15 Maret 2026 (Bahasa Nias)

Download Tata Ibadah (DOC)

Download Tata Ibadah (PDF)

15 Maret 2026 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso ni’omasi’ö Zo’aya ya’ita Yesu Keriso. No tarugi migu Wanõrõ tõdõ Famakao Yesu ma’õkhõ, ma’owai ami: Ya’ahowu ami fefu, ya faofao khömi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta honogö dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunõ ita moroi ba Mbuku Zinunõ No. 146 Me lö ba gulidanö samolala tödö. Wa masao’ö föna-Mö fefu noro dödö. Yesu hakhösi dödö-U khöma si no tana khö-U. Heta horöma do-Mö, ba bohouni dödö. Amualagö khöma, dödö sibohou. Fa ma’ogorifi sa, ni’ogorofi-U. Afu ero ma’ökhö, Ö’omusoi’ö dödö. Da matara lahe-Mö, bè wa’anau gölö. Matou’ö ba danga-Mö fefu zabu tödö. Sitosasa, sofökhö, ba sangaröngarö. Yesu, sahakhö tödö, be’e wondrara dödö. Be khöra Geheha-Mö samolala tödö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ya omuso dõdõmi, awõ Yeruzalema ba mi’a’iki’iki ba khõra andrõ, ya’ami fefu, somasi Ya’ia! ya owuawua dõdõmi awõra, ya’ami fefu, sabu tõdõ ba khõra. Omuso dõdõgu, me lamane khõgu: ”Mõi ita ba gosali Yehowa andrõ! (Yesaya 66:10; Sinunö 122:1) HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi, si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ölulu nono-U omasiö ba danga zokhö horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dödöma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi Nama, ba khö Zo’aya ya’aga Yesu Keriso ba ba Geheha Ni’amoni’ö, Yaduhu!" Mudadao Zato Liturgos : Manunõ ita moroi ba Mbuku Zinunõ No. 290 Lakhömi gulidanö oi si taya, awö fefu zoroma ba hörö. Andrö na tafakhölökhölö ita, oya sa zi möi fondröni dödö. He sökhi sa lakhömi ni’aluida, ba hulö mbowo mbunga sa’atö. Taya manö si lö mudönadöna, andrö tagohi zi lö tebulö. Tasunosuno Lowalangi Ama, same’e buala fa’omasi. No Ifatenge zi möi salahida, Yesu, Sangatulö, Samohouni. Sökhi, atulö niwa’ö Zo’aya, I’ohe ita möi ba lakhömi. Taröi zi taya, da ta’o’ö Ia, me no Ya’ia Razo Wa’auri. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura I Samueli 16 : 1-13 1 Ba imane Yehowa khõ Zamuëli: Ha wa’ara dõhõ wa’abu dõdõu khõ Zaulo andrõ, me noa sa atõ tebai salawa Ndraono Gizeraëli ia, wamaigigu? Fo’õsi fanikha dandru andrõ khõu ba labu: ufatenge ndra’ugõ khõ Giza’i andrõ, banua Mbetilekhema, me no ba nononia ufaigi khõgu zamõsa, nibe’e razo. 2 Ba imane Samuëli: He uwisa we’amõi? Na irongo Saulo, ba ibunudo! Ba imane Yehowa: Ohe nono zawi ba õmane: Ba wame’e sumange Yehowa mõido. 3 Ba kaoni Giza’i andrõ, ba wemanga sumange; ba ya’o zangombakha khõu, he õwisa; nitõtõigu khõu, ba õbayoini khõgu. 4 Ba i’o’õ Samuëli niwa’õ Yehowa. Ba me irugi Mbetilekhema, ba lafaondragõ ia satua mbanua, si no tobali tõdõ, ba lamane: Hadia, ba zi sõkhi mõi’õ? 5 Ba imane: Ya’ia! Ba wame’e sumange Yehowa mõido; mi’amoni ba mitabu ba wemanga zumange andrõ! Ba ifamoni ndra Iza’i ononia ba ikaoni ira ba wemanga zumange andrõ. 6 Ba me so ira, ba ifaigi Geliabi andrõ, imane dõdõnia: Si ndruhu, ya’ia nibayoini khõ Yehowa! 7 Ba imane Yehowa khõ Zamuëli: Bõi faigi nga’eunia ba fa’alawania, tenga sa ya’ia nituyugu. Famaigi Lowalangi sa, ba no tenga si mane famaigi niha. Nga’eu nifaigi niha, ba tõdõ nifaigi Lowalangi! 8 Ba khõ Gabinadabi muhede Giza’i, i’ohe khõ Zamuëli. Ba imane Samuëli: Da’õ gõi, ba tenga nituyu Yehowa. 9 Ba Sama i’ohe khõnia Iza’i; ba imane: Da’õ gõi, ba tenga mituyu Yehowa. 10 Ba fitu i’ohe khõ Zamuëli ononia Iza’i; ba imane Samuëli khõ Giza’i: Lõ nituyu Yehowa ba da’õ! 11 Ba imane na Samuëli khõ Giza’i: Hadia, awai nonou matua? Ba imane: Hatõ si akhi, no mõi kubalo mbiribiri. Ba imane Samuëli khõ Giza’i: Fatenge, fahalõ’õ ia, lõ’õ sa manga ita, na lõ ya’ia. 12 Ba ifatenge, ifahalõ’õ; ba no soyo bu ba si sõkhi hõrõ, ba si sõkhi manõ wamaigida. Ba imane Yehowa: Faoso, bayoini ia, da’õ ia. 13 Ba ituyu dandru wanikha Samuëli, ibayoini [Dawido] ba zi so ira ga’ania. Ba so Geheha Yehowa khõ Dawido, i’otarai luo da’õ, lõ tebulõ. Ba ifazawa ia Samuëli, isawa Rama. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Si manõ sa wa’omasi Lowalangi nõsi gulidanõ, no Ibe’e Nono-Nia andrõ, si ha sambua, ena’õ lõ tekiko dozi samati khõ-Nia, ena’õ so khõra wa’auri si lõ aetu (Yohane 3:16) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 12 : 44-50 44 Ba mu’ao Yesu, imane: Samati khõgu, ba tenga khõgu mamati ia, khõ samatenge ya’o mamati ia. 45 Ba sangila ya’o, ba i’ila zamatenge ya’o andrõ. 46 Haga ndra’o, si no mõi ba guli danõ, ena’õ bõi sa’ae so ba zogõmigõmi dozi samati khõgu. 47 Ba na so zamondrondrongo ligu, ba na lõ i’o’õ, ba tenga ya’o zanguhuku ya’ia. Tenga sa ba da’õ mõi ndra’o, ba wanguhuku õsi guli danõ, ena’õ u’orifi nõsi guli danõ. 48 Khõ zangositengagõ ya’o, si lõ mamonaha taroma ligu, khõnia so sa’ae zanguhuku ya’ia; taroma ligu andrõ, niwa’õgu, da’õ zanguhuku ya’ia, na luo safuria andrõ. 49 Tenga sa moroi khõgu manõ niwa’õgu; samatenge ya’o, Amagu, ba no ibe’e goroisa khõgu, hadia niwa’õgu, hadia wehedegu. 50 Ba u’ila, fa’auri si lõ aetu goroisania andrõ. Andrõ u’o’õ niwa’õ Namagu khõgu, ba wehedegu andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Efeso 5 : 8-14 8 Noa sa sogõmigõmi ami fõna, ba iada’e, ba no haga ami ba khõ Zo’aya; lala ndraono haga mitõrõ, 9 Buabua haga sa, ba ya’ia ngawalõ wa’asõkhi dõdõda, khõ nawõda, awõ wa’atulõ dõdõ, awõ wa’aduhu. 10 Ba mitimba tõdõmi, hadia zomasi Zo’aya, 11 ba bõi fao ami ba wama’ua buabua wa’ogõmigõmi andrõ, si lõ boto, mi’otu’õ na i gõi. 12 Hadia nilaura sa, ba zi tobini, ba aila ita na i tatõtõi. 13 Ba fefu da’õ, hadia ia, ba ni’otu’õ ba haga, ba ni’oroma’õ; fefu, hadia ia sa, zoroma, ba haga da’õ. 14 Andrõ so ba zura: ”Faoso, ya’ugõ, si no mõrõ, fazawa’õ moroi ba ngai zi mate, ba ihagaini ndra’ugõ Keriso” Famotokhi Taromali Lowalangi Sinanõ ba dõdõ tehalõ moroi ba zura Efeso 5 : 9 Buabua haga sa, ba ya’ia ngawalõ wa’asõkhi dõdõda, khõ nawõda, awõ wa’atulõ dõdõ, awõ wa’aduhu. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 292 U’otambali’ö dödö, wolo’ö Sangefa’ö. Khö-Nia ube’e dödö, Ya’ia zamatörö. He na isaisi ndra’odo, tödögu si tohöna. Khö-U, So’aya, mangandrödo, timba fefu wangala. U’otambali’ö dödö, wolo’ö Sangorifi. He oya gabula dödö, fanandraigö wamati. Ba utöngöni Zo’aya, sangomasi’ö ya’o. Si no mate salahigu, ba wangorifi ya’o. U’otambali’ö dödö, wolo’ö Sangatulö. Me Ya’ia zangefa’ö fefu ngawalö horö. He So’aya, nönö khögu, wa’ebua dödö-Mö. Ena’ö anau gölögu, wasöndrata ba horö. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 292 : 4 U’otambali’ö dödö, wolo’ö Sangatulö. Me Ya’ia zangefa’ö fefu ngawalö horö. He So’aya, nönö khögu, wa’ebua dödö-Mö. Ena’ö anau gölögu, wasöndrata ba horö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***