25 Desember 2024 (Bahasa Nias)

Download Tata Ibadah (DOC)

Download Tata Ibadah (PDF)

Rabu, 25 Desember 2024 (Natal Ke-1) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ma’owai ami fefu ba döi Zo’aya ya’ita Yesus Keriso, nitörö tödöda Fa’atumbu ba zi ma’ökhö andre. Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 55 Dozi ita sowulo, nikaoni Zo’aya. Da talulu dödöda, möi sumange-Nia. Böi olifu ita, wangandrö saohagölö, fa’omasi-Nia. Ya dozi tafo’ölö, wa’omasi Nama. Taröi zoya ngawalö, somasi dödöda. Yesu zawatöda, samè khöda Eheha, sanolo ya’ita. Ma’andrö khö-U, So’aya, rorogö ndra’aga. Bè ohahau dödöma, götö wekolima. Afu oi matema, wa’auri si lö aetu, nifabu’u Nama. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Tumbu dania khõda nono, tebe’e khõda nono matua; tebe’e ba galisi-Nia wamatõrõ ba tebe’e tõi-Nia Zahõlihõli dõdõ ba Samolala tõdõ ba Lowalangi sabõlõ, ba Ama zi lõ aetu ba Salawa wa’atulõ. (Yesaya 9:6) HALELUYA! Liturgos : Mangandrõ ita, "He Lowalangi Ama khöma, si so ba zorugo! Masuno Ndra’ugö ba ma’andrö saohagölö-U, me no Öfatenge khöma Nono-U Yesu Keriso, si no tobali ösi niha, ba wangorifi ya’aga. Ma’andrö khö-U, be’e ohahau dödöma iada’a ba wanörö tödö fa’atumbu-Nia, ba be’e aboto ba dödöma, wa khöma sibai manandrösa halöẅö-Nia. Ondrasiga göi bongi, si mane me Öfatenge mala’ika sangondrasi ira kubalo luo no; foloi ba dödöma zogömigömi, ba angali’ö haga-Mö andrö, afu tola ma’omasi’ö era’erama zomasi dödö-U, he ba nirongoma, he ba ni’ila höröma, ena’ö tobali fondrou’ö wangaro’ö famatima khö-U, ba ba khö Nono-U, Yesu Keriso. He So’aya! Tolo dozi sangomasi’ö fa’ato’ele-Mö, awö dozi sihulu tödö ba wombalombaloi inõtõ we’aso-Mõ ba luo safuria, ena’ö falukha ira wondrara dödö. Ondrasi göi zofökhö si tebai mangondrasi omo-Mö, ba rara dödö zi numana, sangaröngarö, si göna abula dödö, si tosasa, awö zi so ba gurunga, mendrua manö nifakao gafökha. Tologa Eheha-Mö andrö, ena’ö oi te’orifi ndra’aga fefu ba gamozua. Yaduhu!" Mudadao Zato Liturgos : Manunõ ita moroi ba Mbuku Zinunõ No. 59 Humulu dödöda, wanema Ya’ia. Solohe fangefa, ba huku horöda. Simate ita fefu, na lö Yesu khöda. Tatema’ö Ia, fangorifida. Böi aombö dödöda, Lowalangi Ama. Ibè Nono-Nia, sanolo ya’ita. Sangabölö tödöda, wolau fasöndrata. Ta’ondrasi Ia, ondrasi Ia. Omusola dödö, Yesu zamobörö. Oi tatema wöfö, tou ba gulidanö. Duhu mo’ahonoa, furi na takhamö. Da ta’oigö dödö, wogamö da’ö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 97 : 1-12 1 No razo Yehowa, ya owuawua dõdõ nõsi guli danõ, ya omuso dõdõ zi so ba hulo soya andrõ. 2 Si no tefasui lawuo ba fa’ogõmigõmi ia; danedane dadaomania ba huku sadõlõ ba fa’atulõ. 3 Mowaõwaõ fõnania galitõ, si manga zi fa’udu khõnia, fasui. 4 Isului guli danõ gari mbanua andrõ khõnia; i’ila uli danõ, ba muhisi. 5 Alau hili, hulõ zigusigu, fõna Yehowa andrõ, fõna Zo’aya tanõ, ma’asagõrõ. 6 Idunõdunõ wa’atulõnia andrõ banua si yawa, ba dozi soi mangila lakhõminia. 7 Falukha wa’aila dania dozi samosumange balõ geu, sanuno ya’ira ba nadu andrõ; mi’angalulu khõnia, ya’ami Lowalangi fefu! 8 Irongo Siona, ba omuso dõdõ; ba owuawua dõdõ nono Ndraono Yuda alawe, bõrõ wanguhukumõ andrõ, ya’ugõ Yehowa! 9 Ya’ugõ sa Wondrege zalawa, Yehowa, ba guli danõ, ma’asagõrõ, alawa yawa Lowalangi bõ’õ fefu ndra’ugõ. 10 Mi’ogorofi zi lõ sõkhi, ya’ami sangomasi’õ Yehowa! Ya’ia zondrorogõ noso zatulõ tõdõ andrõ khõnia; i’efa’õ ira ba danga zebua horõ andrõ. 11 Tumbu haga khõ zatulõ tõdõ, ba fa’omuso dõdõ ba zadõlõ era’era. 12 Mi’omusoi’õ dõdõmi ba khõ Yehowa, ya’ami satulõ tõdõ, ba misuno dõinia andrõ, ni’amoni’õ! Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi sebuasi so ba zorugo yaẅa, aboto ba dödöma,wa no Öfatenge khöma Nono-U Yesu Keriso ba wangefa’ö horöma. Ma’andrö khö-U tologa, heta ba dödöma ngawalö zi lö sökhi, si no amaedola hili salaẅa, ba si no amaedola mbawa danö sabakha, ena’ö monahia ba dödöma Zangorifi andrö, ba wamahaö ya’aga wamalua somasi Ndra’ugö., Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Böi mi’ata’ufi, hi za sa, uturiaigö khömi wa’omuso dodo sabölöbölö, sirugi niha fefu dania, me no tumbu khömi Zangorifi andrö bongi andre, Keriso So’aya, ba mbanua Dawido. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 2 : 9-12 9 Ba me no larongo niwa’õ razo andrõ, ba mõi ira, ba hiza ndrõfi andrõ, ni’ilara ba danõ ba gatumbukha, mowaõwaõ fõnara, irugi tebato ia faudu zi so ono andrõ. 10 Ba me la’ila ndrõfi andrõ ba omuso sibai dõdõra. 11 Ba mõi ira yomo ba da’õ, ba hiza nono, awõ ninania Maria, ba labalõduhini tou danõ, mangalulu khõnia ba labokai naha gana’ara, mamuala ira khõnia, balaki ba kumõyõ ba emuri. 12 Ba iwa’õ khõra Lowalangi, ba wangifi, bõi lafuli ira khõ Herode; ba latõrõ lala bõ’õ, wangawuli ba danõra. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Heberaio 1 : 5-12 5 Ha niha sa mala’ika, ba zi no irai iwaõ: ”Onogu ndra’ugõ, ma’õkhõ andre no mo’ono ndra’o ya’ugõ?” Ba imane zui: ”Amania ndra’odo ba Onogu ia.” 6 Ba so zui, me ifataro ba guli danõ zi a’a ba wa’atumbu andrõ, ba imane: ”Ba yamangalulu khõnia mala’ika Lowalangi, fefu.” 7 Ba imane sa ba mala’ika andrõ: ”Samali’õ angi mala’ikania, ba samali’õ holahola galitõ enoninia”. 8 Ba ba Nono andrõ, ba imane: ”Dadaomamõ, ya’ugõ Lowalangi, ba no si lõ tebulõ, gõtõgõtõ wa’ara, ba si’o ba wa’atulõ zi’o zalawa andrõ khõu. 9 No omasi ndra’ugõ wa’atulõ, ba no fa’udu ndra’ugõ ba zi lõ atulõ; andrõ no ibayoini ndra’ugõ Lowalangiu, ya’ugõ Lowalangi, fanikha fa’owuawua dõdõ, no ihude’õ ndra’ugõ, moroi ba nawõu.” 10 Ba: ”Ya’ugõ So’aya zolata tanõ, ba mbõrõta, ba nifazõkhi dangau mbanua si yawa; 11 ya’ia, ba sadudu dania, ba ya’ugõ, ba si lõ tebulõ; ba atua dania da’õ fefu, timba mbaru, 12 ba õgõlugõ dania, hulõ lembe, ba tobali dania, ba ya’ugõ, ba ya’uya’ugõ manõ, ba si lõ aetu ndrõfiu.” 13 Ba ha niha ba mala’ika, ba zi no irai iwa’õ: ”Dadao ba gambõlõgu, irege no ube’e danedane gaheu zi fatiu tõdõ khõu?” Famotokhi Taromali Lowalangi Sinanõ ba dõdõ tehalõ moroi ba zura Sinunö 97 : 9a Ya’ugõ sa Wondrege zalawa, Yehowa, ba guli danõ, ma’asagõrõ. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 71 Yesu Razo Sangefa’ö, si möi mangatulö. Fefu nösi gulidanö, suno böi mamalö, suno böi mamalö, suno, suno böi mamalö. Fa’omasi Nama khöda Ibè Nono-Nia. Wangorifi dozi niha, samati khö-Nia, samati khö-Nia, dozi samati khö-Nia. Razo Fondrege Zalawa solakhömi Ia. Turiaigö gofu heza, suno Haleluya, suno Haleluya, suno, suno Haleluya. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 72 Me möi tou mala’ika wangombakha khöra. Wa no tumbu Mesia ba Mbetilekhema. Reff. Ae töröi gulidanö .... Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***