12 Januari 2025 (Bahasa Nias)

Download Tata Ibadah (DOC)

Download Tata Ibadah (PDF)

Minggu, 12 Januari 2025 [Tedõni dorosi, mõi ndra sohalõwõ bakha ba gosali, ba lahalõ wangahono dõdõ banua niha Keriso ba wangondrasi ba ba wasumangeta khõ Lowalangi] FANGOWAI BA FOGAONI FANGOWAI Liturgos : Ya’ami banua niha Keriso, ba wondrugida migu Epifania andre, ma’owai ami fefu ba döi Zo’aya ya’ita Yesu Keriso, Ya'ahowu! Jemaat : Ya'ahowu! Liturgos : Yafao-fao khõmi Lowalangi! Jemaat : Ya fao khõu Geheha-Nia! FOGAONI Liturgos : Da ta’owuawua’õ dõdõda wangondrasi Yehowa, da ta’omusoi’õ dõdõda ba wamalua fasumangeta khõ Lowalangi. Tasuno Ia, manunõ ita moroi ba Mbuku Zinunõ No. 12 Lasuno banua yawa, zi no fondrege yawa. Ba ulidanö ölia, fao awö nösinia. Lasunosuno Zabölö, Somböi ya’ira, ba Sokhö, andrö tasuno Ia. Niwöwöi Lowalangida, Ifaigi, Irorogö. Ilumö’ö tanga-Nia, ba wa’omasi-Nia. Dozi solo’ö li-Nia, la’omasi’ö nawöra, andrö tasuno Ia. Ta’angaröfi li Ia, me lö lala dödöda. Tafati wa Ifolala, Ibe wangorifida. Sabölö ba Samatörö, So’aya, Sangomasi’ö, andrö tasuno Ia. Lö faröi Lowalangida, faofao sa Ia khöda. Ya’ia lembalembada, ba lala wekolida. Tödö nama dödö-Nia, no Ifa’ele’ö khöda, andrö tasuno Ia. Sagötö fa’auri andre, tafosumange Ia. Ya lö tebato wanunö, ndra wondrondrongo niha. He iya’e, he dania, ba lö awu’a li-Nia, andrö tasuno Ia. FANGA’ARO’Õ WA’OWULO (VOTUM) Liturgos : Da tahonogõ dõdõda ba wariawõsa, ba ba wa ha sambua khõ Lowalangi, muzizio zato. No owulo ita ba da’e, ba dõi Lowalangi Ama, ba ba dõi Nono-Nia Yesu Keriso, ba ba dõi Geheha Ni’amoni’õ. Fangorifida ha ba dõi Yehowa si no mombõi banua si yaẅa awõ danõ! Jemaat : Yaduhu! Liturgos : He Yehowa, farongogö khögu lala ba wa’auri andrö: no fahöna wa’omuso dödö föna-U, ba ba gambölö-U so wa’ohahau dödö si lö mamalö. (Sinunö 16:11). HALELUYA! Liturgos : Mangandrõ ita, "He Yehowa Lowalangi, Ama sahakhö tödö ba sebua fa’omasi. Ma’andrö saohagölö me no Öheta ndra’aga moroi ba wa’abölö zogömigömi, no Ö’ohe ba haga, börö Zo’aya ya’aga Yesu Keriso. Ya Eheha-U Ni’amoni’ö zanuturu lala khöma, ena’ö si tedou ba saro ndra’aga ba wamati, ba si lö faröi ndra’aga ba wango’aurifagö fa’omasi irugi gamozua götö danö andre, Yaduhu!" Mudadao Zato Liturgos : Manunõ ita moroi ba Mbuku Zinunõ No. 82 No Itutuyu ndra nifaha’ö, ba wanohugö halöwö. Ifaha’ö ira ba wamati, lala wanöndra fa’auri. Ibè khöra duria somuso dödö, ba wanema fangatulö. Oya dandra si no Ifalua, wangoroma fa’abölö. Si’otarai zorugo si yawa, fa’abölö soroi Nama. Ifadöhö zofökhö, ba wangefa’ö si tefakao börö horö. He So’aya, mangandrö ndra’aga, a’aro’ö wamatima. Efa’ö khöma ngawalö horö, samakiko fa’aurima. Böi tehegö te’ala, omusoi’ö dödö wogamö sahono dödö. Yesu ibe’e goroisa-Nia, wangomasi’ö Yehowa. He göi fangomasi’ö awöda, samati ba khö Zo’aya. Ma’andrö khö-U So’aya, sasai dödöma, do-Mö sangele ba röfa. He ya’ita banua Zo’aya, da talulu wa’aurida. Tabè nihaogö Yesu So’aya, afu möi sumange-Nia. Ena’ö dozi ita tasöndra wa’auri, si’oroi khö Lowalangi. FOMBASO TAROMALI LOWALANGI (AMABU'ULA LI SIFÕFÕNA) Liturgos : Da tafondrondrongo daroma Li Lowalangi, tehalõ moroi ba zura Sinunö 40 : 1-6 1 Khõ duka wanunõ andrõ. Khõ Dawido. Sinunõ. 2 Lõ nibõhõigu fanõtõna khõ Yehowa, ba no ihatõ’õ ia khõgu ba no ifondrondrongo we’aogu andrõ. 3 No idõni yawa ndra’odo, moroi ba gohokoho famakiko andrõ, moroi ba dambu sombuyu; ba no ifonaha gahegu ba dete gara ba no i’abe’e’õ mbekagu. 4 Ba no ibe’e ba mbewegu zinunõ si bohou, fanuno Lowalangi andrõ. Ato zangila, ba ata’u, ba manõtõna khõ Yehowa. 5 Ya ahowu niha same’e tõtõnafõnia Yehowa ba si lõ mõi ba zi fayawa ba ba zamahole’õ ya’ira ba waya. 6 Oya ngawalõ zahõlihõli dõdõma khõu ba era’erau, nifatõrõu khõma, ya’ugõ Yehowa, Lowalangigu; lõ hadia ia zi fagõlõgõlõ khõu! na lafatunõ ena’õ, na itõrõ li, ba abõlõ oya, tebai lazarazara. Si manõ daroma Li Lowalangi, da tatema’õ faoma sinunõ moroi ba Mbuku Zinunõ Numero 86:4 TASUNOSUNO ZO'AYA FANGANDRÕ FANGEFA HORÕ Liturgos : Ya’ami ira talifusõ, Na taŵa’õ lõ horõda, ba talimo ita, ba si duhu lõ’õ ba dõdõda. Na ta’ombakha’õ horõda, ba lõ farõi Ia, ba no satulõ Ia, fa I’efa’õ khõda horõ andrõ, Ihaogõ ita, awõ wa Iheta fefu zi lõ atulõ. Andrõ da mõi ita fõna Lowalangi si fao fangidengide’õ ba wangombakha horõda, muzizio zato. Mangandrõ ita, "Masuno ba ma’angaröfi li Ndra’ugö Yehowa, Ama khöma si so ba zorugo, ba khö Yesu Keriso sangorifi. No sebua fa’omasi Ndra’ugö khöma götögötö wa’ara. Ma’ondrasi Ndra’ugö ba nahia ni’amoni’ö ba wangalulu ba ba wangandrö saohagölö, ba howuhowu si no falukha ndra’aga. Mafaduhu’ö wa tenga si nangea ndra’aga tanö föna-Mö, me no fahöna horö si no mafalua, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dödö-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima si faudu ba zomasi Ndra’ugö. Yaduhu!" Jemaat : Manunõ moroi ba Mbuku Zinunõ No. 224 : 1 Liturgos : Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ” (Yesaya 44:22) Lakhõmi khõ Lowalangi si yawa! Jemaat : Manunõ moroi ba Mbuku Zinunõ No. 450 Liturgos : Dumadao Zato! FOMBASO TAROMA LI LOWALANGI (AMABU'ULA LI SIBOHOU) Liturgos : Da tafondrondrongo daroma Li Lowalangi, tehalõ moroi ba zura I Korindro 9 : 16-23 16 Na u’ombakha’õ duria somuso dõdõ andrõ, ba tenga bõrõ wanuno khõgu; lõ’õ sa tola lõ umanõ, alai sa ndra’o, na lõ u’ombakha’õ duria somuso dõdõ andrõ! 17 Na nilau dõdõgu sa, ba so luogu; ba na sabua õlõ ndra’o, ba no nibe’e ba dangagu halõwõ andrõ. 18 Ba hadia luogu ya’õ? Da’õ luogu, ube’e buala duria somuso dõdõ andrõ, na u’ombakha’õ, fa lõ u’oguna’õ zi tola ena’õ, ba halõwõ andrõ, ba duria somuso dõdõ andrõ. 19 He wa’ae tenga sawuyu niha ndra’odo, ba no ubali’õ sawuyu zato ndra’odo, ena’õ ato udõnisi. 20 Ba niha Yehuda, ba no tobali hulõ niha Yehuda ndra’o, ena’õ udõnisi niha Yehuda. Ba zi so barõ mbawa goroisa, ba hulõ zi so barõ mbawa goroisa ndra’o, — ba tenga sa si so barõ mbawa goroisa — ena’õ udõnisi zi so barõ mbawa goroisa. 21 Ba zi lõ oroisa, ba hulõ zi lõ oroisa ndra’o, — ba tenga sa si lõ oroisa ba khõ Lowalangi, solo’õ oroisa Keriso ndra’odo — ena’õ udõnisi zi lõ oroisa. 22 Ba zambõ fa’abe’e, ba no tobali sambõ fa’abe’e ndra’o, ena’õ udõnisi zambõ fa’abe’e; fefu hadia ia, ba niha fefu ba no ugo’õgo’õ, ena’õ fefu gofu heza, ba fasamõsa na atö u’orifi. 23 Ba bõrõ duria somuso dõdõ andrõ, wa ulau da’õ fefu, ena’õ mo’urakha gõi ndra’o ba da’õ. Ya’ahowu zamondrongo taroma Li Lowalangi ba same’e ba dõdõ (Luka 11:28) Jemaat : Yaduhu! FANGOWULOI FASÕMBATA Liturgos : Iada’e tebe’e khõda ginõtõ ba wolohe fasõmbatada khõ Lowalangi. Ta’osamuzaigõ wame’e, he fasõmbata si fõfõna, ba si manõ gõi zi mendrua awõ zi medõlu. Ba si ofõna ua da tafondrondrongo Li Lowalangi me imane: "Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Korindro 9:6-7) Tafa’ema fõna wasõmbata khõ Lowalangi, ba manunõ ita moroi ba Mbuku Zinunõ No. 261 2. Ya’e zumange fasõmbata ma be’e soroi ba dõdõma. 3. Ya’e zumange fasõmbata buala si’otarai Nama. 4. Ya’e zumange fasõmbata, boto, noso, ba fa’aurima. 5. Ya’e zumange fasõmbata, lõ irugi zomasi dõdõ-U. 6. Ya’e zumange fasõmbata, ma’aohasi gõlõ Zo’aya. Liturgos : Da tafasao wasõmbatada andre fõna Lowalangi, musindro ita fefu. [Koordinator Pelayan mangandrõ. Na inõtõ wama'ema fasõmbata Ni'ofulu, aefa wangandrõ Koordinator Pelayan, ba ifa'ema Daroma Li Lowalangi Sangai Huhuo Sebua (Pendeta)] Liturgos : Mudadao Zato! KOOR/VOCAL GROUP Liturgos : Da tafa’anõ dõdõda wamondrongo taroma Li Lowalangi, manunõ ita moroi ba Mbuku Zinunõ No. 163 [Pengkhotbah Mõi ba Mimbar] HUHUO SEBUA Pengkhotbah : Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrõ ita...[Fangadrõ Famokai Huhuo Sebua] Amin. Fombaso Taroma Li Lowalangi moroi ba zura Halowö Zinenge 8 : 14-25 14 Ba me larongo sinenge ba Yeruzalema, la’o’õ li Lowalangi, ba Zamaria, ba lafatenge khõra Wetero ba Yohane. 15 Ba me larugi si tou, ba mangandrõ ira, ba khõra andrõ, ena’õ tebe’e khõra Geheha ni’amoni’õ. 16 Lõ’õ manõ na si mõi ia khõra, samõsa lõ sanema, ha fa no tebayagõ idanõ ira, ba dõi Yesu So’aya. 17 Awena latufa hõgõra tanga, ba latema Geheha ni’amoni’õ. 18 Ba me i’ila Simoni, tebe’e Geheha, na latufa ira tanga sinenge, ba i’ohe khõra gana’a, 19 imane: Mibe’e khõgu gõi wa’abõlõ andrõ, ena’õ na itema Geheha ni’amoni’õ nitufagu tanga. 20 Imane khõnia Fetero: Yamõi ba wa’atekiko gana’au, awõ ndra’ugõ! me õwai ana’a mbõli mbuala Lowalangi andrõ! 21 Lõ urakhau ba lõ sinemau ba daroma li andrõ; lõ’õ sa atulõ dõdõu fõna Lowalangi. 22 Andrõ falalini gera’erau, erogõ golalõwau andrõ, ba andrõ khõ Zo’aya, ma atõ i’efa’õ khõu gera’era dõdõu, si lõ sõkhi andrõ. 23 Oroma sa khõgu, wa no fahõna ba dõdõu gawõkhu safeto, ba no ibõbõ ndra’ugõ si lõ atulõ. 24 Ba itema linia Simoni, imane: Mi’andrõ khõ Zo’aya, salahigu, ena’õ lõ itõrõ ndra’o niwa’õmi andrõ fefu. 25 Ba ya’ira, me no lafaduhu’õ li Zo’aya, me no la’ombakha’õ, ba lafuli ira ba Yeruzalema, ba la’oya’õ banua Ndrawa Zamaria, wanuriagõ turia somuso dõdõ. Famotokhi Taromali Lowalangi Sinanõ ba dõdõ tehalõ moroi ba zura I Korindro 9 : 16c Alai sa ndra’o, na lõ u’ombakha’õ duria somuso dõdõ andrõ! Fangandrõ Fondruhõ Wamotokhi Taromali Jemaat : Manunõ moroi ba Mbuku Zinunõ No. 154 TUHO WAMATI Liturgos : Me no tarongo daroma Li Lowalangi, ba da tafaogõ lida wamaduhu’õ famatida ya’ita niha Keriso fõna Lowalangi, muzizio ita fefu... endronga lida: Ya’o mamati khõ Lowalangi Ama si lõ ambõ fa’abõlõ, sombõi banua si yaẅa awõ danõ. Ya’o mamati khõ Yesu Keriso, So’aya ya’ita, Ono Lowalangi si ha samõsa, nitema nina-Nia Maria khõ Geheha Ni’amoni’õ, ono nono alawe Ia, no manaõgõ huku Ia, barõ mbawa Fondrio Filato, teforõfa Ia, mate, ba lako’o. No mõi Ia ba mbanua niha tou, no maoso Ia moroi ba ngai zimate me no irugi tõlu ngaluo. No manahae Ia, mõi ba zorugo, dumadao ba gambõlõ Lowalangi Ama si lõ ambõ fa’abõlõ. I’otarai da’õ mangawuli Ia dania ba wanguhuku niha sauri, awõ zi no mate. Ya’o mamati khõ Geheha Ni’amoni’õ, ba ufati ha sambua mbanua ni’amoni’õ, fefu niha Keriso, fa’awõsa niha ni’amoni’õ, ba fangefa horõ, ba femaoso mboto zimate, ba fa’auri si lõ aetu. Yaduhu! Liturgos : Mudadao Zato. WARTA JEMAAT (Klik untuk membuka) Liturgos : Manunõ ita moroi ba Mbuku Zinunõ No. 153 Fonaha ba dödöma, fefu zi no marongo. Sangabölö ya’aga, ba lala ba zorugo. Ya humaga dödöma, bè howuhowu khöma. Eheha-Mö zoguna, sangehaogö tödöma. He Yesu, Sangefa’ö, efa’ö khöma horö. No oya sibai lalö, tebai madunödunö. Ya sumange-U ndra’aga, ba fefu zi so khöma. Li-Mö niwa’ö-U khöma, mabe’e ba dödöma. FANGANDRÕ SALAHI + FAMATENGE + HOWUHOWU Pengkhotbah : Sumindro ita fefu, mangandrõ ita: (tetohugõ) "Ba dõi Zo’aya ya’aga Yesu Keriso, si no mamahaõ ya’aga ba wangandrõ mamane:" Pengkhotbah + Jemaat : He Ama khõma si so ba zorugo, ya te’amoni’õ dõi-U. Ya tobali banua-U fefu niha, ya itõrõ zomasi Ndra’ugõ, hulõ ba zorugo, ya si manõ gõi ba gulidanõ. Õma sirugi ma’õkhõ be’e khõma ma’õkhõ andre. Ba efa’õ khõma horõma, si mane fangefa’õma sala ba zi so sala khõma. Bõi ohe ndra’aga ba wanandraigõ, efa’õga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awõ lakhõmi, irugi zi lõ aetu. Yaduhu. Pengkhotbah : Mi’angawuli sifao fa’ohahau dõdõ, yatobali ami sura Keriso, samaduhu’õ Ya’ia ba lala wa’aurimi sero ma’õkhõ, ba mitema howuhowu Lowalangi: Ya mufahowu’õ ami Lowalangi, Ya murorogõ ami; Ya mufohaga mbawa-Nia khõmi, Ya mu’ebua’õ dõdõ-Nia khõmi; Ya mufalemba hõrõ-Nia khõmi, Ya mubè’e wa’ohahau dõdõ khõmi fefu. Yaduhu! Jemaat : Manunõ moroi ba Mbuku Zinunõ No. 134 Törö lalamö samati, Yesu fao awöu. Faduhu’ö wangorifi, baomo, ba zaröu. Böi tageli ndra’ugö, sebua tötönafö. Me ötema howuhowu ba wa’aurimö. Dozi haniha zamati halö halöwöu. Ya Eheha Lowalangi zango’outödöu. Mifaha’ö fefu soi ba wondröi silö sökhi. Fa lasöndra wangorifi, khö Lowalangi. Famakao ba fanandraigö, böi isaisi’ö. Halöwöda da tahalö, moroi ba dödö. Yesu zondrönia’ö, si lö mamalömalö. Li-Nia si lö tebulö, ta’ohia’ö. Pengkhotbah : Ya'ahowu!!! Jemaat : Ya'ahowu!!! *** IBADAH SELESAI ***