9 November 2025 (Bahasa Nias)

Download Tata Ibadah (DOC)

Download Tata Ibadah (PDF)

9 November 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 190 Da ta’ondrasi Yesu So’aya, nifatenge Yehowa. Ha Ya’ia zindruhu lalada, lö manö baero-Nia. Fangöhölida Yesu, fangöhölida Yesu. Duhu, Yesu zangöhöli niha, fangöhölida Yesu. Da ta’ondrasi Yesu Keriso, silö faröi, sanolo. Ha Ya’ia zindruhu gubalo, ba fondrege zendroro. Lö Ibe’e te’ala, lö Ibe’e te’ala. Duhu, Yesu zondrorogö niha lö Ibe’e te’ala. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 237 He na tebai ndra’o Öbè wa’abölö. Ba no Öheta horögu bohou wa’aurigu. Reff: Möi ndra’odo khö-U So’aya Yesu... Ökaonido Yesu wangombakha khögu. Famati ba fanötöna he göi fa’omasi-U. Reff: Möi ndra’odo khö-U So’aya Yesu... Nifalua-U Yesu manandrösa khögu. Me Ötayaigö horögu Öbè howuhowu. Reff: Möi ndra’odo khö-U So’aya Yesu... He So’aya Yesu no sa Öfabu’u. Öbe wa’auri sindruhu ba zamati fefu. Reff: Möi ndra’odo khö-U So’aya Yesu... Nisuno Zo’aya solomasi khögu. Do-Nia Ni’amoni’ö möi fa’atulögu. Reff: Möi ndra’odo khö-U So’aya Yesu... FOMBASO TAROMALI LOWALANGI (AMABU'ULA LI SIFÖFÖNA) Liturgos : Da tafondrondrongo daroma Li Lowalangi, tehalö moroi ba zura III Moze 19 : 9-18 9 Dozi, ha niha zangelifi amania ba inania, ba huku mate hukunia; noa sa i’elifi namania ba inania — horõ fange’e zi no tohare khõnia. 10 Ba na so zohorõni donga zodonga, ha niha zohorõni donga nawõnia, ba huku mate hukura, he sohorõ, ba he nihorõni andrõ. 11 Ba na so zorudu khõ wo’omo namania, ba no iheta mbalubalu zaila namania ba huku mate hukura, faoma darua ira; amaedola horõ fange’e zi no tohare khõra. 12 Ba na so zohorõni umõnõnia, ba huku mate hukura, faoma darua ira; no horõ sebua nifazõkhira, amaedola horõ fange’e zi no tohare khõra. 13 Ba na so zorudu ba ndra matua, si mane fa’orudu ba ndra alawe, ba no horõ sebua nifazõkhira, faoma darua ira, ba huku mate hukura, no amaedola horõ fange’e zi no tohare khõra. 14 Ba na so zangai ira alawe ba na ihalõ gõi nina, ba horõ sebua da’õ; nitunu auri ia, awõ ndra alawe andrõ, fa bõi mamaha ba khõmi horõ. 15 Na so zohorõni saliwaliwa ba danõ ba huku mate hukunia, ba saliwaliwa ba danõ andrõ gõi, ba mibunu. 16 Ba na ihatõ’õ ia ba zaliwaliwa ba danõ ira alawe, ena’õ orudu khõnia, ba õbunu ndra alawe andrõ, awõ zaliwaliwa ba danõ andrõ; huku mate hukura, no amaedola horõ fange’e zi no tohare khõra. 17 Ba na so zangai talifusõnia, ono namania, ba ma ono ninania, na tobali i’ila zaila ia ba na i’ila gõi da’õ zaila ndra matua, ba no salakha, ba nihori ira, ba zanehe niwara; no iheta mbalubalu zaila dalifusõnia ba no tohare khõnia horõ ibe’e. 18 Ba na so zorudu ba ndra alawe gõtõ wa’afõkhõ dalunia, na iheta mbalubalu zaila ia, balubalu gumbu andrõ khõnia, ba na ya’ia gõi zangeheta balubalu gumbu ndro andrõ khõnia, ba nihori ira ba hunõ niwara, faoma darua ira. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRÖ FANGEFA HORÖ Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Yohane 17 : 6-19 6 No ufa’ele’õ dõimõ ba niha andrõ, nibe’eu khõgu, moroi ba niha guli danõ. Khõu ira, ba no õbe’e khõgu, ba no la’o’õ liu. 7 Aboto sa’ae ba dõdõra, wa moroi khõu fefu hadia ia nibe’eu 8 Me no ufa’ema khõra daroma li andrõ, nibe’eu khõgu, ba no latema, ba si ndruhu no aboto ba dõdõra, wa moroi khõu u’otarai, ba no faduhu dõdõra, wa no ya’ugõ zamatenge ya’o. 9 Mangandrõ ndra’o, salahira, tenga salahi niha guli danõ mangandrõdo, khõra sa, nibe’eu khõgu, me no khõu ira. 10 Ba khõu fefu zi so khõgu, ba khõgu fefu zi so khõu, ba no tefolakhõmi ndra’o ba khõra 11 Ba lõ’õ sa’ae sodo ba guli danõ, ba so sa ira ba guli danõ, khõu mõi ndra’odo. He Ama ni’amoni’õ! Taha ira, ba dõimõ, nibe’eu khõgu andrõ, ena’õ ha sambua dõdõra, si mane tõdõda andrõ. 12 Me sodo khõra, ba ya’o zanaha ya’ira, ba dõimõ, nibe’eu khõgu andrõ ba no urorogõ ira, ba lõ si tekiko ba khõra, baero nono wa’atekiko andrõ, ena’õ itõrõ zi so ba zura andrõ 13 Ba mõido khõu iada’e, ba uwa’õ da’õ ba guli danõ, ena’õ a’oi so khõra wa’omuso dõdõ andrõ khõgu, ba dõdõra 14 No ufa’ema khõra daroma limõ, ba no fatiu dõdõ niha guli danõ khõra, me tenga moroi ba niha guli danõ ira, si mane ya’o, si tenga moroi ba niha guli danõ 15 Lõ u’andrõ, õheta ira ba guli danõ, ba ena’õ õrorogõ ira, ba õ’efa’õ ba Gafõkha; 16 Tenga moroi ba niha guli danõ ira, si mane ya’o, si tenga moroi ba niha guli danõ. 17 Amoni’õ ira ba zi duhu; taroma limõ zi duhu. 18 Si mane famatengeu ya’o ba guli danõ, si manõ gõi wamatengegu ya’ira ba guli danõ. 19 Ba u’amoni’õ ndra’o salahira, ena’õ ni’amoni’õ ira gõi ba zi duhu. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Yuda 1 : 17-23 17 Ba ya’ami ni’omasi’õ, ba mitõrõtõrõ tõdõmi daroma li andrõ, si no lahõnagõ fanguma’õ sinenge Zo’aya ya’ita, Yesu Keriso, 18 me lamane khõmi: ”Ba gõtõ safuria dania, ba so zango’aya, sanõrõ lala wangisõra andrõ, ba wa’elungura.” 19 Si oniagõ ya’ira andrõ, sanõrõ lala niha; si lõ eheha. 20 Ba ya’ami ni’omasi’õ, ba mi’a’azõkhi ami, ba wamatimi andrõ, ni’amoni’õ sibai, ba mi’angandrõ, balazi Geheha ni’amoni’õ. 21 Mi’aro’õ ami, ba wa’omasi Lowalangi ita, midõnadõna wa’ahakhõ dõdõ Zo’aya ya’ita, Yesu Keriso, ba wa’auri si lõ aetu. 22 Ba mihakhõsi tõdõ õsa, sangiwa tõdõ; 23 mi’orifi, misõbi ba galitõ; ba tánõ bõ’õ, ba mihakhõsi tõdõ, ba mi’ata’ufi, ba mi’ogorofi gõi mbaru andrõ, si no ra’ira’iõ ba nõsi niha andrõ. Famotokhi Taromali Lowalangi Sinanö ba dödö tehalö moroi ba zura Yuda 1 : 21 Mi'a'aro'ö ami, ba wa'omasi Lowalangi ita, midönadöna wa'ahakhö dödö Zo'aya ya'ita, Yesu Keriso, ba wa'auri si lö aetu. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 499 No abu sibai dõdõgu, me no oya nilaugu, si lõ omasi Yesu. Oya zi lõ faudu, asese elungu, tumbu waniasagu, ba mangesa dõdõgu. Andrõ mõido mangalulu khõ Yesu, ba wangandrõ fangefa horõgu. Khõ Zo’aya ufabu’u, ubõhõi zi lõ faudu, ba u’o’õ li Yesu. Ululu dõdõgu, nibohouni Yesu, da ufalua Yesu, soroi sibai dõdõgu. U’omasi’õ gõi niha fasuigu. Me da’õ duho goroisa Yesu. FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 499 : 4 Ba dangagu sa so wöda folawa nemaligu, fanimba zi fa’udu. Ba moloi gafökha, aila ba ata’u, böbö talu ziduhu fangaro wamatigu. Lö utehe ma’iki nemaligu, me ha Yesu zindruhu nawögu. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***