8 Desember 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 8 Desember 2024 (Adven 2) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, Ya’ahowu ami ba döi Zo’aya, (I Kor 16:22). Maranata!!! Jemaat : Maranata!!! Liturgos : Yafao-fao khõmi Lowalangi! Jemaat : Ya fao khõu Geheha-Nia! (Möi ba meza Altar Zangai Huhuo Sebua, ba imane): “Ma’ökhö andre migu Adefe si Sara khöda. Eluaha Adefe si Sara andre ya’ia da’ö: “Fa’aro Wanötöna ba wombaloi Fa’atohare Zo’aya ba luo safuri” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si Dua khöda. Eluaha Adefe si Dua andre ya’ia da’ö: “Fogaoni ba wamalalini Era’era ba wamaondragö Fa’atohare Zo’aya” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si Tölu khöda. Eluaha Adefe si Tölu andre ya’ia da’ö: “Fa’atohare Mesia ba gulidanö, ba wama’ele’ö fa’atohare Mbanua Lowalangi” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si öfa khöda. Eluaha Adefe si öfa andre ya’ia da’ö: “Fa’owuawua dödö me no ahatö wa’atohare Zo’aya” (Aefa da’ö, itunu Lili molo’õ migu Adefe) FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 31 No fa’omasi Yehowa we’amöi Yesu ba khöda. Iröi lakhömi sebua ba fa’asalawa-Nia. Itehe tobali niha, ba wangöhöli ya’ita. Omuso dödöda, wanema Ya’ia. Si lö ikhamö tödöda nilau Lowalangi Ama. Ba wangorifi ya’ita, si no elungu, no taya. Da talulu wa’aurida, tabè nihaogö Zo’aya. Omusodödöda, wanema Ya’ia. He Yesu matehe khö-Mö, tödöma halö naha-Mö Mabè amatöröwa-Mö, fatörö ba zomasi’Ö Afu marugi, makhamö ba naha sahono dödö. Masuno Ndra’ugö Razo Sangatulö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Hiza, möi yomo ba mbanua khömi razomi, razo satulö ba sabölö (Zakharia 9:9b). MARANATA Liturgos : Mangandrõ ita, "He Yehowa Lowalangima, somböi banua si yawa awö danö. No fa’ebua dödö-U khöma wa no tola marugi mböröta ndröfi ba wa’aniha Keriso. Abölö’ö ndra’aga Eheha-Mö andrö Ni’amoni’ö, ena’ö so khöma mbuabua wamalalini era’era, ba ena’ö soŵa’a, sanöi ba sowua ndra’aga ba wamati ba wamaondragö fa’atohare Zo’aya ya’aga Yesu Keriso. Be’e khöma wehi’a dödö, fangosindruhugö ba fa lö faröi ba wango’aurifagö taroma Li-Mö, ena’ö samonga’eu fa’omasi, fa’atulö, fangefa, ba fa’ohahau dödö ndra’aga fefu irugi we’aso-Mö andrö si mendrua, Yaduhu!" Mudadao Zato Liturgos : Manunõ ita moroi ba Mbuku Zinunõ No. 40 No möi tou mala’ika wangombakha turia wa’atumbu Yesu So’aya. Iröi lakhömi-Nia ba zorugo si yawa tobali Ia ösi niha. Tabe’e dödöda nahia Zo’aya mane luha föröma-Nia. Yesu zindruhu haga sohagaini tödöda tatema ba böi tatimba. Tafaondragö Mesia si tumbu khö Maria ba mbanua Mbetilekhema, Solohe khöda haga fangoroma lalada. Da tafaondragö böi tatimba, si möi salahida ba huku horöda. He Yesu aine khöma heta fefu horöma, ohahau sa’ae dödöma. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 24 : 1-10 1 Khõ Yehowa danõ, awõ nõsinia, uli danõ andrõ, awõ zowanua ba detenia. 2 Me no ya’ia zolata, yawa nasi, sanga’aro’õ ya’ia yawa hohou andrõ. 3 Ha niha zi tola mõi yawa ba hili Yehowa andrõ, ba ha niha zi tola mangiagõ naha ni’amoni’õ andrõ khõnia? 4 Si lõ hadia ia zi falemba ba danga ba sohauhau tõdõ; si lõ mangalui falimosa ba si lõ mõi ba hõlu, na faya. 5 Da’õ zanema howuhowu khõ Yehowa, ba fa’atulõ khõ Lowalangi andrõ, sangorifi ya’ia. 6 Da’õ niha andrõ, sanofunofu ya’ia, sangalui fangila bawau, ya’ugõ Lowalangi Yakobo andrõ. 7 Mifazawa ami, ya’ami bawa gõli! Mi’alawa õ ami, ya’ami bawandruhõ si no arara, ena’õ itõrõ razo andrõ, solakhõmi! 8 Ha niha razo andrõ, solakhõmi? Yehowa andrõ, sabe’e ba sabõlõ! Yehowa, sabõlõ ba wasõndrata. 9 Mifazawa ami, ya’ami bawa gõli! Mi’alawa’õ ami, ya’ami bawandruhõ si no arara andrõ, ena’õ itõrõ razo andrõ, solakhõmi! 10 Ba ha niha atõ razo andrõ, solakhõmi? Yehowa zato andrõ, da’õ razo andrõ, solakhõmi. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 3 : 2 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama Ni’amoni’ö, möiga ma’ondrasi dadaoma wa’ahakhö dödö-U ba wangandrö fangefa horö ba ngawalö nilauma si lö sökhi. Ma’andrö wa’ebolo dödö-U Ama ba wa’oya golalöwama, he nifaluama ba ndraonoma, khö ndra satuama, ba dalifusöma, ba ba niha fefu. Ma’andrö bologö dödö-U khöma me asese iböbö ndra’aga amuata fa’afökhö dödö, fayawasa, ba fönu ba lala wa’auri sero ma’ökhö. Ma’andrö hakhösi dödö-U khöma, sasai fefu horöma ba bohouni ndra’aga ba wamaondragö fa’atohare-Mö. Saohagölö Ama, ba döi Zo’aya ya’aga Yesu Keriso, ma’andrö ni’andröma..." Liturgos : Mangandrö ba dödö zamösana föna Lowalangi... 1 irugi 2 meniti. Jemaat : Mangandrö ba dödö... Liturgos : Hakhösi dödöU khöma, Ama, ba be’e aefa khöma horöma andrö ma’afefu....Yaduhu. Jemaat : Manunõ moroi ba Mbuku Zinunõ No. 224 : 1 Liturgos : Faya wa no sauri Ndra’o, Iŵa’ö Yehowa na omasi-Do mate zebua horö; somasi Ndra’o na iröi lalania andrö sebua horö, na ifalalini gera’erania, ba na auri ia. Mifalalini gera’erami, miröi lalami andrö, si lö sökhi! Hana sa wa edöna mate ami, ya’ami ni’omasi’ö-Gu? Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 1 : 19-28 19 Ba da’õ wamaduhu’õ Yohane, me lafatenge khõnia gere, awõ nono Lewi, niha Yehuda, banua Yeruzalema, ba wanofu khõnia: Ha niha ndra’ugõ? 20 Ba i’ombakha’õ; tenga Keriso andrõ ndra’o. 21 Ba lasofu khõnia: Ba hadia? Eliya ndra’ugõ? Imane: Tenga. Lamane: Ya’ugõ zama’ele’õ andrõ? Imane: Tenga. 22 Ba lamane khõnia: Ba ha niha ndra’ugõ? Ena’õ mawa’õ khõ zamatenge ya’aga. Hadia niwa’õu ba khõu andrõ? 23 Imane: ”Li zi’ao ba danõ si mate ndra’o: Mifadaya lala Zo’aya, si mane niwa’õ Yesaya andrõ, sama’ele’õ”. 24 Ba sinenge warizaio zinenge andrõ. 25 Ba lasofu khõnia, lamane khõnia: Ba hana wa mamayagõ idanõ ndra’ugõ na tenga Keriso andrõ ndra’ugõ, ba tenga Eliya, ba na tenga sama’ele’õ andrõ? 26 Itema lira Yohane, imane: Samayagõ idanõ ndra’o; no so khõmi zi lõ mi’ila, 27 si so furigu; no ambõ ndra’o khõnia, utoto’õ mbõbõ mbadagahenia. 28 Ba Mbetania da’õ, yefo Yoridano, ba da’õ mamayagõ idanõ Yohane. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yesaya 40 : 1-5 1 Mirara dõdõ, mirara dõdõ mbanuagu andrõ, iwa’õ Lowalangimi! 2 Mihede ba mbanua Yeruzalema si gõna ba dõdõ, mi’ao khõra, mifarongogõ, wa no awai wasõndrata andrõ khõra, wa no muheta horõra, wa no dua winaeta latema sulõ horõra fefu, nibe’e Yehowa! 3 Fondrondrongo, so zi’ao, imane: ”Ba danõ si mate mihaogõ lala Zo’aya, mifadaya ba mbenua lala, khõ Lowalangida. 4 Fefu zobawa danõ, ba nifo’õsi ba fefu hili, fabaya hilihili fefu, ba nihõndrõgõ. Ba sobu’ubu’u, ba nibali’õ salo’o ba tanõ sohilihili, ba nibaliõ daso. 5 Ba oroma dania lakhõmi Yehowa ba endronga la’ila dozi niha; noa sa Yehowa zanguma’õ. Famotokhi Taromali Lowalangi Sinanõ ba dõdõ tehalõ moroi ba zura Sinunö 24 : 7 Mifazawa ami, ya’ami bawa gõli! Mi’alawa õ ami, ya’ami bawandruhõ si no arara, ena’õ itõrõ razo andrõ, solakhõmi! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 39 He Yesu no Ötehe möi’Ö tou ba gulidanö. Ba wolo’ö li Nama, ba wolohe fangatulö. Duhu wa somasi’Ö ba wangalui si so horö. Ena’ö lö tehuku dozi samati khö-Mö. Tödöma mafa’anö ba wamaondragö Ya’ugö. Botoma ba fa’aurima malulu sumange-Mö. He So’aya tologa be’e khöma Geheha-Mö. Sangabölö ya’aga wanema’ö Ya’ugö. Yae dödö si ta’unö, ma’ohe gametahö-Mö. Fao fangidengide’ö fangalulu soroi dödö. He Yesu ma’andrö khö-U, bohouni ba atulö’ö. Ya tobali sumange-U si lö mamalömalö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 42 Da’ö wa möi ba danöda Yesu sangorifi. Wolohe khöda fa’auri soroi Lowalangi. Fa’omasi Lowalangi ba niha fefu soi. Afu dozi te’orifi zaro ba wamati. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***