22 Februari 2026 (Bahasa Nias)

22 Februari 2026 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya ni’omasi’ö ba döi Yesu Keriso, no tarugi migu nifotöi migu föna wamakao Yesu. Töi migu ma’ökhö andre, ya’ia da’ö : Invocavit. Ma’owai ami, ba döi Zo’aya ya’ita Yesu Keriso, Ya’ahowu! Jemaat : Ya'ahowu! Liturgos : Ya faofao khömi Lowalangi! Jemaat : Ya fao khõu Geheha-Nia! FOGAONI Liturgos : Da ta honogö dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunõ ita moroi ba Mbuku Zinunõ No. 26 He iraono, he satua, da tasuno Zo’aya, Me da’ö zomasi Ia, na oi tasuno Ia. He na lö terongo lida, na mangandrö dödöda. No oi i’ila So’aya, Ibe’e ni’andröda. Böi mo’aetufa wangandrö, ba fanuno So’aya. He na bongi, he ma’ökhö, tödömö bè khö-Nia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Na i’angarõfi li Ndra’o, ba Ufondrondrongo khõnia, awõnia Ndra’o ba wamakao; U’efa’õ ia ba teturia ia Ube’e. U’abusoi’õ ia fa’anau noso, ba anehe ia wangorifi andrõ khõ-Gu Ube’e. (Sinunö 91:15-16) HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi, si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ölulu nono-U omasiö ba danga zokhö horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dödöma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi Nama, ba khö Zo’aya ya’aga Yesu Keriso ba ba Geheha Ni’amoni’ö, Yaduhu!" Mudadao Zato Liturgos : Manunõ ita moroi ba Mbuku Zinunõ No. 236 He Yesu sahakhö tödö, möido föna-Mö. Usao’ö ngawalö horö, Ösasai do-Mö. Reff : Yesu, Yesu, rongo we’aogu... Da’ö wangaro dödögu, nitaögö-U Yesu. Tödögu si no ta’unö tobali bohou. Reff : Yesu, Yesu, rongo we’aogu... Ha Yesu zondrara tödö, sindruhundruhu. Me si lö faröiröi Ia, ba wa’aurigu. Reff : Yesu, Yesu, rongo we’aogu... FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Nehemia 1 : 4-11 4 Ba me urongo duria andrõ, ba mudadaodo tou, mege’egedo ba mangarõngarõdo, mato dua wongi wa’ara; ba mamoni ba gõ ndra’o ba mangandrõngandrõ ndra’o khõ razo zorugo, umane: 5 ”He Yehowa, Lowalangi ba zorugo, Lowalangi sebua ba sata’u ita, si lõ mowu’ai fawu’usa li fa’ahakhõ dõdõ andrõ ba zangomasi’õ ya’ugõ ba ba zolo’õ oroisamõ. 6 Be’e mbõrõ dalingamõ ba bokai hõrõu, ena’õ õrongo wangandrõ genoniu andre, si lõ ubato khõu iada’e, bongi ma’õkhõ, salahi Ndraono Gizeraëli, enoniu andrõ, wangombakha khõu horõ Ndraono Gizeraëli, horõma khõu; he ya’odo andre, ba ya’aga si samba omo, ba oi si no molalõ khõu. 7 No tenga side’ide horõma khõu, ba lõ ni’o’õma oroisamõ, awõ nifakhoimõ, awõ hukumõ andrõ, niwa’õu khõ genoniu Moze. 8 Tõrõ tõdõu daroma limõ andrõ, niwa’õu, khõ genoniu Moze, me õmane: Na molalõ ami, ba ufazaewe ami ba niha baero! 9 Ba na mifalalini gera’erami, na mifuli ami khõgu, ba na mibe’e ba dõdõmi goroisagu ba na mi’o’õ, ba he ba wondrege, ba gahe mbanua so nifazawili andrõ khõmi, ba u’ozaragõ zui ira ba u’ohe mangawuli ba danõ andrõ, nituyugu, ba wamonahia tõigu ba da’õ. 10 Noa sa atõ enoniu ira ba banuau, ni’orifimõ mege, ba wa’abõlõu andrõ, tangau sabe’e andrõ. 11 He So’aya, be’e mbõrõ dalingau ba wangandrõ genoniu andre ba ba wangandrõ genoniu sato, somasi mangata’ufi tõimõ andrõ: tolo, ena’õ mofozu nilau genonimõ andre ma’õkhõ, ba ena’õ falukha ia wa’ahakhõ dõdõ razo andrõ!” Ba ya’odo, ba same’e yomo gõ khõ razo. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Ba no erege dõdõ-Gu õbe’e ba horõu andrõ; no õfakao-Do olalõwamõ. Ya’o, Ya’odo andre zamunu lalõu andrõ. Bõrõ Ndra’o, ba lõ’õ sa’ae itõrõ tõdõ-Gu horõu! Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 4 : 1-11 1 Aefa da’õ, ba i’ohe ba danõ si mate Yesu Eheha, ena’õ itandraigõ ia Afõkha. 2 Ba me lõ si manga ia, õfa wulu wongi wa’ara, ba olofo ia, me aefa da’õ. 3 Ba mõi khõnia zanandraigõ andrõ, imane khõnia: Na ono Lowalangi ndra’ugõ, ba wa’õ, ena’õ tobali roti gara andre. 4 Ba itema linia, imane: ”Tenga ha ba gõnia auri niha, ba ngawalõ li fefu, si otarai mbawa Lowalangi, auri ia”. 5 Ba i’ohe ia ba mbanua ni’amoni’õ andrõ Afõkha, ba mbumbu gosali ifa’aso. 6 Ba imane khõnia: Na ono Lowalangi ndra’ugõ, ba tibo’õgõ tou, noa sa so ba zura: ”Iwa’õ ba mala’ika andrõ khõnia dania, ba khõmõ andrõ, ba lataya tangara ndra’ugõ, fa lõ manendre gaheu ba gara.” 7 Imane khõnia Yesu: So gõi ba zura: ”Bõi tandraigõ Zo’aya, Lowalangiu.” 8 Ba i’ohe zui ia Afõkha, ifasao ba hili salawa sibai, i’oroma’õ khõnia mbanua ba guli danõ fefu, awõ lakhõminia, 9 ba imane khõnia: Ahori ube’e khõu da’õ, na õtuhi danõ, ba wangalulu khõgu. 10 Ba imane khõnia Yesu: Beta’õgõ Satana! Noa sa so ba zura: ”Khõ Zo’aya, Lowalangiu, mangalulu ndra’ugõ ba ha ya’ia õfosumange”. 11 Awena irõi ia Afõkha, ba hiza, ba la ondrasi ia mala’ika, mõr ira ngoningoninia. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Ngenungenu Yeremia 3 : 49-57 49 Mo’ala’ala manõ hõrõgu, lõ mamalõmalõ, 50 balazi ifaigi moroi yawa, balazi ifaigi lala Yehowa, moroi ba zorugo. 51 Afõkhõ bakha dõdõgu ibe’e [tawa] hõrõgu andrõ, ba nono alawe andrõ, banuada, fefu. 52 No lagohi ndra’o, nifolohi fofo, si fa’udu khõgu, lõ bõrõbõrõ, 53 no la’etu’õ nosogu ba gohokoho danõ ba no lahawui ndra’o kara. 54 No ilawui hõgõgu idanõ, ba umane: si mate ndra’o. 55 Ba no u’angarõfi li dõimõ, ya’ugõ Yehowa, moroi ba wondrege gohokoho. 56 Ba no õfondrondrongo we’aogu andrõ: ”Bõi duhõ dõgi dalingau; okafui dõdõgu, tolodo!” 57 No ahatõ ndra’ugõ, me mu’aodo khõu, õmane: ”Bõi busi dõdõu!” Famotokhi Taromali Lowalangi Sinanõ ba dõdõ tehalõ moroi ba zura Ngenungenu Yeremia 3 : 57 No ahatӧ Ndra’ugӧ me mu’ao ndra’odo khӧ-U, Ӧmane: bӧi busi dӧdӧu! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 248 Ba lö sa’ae aombö dödögu, ba wofanö ba lalagu. Me sawatö fangabe’egu, Keriso So’aya Yesu. Me khö-U So’aya utötöna gahonota wa’aurigu. Andrö wa faduhu dödögu, Ya’ugö razo sindruhu. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 248 : 4 Ufaöga hörögu khö-U Yesu, si lö manö faröi khögu. Ha Ya’ugö lembalembagu, si lö tebulö, Yaduhu. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***