[Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi]
FANGOWAI BA FOGAONI
FANGOWAI
Liturgos : Ya’ami banua Zo’aya. Ma’ökhö andre no tarugi ba Gangohorita Ndröfi Niha Keriso. Ya sowuawua tödö ita ba we’amöi föna Keriso ba wanötöna fa’auri si lö aetu. Ma’owai ami ba döi Zo’aya ya’ita Yesus Keriso, Ya’ahowu!
Jemaat : Ya'ahowu!
Liturgos : Yafao-fao khömi Lowalangi!
Jemaat : Ya fao khöu Geheha-Nia!
FOGAONI
Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No.
427
- Fefu zomasi ita tasöndra ba da’ö.
Fa’auri si lö aetu, fa’ohahau dödö.
Lö ae mamalömalö wa’omuso dödö.
Me khö Yesu fao ita, Razo Wa’atulö.
- Ma’ifu lö falukha, galangua dödö.
Me khö Yesu fao ita, ba lakhömi andrö.
No fa’omasi Nama, fa’ebua dödö.
Zangu’uni ya’ita, lö tebulöbulö.
- No fa’auri Zo’aya, gumbu wa’aurida.
Fa’auri soroi Nama ba wemöna-Nia.
Lö fa’aekhu gölöda, na so wamatida.
Me ba lakhömi Nama, tefonaha ita.
- Lö khamötö si sökhi, baero naha Nama.
Me fa’omuso dödö, a’oi so khö-Nia.
Ya so wehulu dödö khöda zamösana.
Ba wogamö nahia, ni’asiwai Nama.
- Sondrugi naha Nama, oi ohahau dödö.
Ba lasuno Zo’aya, Yehowa ngahönö.
Oi maulu wanunöra, lö mamalömalö.
Hozana khö Zo’aya, Razo Wa’atulö.
FANGA’ARO’Ö WA’OWULO (VOTUM)
Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato.
No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö!
Jemaat : Yaduhu!
Liturgos : Si manö zi möna andrö, nifonukha nukha safusi, ba lö’ö manö sa’ae Ubunu döinia ba zura wa’auri andrö, ba U’ombakha’ö döinia, ba zi so Amagu, ba ba zi so mala’ika andrö khö-Nia! HALELUYA!
Liturgos : Mangandrö ita, "He So’aya ya’aga Yesu Keriso, Lowalangi sauri ba sangorifi. He matörö mbawa danö si göna lumö wa’amate, ba lö khöma fa’ata’u, me no Ya’ugö Gubaloma, sondrorogö ya’aga. Tebai i’alani ndra’aga fa’amate, me no Ya’ugö zangorifi ya’aga. Möiga khö-U ba wanou’ö boto awö nosoma, me no Ya’ugö zokhö ba samatörö fa’auri ba fa’amatema. He Ama ma’andrö khö-U, rorogö ba fatöröga ba zomasi Ndra’ugö irugi gamozua, famakhamö nahia ba zi so Ya’ugö. Si lö mamalömalö nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö. Yaduhu!" Mudadao Zato
Liturgos : Manunö ita moroi ba Mbuku Zinunö No.
431
- Haga-Nia zangoroma, lalagu ba gulidanö.
Ha khö-Nia utötöna, wogamö so’ahonoa,
naha sohahau dödö.
- Wa’asökhi, molakhömi, naha Razo Wa’atulö.
Sawatö so’ahonoa, si so omusola dödö,
si lö tebulöbulö.
- Ambö ligu wamatunö, ni’ilagu na urugi.
Ba nahia Lowalangi, si no maulu fa’asökhi,
ba zowulo samati.
- Mangandrödo khö-U, he Yesu, be’e omuso dödögu.
He na uröi gulidanö, ha sambalö zawatögu,
nahia si so Yesu.
FOMBASO TAROMALI LOWALANGI (AMABU'ULA LI SIFÖFÖNA)
Liturgos : Da tafondrondrongo daroma Li Lowalangi, tehalö moroi ba zura
Yesaya 9 : 1-7
1 Tenga sa si lö tebulö zogömigömi, ba zi no göna famakao. Me föna, ba no ifatörö wangaila ba dano Zebuloni ba ba danö Nafetali, ba dania, ba i’ebua’ö döi, lala ba na i andrö, singa Yoridano, tanö niha solohe adu andrö.
2 Banua sanörö sogömigömi, ba la’ila haga sabölö dania. Ba zi so ba danö, si no tehawu si bongi, ba mohaga dania. Omuso sibai dödö öbe’e.
3 Ba zi lö ni’ebua’ömö fa’omuso dödö, ba somuso tödö dania fönau, timba wa’omuso dödö ba wamasi ba timba wa’omuso dödö na lafaosa gahulua ba wanuwö.
4 Kalo mbagi andrö, norora, ba ue andrö si tohare ba hulura, bözibözi andrö ba danga mandru, ba öfatö sa’ae, si mane me leoo Midiano andrö.
5 Fefu wangaro zangaro andrö ba wanuwö ba baru andrö, si no göna do, ba nitunu sa’ae, ö galitö.
6 Tumbu dania khöda nono, tebe’e khöda nono matua; tebe’e ba galisinia wamatörö ba tebe’e töinia Zahölihöli dödö ba Samolala tödö ba Lowalangi sabölö, ba Ama zi lö aetu ba Salawa wa’atulö.
7 Fa’asalawania ba wamatörö ba fa’atulö andrö, ba si lö aetu, ba dadaoma Dawido andrö ba ba gamatöröwania, wangaro ya’ia ba fangabe’e ya’ia fanguhuku satulö, i’otarai da’e, ba irugi zi lö aetu. Fa’aukhu dödö Yehowa ngahönö zolau si manö.
Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1
FANGANDRÖ FANGEFA HORÖ
Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato.
Mangandrö ita, "He Yehowa Lowalangi si so ba zorugo yawa. No sowuawua tödö ndra’aga, börö howuhowu-Mö si no Ö’amualagö ba wa’aurima irugi ma’ökhö andre. Aboto ba dödöma wa no Ya’ugö gumbu wa’auri, ba no Ya’ugö gamozua wa’aurima. Ba hiza mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba gera’era dödöma, fehedema awö gamuatama si lö faudu ba daroma Li-Mö. Asese ma’osiwawöi ginötö nibe’e-U khöma, ba ambö ndra’aga wangoguna’ö tödö satuatua ba wangerai bongima, ba no malulu wa’aurima nifatörö gisö’isö dödö wa’a’ösi niha. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba ginötöfönama si faudu ba zomasi Ndra’ugö."
[Mangandrö ba dödö zamösana föna Lowalangi... 1 irugi 2 menit]
Liturgos : Hakhösi dödö-U khöma Ama, ba be’e aefa khöma horöma andrö ma’afefu... Yaduhu!
Jemaat : Manunö moroi ba Mbuku Zinunö No. 224 : 1
Liturgos : "Sahakhö tödö Yehowa ba sebua tödö; ebolo sibai dödö-Nia ba no oböwö sibai Ia. Lö nibe’e-Nia dali horöda ba lö nisulöni-Nia khöda olalöwada. Si mane fa’ahakhö dödö nama nononia, simanö wa’ahakhö dödö Yehowa zangata’ufi Ya’ia". Lakhömi khö Lowalangi si yawa!
Jemaat : Manunö moroi ba Mbuku Zinunö No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU)
Liturgos : Da tafondrondrongo daroma Li Lowalangi, tehalö moroi ba zura
Fama'ele'ö 11 : 15-19
15 Ba ilau dorofe mala’ika fanete zi daönö, ba terongo li segebua ba zorugo, lamane: No möi khö Zo’aya ya’ita wamatörö andrö, ba guli danö, ba khö nibayoini andrö khönia, ba razo ia, irugi zi lö aetu.
16 Ba latuhi danö, lafalögu tou ira satua andrö, si dua wulu a öfa, sidadao föna Lowalangi, ba dadaomara andrö, mangalulu ira khö Lowalangi,
17 lamane: Ma’andrö saoha gölö khöu, ya’ugö So’aya, Lowalangi, samatörö fefu, hadia ia, si so, ba si no so föna, me no öhalö khöu wa’abölö andrö khöu, si no ebua, ba me no razo ndra’ugö.
18 Ba no mofönu soi niha baero; ba no tesao wönumö, ba no irugi inöto, ba zi mate andrö, ena’ö tehuku ira, ba ena’ö öbe’e luo andrö, ba genoniu andrö, sama’ele’ö, awö ni’amoni’ö, awö zangata’ufi töimö andrö, he side’ide, ba he sebua, ba ena’ö öfakiko zamakiko uli danö andrö.
19 Ba tebokai gosali Lowalangi andrö, ba zorugo, ba oroma dawöla gamabu’ula li andrö khönia, ba gosalinia andrö; ba so gari mbanua, ba li niha, ba fe’ugu’ugu mbanua, ba siheu, ba teu kara sabölöbölö.
Ya’ahowu zamondrongo taroma Li Lowalangi ba same’e ba dödö (Luka 11:28)
Jemaat : Yaduhu!
FANGOWULOI FASÖMBATA
Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7)
Tafa’ema föna wasömbata khö Lowalangi, ba manunö ita moroi ba Mbuku Zinunö No. 261
2. Ya’e zumange fasömbata ma be’e soroi ba dödöma.
3. Ya’e zumange fasömbata buala si’otarai Nama.
4. Ya’e zumange fasömbata, boto, noso, ba fa’aurima.
5. Ya’e zumange fasömbata, lö irugi zomasi dödö-U.
6. Ya’e zumange fasömbata, ma’aohasi gölö Zo’aya.
Liturgos : Da tafasao wasömbatada andre föna Lowalangi, musindro ita fefu.
[Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163
[Pengkhotbah Möi ba Mimbar]
HUHUO SEBUA
Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin.
Pengkhotbah : Fatua lö tabaso mbörö huhuo da tafondrondrongo ha wa’ato zi tumbu awö zi no mate barö ndröfi andre.
- Situmbu:
- Ira matua: 31 niha
- Ira alawe : 27 niha
Jumlah : 58 niha
- Simate:
- Satua : 30 niha
- Iraono : 4 niha
Jumlah : 34 niha
Pengkhotbah : Musindro Zato... Manunö ita moroi ba Mbuku Zinunö No. 410:1
[Fombaso Taroma li, moroi ba Roma 14:7-9]
7 Lö’ö sa ba khöda sauri, ba khönia manö, ba lö si mate, ba khönia manö.
8 Na auri ita sa, ba khö Zo’aya wa’aurida, ba na mate ita, ba khö Zo’aya wa’amateda; tobali, he sauri ita, ba he si mate ita, ba khö Zo’aya ita.
9 Da’ö sa mbörö, wa mate Keriso, awö wa no ifuli auri, ena’ö ifatörö zi no mate, awö zauri.
Pengkhotbah : Manunö ita moroi ba Mbuku Zinunö No. 410:2
[Fombaso Taroma li, moroi ba I Korindro 15:54b-57]
54b Ba awena itörö daroma li andrö, si so ba zura: ”No alömö wa’amate andrö ba wemöna.
55 Hezo wemönau, fa’amate? Hezo duomö, fa’amate?”
56 Ba tuo wa’amate andrö, ba ya’ia horö andrö, ba fa’abölö horö andrö, ba ya’ia goroisa.
57 Ba nisuno Lowalangi same’e khöda femöna andrö, moroi khö Zo’aya ya’ita andrö, Yesu Keriso.
Pengkhotbah : Manunö ita moroi ba Mbuku Zinunö No. 410:3
- Fombaso Taroma Li Lowalangi moroi ba zura
Danieli 7 : 9-14
9 Ba ufaigifaigi, irugi tefedadao ba da’ö dadaoma zalawa ba irege dumadao ”zatua andrö,” si no arara: barunia, ba no si takile, afusi, fa’afusi mbetua, ba bunia, ba no timba zi ndruhu mbu mbiribiri, ba dadaomania, ba holahola galitö, ba no moroda alitö siholahola.
10 Ba hulö zahele misa galitö, sebua, si otarai ia; mehönö wa hönö ngoningoninia, ba mewulu ngahönö wa fulu ngahönö zi so ba ngainia. Ba dumadao zanguhuku ba labokai zura.
11 Ba ufaigifaigi manö — börö wayawasa andrö, huhuo dandru andrö, sebua li — ufaigifaigi manö, irege labunu zaliwaliwa ba danö andrö, ba irege lafakiko mbotonia, ba irege latibo’ö ba galitö si holahola.
12 Ba he ba nawönia saliwaliwa ba danö andrö, ba teheta wa’abölö, ba te’ötö khöra mbongi ba inötö, ha wa’anau nosora.
13 Ba ni’ilagu na ba gangilata andrö, ba zi bongi, ba so moroi sa, ba lawuo ba mbanua si yawa, zi hulö niha, ba irugi zatua no mege, te’ohe khönia.
14 Ba ba da’ö tebe’e sa’ae wa’abolo ba fa’ebua döi ba fa’asalawa: enoninia niha fefu, ha soi ira ba hadia ngawalö lira; ba fa’abölönia andrö, ba sirugi si lö aetu ba si lö tebulö, ba amatöröwania andrö, ba lö’ö manö adudu.
- Mangandrö
He Lowalangi Ama sahakhö tödö. Mangalulu ndra’aga föna-U me lö mamalömalö wa’omasi-Mö ndra’aga. Öfolombase zi no erege tödö ba wasöndrata ba horö, ba Öfuli Öfatumbu’ö zi bohou ebua ba wangila lakhömi-Mö andrö. Tologa ya’aga sauri na ba guli danö, fama’ila ma’oguna’ö zi tosai wa’aurima andrö nitehe-U ba wangalui fangorifi nosoma, ba ba wamosumange Ya’ugö. Yaduhu. (mudadao zato)
- Famotokhi Taromali Lowalangi
- Sinanö ba dödö tehalö moroi ba zura
Danieli 7 : 14b
Ba fa’abölönia andrö, ba sirugi si lö aetu ba si lö tebulö, ba amatöröwania andrö, ba lö’ö manö adudu.
- Fangandrö Fondruhö Wamotokhi Taromali
Jemaat : Manunö moroi ba Mbuku Zinunö No. 154
TUHO WAMATI
Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida:
- Ya’o mamati khö Lowalangi Ama si lö ambö fa’abölö, somböi banua si yaẅa awö danö.
- Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
- Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu!
Liturgos : Mudadao Zato.
WARTA JEMAAT (Klik untuk membuka)
Liturgos : Manunö ita moroi ba Mbuku Zinunö No.
439
- Ba da’ö oi faondra zamati, manunonuno Lowalangi.
Taya fefu gabula dödö, ohahau dödöda ma’iki.
Reff. Sökhi ae dania...
- Khö Yehowa sahakhö tödö, mangandrö ita saohagölö.
Fa’omasi si lö mamalö, howuhowu sero ma’ökhö.
Reff. Sökhi ae dania...
- Lö falukha wa’abu dödö, ha fa’omuso dödö manö.
Lö aetu wanunö fangandrö, wanuno Lowalangi Sokhö.
Reff. Sökhi ae dania...
FANGANDRö SALAHI + FAMATENGE + HOWUHOWU
Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:"
Pengkhotbah + Jemaat :
He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu.
Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi:
- Ya mufahowu’ö ami Lowalangi, Ya murorogö ami;
- Ya mufohaga mbawa-Nia khömi, Ya mu’ebua’ö dödö-Nia khömi;
- Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu!
Jemaat : Manunö moroi ba
Mbuku Zinunö No.
426
- Keriso zawatögu me no sangatulö.
We’ewe’e dödögu, samè fa’abölö.
Andrö aro dödögu ba wanörö lalagu.
Me lö Iröi ndra’o Itolo Ifasao.
- He oya zamaelungu, he göi sanabigö.
Ba lö fa’ata’ugu, Yesu zondrorogö.
No faduhu dödögu, wa ukhamö zawatö.
Naha si so Yesu, ba zohahau dödö.
- He Yesu, si no möna, Razo Wa’atulö.
Be’e khögu Geheha, sohagaini tödö.
Tödögu onahia, böi röi bongi ma’ökhö.
Be khögu wemöna, ba wolawa horö.
- He Yesu solomasi, Kubalo si sökhi.
Aro’ö wamatigu, ba fanötöna göi.
Afu mangurakhado, buala fangorifi.
Khamötö dödögu, naha solakhömi.
Pengkhotbah : Ya'ahowu!!!
Jemaat : Ya'ahowu!!!
*** IBADAH SELESAI ***
Tidak ada komentar:
Posting Komentar