2 Maret 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 2 Maret 2025 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua Zo’aya ni’omasi’ö ba döi Yesu Keriso, no tarugi migu nifotöi migu föna wamakao Yesu. Töi migu ma’ökhö andre, ya’ia da’ö: Estomihi eluahania Ngaluo si 50, föna wemaoso Yesu. Ma’owai ami, ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 1 Ya’ahowu dozi niha, samati khö Yehowa. Sanötöna fangorifi, ba döi Yesu So’aya. Saro tödö ba da’ö, fa’auri dötönafö. Yehowa zamokai hörö, ba samè khöda haga. Ibönökhi göi wame’e, fefu zoguna khöda. Lö manö faröi Ia, ba nifabu’u-Nia. Salawa yawa Zalawa, Lowalangi Yehowa. Andrö ta’o’ö li-Nia, lö manö baero-Nia. No so Ia ba khöda, Haleluya khö-Nia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Fõkhõda nilu’i-Nia ba no Ihare’õ khõ-Nia zafõkhõ khõda; ba ba dõdõda, ba ni’otu’õ Ia, nibõzibõzi Lowalangi ba nifakao. Ba no lalõda sa mbõrõ, wa tefesokho Ia, ba horõda mbõrõ, wa terasa Ia. Ya’ia zolu’i huku, ena’õ sohahau tõdõ ita, ba moroi ba zokho-Nia, wa no dõhõ wõkhõda. HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 225 Imane Yesu So’aya, sangorifi ya’ita. Falalini gera’era, ogorofi zisala. Aine khö-Gu zamösana, ba wangandrö fangefa. Ba Ya’odo zamè aefa, fefu ngawalö zala. He samati, ta’ondrasi, zangorifi ya’ita. Ibè ohahau dödöda, götögötö wa’ara. Ifotötönafö ita, fa’omasi Zo’aya. Ni’amualagö Nama, ba zamati khö-Nia. Yesu zanguma’ö khöda, Ifabu’u li-Nia. Lö tasöndra wangorifi, na abe’e dödöda. Na lö tebohouni dödö, wamöhöi olalöwa. Si tekiko sa’ae ita, lö tatema wangefa. Da ta’atulö’ö ita, ba khö nawöda niha. Si fao fangidengide’ö föna Yesu So’aya. Na no ta’o’ö li-Nia Ifahowu’ö ita. Ba sahono tödö ita, irugi gamozua. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura II Moze 20 : 1-17 1 Ba iwa’õ daroma li andrõ fefu Yehowa, imane: 2 Ya’odo Yehowa Lowalangiu, si no mangeheta ya’ugõ ba danõ Miserayi andrõ, ba zi no mõi sawuyu ami. 3 Bõi so khõmõ Lowalangi tánõ bõ’õ, baero ndra’o. 4 Bõi fazõkhi khõu nadu, ba he famaedo hadia ia, he si so si yawa ba mbanua, ba he si so si tou ba guli danõ, ba he si so ba nidanõ, barõ danõ. 5 Bõi angalulu khõnia ba bõi fosumange ia, me no Lowalangi solohu ndra’o, ya’odo andre, Yehowa, Lowalangiu, sanguhuku horõ ndra ama ba ndraono ba ba ma’uwu mitou, khõra si fatiu tõdõ khõgu, 6 ba si hakhõsi tõdõ sangomasi’õ ya’o ba solo’õ oroisagu; irugi hõnõ nga’õtõ. 7 Bõi tõtõi dõi Lowalangiu Yehowa ba waya; lõ’õ sa zi lõ ihuku Yehowa zanõtõi tõinia ba waya. 8 Ame’egõ tõdõ luo wolombase andrõ, ba we’amoni’õ ya’ia. 9 Õnõ ngaluo mohalõwõ ndra’ugõ ba õhalõ halõwõu fefu. 10 Ba ero fitu bongi, ba luo wolombase khõ Lowalangiu Yehowa; bõi babaya hadia ia halõwõ ba da’õ, he ya’ugõ, ba he onou matua, ba he onou alawe, ba he sangai halõwõ khõu ira matua ba he sangai halõwõ khõu ira alawe, ba he urifõu, ba he si fatewu khõu ba mbanuami bakha. 11 Õnõ ngaluo sa mege khõ Yehowa, ba wamazõkhi banua si yawa, awõ danõ, awõ nasi, awõ nõsira fefu; ba ba luo si fitu, ba no molombase ia. Andrõ wa no ifahawu’õ luo si fitu andrõ Yehowa, ba no i’amoni’õ. 12 Fosumange namau, awõ ninau, ena’õ anau nosou ba danõ, nibe’e Lowalangiu Yehowa khõu. 13 Bõi ange’e. 14 Bõi ohorõ. 15 Bõi anagõ. 16 Bõi bõbõgõ khõ nawõu zi lõ duhu. 17 Bõi isõ nomo nawõu. Bõi isõ wo’omo nawõu ba he sangai halõwõ khõnia ira matua, ba he sangai halõwõ khõnia ira alawe, ba he õrõbaonia, ba he kudonia, ba he hadia ia, fefu, nibayabaya nawõu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. Ma ondrasi Ndra’ugö ba nahia ni’amoni’ö Ya’ugö si fahöna fa’ahakhö dödö andrö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, irege sohahau tödö ndra’aga wanohugö fekolima ba zi so fönama ba wamalua somasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura II Korindro 3 : 12-4 : 2 12 Ba me no so khõma wanõtõna si manõ, ba no a’oi so wa lõ aiwõ ndra’aga. 13 Ba tenga si mane Moze, sombalugõ bawania, fa bõi lafaigi Iraono Gizeraëli andrõ gamozua zi taya andrõ. 14 Ba no mu’abe’e’õ dõdõra; irugi ma’õkhõ andre, ba lõ saheta mbalubalu andrõ, ba wombaso sura gamabu’ula li si fõfõna andrõ, lõ muheta, me ba khõ Keriso aheta ia. 15 Ba irege ma’õkhõ andre, na labaso zura Moze andrõ, ba no so mbalubalu ba dõdõra. 16 Ba na lafuli ira khõ Zo’aya, ba aheta mbalubalu andrõ. 17 Ba So’aya Geheha andrõ; ba ba zi so Eheha Zo’aya andrõ, ba da’õ so wangefa. 18 Ba ya’ita fefu, ba ta’ila’ila lakhõmi Zo’aya andrõ, lõ balubalu mbawada; hulõ na ba zõrõmi, ba tobali ita, i’ohia’õ wamaedo da’õ, tedou lakhõmi safuria moroi ba lakhõmi si fõfõna, moroi khõ Geheha Zo’aya andrõ. Faza 4 : 1 Andrõ: me no mufataro ndra’aga ba halõwõ andrõ, dali wa’ahakhõ dõdõ andrõ, si no falukha ndra’aga, ba lõ ma’ila wa’ata’u; 2 noa sa matimba wamini andrõ, ba wa’aila andrõ, me lõ matõrõ walimosa, ba me lõ mafuyu’õ daroma li Lowalangi; mafaduhu’õ ndra’aga ba dõdõ niha fefu, fõna Lowalangi, wama’ele’õ si duhu andrõ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura II Moze 34 : 29-35 29 Ba me mõi mitou Moze moroi ba hili Zina’i, ba so ba dangania zura goroisa andrõ, si dua gõrõ; ba lõ i’ila, wa no tobali sihaga guli mbawania, ba wahuhuosania khõ Yehowa. 30 Ba me la’ila A’aroni ba Iraono Gizeraëli fefu mbawa Moze, wa no sihaga, ba ata’u ira lahatõ’õ ira khõnia. 31 Ba humede khõra Moze, ba lafuli la’otahõgõ ia, he A’aroni ba he satua mbanua fefu; ba fahuhuo khõra Moze. 32 Awena la’ondrasi ia Iraono Gizeraëli fefu. Ba i’ombakha’õ khõra goroisa andrõ fefu, ni’oroi’õ Yehowa khõnia ba hili. 33 Ba me no i’o’ozui Moze huhuonia khõra, ba ifobalubalu mbawania. 34 Ba ero na i’ondrasi Yehowa Moze, ba wahuhuosa khõnia, ba iheta mbalubalu andrõ, irege mõi ia baero, ba ifa’ema ba Ndraono Gizeraëli hadia niw~a’õ khõnia. 35 Ba ero na si manõ, ba la’ila Iraono Gizeraëli, wa no sihaga guli mbawa Moze. Ba ifuli dania ifobalubalu mbawania Moze, irege mõi ia bakha zui, ba wahuhuosa khõ Yehowa. Famotokhi Taromali Lowalangi Sinanõ ba dõdõ tehalõ moroi ba zura II Korindro 3 : 16 Ba na lafuli ira khö Zo'aya ba aheta mbalubalu andrö. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 151 Fondrondrongo li Zo’aya, Ikaoni ita. Fefu gomusola dödö Ibe’e khöda. Ba fefu golalöwa oi I’atulö’ö sa. Na solo’ö Yesu ita lö sa te’ala. Fondrondrongo li Zo’aya, sihede khöda. Dozi si lö mamonaha, a’oi te’ala. Lö a’ozu latema, mbuala soroi Nama. Fa’auri so’ahonoa, götö wa’ara. Fondrondrongo li Zo’aya, fangorifida. Ya so wa’anau gölöda, ba wasöndrata. No fahöna wangala, sanaisi era’era. Da tatöngöni Zo’aya, me kubaloda. Fondrondrongo li Zo’aya, fangabölöda. Afu oi oroma khöda, zindruhu lala. Fefu niwa’ö-Nia, ta’o’ö, böi tatimba. Me no li si’oroi Nama, si fao Eheha. Fondrondrongo li Zo’aya, no femönada. He afökhö ba wolo’ö, böi faröi ita. Me lö aekhu gölöda, na sanau ölö ita. Me no Ifabu’u khöda, Ibè wemöna. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 17 Fondrondrongo wanunögu, fangandrö saohagölö. Sandrohu sa fa’aurigu, lö si faröi Ndra’ugö. Andrö utanö ba dödö, lö manö u’olifugö, nilau Yehowa khögu. He Lowalangi, fasaodo, ba döröwagu fefu. Ba zi toröi wa’aurigu, ya fao awögu Yesu. Fa lö ubato wanuno, ufolakhömi Yehowa, irugi zi lö aetu. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***