Folakhömi Lowalangi no Fondrege Zalawa.
Me sokhö sorugo Ia, tanö awö mbanua.
Haleluya suno Ia götögötö wa’ara.
FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato.
No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ!
Jemaat : Yaduhu!
Liturgos : Ba u’ila Zo’aya, sidadao ba dadaoma sebua, si no alawa: anõnõ gosali ahe mbaru-Nia. Serafi fõna-Nia, õnõ gafi zamõsa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khõ nawõra: Ni’amoni’õ, Ni’amoni’õ, Ni’amoni’õ Yehowa ngahõnõ andrõ; no anõnõ lakhõmi-Nia guli danõ ma’asagõrõ. (Yesaya 6:1b, 2-3)HALELUYA!
Liturgos : Mangandrõ ita, "He Yehowa Lowalangi Ama, Ono ba Eheha Ni’amoni’õ. Mõiga mangalulu ba wangandrõ saohagõlõ me no Õrorogõ, Õ’orifi, ba Õbohouniga fa’omasi-Mõ andrõ. Ma’andrõ khõ-U, tohugõ wa’ebua dõdõ-U khõma, rorogõga ba ngawalõ de’ala, efa’õga ba wanandraigõ, rara dõdõ ba ngawalõ gabula dõdõ, tundreheni fa bõi alau ndra’aga. Fatõrõga ba zomasi Ndra’ugõ irugi gamozua, fa makhamõ nahia ba zi so Ya’ugõ. Si lõ mo’aetufa nisuno ba nifolakhõmi Ndra’ugõ, awõ Zo’aya ya’aga Yesu Keriso ba Eheha Ni’amoni’õ, Yaduhu!" Mudadao Zato
Liturgos : Manunõ ita moroi ba Mbuku Zinunõ No.
489
Ba na ufatoutou tödögu, ba zi sandrohu fa’aurigu.
Lö a’oi utörö zindruhu, ha falimosa ba mbewegu.
Itari so wamakuyu, ba wangalui tana khögu.
He tenga sinösö gölögu, ubali’ö uso dödögu.
Na u’osisi’ö tödögu, fefu lala gofanöŵagu.
No ambö sibai folo’ögu, me no awuwu wamatigu.
Alai ndra’o, wa’aurigu, me no faröido khö Yesu.
Lö usöndra wangorifigu, na lö ufulido khö Yesu.
Na usekhegö, u’erönu, zamobörö famakikogu.
Lö baero ngawalö horögu, no u’osiwawöi li Yesu.
Andrö mangesa dödögu, uröi sa’ae zi lö faudu.
U’otambali’ö dödögu, ufulido wolo’ö Yesu.
No tobali angetulagu, utara sa’ae lahe Yesu.
No ufabu’u ba dödögu, ha Yesu sa’ae gubalogu.
Mangandröngandrö dödögu, böi awuwu wamatigu.
Mo’urakhado howuhowu, fozu wa’auri si lö aetu.
FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura
II Moze 20 : 1-17
1 Ba iwa’õ daroma li andrõ fefu Yehowa, imane:
2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami.
3 Bõi so khõmõ Lowalangi tánõ bõ’õ, baero ndra’o.
4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ.
5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu,
6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ.
7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya.
8 Ame’egõ tõdõ luo wolombase andrõ, ba we’amoni’õ ya’ia.
9 Õnõ ngaluo mohalõwõ ndra’ugõ ba õhalõ halõwõu fefu.
10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha.
11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ.
12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu.
13 Bõi ange’e.
14 Bõi ohorõ.
15 Bõi anagõ.
16 Bõi bõbõgõ khõ nawõu zi lõ duhu.
17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu.
Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1
FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato.
Mangandrõ ita, "He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’õ wa tenga sinangea ndra’aga tanõ fõna-Mõ, me no fahõna horõ si no mafalua i’otarai iraono ndra’aga, he ba wehedema, era’era dõdõma, awõ gamuatama si lõ faudu ba daroma Li-Mõ. Andrõ mõiga khõ-U ba wangandrõ fa’ahakhõ dodo-U, ena’õ Õ’efa’õ khõma horõma andrõ, si no mafalua, irege sohahau tõdõ ndra’aga wanohugõ fekolima ba zi so fõnama si faudu ba zomasi Ndra’ugõ. Hakhõsi dõdõ-U khõma Ama, ba be’e aefa khõma horõma andrõ ma’afefu, Yaduhu!"
Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen)
Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa!
Jemaat : Manunõ moroi ba Mbuku Zinunõ No. 450
Liturgos : Dumadao Zato!
FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura
Mataio 15 : 1-9
1 Me luo da’õ mõi khõ Yesu warizaio ba sangila amakhoita, banua Yeruzalema, lamane:
2 Hana wa lasawõ niwa’õ ndra tua ira nifahaõmõ? Lõ’õ sa mombanõ ira, na la’a gõra.
3 Ba itema li, imane khõra: Ba hana ami gõi, wa misawõ goroisa Lowalangi, ba nifakhoimi andrõ?
4 Noa sa i’oroi’õ Lowalangi, imane: ”Fosumange namau, awõ ninau ba: ”si mate zangelifi amania ba ma inania.”
5 Ba ya’ami, ba mimane: Na so zanguma’õ khõ namania, ba ma khõ ninania: Tebe’e sumange [Lowalangi] zinemau khõgu ena’õ, ba alakha lõ ifusumange namania, awõ ninania.
6 Ba no miwu’ai goroisa Lowalangi andrõ, ba nifakhoimi andrõ.
7 He ya’ami, samini tõdõ! Si ndruhu wama’ele’õ Yesaya ba khõmi andrõ, me imane:
8 ”Lafosumange ndra’o bewera niha andrõ, ba tõdõra, ba no arõu khõgu.
9 Zayazaya gõlõra wamosumangera ya’o, me no nifakhoi niha wamahaõra andrõ.”
Ya’ahowu zamondrongo taroma Li Lowalangi ba same’e ba dõdõ (Luka 11:28)
Jemaat : Yaduhu!
FAMAYAGÖ IDANÖ
FAMAYAGÖ IDANÖ
1. MANUNÖ
Pendeta : Manunö ita moroi ba Mbuku Zinunö No. 167 : 1-2
2) Ba no sa Ö’oroi’ö, wolohe iraono. Afu tefahowu’ö, soroi Geheha-Mö.
2. FANGA’ARO’Ö FA’OWULO(Na tenga sifao ba Agendre Migu)
Pendeta : "No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö, Yaduhu!
3. MANGANDRÖ
Pendeta : He Ama khöma si so ba zorugo, möiga ma’ohe ndraono andre föna-U. Tema ba fahowu’ö ira tobali iraono-Mö. Fahaö ira, ba wanörö lala si ndruhu andrö ba wogamö fa’auri si lö aetu, ba döi Zo’aya ya’aga Yesu Keriso. Yaduhu!
4. FAMOTOKHI BA DÖDÖ(salahi huhuo)
Pendeta : Ya’ami ira talifusö satua ndraono nibayagö idanö, ni’omasi’ö ba khö Zo’aya ya’ita Yesu Keriso. Ba wamayagö idanö i’a’asogö wangefa ba ngawalö horöda, I’efa’ö ba wa’amate ba Ibe’e wa’auri si lö aetu ba niha samati khö-Nia. Famayagö idanö tenga ha fanefe idanö si to’ölo, hiza’i idanö ni oroi’ö Lowalangi si ha sambua faoma taroma Li lowalangi. Lowalangi samösa zangohonogöigö famayagö idanö andre faudu ba ni’oroi’ö Yesu Keriso ba wamayagö idanö fefu soi. Taroma Li-Nia imane "Börö da’ö, mia’e mibali’ö nifahaö fefu soi, wamayagö idanö yaira, ba döi Nama, ba ba döi Nono, ba ba döi Geheha Niamoni’ö, mifahaö ira ba wolo’ö fefu hadia ia niẅa’ö-Gu khömi. Ba hiza fao khömi ndraö ero ma’ökhö irugi gamozua götö danö andre."( Mat 28 : 19-20 )Haniha zamati nibayagö idanö da’ö ni’orifi ba nihuku zi lö mamati. (Mareko 16 : 16)
Ya’aboto ba dödömi wa famayagö idanö iraono no ni’oroi’ö Lowalangi, faudu ba wamaduhu’ö zura ni’amoni’ö, börö me fangoroi’ö famayagö idanö manandrösa ba soi ma’afefu, yaia da’ö fefu niha, he satua, he sibohou ebua, he si no biha fangera-ngera ba he göi iraono. Mifondrondrongo daroma Li Lowalangi moroi ba duria somuso dödö nisura Mareko 10 : 13-16: Ba la’ohe khönia ndraono ena’ö Ibabaya, ba lategu zolohe andrö ira nifahaö-Nia. Ba me’i’ila Yesu ba mofönu ia ba imane khöra, "mifa’amöi khö-Gu ndraono böi mitenawa ira ba zi manö sa mbanua Lowalangi andrö. Sindruhu niwa’ö-Gu khömi si lö manema banua Lowalangi andrö si mane iraono ba lö’ö manö lalania ba da’ö, ba Italagui ira, Ifahowu’ö, Itufa högöra tanga." Ba ba zura Halöwö Zinenge 2 : 39 imane: "Khömi sa gamabu’ula li andrö ba ba ndraonomi ba ba zi so ba zaröu fefu gofu ha wa’ato nikaoni Zo’aya Lowalangida."
Börö da’ö wa ta’ohe nono/ndraono andre ba tatou’ö ba danga Zo’aya safönu fa’omasi me lö fangiwa dödöda ba fa’ata’u na ba khö-Nia so ira.
Ya’ami ira talifusö molo’ö ba zi no I’oroi’ö Yesu, tafalua wamayagö idanö andre ba döi Lowalangi Ama, Ono, ba Eheha Ni’amoniö. Si nangea mutöngöni ba wamayagö idanö andre tenga "hewisa lala wamalua ya’ia," hiza i sabölö nisia’aigö ba wamalua, ya’ia da’ö: "ba döi Lowalangi Si Samösa Tölu."
Tebayagö idanö ba döi Lowalangi Ama faböi olifu ita götö wekolida ba gulidanö andre, wa no amada Lowalangi andrö ba ama ndraonoda göi samatörö ya’ira ba sondrorogö.
Tebayagö idanö ba döi Nono, ba wamaduhu’ö khöda wa do Yesu Keriso andrö zangehao iraonoda, he göi ya’ita satua moroi ba ngawalö horö, ba ya’ia zangosambua ya’ita ba wa’amate ba ba wemaoso-Nia, ena’ö si mane Keriso si no mususugi moroi ba ngai zi mate si manö göi ita ba wanema fa’auri.
Tebayagö idanö ba döi Geheha Ni’amoni’ö, ba wamaduhu’ö khöda wa Eheha Ni’amoni’ö zangiagö tödöda ba tödö ndraonoda göi, awö wa Ifatumbu’ö wamati, ena’ö mowa’a ira fefu ba modanedane ba wa’omasi-Nia. Yaduhu!
5. MANUNÖ
Pendeta : Manunö ita moroi ba Mbuku Zinunö No: 167 : 3-4
He So’aya Lowalangima umbu wa’auri ba fangorifima. Börö wa’omasi ba fa’ebua dödöU wa ma’ohe nonoma/ndraonoma andre, ena’ö Ö’fahowu’ö ira. Ya’e nonoma/ndraonoma nibayagö idanö ba ena’ö ba döi Lowalangi samösa tebayagö idanö ira, ba tebohouni ira ba Geheha Ni’amoni’ö, fa tobali ira okhöta-Mö ba tema’ö ira tobali banua-U. Fatumbu’ö ba dödönia/ra wamati, fanötöna ba fa’omasi fa lö faröi ira ba khö-U he na so wanandraigö ba fangabu dödö, ba a’aro’ö wamatira ena’ö lasöndra wa’auri si lö aetu, Yaduhu!
7. FANGANDRÖ ZO’AYA(na tenga ba luo migu mufalua)
Pendeta : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, ba efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu, Yaduhu!
8. MANUNÖ
Pendeta : Manunö ita moroi ba Mbuku Zinunö No: 167 : 5
5) Andrõ masalahini, ya’aga satua
Ya Õbohouni ira, soroi ba Geheha.
9. FANOFU
Pendeta : Ira talifusö satua ndraono, no mirongo wa famayagö idanö no nihonogöi Yesu Keriso ba wangoroma fawu’usa Li buala fangorifi, ba Ikaoni ndraono andre Yesu Keriso ba we’amöi khö-Nia börö da’ö misalahini nono/ndraono andre ba wanema li wanofu nitandrösaigö khömi. Ba fatua lö da’ö da ta’endrongagö lida ba wa maduhu’ö famatida ya’ita niha Keriso, (muzizio zato)... endronga lida:
Ya’o mamati khö Lowalangi Ama si lö ambö fa’abölö, Somböi banua si yaẅa awö danö.
Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate ba lako’o. No möi Ia ba mbanua niha tou, no maoso Ia moroi ba ngai zi mate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, ba fa’awösa niha ni’amoni’ö, ba fangefa horö, ba femaoso mboto zi mate, ba fa’auri si lö aetu. Yaduhu! (mudadao zato)
Pendeta : Ya’ami ira talifusö, hadia omasi ami ena’ö mubayagö idanö ndraono andre ba döi Lowalangi ama, Ono ba Eheha niamoni’ö? Na si manö ba mitema ligu "Omasiga!"
Satua Ndraono : Omasiga!
Pendeta : Hadia moroi ba dödömi omasi ami ena’ö iraono andre tobali ndrotondroto zoroi yomo Lowalangi he ba wa’auri ba he zui ba wa’amate? Na moroi ba dödömi ba mitema ligu, "Moroi ba dödöma!"
Satua Ndraono : Moroi ba dödöma!
Pendeta : Hadia moroi ba dödömi mifabu’u göi limi mifahaö dania nono/ndraono andre ba wanörö sindruhu lala saekhu khö Lowalangi? Na mifabu’u limi ba mitema ligu “moroi ba dödöma mafabu’u”Hadia moroi ba dödömi mifabu’u göi limi mifahaö dania nono/ndraono andre ba wanörö sindruhu lala saekhu khö Lowalangi ? Na mifabu’u limi ba mitema ligu, "Moroi ba dödöma mafabu’u!"
Satua Ndraono : Moroi ba dödöma mafabu'u!
Pendeta : Hadia moroi ba dödömi mifatenge nono/ndraono andre ba wamahaö ba nomo Lowalangi, ba mi fahaö ira ba lala wamati Niha Keriso Protestan enaö tobali ira ndrotondroto mbanua niha Keriso sauri ba khö Yesu Keriso? Na moroi ba dödömi ba mitema ligu, "Moroi ba dödöma mafatenge!"
Satua Ndraono : Moroi ba dödöma mafatenge!
10. FAMALUA FAMAYAGÖ IDANÖ
Pendeta : Na si manö, ba da tatou’ö ba danga Lowalangi ndraonoda andre ba wamayagö idanö, (ihalö nidanö Fandrita itötöi döi nono/ndraono):Ya’ugö onoma sotöi.... Ubayagö idanö ndra’ugö ba döi Lowalangi Ama, (ihalö nidanö zui) Ba ba döi nono-Nia Yesu Keriso,(ihalö nidanö zui) ba ba döi Geheha Ni’amoni’ö, Yaduhu!
Howuhowu (itufa högö nono Fandrita) imane: "Ba lö fangorifi ba danö bö’ö ba lö’ö göi töi bö’ö nibe’e ba niha ba gulidanö ba wangorifi ya’ugö, baero döi Yesu andrö, Yaduhu!
11. MANGANDRÖ (muzizio zatua ndraono)
Pendeta : He Yehowa Lowalangi Ama khöma ba khö Zo’aya ya’aga Yesu Keriso!
Masuno Ndra’ugö moroi si’aikö ba dödöma ba ma’andrö saohagölö-U gamabu’ula li-Mö andrö, ohahau sa’ae dödöma wangebua iraono andre me no ba danga-U so. Ma’andrö khö-U ebua dödö-U khönia/khöra fa böi aefa ba dödöra daroma li-Mö, abölö’ö ira ba wolo’ö khö-U, timba ngawalö wamaelungu awö dandraŵa, ba na elungu ira ena’ö ba böi böhöli ira, fazugizugi ba dödöra, wa lö sameta horö baero-Mö. Amualagö wa’omasi-Mö khö ndra satua ndraono andre. Abölö’ö ira ba wamahaö iraono andre ena’ö lala wa’aurira faudu ba zomasi Ndra’ugö afu oi orudu ndra’aga ba da’ö ba gamozua, ba wanuno Ya’ugö Yaduhu!
13. MANUNÖ
Pendeta : Manunö ita moroi ba Mbuku Zinunö No: 167 : 6
6) Ma’andrõ, bõi tebulõ, wa tana khõ-U ira
Sagõtõ fa’aurira, ba gulidanõ na.
MUTOHUGÖ KEBAKTIAN...
FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7)
Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261
Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)]
Liturgos : Mudadao Zato!
KOOR/VOCAL GROUP
Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163
[Pengkhotbah Mõi ba Mimbar]
HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin.
Fombaso Taroma Li Lowalangi moroi ba zura
V Moze 4 : 1-2 + 6-9
1 Ba iya’e, ba mifondrondrongo gamakhoita andrõ, awõ huku andrõ ba nifahaõgu ya’ami, ya’ami Iraono Gizera’ëli, ena’õ mi’o’õ ia ba ena’õ auri ami ba ena’õ mõi khõmi danõ andrõ, nibe’e Yehowa, Lowalangi ndra tuami andrõ, khõmi dania.
2 Oroisa andrõ, nifa’emagu khõmi, ba bõi midou’õ ba bõi miwuwu; oroisa andrõ, nibe’e Lowalangimi, Yehowa, nifa’emagu khõmi, ba mi’o’õ.
6 Mitõngõni ba mi’o’õ! Da’õ sa dania wa’atuatuami ba fa’onekhemi wamaigi niha baero; na larongo dania gamakhoita andrõ fefu, ba lamane: Si ndruhu, soi satuatua ba sonekhe soi sebua andrõ!
7 Heza atõ so soi sebua si so Lowalangi, si no si manõ fa’ahatõ khõra, si mane Lowalangida, Yehowa [khõda], ero na ta’angarõfi li ia?
8 Ba heza so soi sebua, si no si manõ fa’amo’ahonoa amakhoita, awõ huku, si mane oroisa andrõ fefu, ni’ombakha’õgu khõmi ma’õkhõ?
9 Ba angelama ba faigifaigi, fa bõi olifu’õ ngawalõ andrõ ni’ila hõrõu, ba fa bõi aefa ba dõdõu, gõtõ wa’anau nosou; õ’ombakha’õ ba ndraonou ba ba ma’uwumõ.
Famotokhi Taromali Lowalangi
Sinanõ ba dõdõ tehalõ moroi ba zura
V Moze 4 : 2b
Oroisa andrõ, nibe’e Lowalangimi, Yehowa, nifa’emagu khõmi, ba mi’o’õ.
Fangandrõ Fondruhõ Wamotokhi Taromali
Jemaat : Manunõ moroi ba Mbuku Zinunõ No. 154
TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida:
Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ.
Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate.
Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu!
Liturgos : Manunõ ita moroi ba Mbuku Zinunõ No.
150
Ha ba li-Mö döhöga, ha ba li-Mö auriga.
Me fangoroma zala, ba wanöndra fangefa.
Fefu wa’elunguma, he göi falimosama.
Ha ba ndro-Mö aheta, na mangesa dödöma.
No fangoroma lala, li-Mö niwa’ö-U khöma.
Afu lö te’alaga, ena’ö so wemöna.
Ya’ugö zawatöma, röfa-U nitöngönima.
Ba wangosisi lala, saekhu ba zi so Ama.
Böi ya mamalömalö, bè wondrara dödöma.
Ba ngawalö zafökhö, ba lala wekolima.
Bè wa’owölö’ölö, awö wa’anau gölö.
Afu tola mo’ölö, wolo’ö somasi’Ö.
Ba fehulu dödöma, wogamö sawatöma.
Be’e khöma Geheha, sanuturu lalama.
Li-Mö si no Öwa’ö, ba lö tebulöbulö.
Wa dozi sanauölö, te’orifi ba döi-Mö.
Andrö ha khö-U malulu, wa’aurima he Yesu.
Mabe’e sumange-U, irugi zi lö aetu.
FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:"
Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu.
Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi:
Ya mufahowu’õ ami Lowalangi, Ya murorogõ ami;
Ya mufohaga mbawa-Nia khõmi, Ya mu’ebua’õ dõdõ-Nia khõmi;
Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu!
Jemaat : Manunõ moroi ba Mbuku Zinunõ No.
292
U’otambali’ö dödö, wolo’ö Sangefa’ö.
Khö-Nia ube’e dödö, Ya’ia zamatörö.
He na isaisi ndra’odo, tödögu si tohöna.
Khö-U, So’aya, mangandrödo, timba fefu wangala.
Tidak ada komentar:
Posting Komentar