7 Januari 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 7 Januari 2024 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, ba wondrugida migu Epifania andre, ma’owai ami fefu ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 83 Taturiaigö ba niha,Wa’omasi. Me no möi tou ba danöda,Wa’omasi. Yesu sangorifi niha, si no mate salahida. Wangöhöli fefu niha, Fa’omasi. Fa’omasi, Fa’omasi, wangöhöli fefu niha Fa’omasi. Dozi ita ni’efa’ö Wa’omasi. Suno Ia lö mamalö, Fa’omasi. Fanötöna khöda haga, ba famati mbaluseda. No we’ewe’e dödöda,Fa’omasi. Fa’omasi, Fa’omasi, no we’ewe’e dödöda Fa’omasi. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : He Yehowa, farongogö khögu lala ba wa’auri andrö: no fahöna wa’omuso dödö föna-U, ba ba gambölö-U so wa’ohahau dödö si lö mamalö. (Sinunö 16:11). HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 84 Ato niha si lö haga, sogömigömi tödö na. Lö khöra Yesu So’aya, me sarörö ba zitaya. Hakhösi dödö-U, So’aya, wogaoni si lö haga na. Ya Eheha-U Öbè khöra, ba wohagaini tödöra. Fatenge göi genoni-Mö, wamazaewe turia-Mö. Afu tedönisi dödö, fa tobali banua-Mö. Dou’ö wa’owölö’ölö, ba dödö ndra sohalöwö. Nönö wa’atuatua, enà mo’ölö halöwö. He Yesu, dou’ö wamati, fanötöna, fa’omasi. He oya zi möi fanaisi, tologa afu böi faröi. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 20 : 1 - 17 1 Ba iwa’õ daroma li andrõ fefu Yehowa, imane: 2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami. 3 Bõi so khõmõ Lowalangi tánõ bõ’õ, baero ndra’o. 4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ. 5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu, 6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ. 7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya. 8 Ame’egõ tõdõ luo wolombase andrõ, ba we’amoni’õ ya’ia. 9 Õnõ ngaluo mohalõwõ ndra’ugõ ba õhalõ halõwõu fefu. 10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha. 11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ. 12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu. 13 Bõi ange’e. 14 Bõi ohorõ. 15 Bõi anagõ. 16 Bõi bõbõgõ khõ nawõu zi lõ duhu. 17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Efeso 3 : 1 - 12 1 Andrõ ya’o, Faulo, nikuru andrõ khõ Keriso, bõrõ ami, ya’ami niha baero fõna — 2 na no mirongo nihonogõi Lowalangi, ba wa’ebua dõdõnia andrõ, nibe’e ba dangagu, ba khõmi andrõ, 3 wa no mu’oroma’õ khõgu zi no tobini andrõ, ba wama’ele’õ, nitõrõ ligu mege ma’ifu. 4 Ba da’õ tola mi’ila wa’aboto ba dõdõgu zi no tobini andrõ, khõ Keriso, na mibaso, 5 si lõ mu’oroma’õ ba nono niha, ba gõtõ fõna, si mane fangoroma’õ ya’ia iada’e, ba zinengenia ba ba zama’ele’õ andrõ khõnia, ni’amoni’õ, ba Geheha, 6 wa nifanema gõi niha baero, ba gondrõita andrõ, wa no ndrotondroto gõi ira ba sanema, ba gamabu’ula li andrõ, ba khõ Keriso Yesu, moroi ba duria somuso dõdõ andrõ. 7 Ba da’õ no tobali enoni ndra’o, dali mbuala andrõ fa’ebua dõdõ Lowalangi, nibe’e khõgu, balazi wolaunia, ba wa’abõlõnia, 8 ya’o, fondrege zide’ide ni’amoni’õ, si no falukha fa’ebua dõdõ andrõ, ba wangombakha ba niha baero, wa no a’oi so khõ Keriso, wa no lõ famaedo, 9 ba ba wamotokhi ba dõdõra, he wisa nihonogõi, ba zi no tobini andrõ, si no mubini’õ, gõtõgõtõ wa’ara, ba dõdõ Lowalangi, sombõi fefu hadia ia. 10 Ena’õ te’oroma’õ iada’e ba zamatõrõ andrõ ba ba zalawa andrõ, ba zorugo, ba mbanua Keriso andrõ, zi siwa mbalõ wa’atuatua Lowalangi andrõ, 11 dali gera’era andrõ, si no gõtõgõtõ wa’ara, nifaluania ba khõ Keriso Yesu, So’aya ya’ita, 12 ba zi so khõda wa lõ aiwõ, awõ lala, ba wanõtõna, moroi ba wamati andrõ khõnia. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura II Moze 6 : 2 - 8 2 Ba humede Lowalangi khõ Moze, imane khõnia: Yehowa ndra’odo! 3 No u’oroma’õ ndra’odo no, Lowalangi si lõ ambõ fa’abõlõ, khõ ndra Aberahamo, Iza’aki, Yakobo; ba tenga Yehowa dõigu ba wangoroma’õgu ya’odo khõra. 4 Ba noa na’i ulau fawu’u li khõra, wa ube’e khõra danõ Gana’ana andrõ, tanõ andrõ ba zi fatewu ira mege 5 Ba iya’e, ba no ufondrodrongo wangarõngarõ Ndraono Gizeraëli andrõ ba wangosawuyu Ndrawa Miserayi andrõ ya’ira, ba no itõrõ tõdõgu gamabu’ula ligu andrõ. 6 Andrõ õmane ba Ndraono Gizeraëli: Yehowa ndra’odo, u’efa’õ ami ba halõw~õ zawuyu andrõ, halõw~õmi ba Ndrawa Miserayi, usõbi ami, wameta ya’ami ba halõw~õmi andrõ, halõw~õ zawuyu, u’efa’õ ami tangagu ni’oro’õ andrõ ba fao wangoroma’õ fa’abõlõ si lõ ambõ. 7 Ba utuyu ami banuagu, ba Lowalangimi ndra’odo ba ya’aboto dania ba dõdõmi, wa no Yehowa ndra’odo, Lowalangimi, sangefa’õ ya’ami ba halõw~õ zawuyu andrõ, ba danõ Miserayi. 8 Ba u’ohe ami ba danõ andrõ nifabu’ugu fahõlusa khõ ndra Aberahamo, Iza’aki, Yakobo, fame’e khõra; ba ube’e okhõtami, ya’odo, Yehowa andre! Famotokhi Taromali Lowalangi Sinanõ ba dõdõ tehalõ moroi ba zura II Moze 6 : 7b Wa no Yehowa ndra’odo, Lowalangimi, sangefa’ӧ ya’ami ba halӧwӧ zawuyu andrӧ, ba danӧ Miserayi. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 88 No möi dumaduma khöda, nilau Yesu So’aya. Me Ikaoni fefu ndraono, Ifahowu’ö ira. Simanö wa lö Itimba, zangondrasi Ya’ia. Börö wa’omasi-Nia, wa tola auri ita. Fangorifi Ibè khöda, na mangesa dödöda. Ifosinema fa’auri, zamati ba döi-Nia. Mangandrö Ia salahi, fa aro wamatida. Irorogö, Ifaha’ö, Ifaogö gera’era. Itehegö noso-Nia, yawa ba döla röfa. Fangatulö niha fefu, khö Lowalangi Ama. Da fao ita möi khö Yesu, ba ta’o’ö li-Nia. Me fangorifida Ia, götögötö wa’ara. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 463 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***