28 Januari 2023 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 28 Januari 2024 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, ba wondrugida migu Epifania andre, ma’owai ami fefu ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 263 Tuho goroisa Zo’aya, ba daroma li-Nia. Da ta’omasi’ö Ia, he göi awöda niha. Da ta’oigö dödöda, ta’o’ö, tafalua. No göi dumaduma khöda, wa’omasi Zo’aya. Lö Ibe’e ba’aba’a, fefu ngawalö zala. Fa’omasi Zo’aya, duhu tebai nisu’a. Da fao ita ba wangandrö, wangalulu khö-Nia. Ta’andrö Geheha-Nia, sangabölö ya’ita. Ya sanau ölö ita, wamati khö Zo’aya. Fa’omasi wangoroma, na hasara dödöda. Fa’omasida nawöda, böi tebulö he ara. Ya böi olifu ita, wa’omasi Zo’aya. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : He Yehowa, farongogö khögu lala ba wa’auri andrö: no fahöna wa’omuso dödö föna-U, ba ba gambölö-U so wa’ohahau dödö si lö mamalö. (Sinunö 16:11). HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 262 No afönu wa’omasi-Nia, zi te’ala ba horö. Andrö da ta’omasi’ö Ia, moroi sibai ba dödö. Da takaoni niha möi khö-Nia, fa dozi latara lahe-Nia. Me Ya’ia wa’auri sindruhu nitöngöni. He afökhö lala ba wolo’ö, somasi Yesu andrö. Lö tebulöbulö wefao-Nia, wame’e fa’abölö. Böi mo’aetufa wanötönada, ha Yesu manö we’ewe’eda. Ibè khöda Geheha, sangaro famatida. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura III Moze 18 : 15 - 20 15 Saila numõnõu, ba tebai õheta mbalubalu: no fo’omo nonou, tebai õheta mbalubalu zaila ia. 16 Saila wo’omo dalifusõu, ba tebai õheta mbalubalu, no saila dalifusõu. 17 Saila ndra alawe ba saila nononia alawe, ba tebai faoma õheta mbalubalu; ono nononia matua ba ono nononia alawe, ba lõ tõla õhalõ, wameta balubalu zaila ia; no fondrege zahatõ khõu ira — horõ sebua da’õ. 18 Ba lõ’õ gõi tola õfakaerua zi fatalifusõ, wamobõrõ fa’udusa, na õheta zaila ia, ba ngai zi sambua, fatua auri ia. 19 Lõ tola õhatõ’õgõ ba ndra alawe, ba wameta balubalu zaila ia, gõtõ wa’ara’iõnia andrõ. 20 Lõ tola orudu ndra’ugõ khõ wo’omo nawõu, wangai fa’ara’iõ khõu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Mataio 15 : 12 - 20 12 Ba so ndra nifahaõ, lamane khõnia: Hadia, õ’ila wa no fatuwu ba warizaio, me larongo niwa’õu andrõ? 13 Ba itema li, imane: Fefu zinanõ, si tenga nitanõ Namagu andrõ ba zorugo, ba ladeha dania. 14 Mibõhõi ira; niha sau’a ira, samasao sau’a, ba na ifasao nawõnia sau’a sau’á, ba faoma aekhu ira ba gohokoho. 15 Ba itema linia Fetero, imane khõnia: Ombakha’õ khõma geluaha gamaedola andrõ. 16 Ba imane: Hadia, lõ’õ na saboto ba dõdõmi gõi? 17 Hadia, lõ mi’ila, wa isawa mbetu’a fefu zi mõi bakha ba mbawa, awõ wa ifuli mõi baero ba dõgitõgi? 18 Ba hadia ia zi otarai mbawa, ba ba dõdõ i’otarai, ba da’õ zana’unõi niha. 19 Moroi ba dõdõ sa i’otarai era’era si lõ sõkhi, ba fange’e, ba fohorõni donga zodonga ba fohorõ bõ’õ ba fanagõ ba famõbõgõ si lõ duhu ba fanandrawa. 20 Ya’ia wana’unõi niha. Ba lõ ita’unõi niha, na manga lõ mombanõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura I Korindro 8 : 1 - 13 1 Ba ba gõ nadu andrõ, ba no ta’ila, si so fa’aboto ba dõdõ ita fefu. Famahokha wa’aboto ba dõdõ andrõ ba fa’omasi andrõ, ba fanga’azõkhi. 2 Na so zanguma’õ tõdõnia, so hadia ia zaboto ba dõdõnia, ba tenga si nangea fa’aboto ba dõdõ wa’aboto ba dõdõnia andrõ. 3 Ba na so zangomasi’õ Lowalangi, da’õ zaboto ba dõdõ Lowalangi. 4 Ba ba wemanga gõ nadu andrõ, ba no ta’ila, wa faya nadu ba guli danõ, awõ wa lõ Lowalangi, baero zi sambua andrõ. 5 Ba he wa’ae so nifotõi Lowalangi, he ba zorugo, ba he ba guli danõ — oya sa Lowalangi ba ato zo’aya — 6 ba khõda sa, ba ha sambua Lowalangi, Ama andrõ, ba zi otarai fefu hadia ia, ba ya’ita, ba ba khõnia ita ba ha samõsa Zo’aya, Yesu Keriso, sama’ema fefu hadia ia, ba ya’ita, ba moroi khõnia. 7 Ba lõ dozi so wa’aboto ba dõdõ; so õsa, ba irugi da’e itegu ira tõdõra ba nadu andrõ, ba femanga gõ nadu khõra, na la’a, ba tõdõra andrõ, ba tetutu, me no sambõ fa’abe’e. 8 Tenga femangada mbalazi, ba khõ Lowalangi; lõ tedou wa’asõkhida, na manga ita, ba lõ i’ambõsi ita, na lõ manga ita. 9 Ba mifaigi, fa bõi tobali fangalani sambõ fa’abe’e wa no tola khõmi da’õ. 10 Na so zangila ya’ugõ, na manga’õ ba nomo nadu, ya’ugõ andrõ, si no so fa’aboto ba dõdõ, ba hadia, ba lõ tefarou dõdõnia, sambõ fa’abe’e na ba wemange gõ nadu andrõ? 11 Ba tobali famakiko zambõ fa’abe’e wa’aboto ba dõdõ andrõ khõu, famakiko dalifusõ andrõ, si no bõrõ wa’amate Keriso andrõ. 12 Ba na mosala ami, si manõ, ba dalifusõ, ba no tetutu dõdõra, sambõ fa’abe’e mibe’e, ba khõ Keriso mosala ami. 13 Andrõ, na te’ala dalifusõgu, ba gõ andrõ, ba lõ’õ manõ u’a ndriwo, gõtõgõtõ wa’ara, fa lõ ufobõrõ wangala ba dalifusõgu. Famotokhi Taromali Lowalangi Sinanõ ba dõdõ tehalõ moroi ba zura I Korindro 8 : 9 Ba mifaigi, fa bӧi tobali fangalani sambӧ fa’abe’e wa no tola khӧmi da’ӧ. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 145 Me somasi Yesu, na aefa ba huku, ita fefu. Andrö no Itaha, fefu wango’aya, si möi fangöhölida ba wönu. No ala zatana awö golalöwa, möna Yesu. Fa’abölö Nama wemöna Zo’aya, möi fa’aurida wemaoso-Nia. Omuso dödöda, wanörö lalada ba wekoli. Me Yesu nawöda, kubalo si sökhi, I’ohe, Ifasao ba lakhömi. He Yesu tologa, bè anau gölöma ba wamati. Rorogö ndra’aga, ha khö-U ahonoga, falua fasaoga ba wa’auri. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 265 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***