12 Oktober 2025 (Bahasa Nias)

Download Tata Ibadah (DOC)

Download Tata Ibadah (PDF)

12 Oktober 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 24 Tasuno Lowalangi ba zorugo, same’e luo, bawa, ba döfi. Samè sihombo ba dalumbanua, ba saliwa ba danö, ba nasi. No te’asogö göi gurifö niha, fefu zoguna oi Ibönökhi. Alai niha wa la’erogö Nama, me lawaioi fa’abölöra göi. Tasuno Lowalangi ba zorugo, me somböi niha famaedo-Nia. Itehe wamatörö ulidanö, ba sihombo ba dalumbanua. Ena’ö dozi sanuno Ya’ia, ba sangerönu oroisa-Nia. Alai niha meoi lö fangenanö, oi la’o’ö li famaelungura. Tasuno Lowalangi ba zorugo, samatenge Yesu höli niha. Solohe fangefa ba gulidanö, afu auri zamati khö-Nia. Alai niha wa la’erogö Yesu, lö lafondrondrongo li Geheha. Me no tobini khöra wa so huku, na mangawuli Yesu So’aya. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 222 Lö fa’atulö khöda fefu, me fahöna wayawasa. Da möi ita nihaogö Yesu, me sebolo tödö Ia. Ha Yesu dötönaföda, sangatulö’ö ya’ita. Lö fa’atulö khöda fefu, me fahöna wa’udusa. Lö fa’omasi soroi dödö, me lö fefao gera’era. Ha Yesu dötönaföda, sangatulö’ö ya’ita. Lö fa’atulö khöda fefu, me fahöna wayafaya. Fa’aduhu lö ba dödöda, faruka walimosa. Ha Yesu dötönaföda, sangatulö’ö ya’ita. Lö fa’atulö khöda fefu, me lö fa’ebolo dödö. Asese so wange’e dödö, fa’omasida no ambö. Ha Yesu dötönaföda, same’e fanaha tödö. Lö fa’atulö khöda fefu, me no asese mamadaö. Me lö ta’o’ö li Geheha, sihedehede ba dödö. Ha Yesu dötönaföda, same’e tödö folo’ö. Lö fa’atulö khöda fefu, me ambö fa’anau gölö. Ba asese mangiwa dödö, hulö zi lö tötönafö. Ha Yesu dötönaföda, same’e fa’aro dödö. FOMBASO TAROMALI LOWALANGI (AMABU'ULA LI SIFÖFÖNA) Liturgos : Da tafondrondrongo daroma Li Lowalangi, tehalö moroi ba zura Danieli 3 : 13-18 13 Ba mofõnu sibai Nebukanesa, abao dõdõnia, ba ibe’e li, la’ohe khõnia ndra Saderakhi, Mezakhi, Abedo-Nego. Ba me la’ohe ira khõ razo, ba humede Nebukanesa, 14 imane khõra: Hadia, ni’odõdõgõ, ya’ami, ira Saderakhi, Mezakhi, Abedo-Nego, wa lõ mifosumange Lowalangigu, awõ wa lõ mangalulu ami ba wamaedo niha andrõ ana’a, nifalau’õgu? 15 Hiza, na edõna ami mifalõgu tou ami, ba wangalulu ba wamaedo niha andrõ, nifalau’õgu, na ha si’aikõ mirongo li dorofe ba li zurune ba li mbiola nitika, side’ide ba sebua, ba li mbiola si 10 sinali, ba he li laigi niwuwusi, ba hadia ia na, fefu, nifoli, ba lau; ba na lõ mangalulu ami, ba ladõlõ latibo’õ ami ba mbaho galitõ siholahola, ba ha niha maõ Lowalangi, sangila mangefa’õ ya’ami ba dangagu! (Sam. I. 17, 45, Yes. 36, 20; 37, 20). 16 Ba latema li ira Saderakhi, Mezakhi, Abedo-Nego, lamane khõ razo Nebukanesa: Alakha lõ matema limõ. 17 Na i’ila i’orifi ndra’aga Lowalangima andrõ, nifosumangema, ba i’efa’õga ba mbaho galito siholahola ba ba dangau, ya’ugõ razo; 18 ba na lõ’õ, ba ya aboto ba dõdõu, ya’ugõ razo, wa lõ’õ zui mafosumange Lowalangimõ, ba lõ’õ gõi mangalulu ndra’aga ba wamaedo niha andrõ ana’a, nifalau’õmõ. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRÖ FANGEFA HORÖ Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura Mareko 16 : 15-18 15 Ba imane khõra: Mi’ae mitõrõi guli danõ ma’afefu, mituriagõ duria somuso dõdõ andrõ, midozigõ niha. 16 Ha niha zamati, nibayagõ idanõ, da’õ zi falukha fa’auri, ba mbanua furi, ba nitibo’õ zi lõ mamati. 17 Ba da’õ dandra, si fao ba zamati andrõ: Ba dõigu lafofanõ mbekhu; molau li si bohou ira; 18 latuyu gulõ, ba na labadu langu, famunu, ba lõ te’ala ira; latufa tangara zofõkhõ, ba dõhõ wõkhõ. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Roma 1 : 8-15 8 Si fõfõna, ba usuno Lowalangigu andrõ, dali Yesu Keriso, ba khõmi fefu, me no teturiagõ wamatimi andrõ ba guli danõ ma’asagõrõ. 9 Irongo sa ligu Lowalangi, si mõido enoni tõdõgu, ba wangombakha turia somuso dõdõ andrõ khõ Nononia andrõ, wa lõ tebulõ itõrõ, tõdõgu ami. 10 Lõ aetu u’andrõ, na mangandrõ ndra’o, ma at? salõfõgu samuza, ma aoha gõlõ Lowalangi, mõi ndra’o khõmi. 11 Humulu sa dõdõgu wamaigi ya’ami, ena’õ ufa’ema khõmi ma’ifu, ame’ela Geheha, ba wangabe’e ya’ami, 12 ya’ia na terara dõdõgu gõi awõmi, ba khõmi andrõ, bõrõ wa no faoma samati ita, he ya’ami, ba he ya’o. 13 Ba tebai ubini’õ khõmi, ya’ami ira talifusõ, wa no asese uwa’õ tõdõgu, mõido khõmi — ba no tetabi ndra’o irugi da’e — ena’õ usõndra ba khõmi gõi mbua ma’ifu, si mane ba niha bõ’õ gõi. 14 So’õmõ ndra’odo, he ba Ndrawa Heleni, ba he ba zi tenga Dawa Heleni, he ba zatuatua, ba he ba zi lõ atuatua. 15 Andrõ si manõ wa’edõna dõdõgu, na balazi ndra’o, wangombakha turia somuso dõdõ andrõ, ba khõmi gõi, ba Roma. Famotokhi Taromali Lowalangi Sinanö ba dödö tehalö moroi ba zura Mareko 16 : 15 Ba imane khöra: Mi'ae mitöröi gulidanö ma'afefu, mituriagö duria somuso dödö andrö, midozigö niha. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 472 Wa’ato ndra talifusö, si lö irugi haga. No balunö hörö dödö, no iba’a afökha. Da tafazaewe danömö, taromali Zo’aya. Afu mowa’a ba dödö, wamati khö Zo’aya. FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 472 : 3 Möi ita taturiaigö, daroma li Zo’aya. He akao, he agafökhö, böi tafatou de’ala. Ta’oigö dödö wolo’ö, me oroisa Zo’aya. Me fa’auri nitemada ba luo safuria. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***