20 Oktober 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 20 Oktober 2024 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 9 No töra moroi khö nina, wendroro ononia, Wamaeri Yesu So’aya, ya’o tana khö-Nia. Me omasi Lowalangi, na auri göi ndra’odo. Andrö wa no Ikaoni, afu u’o’ö Keriso. Lö faröi sa Zo’aya, he adudu danöda. Ifatenge Nono-Nia, Ama, Lowalangigu. Itehe nibunu Ia, si möi fangorifigu. He tödögu, lau anunö, böi olifu ndra’ugö. Angalulu khö Yesu, me sangorifi ya’ugö. Lö faröi sa Zo’aya, he adudu danöda. No Ibè Geheha-Nia, samatörö tödögu. Awö daroma li-Nia, wamohaga lalagu. Sangaro’ö famatigu, sondrou’ö fanötöna. Solawa emaligu, ba ginötö watelesa. Lö faröi sa Zo’aya, he adudu danöda. Irorogö sa ndra’odo, Ibönökhi zoguna. He na mofökhö ndra’odo, lö Iröido So’aya. Ba wofanö Ilumö’ö, fa lö göna te’ala. Ifasugi ba dödö, wanunonuno Ya’ia. Lö faröi sa Zo’aya, he adudu danöda. He So’aya, amölido, wanörö ulidanö. Fa lö te’ala ndra’odo, me oya wanandraigö. Böi famalö amenesi, ndra’odo na elungu. Efa’ödo ba horö, si no emali dödögu. Rorogödo, So’aya, irugi gamozua. FANGA’ARO’ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 207 Faduhu dödöma no elunguga, Wolo’ö nikhoi dödöma, me mawalinga harema. Kaoni ndra’aga, ohe ba haga. Omasi ndra’aga fao khö Zo’aya. Sangabölö’ö ya’aga, wanörö sindruhu lala, Lala miyawa saekhu khö Nama. Bè khöma Geheha Ni’amoni’ö. Da’ö we’ewe’edödö, he na oya zagafökhö. Wanuriaigö taromali-Mö. Oi dozi te’ala zabe’etödö. Fahöna wangaröngarö, lö tebato, lö mamalö. Tekiko ira götö wa’ara. FOMBASO TAROMALI LOWALANGI (AMABU'ULA LI SIFöFöNA) Liturgos : Da tafondrondrongo daroma Li Lowalangi, tehalö moroi ba zura Yosua 24 : 12-24 12 Ba ufowaõwaõ fõnami geto, ba moloi ira fõnami labe’e, razo Ndraono Gamori andrõ, si felendrua; tenga ba zi’õlimi ba tenga ba wanami! 13 Ba ube’e khõmi danõ ba zi lõ erege dõdõmi, ba banua si tenga nitaru’õmi, ba mibali’õ nahiami, ba kabu nagu ba kabu nohi, si tenga nitanõmi, ba mi’a mbua.” 14 Ba mi’ata’ufi sa’ae Yehowa ba mifosumange ia moroi si’aikõ ba dõdõmi ba bõi farõi ami, ba miheta nadu andrõ, nifosumange ndra tuami yefo nidanõ andrõ ba ba danõ Miserayi, ba mifosumange Yehowa. 15 Ba na lõ omasi ami wamosumange Yehowa, ba mihonogõi ma’õkhõ, ha niha nifosumangemi, na Lowalangi andrõ, nifosumange ndra tuami, si so yefo nidanõ andrõ, ba na Lowalangi Ndraono Gamori andrõ, si so ami ba danõ; ba ya’odo ba soroiyomogu fefu, ba Yehowa mafosumange! 16 Ba latema li sato, lamane: Ya arõu khõma wangerogõ Yehowa, ba wamosumange Lowalangi bõ’õ! 17 Yehowa sa Lowalangima; ya’ia sa zolohe miyawa ya’ita ba ira amada moroi ba danõ Miserayi, ba zi no mõi sawuyu ita, ba solau sahõlihõli dõdõ andrõ, ba zanehe ita, ba sondrorogõ ya’ita ba lala andrõ fefu, nitõrõda, ba ba niha fefu, nitõrõda tanõ. 18 Ba no ahori itimba fõnada Yehowa soi andrõ, awõ Ndraono Gamori, si so ba danõ. Ya’aga gõi mamosumange Yehowa, me no ya’ia Lowalangima! 19 Ba imane Yosua ba zato: Tebai samosumange Yehowa ami, me no Lowalangi ni’amoni’õ ia; Lowalangi solohu ia: lõ ibe’e aefa khõmi lalõmi ba horõmi andrõ! 20 Na mi’erogõ Yehowa, wamosumange Lowalangi bõ’õ, ba i’erogõ gõi ami ba ifatõrõ khõmi zi lõ sõkhi ba ihori ami, lõ lai wa no si sõkhi ifatõrõ khõmi mege. 21 Lamane sato khõ Yosua: Bõi, Yehowa mafosumange! 22 Ba imane Yosua ba zato: Ya’ami zi so ba mbõrõ khõmi, wa no mihonogõi, Yehowa nifosumangemi. Lamane: Ya’ia da’õ! 23 Ba miheta Lowalangi bõ’õ andrõ, si so ba khõmi, ba ena’õ khõ Lowalangi Ndraono Gizeraëli andrõ, Yehowa, aolo dõdõmi! 24 Ba lamane sato khõ Yosua; Lowalangima, Yehowa andrõ, mafosumange ba linia mofondrondrongo! Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRö FANGEFA HORö Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Mareko 7 : 1-8 1 Ba owulo khõnia warizaio ba sangila amakhoita õsa, si otarai Yeruzalema. 2 Ba me la’ila nifahaõnia õsa, si manga manõ lõ mombanõ — 3 Lõ’õ sa manga warizaio, awõ niha Yehuda fefu, na lõ muforege wanasai tanga, wolo’õ oroisa zatua andrõ, 4 ba na la’otarai kade, ba lõ manga ira, na lõ si mondri, ba oya ngawalõ tánõ bõ’õ, nifa’ema khõra, ni’o’õ, fanasai mako ba fanasai migõ ba fanasai bowoa — 5 Ba lasofu khõnia farizaio andrõ, awõ zangila amakhoita andrõ, lamane: Hana wa lõ latõrõ lala goroisa zatua andrõ ira nifahaõmõ, hana wa manga manõ ira lõ mombanõ? 6 Ba imane khõra: Si duhu nifa’ele’õ Yesaya andrõ ba khõmi, samini tõdõ andrõ, si mané ba zura: ”Lafosumange ndra’o bewera niha andre, ba tõdõra, ba no arõu khõgu. 7 Si lõ guna wamosumangera ya’o, me nifakhoi dõdõ niha wamahaõra. 8 Oroisa Lowalangi mi’erogõ, ba mi’o’õ goroisa niha. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASöMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Roma 12 : 1-8 1 Andrõ ufarou dõdõmi, ya’ami ira talifusõ, moroi ba wa’ahakhõ dõdõ Lowalangi andrõ, ena’õ mibe’e sumange mbotomi, sumange sauri, ni’amoni’õ, somasi Lowalangi; da’õ wamosumange Lowalangi khõmi, si so tõdõ. 2 Ba bõi mifaomagõ ami ba niha zi sagõtõ tanõ andre, mibali’õ ami, wamohouni era’era dõdõmi, ena’õ mi’ila mitimba tõdõmi hadia nilau dõdõ Lowalangi, hadia zi sõkhi, hadia wa’omasinia ba hadia zo’ahonoa. 3 Uwa’õ sa khõmi, dozi ami, moroi ba wa’ebua dõdõ andrõ, si no falukha ndra’o, bõi fayawa zamõsana, ha ndrohundrohu, era’era zatuatua yamu’alui, dali zu’asu’a wamati andrõ, nindrohugõ Lowalangi ba zamõsana. 4 Hulõ mbotoda sa, me no oya ndrotondroto khõda, ba me tenga ha sambalõ halõwõ ndrotondroto andrõ, 5 si manõ ita ba khõ Keriso, ya’ita si no ato, ha sambua boto ita, ba no ndrotondroto ita, zamõsana ba khõ nawõnia; 6 Ba no faehu game’ela andrõ khõda, balazi wa’ebua dõdõ andrõ, si no falukha ita: Na fama’ele’õ, ba yafaudu ba wamati andrõ; 7 ba na so zi so halõwõ, ba yamuhaogõ halõwõnia, ba na famahaõ, ba yamamahaõ; 8 ba na famarou tõdõ, ba yamufarou dõdõ niha; na so zame’e ame’ela, ba ya’adõlõ dõdõnia wame’e; na samatõrõ, ba yamu’oigõ dõdõnia; ba na sahakhõ tõdõ si numana, ba ya moroi ba dõdõnia. Famotokhi Taromali Lowalangi Sinanö ba dödö tehalö moroi ba zura Roma 12 : 1b Ena’õ mibe’e sumange mbotomi, sumange sauri, ni’amoni’õ, somasi Lowalangi; da’õ wamosumange Lowalangi khõmi, si so tõdõ. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 209 Do Keriso So’aya da’ö wangorifida. Möi fangefa horöda na mamati göi ita. Lö a’ozu tehuku, na no ta’o’ö Yesu. Na dalida goroisa ba oi simate ita. Lö tesöndra zamösa zi lö mo’olalöwa. Yesu no möi salahi, Itehe ni’elifi. Fa’omasi-Mö, Yesu, wa Ötehe nibunu. Fangefama ba wönu, ena’ö lö tehuku. Me ebua dödö-Mö, halöga tanakhö-Mö. Da ululudo khö-Mö, Yesu sahakhö tödö. Sawatögu Ndra’ugö, bè khögu Geheha-Mö. Fosinema göi ndra’o, ba ndro-Mö bohounido. FANGANDRö SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 282 Böi irörö ndra’o hare, ba gulidanö. Fefu gisö’isö dödö, ya u’erogö. Ha sambalö sa zaro, si lö mamalömalö. Na Öfanema ndra’odo, fa’auri andrö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***