulöbulö. Wa dozi sanauölö, te’orifi ba döi-Mö. Andrö ha khö-U malulu, wa’aurima he Yesu. Mabe’e sumange-U, irugi zi lö aetu. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 189 Mitabu fefu, ta’ondrasi, Keriso Yesu Sangöhöli, Tabè dödöda Ibohouni, na horö oi taröi. Reff : Ohahau dödöda khö-Nia, .... Mitabu fefu da ta’o’ö, Keriso Yesu Sangefa’ö. Sahakhö tödö Yesu andrö, tabu böi taradö. Reff : Ohahau dödöda khö-Nia, .... Mitabu fefu, böi taböhöi, Keriso Yesu, Solomasi. Ya’ia razo ba wa’auri, Ono Lowalangi. Reff : Ohahau dödöda khö-Nia, .... Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***