14 September 2025 (Bahasa Nias)

Download Tata Ibadah (DOC)

Download Tata Ibadah (PDF)

14 September 2025 [Tedöni dorosi, möi ndra sohalöwö bakha ba gosali, ba lahalö wangahono dödö banua niha Keriso ba wangondrasi ba ba wasumangeta khö Lowalangi] FANGOWAI BA FOGAONI FANGOWAI Liturgos : Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu! Jemaat : Ya'ahowu! Liturgos : Yafao-fao khömi Lowalangi! Jemaat : Ya fao khöu Geheha-Nia! FOGAONI Liturgos : Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangi. Tasuno Ia, manunö ita moroi ba Mbuku Zinunö No. 2 Suno Zo’aya me Ibè mbuala, me Idozigö wame’e si sökhi. Ba no fahöna Ibè ba zamati, suno Zo’aya. Suno Zo’aya Irorogö ita, I’ohe ita ba lala satulö. Dozi niha sedöna ae molo’ö, suno Zo’aya. Suno Zo’aya me lö aefa’aefa, oi Ihörögö zamati khö-Nia. Afu khö-Nia manötöna ira, suno Zo’aya. Suno Zo’aya me kubalo Ia, Ifolombase, Ibe’e zabönö. Ifasao ita ba zahono dödö, suno Zo’aya. Suno Zo’aya sanimba te’ala, si no elungu, I’ohe ba lala. Ibe’e wotu ba famangelama, suno Zo’aya. Suno Zo’aya solului khöda, na tebai ita ba wolawa horö. Itolo ita ba wasöndratada, suno Zo’aya. Suno Zo’aya me Ibe Geheha, sondrara tödö na tosasa ita. Oi Ifasao, Itolo göi ba lala, suno Zo’aya. Suno Zo’aya si lö faröi khöda, he no faröi khöda fefu nawöda. Lö sa faröi khöda Lowalangida, suno Zo’aya. FANGA’ARO’Ö WA’OWULO (VOTUM) Liturgos : Da tahonogö dödöda ba wariawösa, ba ba wa ha sambua khö Lowalangi, muzizio zato. No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö! Jemaat : Yaduhu! Liturgos : Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia guli danö ma’asagörö. (Yesaya 6:1b, 2-3) HALELUYA! Liturgos : Mangandrö ita, "He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no örorogö, ö’orifi, ba öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö, Yaduhu!" Mudadao Zato Liturgos : Manunö ita moroi ba Mbuku Zinunö No. 194 Fuli’ö, fuli’ö, mabaloi ndra’ugö. Ena’ö fao ita, we’amöi khö Nama. He talifusö, fuli, fuli’ö ba, fuli, fuli’ö ba. Fuli’ö, fuli’ö, röi ni’isö dödö. Solohe ya’ugö, ba lala safökhö. He talifusö, sökhi, öfuli’ö, sökhi, öfuli’ö. Fuli’ö,fuli’ö, me so Zangefa’ö. Ya’ia Zo’aya, si mate ba röfa. He talifusö, sökhi, öfuli’ö, sökhi, öfuli’ö. FOMBASO TAROMALI LOWALANGI (AMABU'ULA LI SIFöFöNA) Liturgos : Da tafondrondrongo daroma Li Lowalangi, tehalö moroi ba zura Yeremia 3 : 14-18 14 Mifuli ami, ya’ami ono matua si no fa’ero — iwa’õ Yehowa — me no ya’odo Zo’aya ya’ami — ba uhalõ ami, samõsa zamba banua ba darua zamba mado, ba u’ohe ami ba Ziona. 15 Ba ufataro khõmi gubalo, si faduhu dõdõgu, ena’õ lakubaloi ami si so fa’aboto ba dõdõ ba fa’atuatua. 16 Ba na ato dania ami, na mo’ono’ono ami ba danõ, na luo da’õ — iwa’õ Yehowa —, ba lõ’õ sa’ae lawa’õ: ”Tawõla gamabu’ula li khõ Yehowa”! ba lõ’õ sa’ae itõrõ tõdõ niha, lõ’õ sa’ae la’angeragõ ba lõ la’amalõsi, ba lõ’õ sa’ae lafuli lafazõkhi. 17 ”Dadaoma Yehowa” labe’e tõi Yeruzalema andrõ, na luo da’õ, ba owulo dania ba da’õ fefu niha baero, bõrõ dõi Yehowa andrõ ba Yeruzalema, ba lõ’õ sa’ae abe’e dandrora, wolo õ nikhoi dõdõra andrõ, si lõ sõkhi. 18 Na luo da’õ, ba fao ira ma’uwu Yuda ma’uwu Gizeraëli, la’otarai danõ moroi yõu, orudu ira wanawa tanõ andrõ, nitehegu khõ ndra tuami, tána khõra. Si manö daroma Li Lowalangi, da tatema’ö faoma sinunö moroi ba Mbuku Zinunö No. 20 : 1 FANGANDRö FANGEFA HORö Liturgos : Ya’ami ira talifusö, Na taŵa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lö faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda, muzizio zato. Mangandrö ita, "He Yehowa Lowalangi, si lö ambö fa’abölö, ba si no fahöna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu!" Liturgos : Mangandrö ba dödö zamösana föna Lowalangi… (Mangandrö zamösana sambil diiringi musik instrumen) Liturgos : Hakhösi dödö-U khöma Ama, ba be’e aefa khöma horöma andrö ma’afefu, Yaduhu! “NA UBINI’Ö HORÖGU KHÖ YESU” Jemaat : Manunö moroi ba Mbuku Zinunö No. 224 : 1 Liturgos : Utayaigö golalöwamö, si mane lawuo, awö horöu, si mane sau. Tema fuli’ö khö-Gu, me no U’orifi ndra’ugö” (Yesaya 44:22) Lakhömi khö Lowalangi si yawa! Jemaat : Manunö moroi ba Mbuku Zinunö No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalö moroi ba zura I Timoteo 1 : 12-17 12 U’andrõ saoha gõlõ khõ Keriso Yesu, So’aya ya’ita, sangabõlõ’õ ya’o, me no iwa’õ tõdõnia, lõ farõi ndra’õ, me ifataro ndra’o ba halõwõ andrõ, 13 ya’odo andre, sanandrawa fõna ba solohi ba sangosiwawõi; ba no falukhado wa’ahakhõ dõdõ, me lõ’õ na u’ila watahõgõ, me ulau da’õ, me lõ faduhu dõdõgu na. 14 Bo no fahõna wa’ebua dõdõ Zo’aya ya’ita andrõ, awõ wamati ba awõ wa’omasi andrõ, ba khõ Keriso Yesu. 15 Si ndruhu daroma li andrõ ba si nangea tafonaha manõ, wa no mõi ba guli danõ Keriso Yesu, ba wangorifi si so horõ; sebuara ndra’odo. 16 Ba andrõ tehakhõsi tõdõ ndra’o, ena’õ ba khõgu, ba zebua honõ andrõ, i’oigõ wangoroma’õ fa’ebolo dõdõnia Yesu Keriso, dumaduma ba zamati khõnia dania ba wanema fa’auri si lõ aetu. 17 Ba razo zi lõ aetu andrõ, si lõ tebulõ, si lõ oroma, Lowalangi si ha samõsa andrõ, ba nifosumange ba nisuno, irugi zi lõ aetu. Yaduhu. Ya’ahowu zamondrongo taroma Li Lowalangi ba same’e ba dödö (Luka 11:28) Jemaat : Yaduhu! FANGOWULOI FASÖMBATA Liturgos : Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si oföna ua da tafondrondrongo Li Lowalangi me imane: "Ba da’ö niwa’ögu: Na so zangatalisi tanömö, ba lö oya’oya ibasi, ba na so zi lö alimagö tanömö, ba oya göi ibasi dania. Ba balazi dödö zamösana; böi abu dödö, ba tenga niforege; si no aoha gölö fame’e, da’ö sa zomasi Lowalangi." (II Korindro 9:6-7) Tafa’ema föna wasömbata khö Lowalangi, ba manunö ita moroi ba Mbuku Zinunö No. 261 2. Ya’e zumange fasömbata ma be’e soroi ba dödöma. 3. Ya’e zumange fasömbata buala si’otarai Nama. 4. Ya’e zumange fasömbata, boto, noso, ba fa’aurima. 5. Ya’e zumange fasömbata, lö irugi zomasi dödö-U. 6. Ya’e zumange fasömbata, ma’aohasi gölö Zo’aya. Liturgos : Da tafasao wasömbatada andre föna Lowalangi, musindro ita fefu. [Koordinator Pelayan mangandrö. Na inötö wama'ema fasömbata Ni'ofulu, aefa wangandrö Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö No. 163 [Pengkhotbah Möi ba Mimbar] HUHUO SEBUA Pengkhotbah : Ya irorogö dödömi, awö gera’erami fa’ohahau dödö andrö, khö Lowalangi, sabölö moroi ba gera’era niha fefu, ba khö Keriso Yesu. Mangandrö ita...[Fangadrö Famokai Huhuo Sebua] Amin. Fombaso Taroma Li Lowalangi moroi ba zura Luka 15 : 11-32 11 Ba imane: So niha fõna, si so ono matua, darua. 12 Ba imane si akhi khõ nama: He ama, be’e khõgu dána khõgu gana’a andrõ. Ba ifaosa khõra zi so andrõ. 13 Ba lõ ara furi õ, ba i’ozaragõ fefu hadia ia si akhi nono andrõ no mege, ilau mofanõ, isawa danõ sarõu ba ba da’õ ihori gana’ania, manibo manõ ia. 14 Ba me no ihori fefu hadia ia, ba itõrõ lofo sabõlõbõlõ danõ andrõ ma’asagõrõ, ba ibõrõtaigõ lõ balazo khõnia. 15 Ba mõi ia mu’olembai niha ba danõ andrõ, samõsa, manga gazi; ba ifatenge ia da’õ ba mbenuania, ba wokubaloi bawi. 16 Ba omasi ia ifo’õsi dalunia lõlõ mbanio, õ mbawi, ba lõ same’e khõnia. 17 Ba i’era’era tõdõnia ba imane: Ha wa’ato zangai halõwõ khõ namagu, si lõ ambõ õ, ba ya’o, ba tekiko wa’olofo ba da’e. 18 Damaoso ndra’o, mõido khõ namagu ba umane khõnia: He ama! no ufazõkhi horõ ba zorugo ba fõnau, 19 tenga sa’ae si nangea lawa’õ onou ndra’o, akha hulõ zi manga gazi ndra’o khõu, samõsa. 20 Ba maoso ia, mõi ia khõ namania. Ba me arõu ia na, ba i’ila sa’ae ia amania, ba ahakhõ dõdõ, fagohi ia, italagui mbagi, fa’ago bawa ia khõnia. 21 Ba imane khõnia ono: He ama, no ufazõkhi horõ ba zorugo ba fõnau, tenga sa’ae si nangea lawa’õ onou ndra’o. 22 Ba imane ama ba zawuyunia: Mihalõ mbaru luo si sõkhi andrõ ba mibe’e barunia, mibe’e laeduru ba durunia ba badagahe ba gahenia, 23 ba mihalõ nono zawi nibula andrõ, mitaba ba ta’a, akha omuso dõdõda, 24 me no ifuli auri nonogu andre, si no mate, no elungu ia, ba no musõndra. Ba ibõrõtaigõ omuso dõdõra. 25 Ba no so ba nowi nononia si a’a. Ba me ifuli ia me ahatõ ia ba nomo, ba irongo wanuno ba folaya. 26 Ba humede ia khõ zawuyu, isofu khõnia hadia da’õ. 27 Ba imane khõnia da’õ: No so nakhiu andrõ, ba no ifataba’õ nono zawi nibula andrõ amau, me no mangawuli ia khõnia, me lõ si gõna ia hadia ia. 28 Ba mofõnu ia ba lõ edõna mõi ia yomo. Ba mõi tou namania, ifarou dõdõnia. 29 Ba itema li namania, imane: Hiza, ha me uga fakhe enoniu ndra’o, ba lõ urai usawo goroisamõ, ba khõgu lõ õrai õbe’e nono mbiribiri, ena’õ omuso dõdõgu, awõ zi fahuwu khõgu. 30 Ba me no so nonou andrõ, si no mangohori ana’ania, awõ zohorõhorõ, ba no õfataba’õ khõnia nono zawi nibula andrõ. 31 Ba imane khõnia: He onogu, si lõ tebulõ khõgu ndra’ugõ, ba hadia ia fefu zi so khõgu ba khõu. 32 Ba somuso tõdõ sa ita ena’õ, sowuawua tõdõ, me no ifuli auri nakhiu andrõ, si no mate; no elungu ia, ba no musõndra. Famotokhi Taromali Lowalangi Sinanö ba dödö tehalö moroi ba zura I Timoteo 1 : 14 Ba no fahöna wa'ebua dödö Zo'aya ya'ita andrö, awö wamati ba awö wa'omasi andrö ba khö Keriso Yesu. Fangandrö Fondruhö Wamotokhi Taromali Jemaat : Manunö moroi ba Mbuku Zinunö No. 154 TUHO WAMATI Liturgos : Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi, muzizio ita fefu... endronga lida: Ya’o mamati khö Lowalangi Ama si lö ambö fa’abölö, somböi banua si yaẅa awö danö. Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate. Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri si lö aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunö ita moroi ba Mbuku Zinunö No. 313 Ululu fefu wa’aurigu, amatöröwa Keriso Yesu. Usuno Ia si lö aetu, me solomasi Ia khögu. Ba manunödo soroi dödö usunoIa lö mamalö. Ba manunödosoroi dödö usuno Ia lö mamalö. FANGANDRÖ SALAHI + FAMATENGE + HOWUHOWU Pengkhotbah : Sumindro ita fefu, mangandrö ita: (tetohugö) "Ba döi Zo’aya ya’aga Yesu Keriso, si no mamahaö ya’aga ba wangandrö mamane:" Pengkhotbah + Jemaat : He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lö sökhi. Me ya’ugö zamatörö banua-U, ba sokhö fa’abölö, awö lakhömi, irugi zi lö aetu. Yaduhu. Pengkhotbah : Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi: Ya mufahowu’ö ami Lowalangi, Ya murorogö ami; Ya mufohaga mbawa-Nia khömi, Ya mu’ebua’ö dödö-Nia khömi; Ya mufalemba hörö-Nia khömi, Ya mubè’e wa’ohahau dödö khömi fefu. Yaduhu! Jemaat : Manunö moroi ba Mbuku Zinunö No. 313 : 3 Ube ndra’odo nifatörö, Geheha-Nia Ni’amoni’ö. Ba wombaloigu Yesu andrö, Ifahowu’ö lö mamalö. Ba manunödo soroi dödö usunoIa lö mamalö. Ba manunödosoroi dödö usuno Ia lö mamalö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***