9 Maret 2024 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 9 Maret 2025 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso ni’omasi’ö Zo’aya ya’ita Yesu Keriso. No tarugi migu Wanõrõ tõdõ Famakao Yesu ma’õkhõ, ma’owai ami: Ya’ahowu ami fefu, ya faofao khömi Lowalangi! Jemaat : Ya'ahowu! Ya fao khõu Geheha-Nia! FOGAONI Liturgos : Da ta honogö dödöda wangondrasi Yehowa, da ta’erönusi tödöda wamakao si no itaögö So’aya ya’ita Yesu Keriso, manunõ ita moroi ba Mbuku Zinunõ No. 14 He So’aya, sebua tödö Ndra’ugö khöma, ma’andrö saohagölö ia khö-U. Masuno Ndra’ugö, masuno Ndra’ugö. Ha Ya’ugö, zangomasi’ö, ya’aga fefu, ba sangatulö niha khö Nama. Sangatulö niha, sangatulö niha. He tödögu, böi olifu’ö, zi sökhi fefu, si no Ibe’e Yesu So’aya. Fa’omasi-Nia, fa’omasi-Nia. Lö tesöndra, ba gulidanö, si mane Yesu, solohe fefu niha khö Nama Ba lakhömi-Nia, ba zorugo yawa. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Na i’angarõfi li Ndra’o, ba Ufondrondrongo khõnia, awõnia Ndra’o ba wamakao; U’efa’õ ia ba teturia ia Ube’e. U’abusoi’õ ia fa’anau noso, ba anehe ia wangorifi andrõ khõ-Gu Ube’e. (Sinunö 91:15-16) HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi, si no umbu howuhowu ba fa’auri. Itörö tödöma wamakao Zo’aya ya’aga Yesu Keriso, No Ölulu nono-U omasiö ba danga zokhö horö: te’o’aya, tefakao, teforöfa ba mate börö horöma. Fahaö ndra’aga, fa’aboto ba dödöma ngawalö horö si no mafalua. Abölö’ö ndra’aga wolawa fa’abölö nösi, ena’ö mo’ahonoa ndra’aga ba wamalua somasi Nama, ba khö Zo’aya ya’aga Yesu Keriso ba ba Geheha Ni’amoni’ö, Yaduhu!" Mudadao Zato Liturgos : Manunõ ita moroi ba Mbuku Zinunõ No. 320 Asese so zangaröngarö, nifobörö gisö’isö. Me lö lafuli khö Yehowa, wa lö lingalinga dödö. Andrö fefu da tasao’ö, gakaolada ba wangandrö. So göi zanahigö So’aya, na tohare wanandraigö. Me lö latema ni’andröra, ohitö dödöra andrö. Tani Yehowa ba da’ö, afu so wanaha tödö. Yehowa sa zamo’ana’a, ba sama’anumana göi. Ba Ya’ia zangöhöndrögö, ba same’e salawa göi. Me oi I’ila gaekhuta, zi lö na mufoböröta. Ibè gomusola dödöda, afu aro wamatida. Ibè wa’ohahau dödöda, ena’ö lö faröi ita. Na no oföna tasöndra, wa’abanua Zo’aya. Andrö dozi manunö ita, wanuno Lowalangida. Me no satulö wolau-Nia, ba wamatörö ya’ita. Oi si sökhi lualua, gohitö dödö Yehowa. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Gesitera 5 : 1-8 1 Ba me no aefa dua wongi, ba i’obaru mbaru wo’omo razo Esitera, ba i’agõ golayama tánõ bakha, ba gõdo razo, ba gamaudu gõdo, me no dumadao ba dadaoma razo khõnia razo, yomo ba gõdo, ba gamaudu mbawandruhõ ba gõdo. 2 Ba me i’ila wo’omonia Esitera, tou ba golayama, razo, ba ebua dõdõnia khõnia, ba i’oro’õ khõ Gesitera zi’onia ana’a, si so ba dangania, razo. Ba i’ondrasi Esitera, ibabaya mbalõ zi’o. 3 Ba imane khõnia razo: Hadia khõu, fo’omo razo, Esitera, hadia ni’andrõu? He irege zi matonga gamatõrõwagu, ba latehe khõu! 4 Ba imane Esitera: Na atulõ khõ razo, ba yamõi manga khõgu ma’õkhõ, awõ Hamano, ba gõ andrõ, si no u’asiwai khõnia. 5 Ba imane razo: Mita’ita’i mihede khõ Hamano, ena’õ ma’o’õ zomasi Gesitera! Ba me no so razo, awõ Hamano, ba wemanga gõ andrõ, ni’asiwai Gesitera, 6 ba imane razo khõ Gesitera, me ibadubadu nagu razo: Hadia ni’andrõu, ena’õ labe’e khõu? Hadia zomasi’õ? He irege zi matonga gamatõrõwagu, ba latehe khõu! 7 Ba itema linia Esitera, imane: Da’õ ni’andrõgu ba da’õ zomasido: 8 na no falukhado wa’ebua dõdõ, wamaigi razo, ba na omasi razo ibe’e ni’andrõgu ba itõrõ khõgu zomasido, ba yamufuli mõi manga khõgu razo, awõ Hamano, ba gõ andrõ, ni’asiwaigu khõra dania, ba mahemolu u’o’õ niwa’õ razo. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Ama, Lowalangima sebua fa’omasi. Masuno ba ma’angaröfili Ndra’ugö Yehowa. Möiga ma’ondrasi Ndra’ugö ba nahia ni’amoni’ö, ya’aga niha si no ra’iö. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. No ambö ndra’aga ba wangomasi’ö Ya’ugö soroi dödö. Asese olifu ndra’aga wangandrö saohagölö ba howuhowu-Mö si no matema, ba no arörö ndra’aga ba gisö’isö dödö ba guli danö andre. Si tekiko ndra’aga ba horöma. Andrö ha fa’ahakhö dödö Nama ni’andröma. Bologö dõdõ-U khöma ba be’e aefa khöma horöma, Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Si manõ sa wa’omasi Lowalangi nõsi gulidanõ, no Ibe’e Nono-Nia andrõ, si ha sambua, ena’õ lõ tekiko dozi samati khõ-Nia, ena’õ so khõra wa’auri si lõ aetu (Yohane 3:16) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Luka 7 : 1-10 1 Ba me no i’o’ozui fefu huhuonia, nifondrondrongo niha, ba mõi ia miyomo ba Gafanauma. 2 Ba so zofõkhõ, onali mate, sawuyu gumandra, somasi ia. 3 Ba me irongo Yesu sokhõ, ba ifatenge khõnia zatua niha Yehuda, ifa’andrõ’õ khõnia, ena’õ mõi ia mu’orifi zawuyunia. 4 Ba me falukha ira Yesu, ba laforege wangandrõ khõnia, lamane: Tola sa õ’o’õ khõnia da’õ; 5 me no sangomasi’õ ya’ita, ba no ya’ia zolau khõda omo zekola andrõ. 6 Ba mõi Yesu, fao ia khõra. Ba me no ahatõ sa’ae ia ba nomo, ba ifatenge zi fahuwu khõnia kumandra andrõ, imane: He Tua! bõi akao ndra’ugõ, ambõ sa ndra’o, mõi’õ ba nomogu. 7 Andrõ gõi uwa’õ tõdõgu, tenga si nangea mõi ndra’o khõu; ba hede manõ ha sambua li, ba dõhõ wõkhõ zawuyugu. 8 Ya’odo gõi, ba no niha, si so barõ mbawa zalawa ndra’odo, ba so barõ mbawagu zaradadu, ba na umane ba zi samõsa: Ae’e, ba mofanõ ia, ba ba zi samõsa: Aine, ba i’ondrasido; ba na uwa’õ khõ zawuyugu: Halõwõu da’õ, ba ihalõ. 9 Ba me irongo da’õ Yesu, ba ahõlihõli dõdõnia khõnia, ba ibali’õ ia ba niha sato, solo’õ ya’ia, imane: Uwa’õ khõmi, ba Ndraono Gizeraëli na i, ba lõ nisõndragu famati si manõ. 10 Ba me mangawuli ba nomo zinenge no mege, ba no dõhõ wõkhõ zawuyu andrõ, fõnara. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Roma 10 : 16-21 16 Ba lõ dozi la’o’õ turia somuso dõdõ andrõ. Imane sa Yesaya: ”He So’aya, ha niha zi faduhu tõdõ ba duria andrõ khõma?” 17 Tobali moroi ba duria wamati andrõ, ba turia andrõ, ba moroi ba daroma li Keriso. 18 Ba da’õ niwa’õgu: Hadia, lõ nirongora? Noa sa: ”No itõrõ danõ ma’afefu lira, ba no irugi wondrege guli danõ niwa’õra andrõ.” 19 Ba da’õ niwa’õgu: Hadia lõ saboto ba dõdõ Ndraono Gizeraëli? Moze zi ofõna manguma’õ: ”Afõkhõ dania dõdõmi, ube’e, ba mbanua si tenga banuagu, ba mofõnu ami ba mbanua sambõ ere’era, ube’e.” 20 Ba lõ alawõ Yesaya ba imane: ”No lasõndra ndra’o si lõ mangalui ya’o, no to’ele ndra’o ba zi lõ manofu ya’o.” 21 Ba ba Ndraono Gizeraëli, ba imane: ”Ma’õma’õkhõ manõ no u’oro’õ dangagu ba mbanua si lõ mamondrongo li, si lõ edõna molo’õ.” Famotokhi Taromali Lowalangi Sinanõ ba dõdõ tehalõ moroi ba zura Roma 10 : 17 Tobali moroi ba duria wamati andrö, ba turia andrö, ba moroi ba daroma li Keriso. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 148 Ha samonaha li Yesu, da’ö dana khö-Nia. Ba falukha howuhowu, götögötö wa’ara. He fahöna wangala, lö iröisa So’aya. Ba na so zi lö ba dödö, li Zo’aya ya’ita. Tehare’ö khöra wönu, irugi nga’ötöra. Alimagö sa niha, sangerogöSo’aya. Da ma’andrö khö-U So’aya, sangorifi ya’aga. Bè Geheha samohouni, era’era dödöma. Ya’ugö zawatöma, irugi gamozua. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 210 Mamatido khö-U Yesu, he fahöna wanandraigö. Wa lö Ölulu ndra’o, ba ngawalö zagafökhö. Andrö wa lö ubato, wangandrö soroi dödö. Mamatido khö-U Yesu, fatörö manö ndra’odo. Ba zomasi Ndra’ugö, gofu heza Ö’ohedo. Me lö sanolo ya’o, baero Yesu Keriso. Mamatido khö-U Yesu, lö manö uröi Ndra’ugö. Botogu, fa’aurigu, ba danga-U manö utou’ö. Kubalogu Ndra’ugö, fasaodo ba zawatö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***