6 Oktober 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 6 Oktober 2024 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 16 Sahakhö tödö Zo’aya, khöda fefu sowanua, si so ba gulidanö. Ya’ia zindruhu haga, ba wohagaini tödöda, ba wa’ebua dödö. Duhu, duhu, Ihagaini, Ifoloi zogömigömi, ena’ö oi tebohouni. Ba me no tohare haga, ba zi sagörötanöda, da tasuno Yehowa. Da’ö zomasi Zo’aya, ya ta’oguna’ö haga, fangoroma horöda. Duhu, duhu, no omasi Lowalangi na oiauri, zamati si no Ihöli. Oi dozi te’ala niha, sondröi, sangerogö haga soroi Lowalangida. Lö fao ira ba wogaoni, ba wogamö naha Nama, na luo safuria. Sökhi, sökhi, na talulu wa’aurida dozi ita, amatöröwa Geheha. FANGA’ARO’ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 241 Tahonogö dödöda, föna Lowalangi Ama. Da tatunö khö-Nia, ngawalö golalöwada. Na mangesa dödöda, Ibè aefa horöda. Tahonogö dödöda, föna Lowalangi Ama. Da ta’andrö zanolo, Eheha soroi Zo’aya. Samaha’ö ya’ita, ba wolo’ö li Nama. Tahonogö dödöda, föna Lowalangi Ama. Wangombakha khö-Nia, fefu gabula dödöda. Si lö lala ba niha, Ifolala So’aya. FOMBASO TAROMALI LOWALANGI (AMABU'ULA LI SIFöFöNA) Liturgos : Da tafondrondrongo daroma Li Lowalangi, tehalö moroi ba zura II Moze 20 : 1-17 1 Ba iwa’ö daroma li andrö fefu Yehowa, imane: 2 Ya’odo Yehowa Lowalangiu, si no mangeheta ya’ugö ba danö Miserayi andrö, ba zi no möi sawuyu ami. 3 Böi so khömö Lowalangi tánö bö’ö, baero ndra’o. 4 Böi fazökhi khöu nadu, ba he famaedo hadia ia, he si so si yawa ba mbanua, ba he si so si tou ba guli danö, ba he si so ba nidanö, barö danö. 5 Böi angalulu khönia ba böi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horö ndra ama ba ndraono ba ba ma’uwu mitou, khöra si fatiu tödö khögu, 6 ba si hakhösi tödö sangomasi’ö ya’o ba solo’ö oroisagu; irugi hönö nga’ötö. 7 Böi tötöi döi Lowalangiu Yehowa ba waya; lö’ö sa zi lö ihuku Yehowa zanötöi töinia ba waya. 8 Ame’egö tödö luo wolombase andrö, ba we’amoni’ö ya’ia. 9 önö ngaluo mohalöwö ndra’ugö ba öhalö halöwöu fefu. 10 Ba ero fitu bongi, ba luo wolombase khö Lowalangiu Yehowa; böi babaya hadia ia halöwö ba da’ö, he ya’ugö, ba he onou matua, ba he onou alawe, ba he sangai halöwö khöu ira matua ba he sangai halöwö khöu ira alawe, ba he uriföu, ba he si fatewu khöu ba mbanuami bakha. 11 önö ngaluo sa mege khö Yehowa, ba wamazökhi banua si yawa, awö danö, awö nasi, awö nösira fefu; ba ba luo si fitu, ba no molombase ia. Andrö wa no ifahawu’ö luo si fitu andrö Yehowa, ba no i’amoni’ö. 12 Fosumange namau, awö ninau, ena’ö anau nosou ba danö, nibe’e Lowalangiu Yehowa khöu. 13 Böi ange’e. 14 Böi ohorö. 15 Böi anagö. 16 Böi böbögö khö nawöu zi lö duhu. 17 Böi isö nomo nawöu. Böi isö wo’omo nawöu ba he sangai halöwö khönia ira matua, ba he sangai halöwö khönia ira alawe, ba he öröbaonia, ba he kudonia, ba he hadia ia, fefu, nibayabaya nawöu. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRö FANGEFA HORö Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Mareko 9 : 38-50 38 Imane khönia Yohane: He samahaö, no ma’ila zamösa, sanötöi töimö, wamofanö bekhu, si lö molo’ö ya’ita, ba no matenawa ia, me lö i’o’ö ita. 39 Ba imane Yesu: Böi mitenawa ia; tebai sa ilau hadia ia dandra, niha, ba döigu, ba i’anema’ö zui i’o’aya ndra’o. 40 Ha niha sa zi lö fa’udu khöda, ba no awöda. 41 Ha niha sa zame’e nibadu khömi zamba mako idanö, ba döigu andrö, me khö Keriso ami, ba si ndruhu niwa’ögu khömi, lö aekhu luonia. 42 Ba na so zangalani side’ide andrö samati, samösa, ba ebua mohare ia mena’ö, na labe’e ba mbaginia gara sebua ba na latibo’ö ia ba nasi. 43 Ba na i’alani ndra’ugö tangau, ba tema ewa ia; mohare ndra’ugö, na ha tambai dangau, ba ökhamö wa’auri, moroi dua dangau, ba möi’ö ba narako, ba galitö andrö, si lö matemate, 44 ba zi lö matemate gukuö andrö khöra, awö galitö andrö. 45 Ba na i’alani ndra’ugö aheu, ba tema ewa ia, mohare ndra’ugö, na sakelakela ndra’ugö, ba ökhamö wa’auri, moroi dua gaheu, ba tetibo’ö ba narako, 46 ba zi lö matemate gukuö andrö khöra, awö galitö andrö. 47 Ba na i’alani ndra’ugö höröu, ba tema koë ia, mohare ndra’ugö, na bakole ndra’ugö, ba ökhamö mbanua Lowalangi, moroi dombua höröu, ba tetibo’ö ba narako, 48 ba zi lö matemate gukuö andrö khöra, awö galitö andrö. 49 Ni’asioni alitö sa dania ira fefu. 50 Si sökhi nasio andrö; ba na taya wa’asi’asi nasio andrö, ba ha mibe’e fangasingasinia? Böi zi lö asio khömi ba dödömi, ba böi fa’udu’udu ami. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASöMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Sinunö 124 : 1-8 1 Na tenga Yehowa mena’ö zi oawögö ya’aga — ya lamanö Iraono Gizeraëli — 2 Na tenga Yehowa mena’ö zi oawögö ya’aga, me maoso khöma niha, 3 ba noa sa’ae latölö auri ndra’aga mena’ö, me tesao wönura khöma. 4 Noa sa’ae inönöi mena’ö ndra’aga idanö andrö, ba no itörö mena’ö nosoma idanö sebua andrö. 5 No itörö mena’ö nosoma idanö andrö sebua hokha. 6 Nisuno Yehowa, si lö molulu ya’aga ö mbohara andrö. 7 No aefa nosoma, hulö wofo ba wesu ba zolau fesu wofo; no aetu wesu andrö, ba no aefa ndra’aga. 8 Fangorifima andrö, ba ba döi Yehowa so ia, ba döi Yehowa andrö samazökhi banua si yawa, awö danö. Famotokhi Taromali Lowalangi Sinanö ba dödö tehalö moroi ba zura Sinunö 124 : 8 Fangorifima andrõ, ba ba dõi Yehowa so ia, ba dõi Yehowa andrõ samazõkhi banua si yawa, awõ danõ. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 149 Hede khöma, he So’aya, ha li-Mö gaurifama. Me samohouni tödöma, sandrohu fekolima. Hede khöma, hede khöma, aro’ö wanötöna. Hede khöma, he So’aya, bè khöma Geheha-Mö. Sangabölö’ö ya’aga, wolo’ö somasi’Ö. Hede khöma, hede khöma, da mahonogö dödö. Hede khöma, he So’aya, da matara lahe-Mö. A’aro’ö wamatima, be’e wa’anau gölö. Ena’ö tola marugi naha si so Ya’ugö. FANGANDRö SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 325 Sabu dödöda sero ma’ökhö, lö fa’abölö wolawa horö. Ta’ondrasi Yesu sahakhö tödö. Ibe’e Geheha sangabölö’ö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***