26 Desember 2024 (Bahasa Nias)

Download Tata Ibadah (DOC)

Download Tata Ibadah (PDF)

Kamis, 26 Desember 2024 (Natal Ke-2) [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ma’owai ami fefu ba döi Zo’aya ya’ita Yesus Keriso, nitörö tödöda Fa’atumbu ba zi ma’ökhö andre. Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 61 Hewa’ae ha ba kandra, to’ele’Ö föna. Ba no sa solakhömi, si’otarai Nama. Yesu, Yesu, si’otarai Nama. Ba dozi sangondrasi, simöi mangalulu. Fefu oi mo’urakha, tobali tana khö-U. Yesu, Yesu, tobali tana khö-U. Andrö Öröi lakhömi, we’amöi ba khöma. Folo’ö-Mö li Nama, tobali hölima. Yesu, Yesu, tobali hölima. Fondrege wa’asökhi, we’aso Zo’aya. Solohe fangorifi, ba niha fefu sa. Duhu, duhu, ba niha fefu sa. Lö uröi’Ö Keriso, ba u’o’ö li-Mö. He auri, he matedo, Ya’ugö zawatö. Duhu, duhu, Ya’ugö zawatö. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : Tumbu dania khõda nono, tebe’e khõda nono matua; tebe’e ba galisi-Nia wamatõrõ ba tebe’e tõi-Nia Zahõlihõli dõdõ ba Samolala tõdõ ba Lowalangi sabõlõ, ba Ama zi lõ aetu ba Salawa wa’atulõ. (Yesaya 9:6) HALELUYA! Liturgos : Mangandrõ ita, "He Lowalangi Ama khöma, si so ba zorugo! Masuno Ndra’ugö ba ma’andrö saohagölö-U, me no Öfatenge khöma Nono-U Yesu Keriso, si no tobali ösi niha, ba wangorifi ya’aga. Ma’andrö khö-U, be’e ohahau dödöma iada’a ba wanörö tödö fa’atumbu-Nia, ba be’e aboto ba dödöma, wa khöma sibai manandrösa halöẅö-Nia. Ondrasiga göi bongi, si mane me Öfatenge mala’ika sangondrasi ira kubalo luo no; foloi ba dödöma zogömigömi, ba angali’ö haga-Mö andrö, afu tola ma’omasi’ö era’erama zomasi dödö-U, he ba nirongoma, he ba ni’ila höröma, ena’ö tobali fondrou’ö wangaro’ö famatima khö-U, ba ba khö Nono-U, Yesu Keriso. He So’aya! Tolo dozi sangomasi’ö fa’ato’ele-Mö, awö dozi sihulu tödö ba wombalombaloi inõtõ we’aso-Mõ ba luo safuria, ena’ö falukha ira wondrara dödö. Ondrasi göi zofökhö si tebai mangondrasi omo-Mö, ba rara dödö zi numana, sangaröngarö, si göna abula dödö, si tosasa, awö zi so ba gurunga, mendrua manö nifakao gafökha. Tologa Eheha-Mö andrö, ena’ö oi te’orifi ndra’aga fefu ba gamozua. Yaduhu!" Mudadao Zato Liturgos : Manunõ ita moroi ba Mbuku Zinunõ No. 65 No terongo meföna, wanunö mala’ika. Me momöi wangombakha, fa’atumbu Mesia. Andrö omuso dödö niha bagulidanö. Me so Yesu sangefa’ö ba horö. Ba no möi ndra kubalo, me no aefa larongo. Wa no tumbu Mesia, Ono Lowalangida. Andrö omuso dödö niha bagulidanö. Me so Yesu sangefa’ö ba horö. No oroma madala, khö gere gatumbukha. Aboto ba dödöra, wa no tumbu Zo’aya. Andrö omuso dödö niha bagulidanö. Me so Yesu sangefa’ö ba horö. Simeoni ba Hana, zombase’ö So’aya. Ba terara dödöra, me no la’ila Ia. Andrö omuso dödö niha bagulidanö. Me so Yesu sangefa’ö ba horö. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Amosi 9 : 11-15 11 Ba na luo da’õ, ba ufuli utaru’õ nose Dawido andrõ, si no adudu, ba ufuli u’a’azõkhi zadudunia; adudulania, ba ufuli ufasindro, ba ufuli u’otomosi, si mane ba gõtõ fõna. 12 Ena’õ labe’e barõ mbawara zi tosai Iraono Gedomo, ba soi bõ’õ fefu, ba nitõtõi tõigu mege — iwa’õ Yehowa, solau da’õ dania. 13 Ba irugi bawa dania, iwa’õ Yehowa, ba ikhamõ zamasi samaku, ba ikhamõ zolazi bua nagu sanaru; ba mowõi õsi nagu hili misa, ba mangulu hilihili fefu. 14 Ba ufuli u’azõkhi mbanuagu Iraono Gizeraëli, ba tobali na lafuli lataru’õ mbanua si no adudu, ba la’onahia gõi, ba na lafazõkhi kabu nagu, ba labadu gõi nõsi mbua, ba na latanõ geu sowua, ba la’a gõi mbuania. 15 Ba amaedola utanõ ira ba danõra, fa bõi sa’ae adeha ira ba danõra andrõ, nibe’egu khõra, iwa’õ Yehowa, Lowalangiu. Si manõ daroma Li Lowalangi, da tatema’õ faoma sinunõ moroi ba Mbuku Zinunõ No. 20 : 1 FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "He Lowalangi sebuasi so ba zorugo yaẅa, aboto ba dödöma,wa no Öfatenge khöma Nono-U Yesu Keriso ba wangefa’ö horöma. Ma’andrö khö-U tologa, heta ba dödöma ngawalö zi lö sökhi, si no amaedola hili salaẅa, ba si no amaedola mbawa danö sabakha, ena’ö monahia ba dödöma Zangorifi andrö, ba wamahaö ya’aga wamalua somasi Ndra’ugö., Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Böi mi’ata’ufi, hi za sa, uturiaigö khömi wa’omuso dodo sabölöbölö, sirugi niha fefu dania, me no tumbu khömi Zangorifi andrö bongi andre, Keriso So’aya, ba mbanua Dawido. Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura Tito 3 : 4-7 4 Ba me no to’ele wa’asõkhi dõdõ Lowalangi, sangorifi ya’ita, awõ wa’omasinia niha, 5 ba no i’orifi ita, tenga moroi ba mbuabuada, ba wa’atulõ dõdõ, balazi wa’ahakhõ dõdõnia andrõ, ba wemondri andrõ, ba wa’atumbu si bohou, ba ba wamohouni andrõ, khõ Geheha ni’amoni’õ, 6 nihõnania khõda, wolau ya’ia, nifa’ema Yesu Keriso, sangorifi ya’ita; 7 ena’õ satulõ ita, iwa’õ Lowalangi, moroi ba wa’ebua dõdõnia, ba tõtõnafõda gondrõita andrõ, fa’auri si lõ aetu. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Sinunö 98 : 1-9 1 Mi’anunõ khõ Yehowa, sinunõ si bohou! Noa sa ilau zahõlihõli dõdõ, no itolo ia kambõlõnia, ta’ionia ni’amoni’õ andrõ. 2 No ifarongogõ Yehowa wangorifi andrõ khõnia; ba zanehe niha baero andrõ ifa’ele’õ wa’atulõnia andrõ. 3 No itõrõ tõdõnia wa’ebua dõdõnia andrõ, awõ wa lõ si farõi ia ba ma’uwu Gizeraëli; no la’ila wangorifi andrõ khõ Lowalangida fondrege danõ fefu. 4 Mi’owuawua’õ dõdõ, ya’ami dozi tanõ! Mi’a’iki ba mi’anunõ! 5 Misuno Yehowa, milau mbiola nitika, sebua, milau mbiola ba mifao li wanunõ! 6 Milau dorofe side’ide, awõ dorofe nidõdõni, mi’owuawua’õ dõdõmi tánõ fõna razo andrõ, Yehowa! 7 Ya mu’ugu’ugu nasi, fabaya õsinia, ba uli danõ andre, awõ zowanua ba detenia. 8 Ndramulau datawõ boto nidanõ andrõ ba ya owuawua dõdõ hili, fefu. 9 Tánõ fõna Yehowa; so ia sa moroi sa, ba wanguhuku uli danõ. I’atulõ’õ wanguhuku uli danõ ba ifatõrõ ba niha baero zadõlõ. Famotokhi Taromali Lowalangi Sinanõ ba dõdõ tehalõ moroi ba zura Sinunö 98 : 2a No ifarongogõ Yehowa wangorifi andrõ khõ-Nia. Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 66 Razo Wa’auri ba si lö faröi. Fondrege zalawa, Itehe numana, Iröi lakhömi. Duhu, Iröi lakhömi. Oi lö sangila me tumbu Ia. Ha ira kubalo ba mbenua, zi’oföna mangila. Duhu, la’ila Ia. No möi ba khöra ndra mala’ika. Ba wangombakha, wa no tumbu ba kandra, zotöi Mesia. Duhu amabu’ula. Mitabu fefu, tafaigi Yesu. Ta’ondrasi Ia, tabe’e khö-Nia, dödöda fefu. Duhu, fao fangalulu. Ya’e dödögu, ubè khö-U, Yesu. Fefu wa’aurigu awö zi so khögu, ubè ba danga-U. Duhu, ya möi sumange-U. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 67 Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***