3 Mei 2026 (Bahasa Nias)

Minggu, 3 Mei 2026 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö, me no maoso Zo’aya ya’ita Yesu Keriso moroi ba ngai zi mate. Andrö, ba döi Yesu ma’owai ami, Ya’ahowu!, no maoso Keriso! Jemaat : Ya'ahowu! Duhu No Maoso Keriso! Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 1 Ya’ahowu dozi niha, samati khö Yehowa. Sanötöna fangorifi, ba döi Yesu So’aya. Saro tödö ba da’ö, fa’auri dötönafö. Yehowa zamokai hörö, ba samè khöda haga. Ibönökhi göi wame’e, fefu zoguna khöda. Lö manö faröi Ia, ba nifabu’u-Nia. Salawa yawa Zalawa, Lowalangi Yehowa. Andrö ta’o’ö li-Nia, lö manö baero-Nia. No so Ia ba khöda, Haleluya khö-Nia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Ba na lõ mususugi Keriso, ba si lõ boto wamatimi andrõ, ba lõ si tebulõ ami ba horömi; Ba iada’e, ba no mususugi Keriso, moroi ba ngai zi mate. (I Kor. 15 : 17 ba 20a). HALELUYA! Jemaat : Manunõ Liturgos : Mangandrõ ita, "He Yesu Keriso So’aya ya’aga, Sangorifi ösi gulidanõ andre. Ma’andrõ saohagõlõ khõ-U me no Õlaŵa wa’abõlõ horõ ba fa’amate ba wemaoso-Mö andrö. Iada’e lõ sa’ae ata’u ndra’aga ba lumö wa’abõlõ wa’amate andrõ, me no maoso Ndra’ugõ ba wangorifi ya’aga. No alõmõ wa’amate andrõ ba wemõna, No Õ’efa’õ ndra’aga ba wa’abõlõ zogõmigõmi ba no Õ’ohe ndra’aga ba haga. No Ö’efa’ö ndra’aga moroi ba wesu horõ, irege tobali ndra’aga ono khö Lowalangi Ama. He Yesu Keriso no Öfaogö ndra’aga ba wa’amate-Mö ba tesusugi göi ndra’aga ba wemaoso-Mö andrö, ma’andrö khö-U böi bulö’ö khöma howuhowu-Mö, me Ya’ugö zamatörö banua si yawa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 303 Na so wa’abu dödögu, möido, u’ondrasi Yesu. Ba hadia zambö khögu Ifolala dödögu. Na so zi fa’udu khögu, ha Yesu dötönafögu. He laröido si fahuwu, lö Iröi ndra’oYesu. Sökhi naha föna Yesu, me lö fa’abu dödögu. Owuawua dödögu, irugi zi lö aetu. Da möi ita föna Yesu, sogaoni ya’ita fefu. Dozi solo’ö li-Nia, manema howuhowu. Oi omusomuso dödö dozi sangandrö khö Yesu Ba latema ni’andröra, Ifaogö howuhowu. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 20 : 1-17 1 Ba iwa’õ daroma li andrõ fefu Yehowa, imane: 2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami. 3 Bõi so khõmõ Lowalangi tánõ bõ’õ, baero ndra’o. 4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ. 5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu, 6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ. 7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya. 8 Ame’egõ tõdõ luo wolombase andrõ, ba we’amoni’õ ya’ia. 9 Õnõ ngaluo mohalõwõ ndra’ugõ ba õhalõ halõwõu fefu. 10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha. 11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ. 12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu. 13 Bõi ange’e. 14 Bõi ohorõ. 15 Bõi anagõ. 16 Bõi bõbõgõ khõ nawõu zi lõ duhu. 17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu. FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane taroma Li Lowalangi: ‘Ba no erege dödö-Gu õbe’e ba horõu andrõ; no õfakao-Do olalõŵamõ. Ya’o, Ya’odo andre zamunu lalõu andrõ, bõrõ Ndra’o, ba lõ’õ sa’ae itõrõ tõdõ-Gu horõu. (Yesaya 43:24b-25) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura II Tesalonika 3 : 1-12 1 Ba hadia na mbõ’õnia, ya’ami ira talifusõ, ba mi’angandrõ, salahima ena’õ alio terongo misa daroma li Zo’aya andrõ, ba ena’õ tefolakhõmi, si mane ba khõmi, 2 ba ena’õ te’efa’õ ndra’aga ba niha andrõ, si lõ tõdõ, ba si lõ sõkhi; lõ’õ sa dozi mamati. 3 Ba lõ’õ sa farõi Zo’aya, ba ya’ia zangabe’e ya’ami, ba irorogõ ami, itimba khõmi zi lõ sõkhi andrõ. 4 Ba madõnadõna khõmi, ba khõ Zo’aya, mi’o’õ niwa’õma khõmi, he iada’e, ba he dania. 5 Ba ya So’aya zamatõrõ tõdõmi ba wa’omasi Lowalangi andrõ, ba ba wanaha tõdõ andrõ, khõ Keriso. 6 Ba mawa’õ khõmi, ya’ami ira talifusõ, ba dõi Zo’aya ya’ita andrõ, Yesu Keriso, mifabali ami ba dalifusõ si lõ sõkhi buabua, gofu ha niha ia, si lõ manõrõ lala nirongora khõma. 7 Noa sa mi’ila he wisa wolo’õ khõma; lõ’õ sa nitõrõma si lõ gõna, ba khõmi andrõ; 8 ba lõ’õ gõi nihalõma balazo, si lõ nibe’ema bõli, noa sa erege dõdõma, ba no akao ndra’aga, wohalõwõ, bongi ma’õkhõ, fa bõi abu dõdõmi khõma, ha niha ami. 9 Tenga fa lõ tola mena’õ, ba ena’õ mabe’e famaedo ndra’aga khõmi, ena’õ mi’o’õ khõma. 10 Da’õ sa gõi niwa’õma khõmi, me soga khõmi; si lõ edõna mohalõwõ, ba bõi yamanga gõi. 11 Noa sa marongo, so õsa ba khõmi zi lõ sõkhi buabua, ma’ifu lõ mohalõwõ, molau fayafaya. 12 Ba da’õ niwa’õma ba zi manõ, ba mafarou dõdõra, ba khõ Zo’aya, Yesu Keriso: ena’õ lahonogõ ira ba halõwõra, ba ena’õ la’a gõlõra, balazora. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura II Moze 15 : 1-14 1 Me luo da’õ lalau zinunõ andre Moze ba Iraono Gizeraëli, wanuno Yehowa, lamane wanunõ: ”Da’usuno Yehowa, me no salawa sebua ia; kudo ba si fakudo yawa, ba no ituli’õ ba nasi. 2 Fa’abõlõgu Yehowa ba fanunõgu, me no sangorifi ya’odo ia; Lowalangigu ia, andrõ usuno ia — Lowalangi namagu andrõ, u’ebua’õ duriania. 3 Sabõlõ ba wanuwõ Yehowa andrõ; Yehowa dõinia. 4 Kureta andrõ khõ Wara’o ba sabõlõ andrõ khõnia, ba no ituli’õ ba nasi, ba nitutuyu andrõ, si fasõndra moroi ba gureta yawa, ba no alõmõ ba nasi zukhu. 5 No ibalugõ ira namõ nasi; ba dawuyu ahõndrõ ira, hulõ gara. 6 Si so lakhõmi dangau kambõlõ, ya’ugõ, Yehowa, ba wa’abõlõnia andrõ. Tangau kambõlõ andrõ, ya’ugõ, Yehowa, ba irasa nemali. 7 Ba ba wa’asalawamõ andrõ, si no ebua sibai, ba õhori zi fa’udu khõu. Na õbe’e tesao mbakhuhakhu dõdõu, ba i’a ira, si mane femanga galitõ dõla wakhe. 8 Ba wehõfuhõfumõ, ba wõnumõ, toba’a nidanõ; abe’e hohou, hulõ mba’aba’a; hulõ zi baku hou nasi. 9 Imane emali: Da’ugohi ira, ukhamõ dania: ufaosa dania nirabu, u’abusoi’õ ndra’o ba khõra. Udõni zi’õli; ihori ira tangagu andre. 10 Õfatõrõ hanuhanumõ andrõ, ba ihawui ira asi; ahõndrõ ira, hulõ zimo, ba nasi sebua sibai. 11 Ha niha Lowalangi si fagõlõgõlõ khõu, ya’ugõ. Yehowa! Ha niha zi fagõlõgõlõ khõu, ya’ugõ, salawa sebua lakhõmi, ya’ugõ, sata’u ita, ba wolaumõ andrõ, sebua turia, solau sahõlihõli dõdõda! 12 Õ’oro’õ dangau, ba itõlõ ira tanõ. 13 No õfasao fa’ebua dõdõu soi andrõ si no õ’efa’õ; no õ’ohe ba nahiau ni’amoni’õ andrõ, fa’abõlõu. 14 Me larongõ niha baero, ba manizinizi ira; ihawui Ndrawa Wilisiti fa’ata’u. 15 Tobali dõdõ zalawa Ndraono Gedomo, ba ihawui zolohe Iraono Moabi fogikhi dõdõ; araguragu dõdõ mbanua ba danõ Gana’ana fefu. Famotokhi Taromali Lowalangi Sinanõ ba dõdõ tehalõ moroi ba zura II Moze 15 : 2a Fa’abõlõgu Yehowa ba fanunõgu, me no sangorifi ya’odo Ia. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 307 Börö Keriso Yesu, si möi salahigu. Wa usöndra wangefa, ba huku horögu. Fefu niwa’ö-Nia, ufati me duhu. Wa tebai möi khö Nama, zi lö mendrua tumbu. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 307 : 3 Ba fa’omuso dödö, khö Yesu a’oi so. He bongi, he ma’ökhö, Ya’ia nawö fao. Si lö fabali Ia, sanolo, samasao. Ululu wa’aurigu, ba danga Keriso. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***