2 November 2025 (Bahasa Nias)

Download Tata Ibadah (DOC)

Download Tata Ibadah (PDF)

2 November 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 29 No Öbè wangefa horö no Öbè howuhowu. Umbu nidanö aurifa fa’omasi sindruhu. Samalua fa’omasi Öbali’ö tana khö-U. Ya möi dumaduma khöma wa’omasi nibe’e-U. Ba niwöwöi-Mö So’aya oi to’ele lakhömi-U. Si so ba mbanua yawa he ba gulidanö tou. Mala’ika ba zorugo he göi niwöwöi fefu. Fao niha omböila-Nia oi dozi mangalulu. Da tasunosuno Ia soroi sibai dödöda. Suno Ia lö mamalö ba wa’omasi-Nia. Böi awuwu böi atage he na oya wangala. Faduhu’ö fao fanunö wa solomasi Ia. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 236 He Yesu sahakhö tödö, möido föna-Mö. Usao’ö ngawalö horö, Ösasai do-Mö. Reff : Yesu, Yesu, rongo we’aogu... Da’ö wangaro dödögu, nitaögö-U Yesu. Tödögu si no ta’unö tobali bohou. Reff : Yesu, Yesu, rongo we’aogu... Ha Yesu zondrara tödö, sindruhundruhu. Me si lö faröiröi Ia, ba wa’aurigu. Reff : Yesu, Yesu, rongo we’aogu... FOMBASO TAROMALI LOWALANGI (AMABU'ULA LI SIFÖFÖNA) Liturgos : Da tafondrondrongo daroma Li Lowalangi, tehalö moroi ba zura II Moze 20 : 1-17 1 Ba iwa’õ daroma li andrõ fefu Yehowa, imane: 2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami. 3 Bõi so khõmõ Lowalangi tánõ bõ’õ, baero ndra’o. 4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ. 5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu, 6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ. 7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya. 8 Ame’egõ tõdõ luo wolombase andrõ, ba we’amoni’õ ya’ia. 9 Õnõ ngaluo mohalõwõ ndra’ugõ ba õhalõ halõwõu fefu. 10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha. 11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ. 12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu. 13 Bõi ange’e. 14 Bõi ohorõ. 15 Bõi anagõ. 16 Bõi bõbõgõ khõ nawõu zi lõ duhu. 17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRÖ FANGEFA HORÖ Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Yakobo 5 : 12-18 12 Ba si ofõna sibai, ya’ami ira talifusõgu, ba bõi mi’ae ba hõlu, bõi mibe’e hõlu zorugo, ba bõi gõi tanõ, ba ma hadia ia mbõ’õnia. Da’õ khõmi: Ya’ia, na ya’ia, ba: lõ’õ, na lõ’õ, fa lõ gõna ami huku. 13 Na so ba khõmi zi gõna famakao, ba yamangandrõ, na so zohahau tõdõ, ba yamanunõ. 14 Na so zofõkhõ ba khõmi, ba yamufahede’õ ba zatua mbanua, ba ndramangandrõ ba khõnia, ba ndramubayoini ia fanikha, ba dõi Zo’aya; 15 ba i’orifi dania zofõkhõ andrõ fangandrõ andrõ, soroi ba wamati, ba i’abe’e’õ So’aya, ba na so horõ, nifazõkhinia, ba te’efa’õ khõnia. 16 Ba faoma mi’ombakha’õ khõ nawõmi horõmi, ba faoma mi’angandrõ, salahi nawõmi, ena’õ tefadõhõ wõkhõmi; abõlõ sibai wangandrõ niha satulõ, na moroi ba dõdõ. 17 Eliya andrõ, ba no niha, si mane amuatada gamuatania, ba mangandrõ ia, moroi si’aikõ ba dõdõ, fa bõi moteu, ba lõ teu ba danõ, medõlu fakhe a matonga. 18 Ba ifuli mangandrõ, ba so deu, moroi yawa ba mbanua, ba mowua danõ. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Nehemia 1 : 1-11 1 Hikaya khõ Nehemia andrõ, ono Hakalia. Me bawa Kisilewi, dõfi si dua wulu, me sodo ba gõdo ba Zusa, 2 ba mõi khõgu nakhigu Hanani, awõ mado Yuda õsa. Ba me usofu khõra, he wisa ba niha Yehuda sauri andrõ, si tosai ni’oloi’õ no, ba he wisa ba Yeruzalema, 3 ba lamane khõgu: Si tosai andrõ, si lõ ahori ni’oloi’õ no, ba danõ andrõ, ba no numana sibai ba no si tehawu fa’aila, me no mududugõ gõli Yeruzalema õli kara, ba me no mutunu mbawa gõli. 4 Ba me urongo duria andrõ, ba mudadaodo tou, mege’egedo ba mangarõngarõdo, mato dua wongi wa’ara; ba mamoni ba gõ ndra’o ba mangandrõngandrõ ndra’o khõ razo zorugo, umane: 5 ”He Yehowa, Lowalangi ba zorugo, Lowalangi sebua ba sata’u ita, si lõ mowu’ai fawu’usa li fa’ahakhõ dõdõ andrõ ba zangomasi’õ ya’ugõ ba ba zolo’õ oroisamõ. 6 Be’e mbõrõ dalingamõ ba bokai hõrõu, ena’õ õrongo wangandrõ genoniu andre, si lõ ubato khõu iada’e, bongi ma’õkhõ, salahi Ndraono Gizeraëli, enoniu andrõ, wangombakha khõu horõ Ndraono Gizeraëli, horõma khõu; he ya’odo andre, ba ya’aga si samba omo, ba oi si no molalõ khõu. 7 No tenga side’ide horõma khõu, ba lõ ni’o’õma oroisamõ, awõ nifakhoimõ, awõ hukumõ andrõ, niwa’õu khõ genoniu Moze. 8 Tõrõ tõdõu daroma limõ andrõ, niwa’õu, khõ genoniu Moze, me õmane: Na molalõ ami, ba ufazaewe ami ba niha baero! 9 Ba na mifalalini gera’erami, na mifuli ami khõgu, ba na mibe’e ba dõdõmi goroisagu ba na mi’o’õ, ba he ba wondrege, ba gahe mbanua so nifazawili andrõ khõmi, ba u’ozaragõ zui ira ba u’ohe mangawuli ba danõ andrõ, nituyugu, ba wamonahia tõigu ba da’õ. 10 Noa sa atõ enoniu ira ba banuau, ni’orifimõ mege, ba wa’abõlõu andrõ, tangau sabe’e andrõ. 11 He So’aya, be’e mbõrõ dalingau ba wangandrõ genoniu andre ba ba wangandrõ genoniu sato, somasi mangata’ufi tõimõ andrõ: tolo, ena’õ mofozu nilau genonimõ andre ma’õkhõ, ba ena’õ falukha ia wa’ahakhõ dõdõ razo andrõ!” Ba ya’odo, ba same’e yomo gõ khõ razo. Famotokhi Taromali Lowalangi Sinanö ba dödö tehalö moroi ba zura Nehemia 1 : 11a He So'aya, be'e mbörö dalinga-U ba wangandrö genoni-Uandre ba ba wangandrö genoni-U sato, somasi mangata'ufi töi-Mö andrö. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 256 Yesu So’aya zondrorogö, tanga-Nia zomba’agö. Iföwö fefu nudumö, Yesu So’aya zondrorogö. Reff. Ba wanörö ulidanö,... Yesu So’aya sondrorogö, he falukha wanandraigö. Ya’ia zondrara tödö, Yesu So’aya zondrorogö. Reff. Ba wanörö ulidanö,... FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 256 : 4 Yesu So’aya zondrorogö, ba wasöndrata ba horö. Ifemöna sa ndra’ugö, Yesu So’aya zondrorogö. Reff. Ba wanörö ulidanö,... Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***