22 Desember 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 22 Desember 2024 (Adven 4) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, Ya’ahowu ami ba döi Zo’aya, (I Kor 16:22). Maranata!!! Jemaat : Maranata!!! Liturgos : Yafao-fao khõmi Lowalangi! Jemaat : Ya fao khõu Geheha-Nia! (Möi ba meza Altar Zangai Huhuo Sebua, ba imane): “Ma’ökhö andre migu Adefe si Sara khöda. Eluaha Adefe si Sara andre ya’ia da’ö: “Fa’aro Wanötöna ba wombaloi Fa’atohare Zo’aya ba luo safuri” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si Dua khöda. Eluaha Adefe si Dua andre ya’ia da’ö: “Fogaoni ba wamalalini Era’era ba wamaondragö Fa’atohare Zo’aya” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si Tölu khöda. Eluaha Adefe si Tölu andre ya’ia da’ö: “Fa’atohare Mesia ba gulidanö, ba wama’ele’ö fa’atohare Mbanua Lowalangi” (Aefa da’ö, itunu Lili molo’õ migu Adefe) (Möi ba meza Altar Zangai Huhuo Sebua, ba imane): “Ma’ökhö andre migu Adefe si öfa khöda. Eluaha Adefe si öfa andre ya’ia da’ö: “Fa’owuawua dödö me no ahatö wa’atohare Zo’aya” (Aefa da’ö, itunu Lili molo’õ migu Adefe) FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 35 Da’ö zumange-Nia,wanema Ya’ia. Be’e dödöu nihaogö, Zo’aya ya’ita. Fonaha ae li-Nia tanö ba dödömö. Ba be’e dali Ia, ba gamuatamö. He sinumana tödö, so wangorifida. Ya dozi oi tatema, wa’omasi-Nia. Tötönaföda Ia, me So’aya Sokhö. Tafosumange Ia, ba ta’omasi’ö. Samuza tö so Yesu, möi ba wamöfö’ö, Ba wamalua huku, sitobali sulö. He sauri, he simate, farahu ba da’ö. Samati dozi auri, oi omuso dödö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Hiza, möi yomo ba mbanua khömi razomi, razo satulö ba sabölö (Zakharia 9:9b). MARANATA Liturgos : Mangandrõ ita, "He Yehowa Lowalangima, somböi banua si yawa awö danö. No fa’ebua dödö-U khöma wa no tola marugi mböröta ndröfi ba wa’aniha Keriso. Abölö’ö ndra’aga Eheha-Mö andrö Ni’amoni’ö, ena’ö so khöma mbuabua wamalalini era’era, ba ena’ö soŵa’a, sanöi ba sowua ndra’aga ba wamati ba wamaondragö fa’atohare Zo’aya ya’aga Yesu Keriso. Be’e khöma wehi’a dödö, fangosindruhugö ba fa lö faröi ba wango’aurifagö taroma Li-Mö, ena’ö samonga’eu fa’omasi, fa’atulö, fangefa, ba fa’ohahau dödö ndra’aga fefu irugi we’aso-Mö andrö si mendrua, Yaduhu!" Mudadao Zato Liturgos : Manunõ ita moroi ba Mbuku Zinunõ No. 46 Yesu haogö dödöma, heta fefu zi fatimba. Be’e khöma Geheha, samatörö fa’aurima. Afu ma’ogorofi, zi lö omasi’Ö göi. Ma’andrö khö-U So’aya be’e ba dödöma haga. Sohagaini tödöma ba wanema’ö Mesia. Aine böi talu’iga onahia dödöma. Fo’arota ba khöma, Geheha Ni’amoni’ö. Samaha’ö ya’aga, ba wolo’ö somasi’Ö. Ya aro wamatima, khö-U Keriso So’aya. Börö wa’omasi-Mö wa möi’Ö ba gulidanö. Lö omasi Ndra’ugö na tekikoga ba horö. Matema’ö Ndra’ugö moroi sibai ba dödö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 112 : 1-10 1 Haleluya! Ya ahowu niha sangata’ufi Lowalangi, somasi sibai oroisania andrõ! 2 Sabõlõ ba guli danõ dania ma’uwunia, ba sebua howuhowu dania nga’õtõ zadõlõ tõdõ. 3 So baomo khõra mbalazo ba ana’a; ba fa’atulõra, ba lõ tebulõ, irugi zi lõ aetu. 4 Ba zadõlõ todõ andrõ, ba tumbu haga ba dalu zogõmigõmi; sebua tõdõ ba sahakhõ tõdõ ba satulõ. 5 Ya ahowu niha sahakhõ tõdõ ba same’e nifalali! Lõ te’ala ia ba huhuo nifatunõ. 6 Lõ’õ sa mangiwa ia, irugi zi lõ aetu; gõtõgõtõ wa’ara lõ olifu niha zatulõ andrõ. 7 Lõ tokea ia, na irongo duria si lõ sõkhi; abe’e dõdõnia, manõtõna khõ Yehowa. 8 Aró dõdõnia; lõ ata’u ia, irege omuso dõdõnia, na i’ila zi gõna si fa’udu khõnia. 9 Mamazaewe ia, mame’e ame’ela ba zi numana; si lõ mamalõmalõ wa’atulõnia; alawa dandrunia, moturia. 10 I’ila sebua horõ, ba lõ sõkhisõkhi dõdõnia: ifatangi mbohania ba ariri; ba waya aekhu wangisõ zebua horõ. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 3 : 2 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama Ni’amoni’ö, möiga ma’ondrasi dadaoma wa’ahakhö dödö-U ba wangandrö fangefa horö ba ngawalö nilauma si lö sökhi. Ma’andrö wa’ebolo dödö-U Ama ba wa’oya golalöwama, he nifaluama ba ndraonoma, khö ndra satuama, ba dalifusöma, ba ba niha fefu. Ma’andrö bologö dödö-U khöma me asese iböbö ndra’aga amuata fa’afökhö dödö, fayawasa, ba fönu ba lala wa’auri sero ma’ökhö. Ma’andrö hakhösi dödö-U khöma, sasai fefu horöma ba bohouni ndra’aga ba wamaondragö fa’atohare-Mö. Saohagölö Ama, ba döi Zo’aya ya’aga Yesu Keriso, ma’andrö ni’andröma..." Liturgos : Mangandrö ba dödö zamösana föna Lowalangi... 1 irugi 2 meniti. Jemaat : Mangandrö ba dödö... Liturgos : Hakhösi dödöU khöma, Ama, ba be’e aefa khöma horöma andrö ma’afefu....Yaduhu. Jemaat : Manunõ moroi ba Mbuku Zinunõ No. 224 : 1 Liturgos : Faya wa no sauri Ndra’o, Iŵa’ö Yehowa na omasi-Do mate zebua horö; somasi Ndra’o na iröi lalania andrö sebua horö, na ifalalini gera’erania, ba na auri ia. Mifalalini gera’erami, miröi lalami andrö, si lö sökhi! Hana sa wa edöna mate ami, ya’ami ni’omasi’ö-Gu? Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 5 : 14-16 14 Ya’ami haga ba niha ba guli danõ. Tebai tobini mbanua, si so ba hili yawa. 15 Lõ’õ gõi tatunu wandru ba tabalugõ tumba yõu, tabe’e yawa ba naha wandru, ba ihagaini hadia ia, khõra fefu, si so yomo. 16 Yasi manõ hagami andrõ, yahumaga ba niha, ena’õ la’ila mbuabuami andrõ, si sõkhi, ba ena’õ lasuno Namami andrõ, si so ba zorugo. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Yesaya 60 : 1-7 1 Faoso, yamohaga ndra’ugõ; noa sa so hagamõ andrõ, no humaga yawau lakhõmi Yehowa! 2 Hiza sa: No tobalu sogõmigõmi danõ ba si bongi zombalugõ soi niha; ba yawamõ, ba humaga Yehowa ba lakhõminia zi to’ele yawau. 3 Ba la’ondrasi dania haga andrõ khõu niha baero, ba razo zangondrasi lakhõmi andrõ, si no humaga yawamõ. 4 Faõga hõrõu, fakhõlõ’õ ba faigi: No owulo ira fefu, la’ondrasi ndra’ugõ! La’otarai zarõu ono matua khõu, ba nilu’i ba lembe nonou alawe. 5 Ba na õ’ila dania, ba humaga mbawau [ba wa’omuso dõdõ], humufa dõdõu ba ebolo; isawa sa’ae ndra’ugõ ana’a si otarai nasi, mõi khõu girõgirõ niha baero. 6 Ihawui ndra’ugõ fa’oya gondra andrõ, ono gondra Midiano ba ono gondra Gefa; dozi so ira moroi ba Zaba: la’ohe gana’a ba kumõyõ ba laturiaigõ nilau Yehowa, fa’ebua dõinia andrõ. 7 Fefu mbiribiri Gedara andrõ, ba khõu owulo, ba balazi ndra’ugõ mbiribiri si matua ba Ndraono Nabayoti. Ba naha wame’e sumange khõgu yawa numalõ, omasiõ, ba ufolakhõmi na nomo lakhõmigu andrõ. Famotokhi Taromali Lowalangi Sinanõ ba dõdõ tehalõ moroi ba zura Yesaya 60 : 1 Faoso, yamohaga ndra’ugõ; noa sa so hagamõ andrõ, no humaga yawau lakhõmi Yehowa! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 37 Ma’andrö khö-U he Yesu böi sa talu’iga. Onahia dödöma ba fo’urakhaga. Haga soroi zorugo sangehao tödöma. Afu lö elunguga wanörö lalama. Amualagö khöma wangorifi andrö. Si no sa Öfabu’u ba zamati khö-Mö. A’aro’ö dödöma ba daromali-Mö. Ha sambalö Ya’ugö khöma dötönafö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 289 Oi taya wangiwa dödö, ba wekoli ba danö. He famakao, fa’afökhö, tola manö tataögö. Me Yesu zi lö tebulö, fao khöda ero ma’ökhö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***