14 Mei 2026 (Bahasa Nias)

Kamis, 14 Mei 2026 (Kenaikan Yesus) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, No oi owulo ita oi faondra ba wa’owuawua dödö föna Keriso, ba wanörö tödö Fanahae Zo’aya ya’ita Yesu Keriso ba zorugo. Andrö, ba döi Yesu ma’owai ami fefu, Ya’ahowu! Jemaat : Ya'ahowu! Liturgos : Ya faofao khõmi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No 118 Me möi’Ö ba zorugo Salawa Wa’auri. Möi mamöfögö naha zaro ba wamati. He bongi he ma’ökhö Öfahowu’öga. Duhu zi no Öwa’ö, lö faröi’Ö khöma. Ma’andrö khö-U, So’aya, fazawa danga-Mö. Afu mo’urakhaga, ba howuhowu-Mö. Be’e khöma Geheha si möi fangabölö. Ba wanga’i halöwö si no Ö’oroi’ö. No Ökaoniga, Yesu, dozi tanakhö-Mö. Wama’ema buala, ba zeregetödö. Faulugö wangehaogö ya’aga ba ndro-Mö. Ena’ö lö tebulö wa’omusodödö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Imane Yesu: “Iada’e, ba mofanõ Ndra’o khõ zamatenge Ya’o. Mõido sa muhaogõ naha khõmi. Urõi khõmi wa’ohahau dõdõ, fa’ohahau dõdõ khõ-Gu Ube’e khõmi. Bõ’õ nibe’e niha guli danõ, bõ’õ nibe’e-Gu. Bõi abu dõdõmi ba bõi ata’u ami (Yohane 16:5; 14:2c; 14:27). HALELUYA! Jemaat : Manunõ Liturgos : Mangandrõ ita, "He So’aya ya’aga Yesu Keriso, Ono Lowalangi Ama, solakhömi! No manahae Ndra’ugö ba zorugo, dumadao ba gambölö Nama, ba wamatörö si so si yawa ba mbanua, he göi si so si tou ba gulidanö. He So’aya, böi röi ndra’aga ba wanörö lalama. Fatenge khöma Geheha sanolo. Be’e khöma wa’abölö ena’ö lö faröi ndra’aga ba daroma Li-Mö, ba abölö’ö mbanua-U ba wolaŵa ngawalö zi lö sökhi, ena’ö si tedou ira wamati ba gulidanö andre. Ha khö-U manötönaga, me Ya’ugö zamatörö banua si yaŵa awö danö i’otarai da’e irugi ba zi lö aetu, Yaduhu!"Mudadao Zato Liturgos : Manunõ ita moroi ba Mbuku Zinunõ No. 117 Duhu no mo’ahonoa, wangöhöli ya’ita. Ba röfa no Ifaulugö, wangatulö’ö niha. Faduhu sibai dödöda, khö Zo’aya ya’ita. Me Ya’ia zamalua, fanguhuku dania. Oi te’u’u fefu niha, amatöröwa-Nia. No da’ö zomasi Ia, na te’orifi ita. Da tafosumange Ia, ba ta’ata’ufi göi. Lowalangida Yehowa, samatörö fefu soi. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 68 : 16-20 16 Hili khõ Lowalangi hili Mbazana andrõ; hili soya zuzu hili Mbazana. 17 Hana wa afõkhõ dõdõmi, ya’ami hili soya zuzu, ba hili andrõ somasi Lowalangi dadaomania? Ba lõ mamalõmalõ, wa nahia Lowalangi ia. 18 Kureta Lowalangi andrõ, ba no ba ngafulu ngahõnõ, mehõnõ wa hõnõ; no so ba khõra Zo’aya: — hili Zina’i, ni’amoni’õ. 19 No mõi miyawa ndra’ugõ, no õ’ohe nikuru nikuroe andrõ; no õtema game’ela ba niha, he ba zi lõ molo’õ li, ena’õ lõ tebulõ Yehowa, Lowalangi. 20 Nisuno Zo’aya, ero ma’õkhõ i’onoro noroda. Fangorifida Lowalangi. Si manõ daroma Li Lowalangi, da tatema’õ faoma sinunõ moroi ba Mbuku Zinunõ NO. 3 : 2 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi Ama, si so ba zorugo yaŵa. Ma’ondrasi dadaoma wa’ahakhö dödö-U andrö. Mafaduhu’ö wa no niha sebua horö ndra’aga tanö fona-Mö, i’otarai iraono ndra’aga, no iböböga amuata walimosa, fanagö, fangisö, awö wamalua ngawalö gamuata si lö faudu ba zomasi Ndra’ugö. He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko ndra’aga ba böi tehe te’ala, törö tödö-U wa’ebua dödö-U ba fa’ahakhö dödö-U andrõ khöma. Böi bulö’ö khöma wangorifi andrö si no Öhönagö ba zamati khö-U, Yaduhu!" Mangandrõ ita, "He So’aya ya’aga Yesu Keriso si mate ba röfa ba hili Gologata, ba si no maoso moroi ba ngai zimate. Faduhu dödöma ba daroma Li-Mö me Õwa’ö: “Ya’odo wemaoso ba fa’auri, samati khõ-Gu, ba auri, heŵa’ae mate ia.” Ba hiza, ba lala wa’aurima sero ma’ökhö asese ma’ositengagö ba ma osilö’ögö Ndra’ugö So’aya, me ma’o’ö nifakhoi dödöma samösa. Bologö dödö-U khöma, ba be’e aefa khöma horöma andrö. Hakhösi dödö-U khöma So’aya, böi tehe tekiko, törötõrõ tödö-U wa’ebua dödö-U awõ wa’ahakhö dödö-U khöma. Böi bulõ’õ ndra’aga moroi ba wa’omasi ba ba wangorifi andrö si no öhönagö ba zamati khö-U." Mangandrõ ba dõdõ zamõsana fõna Lowalangi.....1 irugi 2 meniti. Hakhõsi dõdõ-U khõma Ama, ba be’e aefa khõma horõma andrõ ma’afefu. Yaduhu! Jemaat : Manunõ moroi ba Mbuku Zinunõ No. 224 : 1 Liturgos : Imane Taroma Li Lowalangi, "Noa sa ahori mamazõkhi horõ ira, ba lõ’õ sa si sõkhi duriara khõ Lowalangi. Ba saohagõlõ wa Iŵa’õ Lowalangi satulõ ira, fa’ebua dõdõ-Nia, bõrõ wangõhõli andrõ, ba khõ Keriso Yesu, nifataro Lowalangi hõli, ba ndro-Nia andrõ, balazi wamati, ba wangoroma’õ fa’atulõ dõdõ-Nia, bõrõ wa no I’osilõmilagõ horõ fõna. Si mane fa’ahakhõ dõdõ nama nononia, si manõ wa’ahakhõ dõdõ Yehowa zangata’ufi Ya’ia." Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO WAÕWAÕ WANAHAE YESU Liturgos : Da tafondrondrongo waõwaõ wanahae Zo’aya ya’ita Yesu Keriso. Manunõ ita moroi ba Mbuku Zinunõ No. 118:1 Fombaso Mataio 28:18–20 18 Ba i’ondrasi ira Yesu, humede ia khõra, imane: Fefu wa’abõlõ andrõ ba zorugo ba ba guli danõ, ba no mube’e khõgu. 19 Mi’ae’e, mibali’õ nifahaõ fefu soi, wamayagõ idanõ ya’ira ba dõi Nama ba ba dõi Nono ba ba dõi Geheha ni’amoni’õ; 20 mifahaõ ira ba wolo’õ fefu hadia ia niwa’õgu khõmi. Ba hiza, fao khõmi ndra’o, ero ma’õkhõ, irugi gamozua gõtõ danõ andrõ. Manunõ ita moroi ba Mbuku Zinunõ No. 118:2 Fombaso Halõwõ Zinenge 1:3-8 3 ba ni’oya’õnia tandra, wangoroma’õ wa no auri ia, me no aefa itaõgõ wamakao andrõ; õfa wulu wongi wa’ara i’oromaroma’õ ia khõra, i’ombakha’õ khõra ngawalõ mbanua Lowalangi andrõ. 4 Ba me orudu ira, me manga ira, ba iwa’õ khõra, bõi larõi Yeruzalema, labaloi gamabu’ula li Nama andrõ, nirongomi khõgu (iwa’õ). 5 Idanõ sa nibayagõ Yohane, ba nibayagõ Eheha ni’amoni’õ ami, lõ ara tõ. 6 Ba lasofu khõnia si so ba da’õ, lamane: He Tua, hadia õfuli õ’a’azõkhi iya’e dania nõri Ndraono Gizeraëli? 7 Ba imane khõra: Tenga si nangea ya’ami zangila bawa ba bu’u li, nihonogõi Nama ba wa’abõlõnia, 8 ba mitema dania wa’abõlõ Geheha ni’amoni’õ, si mõi khõmi, ba samaduhu’õ ami khõgu ba Yeruzalema, ba ba danõ Yudaia, ma’asagõrõ, ba ba Zamaria, ba irugi wondrege danõ. Manunõ ita moroi ba Mbuku Zinunõ No. 118:3 Fombaso Halõwõ Zinenge 1:9-14 9 Ba me aefa iwa’õ da’õ, ba tefazawa ia, anehe ira, ihalõ ia lawuo, ba lõ’õ sa’ae oroma ia khõra. 10 Ba me latõngõ mbanua si yawa, me mofanõ ia, ba hiza, darua zi so ba da’õ khõra niha, sobaru safusi, 11 sanguma’õ gõi: Hana wa so ami ba da’e, wa mitõngõ mbanua, ya’ami banua Galilaia? Mangawuli dania Yesu andrõ, nihalõ ba zorugo moroi ba khõmi, si mane me mi’ila ia, me mofanõ ia ba zorugo. 12 Aefa da’õ, ba mangawuli ira ba Yeruzalema, moroi ba hili andrõ, sotõi hili wanikha, ba ngai Yeruzalema, mato sambadu fofanõ. 13 Ba me no larugi yomo, ba mõi ira yawa ba mbate’e ba zi sagõtõ, ba da’õ sosó ira, Fetero ba Yohane ba Yakobo ba Andrea ba Filifo ba Toma ba Batolomaio ba Mataio ba Yakobo, ono Galifaio, ba Simoni selote ba Yuda, ono Yakobo. 14 Da’õ fefu zi lõ aefa’aefa mangandrõ, ha sara dõdõ, awõ ndra alawe andrõ, ba awõ Maria, ina Yesu, ba ira talifusõnia. Manunõ ita moroi ba Mbuku Zinunõ No. 118:4 FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Yohane 14 : 28-31 28 No mirongo, me uwa’õ khõmi: Mofanõ ndra’o ba ufulido khõmi. Na mi’omasi’õ ndra’o, ba omuso dõdõmi ena’õ, me khõ Nama mõido, me no sebua moroi khõgu Nama. 29 Ba noa sa uwa’õ khõmi, fatua lõ alua, ena’õ faduhu dõdõmi, na alua dania. 30 Lõ’õ sa’ae oya huhuogu khõmi, so sa’ae zalawa guli danõ andrõ, ba lõ isõndra hadia ia khõgu; 31 ba ena’õ aboto ba dõdõ niha guli danõ, omasido Nama ba u’o’õ hadia niwa’õ Nama khõgu, ba mifaoso, taheta ita ba da’e! Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Halöwö Zinenge 1 : 1-11 1 No awai khõgu zura si fõfõna andrõ, ya’ugõ Teofilo, no usura fefu nibõrõtaigõ Yesu, folau ba famahaõ, 2 irugi luo tefazawa ia, me no ibe’e goroisa ba zinenge andrõ, ni’anutuyu’õnia Eheha ni’amoni’õ, 3 ba ni’oya’õnia tandra, wangoroma’õ wa no auri ia, me no aefa itaõgõ wamakao andrõ; õfa wulu wongi wa’ara i’oromaroma’õ ia khõra, i’ombakha’õ khõra ngawalõ mbanua Lowalangi andrõ. 4 Ba me orudu ira, me manga ira, ba iwa’õ khõra, bõi larõi Yeruzalema, labaloi gamabu’ula li Nama andrõ, nirongomi khõgu (iwa’õ). 5 Idanõ sa nibayagõ Yohane, ba nibayagõ Eheha ni’amoni’õ ami, lõ ara tõ. 6 Ba lasofu khõnia si so ba da’õ, lamane: He Tua, hadia õfuli õ’a’azõkhi iya’e dania nõri Ndraono Gizeraëli? 7 Ba imane khõra: Tenga si nangea ya’ami zangila bawa ba bu’u li, nihonogõi Nama ba wa’abõlõnia, 8 ba mitema dania wa’abõlõ Geheha ni’amoni’õ, si mõi khõmi, ba samaduhu’õ ami khõgu ba Yeruzalema, ba ba danõ Yudaia, ma’asagõrõ, ba ba Zamaria, ba irugi wondrege danõ. 9 Ba me aefa iwa’õ da’õ, ba tefazawa ia, anehe ira, ihalõ ia lawuo, ba lõ’õ sa’ae oroma ia khõra. 10 Ba me latõngõ mbanua si yawa, me mofanõ ia, ba hiza, darua zi so ba da’õ khõra niha, sobaru safusi, 11 sanguma’õ gõi: Hana wa so ami ba da’e, wa mitõngõ mbanua, ya’ami banua Galilaia? Mangawuli dania Yesu andrõ, nihalõ ba zorugo moroi ba khõmi, si mane me mi’ila ia, me mofanõ ia ba zorugo. Famotokhi Taromali Lowalangi Sinanõ ba dõdõ tehalõ moroi ba zura Sinunö 68 : 20 Nisuno Zo’aya, ero ma’õkhõ i’onoro noroda. Fangorifida Lowalangi. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 433 Mohon Maaf, audio untuk lagu ini belum tersedia...! Yae wangandrögu, fao fangalulu. Abölö’ödo wolawa udu. He Yesu tolo, wolo’ö siduhu. Ya’e dödögu, ubè khö-U, Yesu. Ha khö-U ululu fa böi elungu. Ohe dangagu ba lala sindruhu FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 433 : 4 Ya’ugö, Yesu, dötönafögu. Lembalembagu ba wa’aurigu. Ba danga-U, Yesu, ahono dödögu. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***